CIIYO 38
Amulumbe Kucipego Cabuumi
Kuli zintu zinji zibotu nzyotukonzya kucita alimwi akukkomanina akaambo kakuti tuli baumi. Nociba ciindi notujisi mapenzi, tulakonzya kukkomana mumbazu zimwi zyabuumi. Mbuti mbotukonzya kutondezya kuti tulalumba kucipego cabuumi? Alimwi nkaambo nzi kapati ikeelede kutupa kucita boobo?
1. Nkaambo nzi ncotweelede kulumba akaambo kabuumi?
Tweelede kulumba akaambo kabuumi nkaambo ncipego kuzwa kuli Taateesu siluyando, Jehova. ‘Ngokasensa kabuumi,’ ngowakalenga zintu zyoonse zyuumi. (Intembauzyo 36:9) “Walo mwini nguupa bantu boonse buumi, muya alimwi azintu zyoonse.” (Milimo 17:25, 28) Jehova ulatupa nzyotuyandika kutegwa katupona. Pele kwiinda zyoonse, ulatukwabilila kutegwa katubukkomanina buumi.—Amubale Milimo 14:17.
2. Mbuti mbotukonzya kutondezya Jehova kuti tulalumba kucipego cabuumi?
Kuzwa ciindi nomwakamitwa, Jehova wali kumulanganya. Kwiinda mukusololelwa amuuya uusalala, mubelesi wa Leza umwi, Davida, wakaambila Jehova kuti: “Meso aako akandibona nindakacili nsalalila.” (Intembauzyo 139:16) Jehova ulabubikkila maano kapati buumi bwanu. (Amubale Matayo 10:29-31.) Inga camucisa kapati kuti umwi wajaya muntu umwi acaali, nokuba kulijaya. a (Kulonga 20:13) Alimwi inga camucisa Jehova kuti twabikka buumi bwesu muntenda acaali naa kuti tiitwabikkila maano kukwabilila buumi bwabamwi. Kuti twabikkila maano kubuumi bwesu alimwi akulemeka buumi bwabamwi, tutondezya kuti tulalumba kucipego cabuumi icikkomanisya kapati.
AMWIIYE ZINJI
Atulange-lange nzila mbomukonzya kutondezya kuti mulalumba kucipego cabuumi.
3. Amububikkile maano buumi bwanu
Banakristo balyaabide balabelesya buumi bwabo boonse kubelekela Jehova. Cili mbuli kuti batuula mibili yabo kaili cipaizyo kuli Leza. Amubale Baroma 12:1, 2, akubandika mibuzyo eeyi:
-
Ncinzi ceelede kumukulwaizya kubikkila maano kubuumi bwanu?
-
Muunzila nzi momukonzya kucita boobo?
4. Amutobele malailile kutegwa kutabi uulicisa naa kufwa
Bbaibbele litukulwaizya kutantamuka zintu iziletela ntenda. Atweebelele VIDIYO akubona zintu nzyomukonzya kucita kutegwa mulikwabilile.
Amubale Tusimpi 22:3, akubandika mbomukonzya kulikwabilila nywebo alimwi abamwi . . .
-
aŋanda yanu.
-
kumulimo.
-
ciindi nomusobana.
-
ciindi nomweenzya mootokala naa nomukkwelede mumootokala.
5. Amubulemeke buumi bwamwana uucili mwida
Mumwaambo wakweema, Davida wakaamba kuti Jehova ulabikkila maano kuzintu zyoonse zicitika ciindi mwana uuli mwida nayaabukomena. Amubale Intembauzyo 139:13-17, akubandika mubuzyo ooyu:
-
Mumeso aa Jehova, sena buumi bwamuntu butalika ciindi naamitwa naa ciindi naazyalwa?
Milawo ya Jehova kubana Israyeli bansiku yakali kukwabilila bamatumbu alimwi abana babo ibakacili mwida. Amubale Kulonga 21:22, 23, akubandika mibuzyo eeyi:
-
Ino Jehova wakali kumubona buti muntu iwajaya mwana uucili mwida cakutazyiba?
-
Mbuti mbwakonzya kulimvwa kuti umwi wacita oobo acaali? b
-
Ino mulimvwa buti kujatikizya mbwaabona makani aaya Leza?
Naba mukaintu uuzyi mpindu yabuumi ulakonzya kulimvwa kuti kugusya da ncecintu cikonzya kumugwasya. Amubale Isaya 41:10, akubandika mibuzyo eeyi:
-
Ikuti mukaintu kasinikizyigwa kugusya da, nkuuli ni nkwayelede kulomba lugwasyo? Nkaambo nzi?
BAMWI BAAMBA KUTI: “Zimwi ziindi bukkale bulakonzya kupa mukaintu kugusya da.”
-
Ncinzi cimupa kusyoma kuti Jehova ulabubikkila maano buumi bwabanyina alimwi abwamwana uucili mwida?
MUBUFWAAFWI
Bbaibbele lituyiisya kuciyanda, kucilemeka alimwi akucikwabilila cipego cabuumi ncaakatupa Jehova. Eeci cibikkilizya buumi bwesu alimwi abwabamwi.
Ncinzi Ncomwaiya?
-
Nkaambo nzi buumi bwamuntu ncobuyandika kapati kuli Jehova?
-
Ino Jehova ulimvwa buti ciindi umwi naajaya muntu umwi acaali?
-
Ncinzi cimupa kulumba kucipego cabuumi?
AMUZYIBE ZINJI
Mbuti mbotukonzya kumulumba Jehova kucipego cabuumi?
Atujane bwiinguzi kumubuzyo ooyu, sena Leza inga wamulekelela mukaintu iwakagusya da?
“Ino Ncinzi Bbaibbele Ncolyaamba Kujatikizya Kugusya Da?” (Cibalo caaintaneti)
Atulange-lange mbwabubona buumi Leza mbokweelede kukujatikizya mbotusala zyakulikondelezya.
“‘Zisobano Izibikka Buumi Muntenda’—Sena Muleelede Kutola Lubazu?” (Sinsimuka!, October 8, 2000)
Mbuti kuti muntu kajisi mizeezo yakuyanda kulijaya? Atubone Bbaibbele mbolikonzya kugwasya.
“Sena Bbaibbele Inga Lyandigwasya Ciindi Nondaba Amizeezo Yakuyanda Kulijaya?” (Cibalo caaintaneti)
a Jehova ulababikkila maano kapati aabo batyompedwe mumoyo. (Intembauzyo 34:18) Ulakumvwisya kucisa kwabo ikukonzya kubapa kuba amizeezo yakuyanda kulijaya, alimwi buya ulayanda kubagwasya. Kutegwa mubone lugwasyo lwakwe mbolukonzya kupa muntu nguzu zyakuzunda mizeezo yakuyanda kulijaya, amubale cibalo cakuti “Sena Bbaibbele Inga Lyandigwasya Ciindi Nondaba Amizeezo Yakuyanda Kulijaya?” icili mucibeela cakuti Amuzyibe Zinji, muciiyo eeci.
b Aabo bakagusya kale da tabeelede kulipa mulandu, Jehova ulakonzya kubalekelela. Kutegwa muzyibe zinji, amubone cibalo cakuti “Ino Ncinzi Bbaibbele Ncolyaamba Kujatikizya Kugusya Da?” icili mucibeela cakuti Amuzyibe Zinji, muciiyo eeci.
Andiza Inga Mwaakkomanina Ayaaya
MIBUZYO IIVWULA KUBUZYIGWA
Ino Ndwiiyo Nzi Lwamu Bbaibbele Ndobapa Bakamboni ba Jehova?
Mulakonzya kubelesya Bbaibbele lili lyoonse nomwiiya mupulogilamu iitabbadelelwi ya Bakamboni ba Jehova. Amwaanguluke kutamba bamukwasyi wanu boonse naa balongwe.
