YOOSOMA 38
Muttitttimiheke okumi
Okumi ennanivaha eparakha yookhalano sookumanano sootikiniha. Nnaamweera nikumanakano maxupo, veekhaikhai vannawereya ohakalala. Vanonto moota heeni nneeraahu noonihereke weera ninnahela mwiitti yoovaha ela ya okumi? Ni etthu heeni yootthuneya enneeriha opaka eyo?
1. Mwaha wa heeni oraaya wootthunneya ottittimiha okumi?
Ninnatthuneya ottittimiha okumi, mwaha wooweera yoovaha ela enkhuma wa Tiithi ahu, a nsivelo Yehova. Owo “ephattuwelo ya ekumi”—naari neere, owo topattunxe ekumi. (Nsalmu 36:10 [36:9, NM]) “Muluku topattunxe olumwenku ni itthu sootheene siri’mo.” (Miteko 17:25, 28) Yoolepa ela, ennoonihera weera Yehova tonivanhe sootheene ninhaawelaahu weera nikhaleno okumi. Mene owo onnapaka itthu opwaha eyo. Yehova oonivaha sootheene sintthuneya weera nikhaleno okumi yoohakalaliha.—Musome Miteko 14:17.
2. Moota heeni nneeraahu nimoonihere Yehova weera ninnahela mwiitti okumi?
Ekwaha emoha murumeyi a Muluku eeriwa Davidi aavekela eeraka: “Maitho anyu yàkòna miyo kirene eyasi ene.” (Nsalmu 139:16) Eyo yooniheraka weera Yehova onnapwattha mpaka okumi wa mwaana ori mmirimani mwa muthiyana oorupala. Okumi anyu ti wootepa otthuneya vamaithoni va Yehova. (Mmusome Matheyo 10:29-31.) Yehova onnahela mwiitti okumi mpaka onnamuriipa murima vaavo mutthu oniisiivaawe naari ommwiivaawe mutthu mukina. a (Ottimula 20:13) Yehova onnamuripa murima vaavo ninhelaahu varisani okumi ahu naari okumi wa atthu akina. Naakosoopaka okumi ahu ni naattittimihaka okumi wa atthu akina ninnoonihera weera ninnahela mwiitti yoovaha ela yootepa oreera.
WEERA MUXUTTERE SINTXIPALE
Moone itthu ikina seiyo muneeraanyu moonihereke weera munnahela mwiitti yoovaha ya okumi.
3. Mukosoopeke okumi
Ntoko arumeyi a Yehova, hiyo noomulaihera Yehova weera nnoorowa onvarela muteko okumi ahu wootheene. Vaavo nimpakaahu eyo onkhala ntoko nivaherenre okumi ahu ntoko mukuttho wa Muluku. Mmusome Aroma 12:1, 2. Avinyaka mutthekule ni ipontu sinttharelana:
-
Moovarihana ni yoolepa ela, eheeni eneera eweerihekeni okosoopa okumi?
-
Moota heeni muneeraanyu mpake eyo?
4. Mwiikosoopeke weera muhimphite mutthu naari muhimwiive
Biblya onnanooperera osempa itthu soowoopiha. Moone EVIIDIYU weera moone itthu seiyo mweeraanyu mpakeke ni ovareleleya.
Musome Miruku 22:3. Avinyaka mutthekule voohima sa moota nyuwo ni atthu akina muneeraanyu mukhale oovareleleya . . .
-
owaani.
-
omutekoni.
-
naatthimakaka.
-
mweettihaka ekaaro, etxinka naari etthu ekina eneetta.
5. Muttittimiheke okumi wa mwaana ahaakunve oyariwa
Davidi aathaliha weera Yehova onnasuwela okumi ya mwaana ori mmirimani ohinaakuve oyariwa. Musome Nsalmu 139:13-17. Avinyaka mutthekule ni ipontu sinttharelana:
-
Vamaithoni va Yehova okumi empatxera vaavo muthiyana onrupalaawe ni vaavo mwaana on˜yariwaawe?
Malamulo Yehova aavanhaawe ana a Israeli khalayi yannoonihera weera owo annamukosoopa muthiyana oorupala ni mwaana ohaakunve oyariwa. Mmusome Ottimula 21:22, 23. Avinyaka mutthekule ni ipontu sinttharelana:
-
Tuuvi waari moonelo wa Yehova voohima sa mutthu moohitthuna aamwiiva mwaana ohaakunve oyariwa?
-
Yehova ommoona moota heeni mutthu ompaka eyo mootthuna? b
-
Nyuwo munoonela hayi moonelo owo wa Muluku?
Mpaka muthiyana osuwenle weera okumi ti wootthuneya, pooti woona weera orupala yoothanla yoomeekha. Mmusome Yesaya 41:10. Avinyaka mutthekule ni ipontu sinttharelana:
-
Muthiyana onnanyesereriwa oyeeha erukulu, anvekeleke taani nikhavihero? Mwaha heeni?
ATTHU AKINA ANEERA: “Athiyana ootheene aakhalano otaphuwa wothanla oyeeha erukulu. Mwaha wooweera, erutthu ti yawaya.”
-
Eheeni enoovarani murima mwaha woosuwela weera Yehova onnahela mwiitti okumi mpaka wa muthiyana ni wa mwaana ohiyarinwe?
NYAHA SOOTTHUNEYA
Biblya onnaxuttiha osivela, ottittimiha ni okosoopa okumi, yoowo wootepa oreera eri yoovaha ya Yehova. Eyo enhela mpuwa okumi ahu ni okumi wa atthu akina.
Wuuluula
-
Mwaha heeni okumi ahu oraaya wootepa otthuneya vamaithoni va Yehova?
-
Yehova onoonela hayi vaavo mutthu oniisivaawe naari omwiivaawe mutthu mukina?
-
Mwaha wa heeni nyuwo muntthuneyaanyu ohelaka mwiitti okumi?
WEERA MUSUWELE ITTHU SINTXIPALE
Muneere moota heeni asantte wa Yehova mwaha wa yoovaha ya okumi?
Neereke Muluku pooti omulevelela muthiyana oyeehale erukulu?
“Biblya onhima eheeni voohima sa oyeeha erukulu?” (Mwaha va jw.org)
Moone moota heeni moonelo wa Muluku voohima sa okumi oneeraaya ovoleele soothanla sanyu sa otthekula.
“‘Axooku oowoopiha’—keereke kinnatthuneya oweetta?” (Despertai!, 8 a Outubro a 2000)
Ankha wakhala weera mutthu ookhalano muupuwelo wootthuna wiisiiva? Moone moota Biblya okhalaawe oowookhaviherani.
a Yehova onnoona ovoreya murima wa atthu yaale antthuna wiisiva ni ontthuna waakhavihera. Yehova onnaapwattha atthu yaale oriipiwa murima. (Nsalmu 34:18) Weera moone moota Yehova oneeraawe aakhavihere atthu yaale arino nyuupuwelo sootthuna wiisiiva: Musome eparte eneera weera musuwele itthu sintxipale mwaha oneera: “Miyo kintthuna okhwa—Neereke Biblya pooti okikhavihera vaavo kinkhalaakano nyuupuwelo sootthuna wiisiiva?”
b Muthiyana oyenhe erukulu moohitthuna, khontthuneya wiivaha nthowa. Wakhala hiihaawo Yehova atthuna vale pooti omulevelela. Weera musuwele sintxipale voohima sa mwaha ola, musome eparte eneera weera musuwele itthu sintxipale, mwaha oneera: “Eheeni Biblya onhimaawe voohima sa oyeeha erukulu?”
