38 YACHACHIKUY
Jehova Diostayá agradecekusun kawsakusqanchikmanta
Vidanchikpiqa kachkanmi imapas kusikunanchikpaq. Sasachakuykunapi kaspanchikpas atichwanmi kusisqa kawsakuytaqa. ¿Imaynatam Diosta vidanchikmanta agradecekuchwan? ¿Imanasqataq agradecekunanchik? Chaymanta yachaykusun
1. ¿Imanasqataq sumaqta cuidakunanchik?
Vidanchiktaqa cuidananchik taytanchik Jehova Dios quwasqanchikraykum. Pay munaptinmi tukuy imapas kawsan (Salmos 36:9). “Payqa llapallan runakunamanmi qun vidata, samayta hinaspa tukuy imakunatapas” (Hechos 17:25, 28). Arí, Jehova Diosmi parachimun, intitapas qispichimun, hinaspa kawsaykunatapas qispichin, chaynapi kawsakunanchikpaq. Payqa tukuytam quwanchik kusisqa kawsakunapaq (leey Hechos 14:17).
2. ¿Imaynatam Jehova Diosta agradecekuchwan kawsakusqanchikmanta?
Mamaykipa wiksallanpiraq kachkaptikim Jehova Diosqa qawasurqankiña. Diosta serviq Davidpas kaynatam nirqa: “Qamqa sulluchallaraq kachkaptiymi qawawarqankiña”, nispa (Salmos 139:16). Jehova Diospaqqa ancha valorniyuqmi vidanchikqa (leey Mateo 10:29-31). Chaymi Diosqa anchata llakikun pipas runamasinta wañurachiptinqa utaq kikinpas wañuyta maskaptinqa (Exodo 20:13). a Diosqa llakikuntaqmi yanqakunapi purispa mana cuidakuptinchikpas chaynataq hukkunata wañuypa patanpi churaptinchikpas. Cuidakuspanchikqa chaynataq hukkunapa vidanta cuidaspanchikqa taytanchik Jehova Diostam agradecekunchik vida quwasqanchikmanta.
ASTAWAN YACHAYKUSUN
Jehova Diostam agradecekunanchik kawsakusqanchikmanta. Chaymanta kaypi yachaykusun.
3. Cuidakuyá ama unqurunaykipaq
Diosta serviqkunaqa paymanmi nirqanchik munasqanman hina kawsakunapaq. Chaymi ofrendata hina cuerponchikta Diosman qunchik chuyay-chuyayta, hinaspa pay chaskinanpaq hinata chayraykum cuerponchiktaqa cuidakunanchik. Leeychik Romanos 12:1, 2 hinaspa qatiqninmanta rimariychik:
-
¿Imanasqataq mana unqurunanchikpaq cuidakunanchik?
-
¿Imaynatam cuidakuchwan?
4. Cuidakusun mana imapas pasaruwananchikpaq
Diosmi palabranpi niwanchik imata ruwaspapas cuidakunanchikpaq. VIDEOTA qawaykuychik imakunata ruwaspa hinaspa maykunapi cuidakunamanta.
Leeychik Proverbios 22:3 hinaspa rimariychik: ¿Imaynatataq mana imapas pasaruwananchikpaq cuidakuchwan...
-
... wasipi kaspa?
-
... llamkaspa?
-
... pukllaspa?
-
... carropi rispa utaq manejaspapas?
5. Sulluchallaraq wawapas Diospaqqa kawsachkanñam
Jehova Diosqa sulluchallaraq wawa imayna wiñasqantam qawamun, chaytam bibliapi willawanchik. Leeychik Salmos 139:13-17 hinaspa qatiqninmanta rimariychik:
-
¿Diospaqqa sulluchallaraq wawapas kawsachkanmanñachu?
Jehova Diosmi ñawpaqpi serviqninkunata kamachirqa wiksayuq warmita chaynataq wiksapi wawata cuidanankupaq. Leeychik Exodo 21:22, 23 hinaspa qatiqninmanta rimariychik:
-
¿Ima nirqataq Jehova Diosqa wiksayuq warmita pipas qunqaymanta imanaruptin wiksanpi wawa wañukuptinqa?
-
Hinaptinqa, ¿ima ninmantaq Jehova Diosqa pipas llullanta abortaruptinqa? b
-
¿Ima ninkitaq Jehova Dios sulluchallaraq wawatapas valorasqanmanta?
Wakinpiqa Diosta serviq warmipas wawan unquq nacenanmanta yacharuspanqa ichapas piensanman abortayta. Leeychik Isaias 41:10 hinaspa qatiqninmanta rimariychik:
-
Pi warmipas abortananpaq hikutasqa kaspanqa, ¿pitam yanapaykunanpaq mañakunan? ¿Imanasqa?
WAKIN RUNAKUNAM NINKU: “Warmikunaqa sapakamam tantiakunanku abortanankupaq utaq manapas. Wiksapiraq wawaqariki mamanpa makinpim, pimá imatapas ninman”, nispanku.
-
¿Imanasqataq niwaq Jehova Diosqa wiksayuq warmita hinaspa wiksanpi wawatapas ancha kuyasqanta?
YUYARIYKUSUN
Diostam agradecekunchik vida quwasqanchikmanta, chaymi mana unqurunapaq cuidakunanchik, cuidakunanchiktaqmi peligropi mana kanapaq, runamasinchiktapas manam peligromanqa churananchikchu.
¿Ima niwaqtaq?
-
¿Imaynatam yachanchik vidanchikqa Jehova Diospaq ancha valorniyuq kasqanta?
-
¿Imaynataq Jehova Diosqa tarikun pipas runamasinta wañurachiptinqa utaq kikinpas wañuyta maskaptinqa?
-
¿Imaynataq tarikunki Jehova Dios vida qususqaykiwan? ¿Imanasqa?
ASTAWAN YACHANAYKIPAQ
¿Imaynatataq Jehova Diosta agradecekuchwan kawsakusqanchikmanta chaynataq tukuy ima unanchasqanmanta? Chaypaq videota qawaykuy.
¿Diosqa pampachanmanchu abortaruq warmita? Chaymanta kaypi leeykuy.
“¿Ima nintaq bibliapiqa abortaymanta?” (Tarinkim jw.org nisqanpi)
Jehova Diosqa manam munanchu wañuypa patanpi vidanchikta churananchiktaqa. Chaymanta kaypi yachaykuy.
“¿Allinchu kanman wañuypa patanpi churakuy?” (¡Rikchariy!, octubre 2000)
Pipas llakisqa kaspan wañuyta maskaptinqa, ¿imataq yanapanman chayman mana chayananpaq? Chaymanta kaypi leeykuy.
“¿Bibliapi yachachikuykuna yanapawanmanchu wañuruyllapiña piensaptiy?” (Tarinkim jw.org nisqanpi)
a “Jehova Diosqa llakisqa sunquyuqkunapa hichpallanpim kachkan” (Salmos 34:18). Payqa yachanmi pipas llumpay llakisqa kaspan wakinpiqa wañuyta munasqanta, chaymi paykunata yanapaykuyta munachkan. Chaymanta yachaykunaykipaq leey “¿Bibliapi yachachikuykuna yanapawanmanchu wañuruyllapiña piensaptiy?” niq yachachikuyta, chayqa kachkan “Astawan yachanaykipaq” niqpim.
b Pipas ñawpaqta abortaruqqa ichapas chaywan kunankama hukmanyasqa tarikun. Chayna tarikuspanqa Jehova Dios pampachakuq kasqantam yuyarinan. Chaypaq leey “¿Ima nintaq bibliapiqa abortaymanta?” niqta, chayqa kachkan “Astawan yachanaykipaq” niqpim.
Kaykunatapas leeykuy
TAPUKUYKUNA
¿Imaynatam Jehova Diospa testigonkunaqa bibliamanta yachachinku?
Jehova Diospa testigonkunaqa runamasinchiktam yanapaniku bibliamanta sumaqta yachanankupaq. Munasqayki bibliawanmi estudiawaq hinaspapas invitawaqmi aylluykikunata chaynataq amistadnikikunatapas.
