LIJIGANYO 38
Ayamichileje Mtuka wa Umi
Pana yindu yejinji yampaka tutendeje soni tusangalaleje nayo ligongo lyakuti tukwete umi. Atamose patukusimana ni yipwetesi mpaka tusangalaleje ni umi. Nambo, ana mpaka tulosye chamtuli kuti tukusayamichila mtuka wa umiwu? Soni ana ligongo lyekulungwa lyakututendekasya kuwuyamichila mtukawu lili chichi?
1. Ligongo chichi tukusosekwa kuyamichilaga mtuka wa umi?
Tukusosekwa kuwuyamichilaga mtuka wa umiwu ligongo lyakuti Atati ŵetu ŵachinonyelo Yehofa ni ŵaŵatupele. Mwamti ‘umi wosope uli wakutyochela kwa jwalakwe.’ (Salimo 36:9) Baibulo jikusati jwalakwe “akusiŵapa ŵandu wosope umi, lipuje ni yine yosope.” (Masengo 17:25, 28) Yehofa akusatupa yindu yakutukamuchisya kuŵa ni umi. Nambo ngaŵa kuti Yehofa agambile kutupa umipe, nambosoni akusatukamuchisya kuti tuŵeje ŵakusangalala paumi.—Aŵalanje Masengo 14:17.
2. Ana mpaka tumyamichile chamtuli Yehofa ligongo lya mtuka wa umi?
Yehofa aŵele ali mkwakamuchisya kutandila pandaŵi jele mama ŵawo ŵakwete msigo wa wawojo. Daudi juŵaliji jwakutumichila jwa Mlungu jwapopesile kuti, “Meso gawo gambweni mkinimbagwe [ndili m’chitumbo, NWT].” (Salimo 139:16) Yehofa akusawuwonaga umi wawo kuŵa wakusosekwa mnope. (Aŵalanje Mateyu 10:29-31.) Mwamti yikusampweteka mnope pakumwona jwine mwamele ali mkuwulaga mjakwe kapena kuliwulaga. a (Ekisodo 20:13) Yikusampwetekasoni Yehofa naga tukutenda yindu yampaka yijonanje umi wetu soni wa ŵane ligongo lyakulepela kuŵambala ngosi. Tukusalosya kuti tukusachimbichisya mtuka wa umi, naga tukutenda yindu yakusamala umi ŵetu soni wa ŵane..
KULIJIGANYA YEJINJI
Kwende tulole matala gane gakulosya kuti tukusayamichila mtuka wa umi.
3. Achisamalileje chilu chawo
Ligongo lyakuti twasimichisye mwakumsalila Yehofa kuti tuchitendaga yakusasaka jwalakwe, tukusamtumichilaga ni umi wetu wosope. Yikusaŵa mpela kuti tukupeleka yilu yetu kwa Mlungu mpela mbopesi. Aŵalanje Aloma 12:1, 2, kaneko akambilane yiwusyo ayi:
-
Ligongo chichi akusosekwa kuchisamalilaga chilu chawo?
-
Ana mpaka atende yeleyo mwamtuli?
4. Aŵambaleje yindu yampaka yiwulasye kapena kuwulaga ŵane
Baibulo jikusatulimbikasya kuŵambala yitendo yampaka yijonanje umi wetu. Alolele FIDIYO kuti amanyilile yampaka atende kuti aŵambale ngosi.
Aŵalanje Misyungu 22:3, kaneko akambilane yampaka atende kuti aŵambaleje ngosi . . .
-
kunyumba.
-
kumasengo.
-
pakutenda masewela.
-
pakwendesya galimoto kapena pakwela njinga.
5. Achimbichisyeje umi wa mwanache jwanganapagwe
Daudi jwasasile kuti Yehofa akusalolechesya chilichose chachikusatendekwa paumi wa mwanache jwanganaŵe kupagwa. Aŵalanje Salimo 139:13-17, kaneko akambilane chiwusyo achi:
-
Ana Yehofa akusayiwona kuti umi wa mundu ukusatanda papi, mama pajigele chitumbo kapena mwanache papagwile?
Chilamusi chiŵapeleche Yehofa kwa Aisalaeli chachenjelaga mama ni ŵanache ŵanganaŵe kupagwa. Aŵalanje Ekisodo 21:22, 23, kaneko akambilane yiwusyo ayi:
-
Ana Yehofa jwam’wonaga chamtuli mundu jwele mwangosi amwuleje mwanache jwanganaŵe kupagwa?
-
Nambi uli naga mundu awuleje mwamele, ana Yehofa jwapikanaga uli? b
-
Ana akuganisya wuli ni nganisyo sya Mlungusi?
Atamose kuti jwamkongwe jwakusawuwona umi kuŵa wakusosekwa mnope ndaŵi sine mpaka ayiwoneje kuti kwasa chitumbo lili litalape lyambone. Aŵalanje Yesaya 41:10, kaneko akambilane yiwusyo ayi:
-
Naga jwamkongwe akumkanganichisya kwasa chitumbo, ana mpaka apate chikamuchisyo kutyochela kwa ŵani? Ligongo chichi?
YAKUSAŴECHETA ŴANDU ŴANE: “Jwamkongwe ni jwampaka asagule kwasa chitumbo kapena iyayi.”
-
Ana ni chichi chachikwasimichisya wawojo kuti Yehofa akusawuwona umi wa mama soni wa mwanache jwanganaŵe kupagwa kuŵa wakusosekwa mnope?
YALIJIGANYISYE
Baibulo jikusatujiganya kuti tunonyeleje, kuchimbichisya soni kuwuchenjela mtuka wa umi waŵatupele Yehofa. Yeleyi yikupwatikapo umi wetu kapena wa achimjetu.
Yiwusyo Yakuwilisya
-
Ligongo chichi Yehofa akusawuwonaga umi wa mundu kuŵa wakusosekwa mnope?
-
Ana Yehofa akusapikana uli naga jwine mwamelepe akum’wulaga mundu?
-
Ana ni chichi chachikwatendekasya wawojo kuyamichilaga mtuka wa umi?
YAKULINGA YINESONI
Ana mpaka tumyamichile chamtuli Yehofa ligongo lya mtuka wa umi watupele?
Apate kwanga kwa chiwusyo chakuti, Ana Mlungu akusamkululuchila jwamkongwe jwajasile chitumbo?
“Ana Baibulo Jikusasala Yamtuli Pangani Jakwasa Chitumbo?” (Ngani ja pa intaneti)
Alijiganye yampaka yakamuchisye kusagula masewela gambone gangajonaga umi, mwakamulana ni mwakusajiwonela Mlungu ngani ja umi.
“Ana Mpaka Ajonanje Umi Wawo Mwakutenda ‘Masewela Gakogoya?’” (Ajimuche!, Okotoba 8, 2000)
Ana uli naga mundu akusaka kuliwulaga? Alole mwampaka Baibulo jikamuchisye.
“Ana Baibulo Mpaka Jingamuchisye Naga Ngusaka Kuliwulaga?” (Ngani ja pa intaneti)
a Yindu yayikwatendechela ŵandu ŵakasiche mtima, Yehofa yikusamkwaya mnope. (Salimo 34:18) Jwalakwe akusiŵapikanichisyaga ŵanduŵa. Mwamti ŵandu ŵakusaka kuliwulaga mpaka ŵakamuchisye. Kuti amanyilile yakusatenda Yehofa pakwakamuchisya ŵanduŵa, aŵalanje ngani jakuti “Ana Baibulo Mpaka Jingamuchisye Naga Ngusaka Kuliwulaga?”, pambali jakuti Yakulinga Yinesoni mu lijiganyoli.
b Ŵandu ŵaŵajasile chitumbo ngakusosekwa kulijimba magambo mwakupundanganya, ligongo Yehofa mpaka ŵakululuchile. Kuti amanyilile yejinji aŵalanje ngani jakuti, “Ana Baibulo Jikusasala Yamtuli Pangani Jakwasa Chitumbo?”, pambali jakuti Yakulinga Yinesoni mu lijiganyoli.
You May Also Like
YIWUSYO YAKUSANONYELA ŴANDU KUWUSYA
Ana Ljiganyo lya Baibulo Lyakusatendesya Ŵamboni sya Yehofa Likusatendekwa Mwamtuli?
Muyakambilana ni Ŵamboniyi akwete ufulu ŵakamulichisya masengo Baibulo jawo. Yili yakomboleka kwaŵilanga achimjawo soni ŵamwiŵasa mwawo kuti atende nawo lijiganyoli.
