IKIMANYILO 38
Amundaghisyeghe Ikyapupe kya Bumi
Filipo ifindu fingi ifyakuhobosya ifi tubaghile ukubomba panongwa yakuti tuli nu bumi. Nalinga tukwaghana nindamyo, tubaghile ukubohoboka ni findu fimo pa bumi. Ngimba tubaghile ukunangisya bulebule ukuti tukunndaghisya Yehova panongwa ya kyabupe kya bumi? Kangi ikifukwa ikinywamu ikyakubombela isi kyo kiliku?
1. Nongwa yafiki tukulondiwa ukundaghisya panongwa ya bumi?
Tukulondiwa ukundaghisya panongwa yakuti ubumi kyo kyabupe ikyakufuma kwa Tata witu wakumwanya Yehova. Umwene yo “nyibuko ya bumi” kangi apelile ifyabumi fyosa. (Salimo 36:9) “Umwene yo uyu ikupanga ubumi bosa, numuyi na fyosa itolo.” (Imbombo sya Batumiwa 17:25, 28) Yehova ikutupapo isi tukulondiwa ukuti tuyeghe bumi, loli ukukinda pa isi umwene ikutupangisya ukuti tuhobokeghe nu bumi.—Belenga Imbombo sya Batumiwa 14:17.
2. Ngimba tubaghile ukunangisya bulebule ukuti tukundaghisya Yehova panongwa ya kyabupe kya bumi?
Yehova alyandile ukutupwelelela ukufuma pakabalilo aka twali ndwanda. Davidi uyu ali mbombi wa Yehova aliputile ukuti: “Amaso ghako ghalinkutubona utumbakasya twangu utusita kutendekesiwa.” (Salimo 139:16) Yehova ikubuketa ubumi bwinu ukuya bwa pamwanya fiyo. (Belenga Matai 10:29-31.) Sikumbaba fiyo Yehova linga yumo ikughela ukuti angoghe umwinake, pamo linga ikulonda ukwighogha mwene. a (Ukusoka 20:13) Sibaghile ukumbaba kangi linga tukubomba ifindu ifi fibaghile ukubika ubumi bwitu pangozi mwakuleka ukwifighilila twibene pamo ukufighilila ubumi bwa bangi. Linga tukubufighilila ubumi bwitu nu bwa binitu bo tukunangisya ukuti tukughindika fiyo ikyabupe kya pamwanya fiyo iki bo bumi.
MANYILA NYINGI
Keta injila isingi isi mubaghile ukunangisya ukuti mukundaghisya ikyabupe kya bumi.
3. Mughupweleleleghe umbili winu
Panongwa yakuti twalimbulile Yehova ukuti tukuya pakubombagha kilikyosa iki umwene ikulonda, tukubombela ubumi bwitu pakumbombela Yehova. Kangi tukufwana tukuyibika imibili yitu ukuya ikemo. Belenga Baroma 12:1, 2, kangi muyobesanie amalalusyo agha:
-
Ngimba findu fiki fikubatuma ukuti mughupweleleleghe umbili winu?
-
Ngimba njila simo siliku isi mubaghile ukubombela isi?
4. Muyeghe maso na isi mukubomba ukuti muleke ukwifulasya pamo ukufwa
Ibaibolo likutukasya ukuti tuleke ukubomba ifindu ifi fibaghile ukubika ubumi bwitu pangozi. Ketelela IVIDIYO ukuti mumanyile ifindu fimo ifi fibaghile ukubatula ukuti mwifighilileghe.
Belenga Isya Mbupingamu 22:3, kangi muyobesanie muno umwe na bangi mubaghile ukwifighilila . . .
-
pakaya.
-
kuno mukubombela imbombo.
-
linga mukwangala.
-
linga mukwendesya igalimoto.
5. Amubughindikeghe ubumi bwa mwana uyu akali ukupapiwa
Davidi alingenie ukuti Yehova ikubikako amahala fiyo ku isi sikubombiwa nu mwana uyu ikukula ndwanda lwa mama wake. Belenga Salimo 139:13-17, kangi muyobesanie ilalusyo ili:
-
Ukufwana na muno Yehova ikuketela ifindu, ngimba ubumi bwa mundu bukwanda apa apapiwe pamo apa mama eghile ulwanda?
Indaghilo isi Yehova abapele Abaisraeli syabafighililagha abamama na banabo aba bakali ukupapiwa. Belenga Ukusoka 21:22, 23, kangi muyobesanie amalalusyo agha:
-
Ngimba Yehova ikunketa bulebule umundu uyu mwangozi amasisye ubumi bwa mwana uyu akali ukupapiwa?
-
Ngimba umwene ayagha pakwipilika bulebule linga yumo mwamatingo abombile isi? b
-
Ngimba mukwipilika bulebule ukufwana na muno Kyala ikuketela ifindu?
Unkikulu uyu ikubughindika ubumi yope abaghile ukuketa ukuti ukusosya ulwanda yo njila yene inunu. Belenga Yesaya 41:10, kangi muyobesanie amalalusyo agha:
-
Linga unkikulu ikufimbilisiwa ukuti asosye ulwanda, ngimba ko kughu kuno abaghile ukusuma ubutuli bwa nkhani iyi kangi nongwa yafiki?
ABANDU BAMO BIKUYOBA UKUTI: “Unkikulu ali nu bwabuke linga ikulonda ukusosya ulwanda panongwa yakuti umwene yo uyu ali nu lwanda.”
-
Ngimba findu fiki ifi fikubakasya ukuti Yehova ikubughindika ubumi bwa mama pampene nu mwanake uyu akali ukupapiwa?
IFUNDO INYWAMU
Ibaibolo likutumanyisya ukuti tubughaneghe, ukubughindika nu kubufighilila ubumi panongwa yakuti kyabupe kyakufuma kwa Yehova. Isi sikongelelapo ubumi bwitu nu bumi bwa bangi.
Ukughomokelamo
-
Nongwa yafiki ubumi bwa mundu bwapamwanya fiyo kwa Yehova?
-
Ngimba Yehova ikwipilika bulebule linga umundu angoghile umwinake mwamatingo?
-
Nongwa yafiki mukundaghisya ikyabupe kya bumi?
KETA KANGI IFINGI
Ngimba tubaghile ukundaghisya bulebule Yehova panongwa ya kyabupe kya bumi?
Mumwaghe ansala wa ilalusyo lyakuti ngimba Kyala ikuya pakunhobokela unkikulu uyu asosisyemo ulwanda?
“Ngimba Ibaibolo Likuyoba Isyafiki pa Nkhani Yakusosya Ulwanda?” (Inkhani ya pa Webusayiti)
Ukumanya muno Kyala ikubuketela ubumi kukututula ukuti tusaleghe kanunu inyangalo isi tukubomba.
Bule linga umundu ali na minong’ono ghakulonda ukwighogha? Keta muno Ibaibolo libaghile ukutulila.
“Ngimba Ibaibolo Libaghile Ukundula Linga Ngulonda Ukwighogha?” (Inkhani ya pawebusayiti)
a Yehova ikubapasikisya fiyo abandu aba indumbula syabo sisulumenie. (Salimo 34:18) Umwene ikupilikisya ifyakubaba ifi bikwipilika mundumbula ifi fibaghile ukubapangisya ukuti binong’oneghe isya kwighogha, kangi umwene ikulonda ukuti abatule abandu aba. Ukuti mukete muno ubutuli bwake bubaghile ukuchenja ifindu, belenga inkhani yakuti “Ngimba Ibaibolo Libaghile Ukundula Linga Ngulonda Ukwighogha?” iyi yili pa kighaba ikyakuti “Keta kangi ifingi” nkimanyilo iki.
b Bosa aba basosisyepo ulwanda batikulondiwa ukwiyipa inongwa. Yehova abaghile ukubahobokela. Ukuti mumanye nyingi, keta inkhani iyakuti “Ngimba Ibaibolo Likuyoba Isyafiki pa Nkhani Yakusosya Ulwanda?” iyi yili pa kighaba kyakuti “Keta kangi ifingi” nkimanyilo iki.
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
