TLAMACHTIL 38
Matikpatioitakan toyolilis
Tiyolpakij tiyoltokej maski ualeua techpanoua miak tlamantli tlen amo kuali. ¿Ken tikteititiskej tiktlasojkamatiliaj Jehová otechmakak toyolilis? ¿Tleka moneki ijkon tikchiuaskej?
1. ¿Tleka moneki tikpatioitaskej toyolilis?
Moneki tikpatioitaskej porque otechtliokoli toTajtsin Dios. Ye otechchijchi ikinon uelis tikijtoskej itech “uits yolilistli” (Salmo 36:9). “Ye kichiua tinochtin matiyoltokan, kichiua matimijyotikan uan techmaka nochi tlen onka” (Hechos 17:25, 28). Jehová techmaka miak tlamantli para uelis tiyoltoskej uan tiyolpakiskej (xiktlajtolti Hechos 14:17).
2. ¿Ken uelis tiktlasojkamatiliskej Jehová porque otechmakak toyolilis?
Jehová opejki mitstlasojtla ijkuak opejki timoskaltia ijtik monantsin. David okatka itekipanojka Jehová uan ijkuak omotlatlaujti okijto: “Otechitak ijkuak yikin opejki nimoskaltia ijtik nonantsin” (Salmo 139:16). Jehová sapanoua mitspatioita (xiktlajtolti Mateo 10:29-31). Ye kiyolkokoua tla ikaj kineki momiktis noso kineki ikaj kimiktis (Éxodo 20:13). a Noijki kiyolkokoua tla amo timomaluiaj uan itlaj techpanoua noso oksekimej itlaj kinpanoua. Ijkuak timomaluiaj uan tikinmaluiaj oksekimej tikteititiaj tikpatioitaj toyolilis.
MATIMOMACHTIKAN
Matikitakan ken uelis tikteititiskej tikpatioitaj toyolilis.
3. Ximomalui para amo timokokos
Akinmej yomotemakakej ixpan Jehová mochijchikauaj momaluiskej uan kichiuaj tlen ye kipaktia. Yetoskia ken kitliokoliaj incuerpo toTajtsin Dios para kiueyichiuaskej, ikinon kimaluiaj. Xiktlajtoltikan Romanos 12:1, 2 uan satepan xikitakan tlen namechmachtia.
-
¿Tleka moneki timomaluis para amo timokokos?
-
¿Ken uelis timomaluis?
4. Ximomalui uan xikinmalui oksekimej para amitlaj makinpano
Biblia kijtoua matimomaluikan para amitlaj techpanos tejuan uan oksekimej. Xikitakan VIDEO uan satepan xikitakan tlen moneki tikchiuaskej para amitlaj techpanos.
Xiktlajtoltikan Proverbios 22:3 uan satepan xikitakan ken uelis timomaluiskej...
-
... tokalijtik.
-
... kanin titekipanouaj.
-
... ijkuak timauiltiaj.
-
... ijkuak tikuikaj se carro noso itech tiauij.
5. Xikmalui konetl maski ayamo nesi
David okijto Jehová kitlasojtla iyolilis konetl tlen moskaltijtok ijtik inantsin. Xiktlajtoltikan Salmo 139:13-17 uan satepan xikitakan tlen namechmachtia.
-
Ixpan Jehová, ¿keman peua iyolilis se konetsintli? ¿Ijkuak peua moskaltia ijtik inantsin noso ijkuak nesi?
Tlanauatil tlen okinmakakej israelitas, okinmaluiaya siuamej ijkuak okipiayaj inkone maski ayamo onesiaya. Xiktlajtoltikan Éxodo 21:22, 23 uan satepan xikitakan tlen namechmachtia.
-
¿Ken okitaya Jehová tla ikaj maski amo okinekiaya okimiktiaya se konetl tlen ayamo onesiaya?
-
¿Ken momachilia Jehová ijkuak ikaj kineki kimayauis ikone? b
-
¿Ken tikita tlen Jehová kijtoua?
Maski se siuatl kipatioita iyolilis ikone, xamo mokuayejyekos moneki kimayauis. Xiktlajtoltikan Isaías 41:10 uan satepan xikitakan tlen namechmachtia.
-
Tla se siuatsintli kiluiaj moneki kimayauis ikonetsin, ¿akin moneki kiluis makipaleui? ¿Tleka ijkon tikijtoua?
SEKIMEJ KIJTOUAJ: “San siuatl moneki kipejpenas kox kimayauis ikone”.
-
Pero tejuatsin ¿tleka tikijtoua miak ipati ixpan Jehová iyolilis siuatl uan ikonetsin maski ayamo nesi?
XIKILNAMIKTO
Jehová otechtliokoli toyolilis. Biblia techiluia matiktlasojtlakan, matiktlakaitakan uan matikmaluikan toyolilis uan inyolilis oksekimej.
Matikojpauikan
-
¿Ken tikmatij Jehová kipatioita toyolilis?
-
¿Ken momachilia Jehová ijkuak kita ikaj momiktia noso ikaj kimiktiaj?
-
¿Tleka tiktlasojkamati tiyoltos?
NIN NOIJKI MITSPAKTIS
¿Ken uelis tiktlasojkamatiliskej Jehová porque otechmakak toyolilis?
Tlen tikijtoskia, ¿uelis toTajtsin Dios kitlapojpoluis akin okimaya ikonetsin?
“¿Tlajtlakoli ijkuak ikaj kimayaui ikone?” (Nin tlamachtil kajki itech jw.org/ncx)
Kuali matikpejpenakan tlen ika timoyolpaktiaj porque toTajtsin Dios kineki kuali matiyetokan.
“¿Moneki timoyolpaktiskej kanin uelis itlaj techpanos?” (¡Ma titlachixtokan!, 8 de octubre 2000)
Xikita tlen kijtoua Biblia tla ikaj kineki momiktis.
“¿Nechpaleuis tlen kijtoua Biblia tla nikneki nimomiktis?” (Nin tlamachtil kajki itech jw.org/ncx)
a Jehová kinmita akinmej sapanoua moyolkokouaj (Salmo 34:18). Ye kimatok tlen kimachiliaj akinmej sapanoua moyolkokouaj uan kinekij momiktiskej, ikinon kineki kinpaleuis. Xikita ken kinpaleuia Jehová, itech tlamachtil: “¿Nechpaleuis tlen kijtoua Biblia tla nikneki nimomiktis?”. Nin tlamachtil tikajsis kanin kijtoua: “Nin noijki mitspaktis”.
b Tla ikaj ijkon okichi, amo mamotlajtlakoltijto porque Jehová kineki kitlapojpoluis. Para okachi tikmatis, uelis tiktlajtoltis tlamachtil: “¿Tlajtlakoli ijkuak ikaj kimayaui ikone?”. Nin tlamachtil tikajsis kanin kijtoua: “Nin noijki mitspaktis”.
Xamo noijki mitspaktis
TLEN MIAKEJ MOTLAJTLANIAJ
¿Ken tlamachtiaj iTlaixpantijkauan Jehová?
Ijkuak mitstlajpalotiuij iTlaixpantijkauan Jehová uelis timomachtis ika moBiblia. Noijki uelis tikinyoleuas mofamilia noso moyolikniuan mouan mamomachtikan.
