38 YACHACHIKUY
Agradecekusun Diosta kausay qowasqanchismanta
May munaymi may sumaqpunin kay kausayninchisqa. Ima llakiña nanayña kaqtinpas kanpunin imallapas kusisqa kanapaqqa. Chayrayku, ¿imaynatan Diosninchis Jehová Diosta gracias nisunman kay kausay qowasqanchismanta? ¿Imaraykun payta gracias ninanchispuni?
1. ¿Imaraykun kausayninchista anchata valorananchis?
Kausayninchistaqa valorananchis munakuq taytanchis Jehová Dios chay munay regalota qowasqanchisraykun. Paymantan “kausayqa paqarimun”, paypa kamasqanmi llapa ima kausaqpas kashan (Salmos 36:9). “Paymi runakunaman qon kausayta, samayta, tukuy imaymanatapas” (Hechos 17:25, 28). Jehová Diospa qowasqanchismi tukuy imapas kashan. Chaymantapas, kusisqa kausananchispaqmi payqa tukuy imata kamarqan (leey Hechos 14:17).
2. ¿Imakunata ruwaspan Jehová Diosta gracias nisunman?
Mamaykiq wijsanpi paqarishallaqtiykiraqmi Jehová Diosqa rikumusharqasunkiña. Juj kutinmi, Diospa yuyaychasqan kaspa rey Davidqa khaynata nirqan: “Mamaypa wijsanpi rijurishaqtiypas ñawiykiqa rikushawarqanmi”, nispa (Salmos 139:16). Vidaykiqa anchatan valen Jehová Diospaqqa (leey Mateo 10:29-31). Chaymi payqa manapuni munanmanchu pipas runamasinta wañuchinantaqa ni pay kikinta wañuchikunantapas (Éxodo 20:13). a Chaymantapas, manapunin allinchu kanman yanqapas qasi ima desgraciamanpas wañuypatamanpas churakuyqa, manapunin jujkunatapas chhaynakunamanqa churananchischu. Vidanchistapas jujkunaq vidantapas cuidaspan rikuchisun Jehová Diospa kausay qowasqanchista valorasqanchista.
ASTAWAN YACHASUNCHIS
¿Imakunata ruwaspan Diosta agradecekusunman kausay qowasqanchismanta? Chaymanta astawan yachasun.
3. Ama onqonaykipaq cuidakuy
Jehová Diosta serviqkunaqa paypaq jinan kausananchis. Noqanchisqa paymanmi cuerponchista ch’uya sacrificiota jina jaywarqanchis, chaymi vidanchistapas cuerponchistapas cuidananchis. Leeychis Romanos 12:1, 2 textota, jinaspa jamuq tapuykunaman jina parlariychis:
-
¿Imaraykun cuerponchista cuidananchis?
-
¿Imaynatan chayta ruwasunman?
4. Vidanchista, jujkunaq vidantapas cuidasun
Bibliaq nisqan jina, mana imapas pasawananchispaqqa allinta qhawarikuspan imatapas ruwananchis. VIDEOTA qhawaychis, chaypin imaynatachus chayta ruwasunman chaymanta willashan.
Leeychis Proverbios 22:3 textota, jinaspa jamuq tapuykunaman jina parlariychis:
-
¿Imatan ruwasunman wasinchispi ama imapas pasawananchispaq?
-
¿Llank’ananchispi kaqtinchispas ama imapas pasawananchispaq?
-
¿Imatan ruwasunman ejerciciota ruwashaqtinchis ama imapas pasawananchispaq?
-
¿Imatan ruwasunman carrota manejashaqtinchis viajashaqtinchispas ama imapas pasawananchispaq?
5. Respetananchismi manaraq naceq wawaq vidantaqa
Rey Davidmi qelqarqan imaynas Jehová Diosqa wijsallapiraq kaq wawakunata makilla qhawamushan chaymanta. Leeychis Salmos 139:13-17 textota, jinaspa jamuq tapuyman jina parlariychis:
-
¿Jayk’aqmi Jehová Diospaq juj runaq kausaynin qallarin, naceqtinchu icha mamanpa wijsanpi paqariqtinchu?
Israel llaqtaman kamachikuykunata qoshaspan Jehová Diosqa paykunata kamachirqan onqoq warmikunata, wijsankupi kaq wawakunatapas cuidanankupaq. Leeychis Éxodo 21:22, 23 textota, jinaspa jamuq tapuykunaman jina parlariychis:
-
Jehová Diospa kamachisqanman jinaqa, juj runa manaña yuyaypichu ruwarqan chaypas, ¿imatan ruwananku karqan manaraq naceq wawa wañuchiqtaqa?
-
Chhaynaqa, ¿imaninmanmi Jehová Dios manaraq naceq wawakunata yuyaypipuni wañuchiqkunamanta? b
-
¿Imaninkin manaraq naceq wawakunata imaynatachus Dios qhawarisqanmanta?
Kausayta valoraq warmipas yaqapaschá sinchi llakipi tarikuspa wawanta orqochikuyta munanman. Leeychis Isaías 41:10 textota, jinaspa jamuq tapuyman jina parlariychis:
-
Pipas wawanta orqochikunanpaq mat’ipayasqa kanman chayqa, ¿pimantan yanapayta mañakunan? ¿Imaraykun chay ruway allin kanman?
WAKIN RUNAKUNAN NINKU: “Pipas munaspaqa wawantaqa orqochikullanmanmi. Cuerponwanqa imatapas ruwallanmanmi”, nispa.
-
¿Jehová Diospaqqa piqpa vidantaq masta valenman, juj warmiq vidanchu icha wijsanpi kaq wawaq vidanchu? ¿Imaraykutaq chhaynata ninki?
IMATAN YACHAMURQANCHIS
Kausayqa Jehová Diospa qowasqanchis regalon. Chaymi kausayninchistapas jujkunaq kausaynintapas respetananchis, cuidananchis, munakunanchis ima.
Yuyarisun
-
¿Imaynatan Jehová Dios qhawarin lliupa vidantapas?
-
¿Imaynatan Jehová Dios qhawarinman pipas runamasinta wañuchiqtin, pay kikinta wañuchikuqtinpas?
-
¿Iman vidaykipi astawan kusichisunki?
ASTAWAN YACHANAYKIPAQ
¿Imakunata ruwaspan Jehová Diosta gracias nisunman kausay qowasqanchismanta? Chaymantan kay taki rimashan.
¿Perdonanmanchu Dios wawan orqochikuq warmita? Chaymantan kaypi yachanki.
“¿Imaninmi Biblia wawa abortaymanta?” (jw.org paginapi leey)
¿Respetashasunmanchu vidanchista kusirikunanchisrayku wañuy pataman churakuspanchis? Chaymantan kay qelqapi yachanki.
“¿Allinchu kanman peligroso pujllaykunapi pujllay?” (¡Rijch’ariy!, 2000 watapi 8 octubre)
¿Imaynatan Biblia yanapanman paykuna kikinkuta wañuchikuyta munaqkunata? Chaymantan kaypi yachanki.
“¿Yanapanmanchu Biblia wañuchikuyta munaqkunata?” (jw.org paginapi leey)
a Jehová Diosqa khuyapayanmi nanasqa sonqoyoqkunataqa (Salmos 34:18). Allintan yachan imaraykus pipas sinchi sonqo nanaypi tarikushan chayta, yachanmi imaraykus wakinqa hasta wañuchikuyta imaraq munanku chaytapas, yanapaytataqmi munashanpas. Chaymanta astawan yachanaykipaq leey “¿Yanapanmanchu Biblia wañuchikuyta munaqkunata?” nisqa yachachikuyta, chayqa kashan “Astawan yachanaykipaq” nisqa partepin.
b Manaraq Diosmanta yachashaspa wawankuta abortaqkunaqa perdonasqan kankuman. Jehová Diosqa liston kashan perdonananpaq chhaynapi manaña ñakapakuspa kausanankupaq. Chaymantan astawan yachanki “¿Imaninmi Biblia wawa abortaymanta?” nisqa yachachikuypi, chayqa kashan “Astawan yachanaykipaq” nisqa partepin.
Astawan yachanaykipaq
SAPA KUTILLA TAPUKUSQANKU
¿Imaynatan Jehová Diospa testigonkuna Bibliamanta yachachinku?
Jehová Diospa testigonkunawan Bibliata estudiaspaqa, munasqayki Bibliawanmi estudiawaq. Chaymantapas llapa familiaykita amigoykikunata iman invitawaq. Chayqa manan qolqepaqchu.
