LECCIÓN 38
¿Nikʼwach inqakʼuhtaaj chi inqakʼax i kʼacharik?
Reʼ kʼacharik qʼeʼ holohik. Atoobʼ ta ne qojikʼik pan kʼaxkilal xa ne woʼ inqasuqkileej chuʼnchel taqeh i inqabʼan pan qakʼachariik. ¿Nikʼwach ne inqakʼuhtaaj reh i Jehová chi inqatyooxeej reh i qakʼachariik? ¿Eh chaaj woʼ reet ko ruman chi ne inqatyooxeej reh?
1. ¿Chaaj woʼ reet ko ruman chi ne inqakʼax i kʼacharik?
Ko ruman chi ne inqakʼax i kʼacharik ruum chi reʼ Qajaaw Jehová inyeʼwik reh i kʼacharik. Eh reʼ woʼ reh xtzʼuhkrisanik reh chuʼnchel i wilik kikʼachariik (Salmo 36:9). «Reʼ reh inyeʼwik qeh chi qunchelaal i qakʼachariik, i quxlabʼal, jeʼ woʼ chuʼnchel i xa chibʼih jariik» (Hechos 17:25, 28). Jeʼ rukabʼ inqil reʼ Jehová iruyeew qeh i aajwaal wach chi qeh reh chi wilik qakʼachariik eh irubʼan chi ne inqasuqkileej i kʼacharik (Chawil Hechos 14:17).
2. ¿Nikʼwach ne inqakʼuhtaaj reh i Jehová chi inqatyooxeej reh i qakʼachariik?
Xa reʼ woʼ noq xkahnik wach kʼacharik atuut, reʼ Jehová xatril. Ruum i rusanto laj uxlabʼal i Dios jenaj rajkamanoom rubʼihnaal David xuqʼor pan rutiij: «Reʼ hat xawilow noq xkorjik i nutiʼjolal» (Salmo 139:16). Reʼ akʼachariik looqʼ chi reh i Jehová (chawil Mateo 10:29-31). Reʼ Dios intiʼbʼik rukʼux noq jenoʼ irubʼan i kansanik ruum chi xa iraaj eh jeʼ woʼ noq irukansaj riibʼ (Éxodo 20:13). a Eh intiʼbʼik woʼ i rukʼux noq reʼ hoj inqakoj qiibʼ pan yohbʼaal oon noq maʼ inqakʼax ta i kikʼachariik i tokoom. Noq reʼ hoj inqakʼax i qakʼachariik eh looqʼ chi qeh i kikʼachariik i tokoom, inqakʼuhtaaj chi looqʼ chi qeh i kʼacharik xuyeew qeh i Jehová.
CHATZʼIR RIIJ I KʼAHCHIʼ ATIJEM
Naqilom nikʼwach ne inqakʼax i kʼacharik.
3. Chakʼax awiibʼ
Reʼ taqeh kʼachareel kiqʼahsam i kikʼachariik reh i Jehová inkikʼax i kikʼachariik jeʼ rukabʼ iraaj i reh, ruum chi kiqʼahsam reh i kitiʼjolaal chi kʼachlik mayiij santohimaj jeʼ rukabʼ imponik chuwach i Dios. Ruum aj reʼ, nakikʼaxam kiibʼ. Chawil taq i Romanos 12:1, 2 eh tiqʼoroq taq chi riij:
-
¿Chaaj woʼ reet ko ruman chi naʼakʼaxam awiibʼ?
-
¿Chajariik naʼabʼanam reh chi ne nakʼax awiibʼ?
4. Chawil mi maʼ inakoj pan yohbʼaal i kikʼachariik i tokoom eh jeʼ woʼ i hat
Reʼ Santo Laj Huuj iruqʼor qeh chi naʼlik oq qeh ruukʼ taqeh yohbʼaal ne inchalik. Chawil taq i VIDEO eh chakoj taq rehtaal nikʼwach taq ne inakʼax akʼachariik eh maʼ ne ta taq inakoj pan yohbʼaal.
Chawil taq i Proverbios 22:3 eh tiqʼoroq taq chi riij nikʼwach taq ne inabʼan chi maʼ pan yohbʼaal ta taq wilkaat...
-
... pan paat.
-
... pan kamanik.
-
... pan kʼoʼnik.
-
... chi bʼehsanik carro oon noq tiʼooj taq chi bʼehik.
5. Chakʼax i rukʼachariik i kʼisa neeʼ reʼ ko majaaʼ inasjik
Holohik qʼorik xukoj i David reh qʼorik chi riij irikʼraaj i Jehová ruum i kʼachariik eh chi riij i halakʼun reʼ ko majaaʼ inasjik. Chawil taq i Salmo 139:13-17 eh tiqʼoroq taq chi riij:
-
Chi reh i Jehová, ¿nikʼ intohqʼik i rukʼachariik jenoʼ kʼachareel: noq inasjik i kʼisa neeʼ oon noq inkahnik wach kʼacharik i rutuut?
Reʼ taqeh kʼuhbʼaal xuyeew i Jehová reh i najtir Israel irukoʼleej naq taqeh i yowaabʼ ixoq eh i halakʼun reʼ ko majaaʼ inasjik. Chawil taq i Éxodo 21:22, 23 eh tiqʼoroq taq chi riij:
-
¿Chajariik iruqʼor i Jehová chi riij i kʼachareel iruqʼoj i yowaabʼ ixoq eh inkimik i kʼisa neeʼ wilik chupaam?
-
Jeʼ reʼ noq, ¿chajariik irikʼraaj i Jehová noq jenoʼ ixoq xa iraaj rikʼsam i ruhalakʼuun? b
-
Raaj i hat, ¿chajariik inakapaaj chi riij iruqʼor i Dios?
Jenoʼ ixoq irukʼax i kʼacharik mareh ne irukapaaj chi reʼ ikʼsanik halakʼun, reʼ i ko ruman chi ne irubʼan. Chawil taq Isaías 41:10 eh tiqʼoroq taq chi riij:
-
¿Ajwach ne intobʼinik reh jenoʼ ixoq mi inkimin reh chi ne irikʼsaj i ruhalakʼuun? ¿Chaaj woʼ reet?
REʼ INKIQʼOR I JUʼJUN: «Reʼ taqeh ixoq kiʼilwik reh mi nakikʼsam oon maʼ na ta kikʼsam i kihalakʼuun. Keh i kikʼachariik».
-
¿Chaaj woʼ reet inachʼikaaʼ akʼux chi reʼ Jehová looqʼ chi reh i rukʼachariik i yowaabʼ ixoq eh i halakʼun ko majaaʼ inasjik?
KʼOLOQ PAN AKʼUX
Reʼ kʼacharik jenaj kooch inchalik ruukʼ i Jehová. Reʼ Santo Laj Huuj irukʼuhtaaj chi naqayeʼem ruloqʼil i kʼacharik chi naqakoʼleem, naqakʼaxam eh jeʼ woʼ keh i tokoom.
Reʼ xkahnik pan akʼux
-
¿Chaaj woʼ reet qehtʼal chi reʼ Jehová looqʼ chi reh i kʼacharik?
-
¿Nikʼwach irikʼraaj riibʼ i Jehová noq jenoʼ kʼachareel irukansaj riibʼ oon irukansaj jenoʼ kʼachareel?
-
¿Chajariik imponik chawach chi riij i kʼacharik?
CHAREQ RUMAN
¿Nikʼwach ne inqakʼuhtaaj reh i Jehová chi inqatyooxeej reh i qakʼachariik?
Mi jenoʼ ixoq xrikʼsaj i ruhalakʼuun, ¿mi ne inkuyarik rumahk ruum i Dios?
«¿Chajariik iruqʼor i Santo Laj Huuj chi riij i ikʼsanik halakʼun?» (Naʼojbʼal reh jw.org)
Chawil nikʼwach irukʼam riibʼ irukapaaj i Dios chi riij i kʼacharik eh irukapaaj chi riij taqeh kʼoʼnik inqachih.
Mi jenoʼ kʼachareel kʼahchiʼ rukapaam rukansjiik riibʼ, chanabʼeej taqeh naʼojbʼal iruyeew i Santo Laj Huuj reh rutobʼjiik.
a Reʼ Jehová iraaj rutobʼeem taqeh i tiʼ wilik i kanima (Salmo 34:18). Reʼ reh irureq chi riij nikʼwach wilkeebʼ i kʼachareel eh rehtʼal chaaj woʼ reet inkaaj kikansam kiibʼ, eh ruum aj reʼ iraaj rutobʼeem taqeh i jeʼ reʼ inkikʼraaj kiibʼ. Chanabʼeej chi reʼ taqeh runaʼojbʼal i Jehová inkamanik. Chawil ahaʼ iruqʼor: «¿Nikʼwach ne kirutobʼeej i Santo Laj Huuj mi maʼ inwaaj ta chik kʼacharik oon mi inwaaj nukansam wiibʼ?», eh ne woʼ inareq i wilih ahaʼ iruqʼor «Chareq ruman» reh i tijinik wilih.
b Reʼ taqeh ixoq reʼ xa xkaaj kikʼsam i kihalakʼuun noq ko majaaʼ kiʼasjik maʼ ne ta irubʼan chi ne inkikoj kimahk chi juneliik, ruum chi reʼ Jehová iraaj rukuyum kimahk. Ne inareq chi riij i wilih ahaʼ iruqʼor «¿Chajariik iruqʼor i Santo Laj Huuj chi riij i ikʼsanik halakʼun?», reʼ wilik pan «Chareq ruman» reh i tijinik wilih.
Puede que también le interese
PAHQANIK CHI KIIJ TAQEH TESTIGO REH JEHOVÁ
¿Nikʼwach i tijinik chi riij i Santo Laj Huuj inkiyeew taqeh testigo reh Jehová?
Ruukʼ i tijinik inkiyeew taqeh testigo reh Jehová xa ahaʼ paʼ wilik i Santo Laj Huuj ne irubʼan chi ne nakoj. Jeʼ woʼ chik, ne irubʼan chi ne nayuqʼeej taqeh awas achaaq oon taqeh amigo inawaaj.
