LÉZIʼI 38
Pégé gôʼté léwô wo
Ngouo métam mboŋo yiôôn tsèe léwô. Ta mboo paʼ yié mé lôôn ngwiée ngégé, mba tsô choum mboŋo ée tsèe léwô sié ngouo mé ké ngôʼté gôʼté. Angouo pégé gniè lékô ngié pégé gôʼté léwô wo? Akô kouaʼ ntsôté wégé lé gʉo pouʼou?
1. Léwô wo gwiée lé wô tʉnzuing ménʉôg pégé nti kô?
Léwô wo gwiée lé wô tʉnzuing ménʉôg pégé, nti noué aa taʼ kado yié a foo pwo Jéova, Ta wégé wuié a gwiée maamaa nkouŋé. «Léwô wo foo pô mbwo yé», Yé zo la pouoon choum ntsém sié ée wo (Zôbô ntsé 36:9). «Yé zo naa zuigé mbwo pʉa mésong ta po lôg ngouô wo, ta mboo kôôkôô wô» (Mégang ntoum 17:25, 28). Jéova naa mmo yié a né nzaté wégé lé lôg ngouô wo. A yiing ngʉo na nti yié pégé gé néŋé née nkag kaag (toŋo Mégang ntoum 14:17).
2. Ngouô pégé gnièe mbwo Jéova ngié pégé gôʼté léwô wo lékô?
Afʉʼ yié pégé gniée ngouo po tsaa lépfom, Jéova lié wégé. Ngaŋa faʼ Ssé wuié mé toŋo lé Ndavid la gôôn ngié: «Ménʉôg mou la giè wôôn afʉʼ yié n da gnié ngouô po lépfom» (Zôbô ntsé 139:16). Léwô wégé pouou ngouô tʉnzuing mbwo Jéova (toŋo Matio 10:29-31). A pou mmʉôgté tèʼ fʉʼ yié gning tʉôgô paa na wé léwô, ka nzuié po gning wô a (Èkzode 20:13). Jéova pou mmʉôgté paʼ a giè pégé té pôônté léwô wégé wô mboo yé pétsô pʉa. Pégé pôônté léwô wégé, ngwiée mékouʼ na wé pétsô pʉa péʼé, a lôgô ngniè ngié pégé gôʼté kado yié a foo mbwo Jéova.
YING NKUIʼI NZIʼI
Giè tso méchʉo mié ngouo o tchʉaté moo ngniè ngié o gôʼté kado yié aa léwô wo.
3. Pôônté nténtʉ jou
Taʼ Kréeté vôg ta nna mboum yé mbwo Jéova péʼé, a lôgô ngnièe ngié a naa léwô ntsém pwo yé. A gʉo pouʼou ndôgô ngnièe ngié a lôôg mboum yé ngʉo suièʼ pwo Ssé. Toŋo Roma 12:1, 2, mbing ngôôn no na môôn ménzaté:
-
Akô gwiée lé tsoté wou lé lié nténtʉ jou?
-
Ngouo o lié nténtʉ jou na mèe méchʉo?
4. Pôônté léwô wou ta mboo wé pétsô pʉa
Biible kuingté wégé lé pôôn choum sié ngouo é néng fʉʉng na pégé, mboo na pétso pʉa, ka nzuié wéga pétso pʉa wô. Tsôʼô VIDÉO ndôg ngiè mmo yié ngouo o gʉo ta ndôg mbôônté léwô maagning ntsém.
Toŋo Saga no 22:3, mbing ngôôn no na méchʉo lôg mbôônté léwo . . .
-
fʉʼ yié mée mbʉa.
-
ajʉʼʉ faʼ.
-
fʉʼ yié mé né ngʉo sport.
-
fʉʼ yié mée tsèe matoua.
5. Pôônté léwô mouô wuié aa tsèe lépfom
Ndavid la lôg méchouŋé mié é pou si ngôôn no na paʼ Jéova lôg ngiè léwô mouô wuié aa lépfom ngnié ta né ngouʼou. Toŋo Zôbô ntsé 139:13-17, mbing ngôôn no na yôôn nzaté:
-
Aa mbwo Jéova léwô gning mésong zhiété fʉʼ yié a gniée ngouo po mouô mélépoum ka fʉʼ yié mé zhiée yé?
Méloua mié Jéova la naa mbwo laʼ Israel lôôn mbôônté méma laa pénkʉ pié é laa lépfom. Toŋo Èkzode 21:22, 23, mbing ngôôn no na môôn ménzaté:
-
Jéova lôôn ngiè gning wuié a zuiée mouô lépfom té zsé lékô?
-
A lôôn mbing njouʼou lékô fʉʼ yié gning chènèe lé tsôʼô mouô? b
-
O kouang jou ngié nti lé gièe no yé Ssé ée lékô?
A gʉa tsô fʉʼ, mboo manzuiée wuié a gôʼté léwô wo kouang ngié ndaʼ mmo yié ngouo a gʉo, a wo po létsôʼôô mouô. Toŋo Ésaya 41:10, mbing ngôôn no na môôn ménzaté:
-
Mé lôôn né suièe manzuiée lé tsôʼô mouô, mba ngouo a faʼ nkuiété nzôô? Pouʼou nti kô?
TSO PɄA GÔÔN NGIÉ: «Manzuié lôôn nkoung a tsôʼô mouô, noué a gwiée lé gʉo mmo yié a koung né mboum nnè yé.»
-
Akô tsôté wou lé zuing té mʉʼté ngié Jéova giè léwô wé mouô wuié mé gnié té zhiée yé, laa wé ma wé paʼ mmo yié a poŋo tʉnzuing?
TA O ZIʼII KÔ?
Biible ziʼii ngié léwô wo a maamaa kado yié a foo mbwo Jéova. Pégé gwiée lé kouoŋo léwo wégé po wé pétso, ngwiée mékouʼ moo, mbing mboonté.
Ta o né nkimté?
-
Nti kô léwô pʉa mésong aa tʉnzuing mbwo Jéova?
-
Jéova jououʼ lékô afʉʼ yié gning koung koung nzuié wétsôô?
-
O na ndaag mbwo Jéova nti kado yié aa léwô wo nti kô?
KUIʼI FAʼ
Ngouô pégé gʉo lékô ta sié Jéova paʼ a la gʉo pégé wô wo?
Mbʉèe na nzaté: Ngouô Ssé ponésé gning wuié a tsôʼôô mouô?
Ngouo nti yié Ssé lôg ngiè léwô kuiété wégé lé tsôʼ yégé nti lôg ngʉo mégʉa lékô?
« Sports de lʼextrême: doit-on faire abstraction des risques ? » (Révéillez-vous !, 8 octobre 2000)
Ngouo Biible kuiété gning wuié a né ntsôôn lé tʉôgô paa na wé léwô lékô?
« Je veux mourir—Est-ce que la Bible peut mʼaider si jʼai des idées suicidaires ? » (article jw.org)
a Jéova chʉéchʉé ndié pʉa pié létʉm sôb né mmʉôgté (Zôbô ntsé 34:18). A né njouʼou mmo yié ngouo a gʉo gning tsôôn po lé zuié mboum nnè yé. O lôôn né nkouŋo lé zsé paʼ ngouo o zuièʼ yèe nkuiété, o toŋo article « Je veux mourir—Est-ce que la Bible peut mʼaider si jʼai des idées suicidaires ? » ana jʉʼ Kuiʼi faʼ tsèe sôôn léziʼi.
b Pʉa pié po laa tsôʼô mouô té gwiée lé mʉôgté sésag wô nti noué ngouo Jéova tchousé wôb. Léying nkuiʼi nzsé, lié ŋwaʼné « Lʼavortement: quʼen dit la Bible ? » ayié aa na jʉʼ «Kuiʼi faʼ» tsèe sôôn léziʼi.
