YOOSOMA 38
Nvaheke Efaita Okumi
Okhala mukumi, onninikhaliherya opaka itthu sinceene sooloka. Hata nirina ene mixankiho sinceene, vanniweryaneya okhalana okathi woohakalaliha mookumini mwahu. Ninrowa wooniherya sai wira ninnivaha efaita okumi? Etthu xeeni yuulupale enniiriha ovaha efaita okumi?
1. Xeeni ninvaha ahu efaita okumi?
Nihaana ovaha efaita okumi mwaha woowi yoovaha enikhuma wa Tiithi ihu oophenta Yehova. Owo tori “maphattuwelo èkumi”. Eyo enitaphulela wira topattunxe okumi. (Esalimo 36:10) “Owo tonaavaha atthu iphumu, okumi ni itthu sotheene”. (Miteko 17:25, 28) Yoolepa ela, ennooniherya oratteene wira Yehova onninivaha itthu sootheene wira nikhaleke akumi. Nave onnipaka itthu sikina. Maana Yehova onninivaha itthu sootheene nimphavela ahu wira nihakalaleke mookumini mwahu.—Musome Miteko 14:17.
2. Ninrowa omooniherya sai Yehova wira ninnivaha efaita okumi?
Okathi omosa, murumeyi a Muluku iihaniwa Davidi aahinvekela Muluku oriki: “Maitho anyu yahikòna kihinatthi oyariwa”. (Esalimo 139:16) Eyo enooniherya wira Yehova onnoothokoreryani okhuma okathi mwaarupaliwe anyu. Yehova onnivaha efaita yinceene okumi anyu. (Mmusome Matheyo 10:29-31.) Yehova onnivaha efaita okumi, maana onniriipiwa murima vanceene okathi mutthu onimwiiva awe mukhwaawe aahiiso oniixiiva awe. (Okhuma 20:13) a (Nwehe enoota) Nave Yehova onniriipiwa murima okathi moohilakelela nimpaka ahu etthu yaarowa onikumiherya mixankiho wala waakumiherya mixankiho atthu akina. Okathi ninkhapelela ahu okumi ahu, ninnooniherya wira ninninivaha efaita okumi wa atthu akina ni ninnooniherya wira ninnixukhurela ovahiwa etthu ya faita yinceene, okumi.
MWIIXUTTE ITTHU SIKINA
Nwehe inamuna vakhaani mukhanle anyu oowooniherya wira munnixukhurela okumi nivahiwe ahu.
3. Mukhapeleleke okumi anyu
Okhala wira na arumeyi a Yehova, hiyo noomuleiherya wira ninrowa orumeelaka okumi ahu wira nimukokhoreleke. Okathi nimpaka ahu eyo vanikhala ntoko wira nninvaha erutthu ahu ntoko mukuttho. Mmusome aRoma 12:1, 2, nuumala-vo mwaakhule makoho anittharelana:
-
Moovariha ni yoolepa ela, etthu xeeni eniwiirihani okhapelela okumi anyu?
-
Mwa inamuna xeeni mukhanle anyu ookhapelela okumi anyu?
4. Nvaheke ephoole wira muhiikumiherye ehasara wala okhwa
Biibiliya onnintumererya ohipaka itthu saarowa okumiherya mixankiho. Nwehe EVIIDIYU wira moone itthu mukhanle anyu oopaka wira mukhale oovareleleya.
Musome Miruku 22:3, nuumala-vo nwehe etthu mukhanle anyu oopaka wira nyuwo ni atthu akina mukhaleke oovareleleya . . .
-
vatthokoni vanyu.
-
omutekoni.
-
okathi muniweetta anyu axooku.
-
okathi muneettiha anyu aahiiso munwela anyu ekaaro.
5. Muttittimiheke okumi wa mwaana orupaliwe
Davidi ohimmye wira Yehova onniweha itthu sootheene sinimwiiraneela mwaana orupaliwe. Musome Esalimo 139:13-17, nuumala-vo mwaakhule nikoho ninttharelana:
-
Moovarihana ni Yehova, okumi onipacerya okathi xeeni, okathi mwaana onirupaliwa awe wala nuumala oyariwa?
Malamulo Yehova aavanhe awe aisarayeli, yaanimukhapelela muthiyana ni mwaana aamurupanle awe. Mmusome Okhuma 21:22, 23, nuumala-vo mwaakhule makoho anittharelana:
-
Yehova aamoonela sai mutthu moohilakela aamwiiva mwaana orupaliwe?
-
Yehova onoonela sai vaavo moolakela mutthu onimwiiva awe mwaana orupaliwe? b
-
Munoonela sai moonelo owo wa Yehova?
Hata muthiyana onisuwela wira okumi wookhalana efaita yinceene, pooti woonaka wira ohaana okumiha erukulu. Mmusome Yesaya 41:10, nuumala-vo mwaakhule makoho anittharelana:
-
Akhala wira muthiyana onnikhanyereriwa okumiha erukulu, tani onireerela awe onvekela nikhaliheryo? Mwaha wa xeeni?
ATTHU AKINA ANIHIMYA WIRA: “Khula muthiyana ookhalana ehakhi yookumiha erukulu maana erutthu awe”.
-
Etthu xeeni enookupalihani wira Yehova onnivaha efaita okumi wa muthiyana ni okumi wa mwaana omurupanle awe?
IPONTO SUULUPALE
Biibiliya onniixuttiha wira nihaana ophenta, ottittimiha ni okhapelela okumi, maana yoovaha ya faita enikhuma wa Yehova. Eyo enihela muhina okumi ahu ni okumi wa atthu akina.
Wuuluula
-
Xeeni okumi wa apinaatamu orina aya efaita yinceene vamaithoni va Yehova?
-
Yehova onoonela sai vaavo moolakelela mutthu onimwiiva awe mutthu mukina?
-
Etthu xeeni eniwiirihani ovaha efaita okumi?
NWEHE ITTHU SIKINA
Ninrowa omuxukhurela sai Yehova mwaha woonivaha okumi?
Niireke Muluku pooti omulevelela muthiyana okumihale erukulu?
“Biibiliya Onihimya Exeeni Voohimya sa Okumiha Erukulu?” (Mwaha ori va jw.org)
Osuwela moota Muluku onoonela awe okumi, woonikhaliherya othanla oratteene matthekulelo ahu.
“‘Axooku Oowoopiha’—Kiireke Kihaana Oweetta?” (Nvenye!, 8 a Outubro, 2000)
Ankhi mutthu oniphavela wiixiiva? Nwehe moota Biibiliya okhanle awe oomukhaliherya.
a Yehova onnisuwela owereya onoona awe mutthu oniphavela wiixiiva. Nave Yehova onnaakhapelela vanceene ale axankale. (Esalimo 34:18) Wira nwehe moota woomukhaliherya mutthu oniphavela wiixiiva, musome mwaha oni: “Kiniphavela Wiixiiva—Kiireke Biibiliya Onookikhaliherya Vaavo Kinuupuwela Aka Wiixiiva?” yoowo ori mpantta oni: “Mwiixutte itthu sikina”, yoosoma yeela.
b Muthiyana okuminhe erukulu moohilakela, khivanreerela wiivaha nthowa. Mwaha woowi Yehova pooti omulevelela. Wira nwehe itthu sikina, musome mwaha oni: “Biibiliya Onihimya Exeeni Voohimya sa Okumiha Erukulu?” ori mpantta oni: “Nwehe itthu sikina”, yoosoma yeela.