WIRIKAPAI 38
Mo Du na Tambuahe Tipa gu Gamahe Nga Unga
Badungu wene apai gu duho rengbe ani ka gbia ngbarago ti ni rogo raka yo. Zavura ho ani agbia tirani ni na kpakarapai, bete apai kina ti ni rengbe ani ka gbia ngbarago behe rogo raka yo. Waigu rengbe ani ka yugoho nga ani na tambuahe tipa gu gamahe nga unga? Na gini nyanyaki ndupai duho tipa mangaha wo?
1. Tipagine si aida ani du na tambuahe ti ni tipa unga?
Si naida ani du na tambuahe tipa unga mbiko si nga gamahe be gu Barani nga boro nyemuse du ngbangbaturũ yo nga Yekova. Ko nga ‘mburu unga’—ko nakusi ngbatunga araka dunduko. (Atambuahe 36:9) ‘Ko ni tiko nafu unga fu aboro dũ na onga na ahe dunduko.’ (Amokedi 17:25, 28) Yekova nafu agu ahe furani ani aidaha tipa kadu ni ungarani. Ono gu susi asusa tie gbe nga ko nasarani ani du na rengba ka gbia ngbarago rogo raka yo.—Mo gedi Amokedi 14:17.
2. Wai rengbe ani ka yugo gupai fu Yekova nga ani na tambuahe tipa gu gamahe nga unga?
Yekova atona ngerafuo ro natona kina ti gu regbo i adu na vuro. Ga Mbori toro adu ku gii gu kura irisimbori sa nangia Davide ko ke gupai nga: ‘Bangiro abi kpotore wa si adu ni iwo ho.’ (Atambuahe 139:16) Yekova nabi ungaro na nyanyakipaha. (Mo gedi Matayo 10:29-31.) Yekova ima rengba kadu rogo bakere gberãrago ka si du nga boro ata ino aino kini imi kurani watadu kini imi tini. a (Gate 20:13) Rago ima rengba ka gberã ti Yekova a ka si dunga ani namaa gaani raka ngbapai watadu ani amaanga agu adiandue si aidaha tipa ka banda gu raka nga ga kura aboro te. Ho ani angerani fuo raka rani na kini yugu irisa tipa gu raka nga ga kura aboro, ani nayugo gupai nga ani na tambuahe tipa gu bawene gamahe nga unga.
MO WIRIKI KURA DUNGU APAI
Mo bingo gu bete agene rengbe mo ka yugo gamo tambuahe ngbaha tipa gu gamahe nga unga.
3. Mo ngerefuo padu kpotoro wenengai
Agu aKristano naima kpara gayo raka fu Yekova namangasunge na apai dũ rogo gayo raka yo ka iriso Yekova. Si wa ka i ya i nafu akpotoyo ni motumo fu Mbori. Mo gedi ARomo 12:1, 2, na tifuoho, mo ki sakipai tipa agi asanahe re:
-
Ginipai rengbe ka fõ ro tipa mo ngerefuo padu kpotoro wenengai?
-
Gini agene rengbe mo ka mangaha ngbaha?
4. Mo du na rubangirise ka bandatiro be agu ahe rengbe ka õgaro watadu ka imo ro
Baibiri nangarasa rani nga ani ne gu mangaapai du ni kerehe. Mo bi gu VIDIO re tipa ka bi gu bete apai rengbe mo ka mangaha ka bandatiro.
Mo gedi Asanza 22:3, na tifuoho mo ki sakipai tipa wai rengbe mo gbiati kura aboro ka bandatiro . . .
-
kpuro yo.
-
ba gamo sunge yo.
-
ho mo angi ambaro ni.
-
ho mo agbe tarambiri ni watadu ho du mo ni rogo gu kura aũnduge.
5. Mo yugu irisa tipa gu unga nga ga gu gude i ata vunga nga ru ya
Davide amangisunge na bawene afugo tipa ka sakapai tipa wai du Yekova na nyemu gu raka nga ga gu gude i ata vunga nga ru ya. Mo gedi Atambuahe 139:13-17, na tifuoho, mo ki sakipai tipa gi sanahe re:
-
Bangiri Yekova, ya mo raka boro natona ho i nadu na vuni ni watadu ho i avunga ni ni?
Ga Yekova andiko fu agu Yisaraere nadu mbata anaabanda anaagude gbiati agu awiriyo i ata vunga nga yo ya. Mo gedi Gate 21:22, 23, na tifuoho mo ki sakipai tipa agi asanahe re:
-
Waigu Yekova anaabi gu boro na ni imi gu gude i ata vunga nga ru ya zanga ni ini aino?
-
Waigu ko ani rengbe kadu ka si dunga boro ata ino aino kini imi gu gude i ata vunga nga ru ya? b
-
Gamo berãpai nga gine tipa gu bipai du Mbori na ni?
Zavura gu dee nabi unga na nyanyakipaha ima rengba kaa bihe nga ba gude kusayo vuseyo nga gu yangarapai rengbe ri ka mangaha. Mo gedi Yesaya 41:10, na tifuoho mo ki sakipai tipa agi asanahe re:
-
Ka si du nga dee nagbia tiri na sosodahe nga ri ba gude kusayo vuseyo da du rengbe ri ka ndu fuo ni tipa undo? Na tipagine?
GU KURA ABORO NAPE GUPAI NGA: “Dee na kina rengo beri ka sia singia ri naida ka ba gude kusayo vuseyo—mbiko ri du du na vuse.”
-
Ginipai sa ro mo idi kuti gupai nga Yekova nabi gu unga ga gu gude i ata vunga nga ru ya na nyanyakipaha?
GINIPAI MO NAWIRIKIHE?
Baibiri nayugo gupai furani nga ani kpinyemu gu ga Yekova gamahe nga unga kidu na irisa tipaha na kini bandaha. Si nakoda gaani raka gbiati gu raka nga ga kura aboro.
Fugöpai
-
Tipagine du raka aboro ti ni na nyanyakipaha fu Yekova?
-
Waigu du Yekova ho boro ata ino aino ni kini imi kurani?
-
Tipagine du mo na tambuahe ti ni tipa gu gamahe nga unga?
MO WETEKE GU KURA APAI
Waigu rengbe ani ka tambua Yekova tipa gu gamahe nga unga?
Mo gbia karagapai kuti gu sanahe nga ya mo Mbori ambupai fu gu dee naima ba gude kusayo vuseyo mbata?
“Ginipai Baibiri Apehe Tipa Ba Gude Kusayo Vuseyo?” (Gu kekeapai du rogo gaani bangiriba nga ga Internet)
Mo bingo wai ga Mbori bipai tipa unga narengbe kadu na maapai kurii agu aũzambuasitise ani asiaha.
“‘Kere Ambaro’—Ya Mo Si Naida Mo Ngihe?” (Awake!, Tanvuo 8, 2000)
Na ka si dunga boro naberãpa imo tini? Mo bingo wai Baibiri narengbe ka undo.
“Mi Naida Ka Kpi—Ya Mo Baibiri Rengbe Ka Undo Re Ho Mi Aberãpa Imo Tire Ni?” (Gu kekeapai du rogo gaani bangiriba nga ga Internet)
a Yekova naberãpa agu aboro bakere gbe du kpotoyo yo na rungo. (Atambuahe 34:18) Ko ima rugatiko na pa agu aimisiri nga gu rengbe ka sa boro niberẽpa imo ti ni na ko naida ka undo. Tipa ka bi wai gako undo narengbe ka manga ariapai, mo gedi gu kekeapai nga “Mi Naida Ka Kpi—Ya Mo Baibiri Rengbe Ka Undo Re Ho Mi Aberãpa Imo Tire Ni?” nga gu du tii gu paparaha nga Mo Weteke Gu Kura Apai du rogo gi wirikapai re.
b Agu aboro naima ba agude mbata kusayo vuseyo, si aidanga i du rogo bakere gberãrago te mbiko Yekova ima rengba ka mbupai fuyo. Tipa ka ino kura dungu apia, mo bi gu kekeapai nga “Ginipai Baibiri Apehe Tipa Ba Gude Kusayo Vuseyo?” du tii gu paparaha nga Mo Weteke Gu Kura Apai du rogo gi wirikapai re.
