Mmegyia nwʋ ihyinyia paa. Sɛ íni ye nu a, ankɩ abiyela ɩ́da azɩ. Iluwakɛɛ Nyamɩnlɩ yɛ ɩwɔlɩ yɛ nɩ ti, mɛyɩ yɛ ɩkɔhʋla ikehile yɛ kezimɔ yɛkɛva mmegyia yekeli egyima a. Mɩnla yɛ ɩhã ɩvalɩ mmegyia nwʋ a? Asʋ̃ sa yɛkʋla yedi mmegyia anzɛnyɩɩ yɛtwɩ̃ yɛma abiye a? Kɛ ɩkɛyɛ na wʋazi pɔkɔba wɔ odwokɔ eyi nu a?

1. Kɛ Gyehova bu mmegyia ise a?

Gyehova ɩhã ihileli yɩ azʋ̃mɩvʋlɔ wɔ ɔwɔkɩ kɛɛ: “Nnwʋnlamɩ bela yɩ nnwʋanlɩ yɛ lɛ yi mmegyia.” (Lɛvitikɔsʋ 17:14) Gyehova ibu mmegyia kɛɛ igyĩ ɛkɛnɩ ɩma nnwʋanlɩ. Iluwakɛɛ nnwʋanlɩ ɩdɩ akyɛdɩ titili mɔɔ ɩzʋ̃ Nyamɩnlɩ yɩ ɛkɛnɩ nɩ ti, mmegyia sʋ̃ ɩdɩ akyɛdɩ titili mɔɔ ɩzʋ̃ yɩ ɛkɛnɩ.

2. Mɩnla ɔhʋanɩ zʋ yɛ yɛfa mmegyia yedi egyima a, Nyamɩnlɩ ɩábɛ yɩ a?

Ansaana bɛbahyɩhyɛ Kilisinyianɩ Asafʋ yɩ nɩ, Gyehova ɩhyɛlɩ yɩ azʋ̃mɩvʋlɔ kɛɛ máma bedi mmegyia. (Kɩnga Gyɛnɛsɩsɩ 9:4 nɩɩ Lɛvitikɔsʋ 17:10.) Iluwa ɔhʋanɩhilelɛ okuwu yɩ zʋ izili ahyɛdɩ eyi zʋ wudo ihileli Kilisinyiamaa kɛɛ “máma bedi mmegyia” nɩ.—Kɩnga Egyima 15:28, 29.

Sɛ bɛkã kɛɛ yɛhwɩ̃ yɛ nwʋ wɔ mmegyia nwʋ a, kɛ yɩ tʋ ikile a? Sɛ dɔkɩta ɩkã ikile wʋ kɛɛ ɔhwɩ̃ wʋ nwʋ wɔ nzã nwʋ a, asʋ̃ ɔkɔnlʋ a? Asʋ̃ ekeli alɩyɛ mɔɔ bɛva nzã bɛyɛlɩ, anzɛnyɩɩ ɛkɛma bɛkɛva bokoluwa wʋ ndini nu a? Anhã. Ɔzɔ sʋ̃ la yɛ Nyamɩnlɩ yɩ mmɛla mɔɔ ise yɛhwɩ̃ yɛ nwʋ wɔ mmegyia nwʋ nɩ, ikile kɛɛ íni kɛɛ yɛnʋ mmegyia anzɛnyɩɩ yedi ɛnlamɩ mɔɔ bɛátua yɩ hɔ botwonwɔ yi mmegyia bokua. Yɛɛ íni kɛɛ yedi alɩyɛ mɔɔ bɛva mmegyia bɛyɛ sʋ̃.

Na mmegyia mɔɔ bɛfa bedi egyima wɔ awudoyɛlɛ nu sʋ̃ ɛ? Numɔ be wɔ ɛkɛnɩ mɔɔ itiyia Nyamɩnlɩ yɩ mmɛla yɩ petee. Eyi be yɛ lɛ mmegyia anzɛnyɩɩ mmegyia nu nninyeni aditili be mɔɔ bɛfa bɛma nɩ. Dɩkɛɛ nnwʋanlɩ mmʋwaba kɔkɔlɔ, nnwʋanlɩ mmʋwaba fuvulo, nnwʋanlɩ mmʋwaba tafɩlaa nɩɩ mmegyia nu nzulo. Awudoyɛlɛ be sʋ̃ wɔ ɛkɛnɩ a, nwʋmɔ mmɛla pɔkyɩɩ íni ɛkɛnɩ. Kɛ ndianwʋ nɩ, bɔkʋla bɛfa mmegyia nu nninyeni aditili numɔ ɔkʋ̃ nu nninyeni ngyɩkɩ̃ɩ̃ ngyɩkɩ̃ɩ̃ bɛyɛ awudo. Wɔ awudoyɛlɛ mvʋlɔ sʋ̃ nu nɩ, bɔkʋla bɛfa enii kʋ̃ nɩ yɩzayɩ yi mmegyia bedi egyima. Mmɩlɩ mɔ yesunzũũ awudoyɛlɛ eyimmɔ nwʋ nɩ, ɩsɛ kɛɛ ye nu kʋ̃ bela yɩzayɩ isi yɩ pɔkɔ. a—Galatiyiamaa 6:5.

 SUMÁ SƲ̃MAA

3. Sí awudoyɛlɛ nwʋ pɔkɔ mɔɔ ɩkɔzɔ Gyehova anyɩ

Kɛ ɩkɛyɛ na wʋazi awudoyɛlɛ nwʋ pɔkɔ mɔɔ ɩ nɩɩ Gyehova yɩ adwɩnɩ wɔ mmegyia nwʋ nɩ ikeyiyia a? Yɩ́ VIDIYO nɩ, na akʋ̃ bozunzú sianti mɔɔ ɩsɛ kɛɛ yesunzu ndwokɔ mɔɔ ɩwɔ azɩ ɛkɩhyɩ yɩ nwʋ ansaana yɛazi pɔkɔ.

• Bɔ́ mpayɩ fa pɩbɛ nɣɛlɛbɛ.—Gyemisi 1:5.

• Pɩbɛ́ Bayɩbʋlʋ nu egyinanlɛzʋ-ndwokɔ na sunzú kezimɔ ɛkɛva ekeli egyima nɩ nwʋ—Ɛɣɛlɛwulɛ 13:16.

• Pɩbɛ́ ɔhʋanɩ azʋlɔtʋ mɔɔ boduwa zʋ bɛsa adimakɛlɛ wɔ dɩka mɔɔ ɛda nɩ.

• Bɔ́ mmɔdɩnɩ kɛɛ ɔkɔnwʋ mɔɔ wʋále etiã numɔ donwuu nɩ.

• Kilá kɛɛ wʋ pɔkɔzilɛ nɩ ɩlɛ́ma wʋ adwɩnɩ ikowu wʋ ɔfɔ—Egyima 24:16. b

• Nwʋ́ kɛɛ abiyela ɩlɔ́kʋla ikezi pɔkɔ ɩkɛma wʋ wɔ ndwokɔ mɔɔ ɩsɛ kɛɛ wʋzawʋ ɛfa wu ti ɔwʋwaba edi egyima wɔ nwʋ nɩ nwʋ, kɛɛ ɩdɩ wu hũ anzɛnyɩɩ wʋ yɩ, asafʋ nu ebani, anzɛnyɩɩ wʋ Bayɩbʋlʋ kilehilevʋlɔ.—Wulomimaa 14:12.

• Kɛlɛ́ wʋ pɔkɔzilɛ nɩ tiã ɛkɛnɩ.

4. Gyehova Dasɩvʋlɔmaa bɛpɩbɛ awudoyɛlɛ baaba

Yɛkɔhʋla yekeli Nyamɩnlɩ yɩ mmɛla mɔɔ ɩfalɩ mmegyia nwʋ nɩ zʋ, na yeanyia awudoyɛlɛ baaba mɔɔ bɛlɛ́fa mmegyia bekeli egyima wɔ nu. Yɩ́ VIDIYO nɩ.

Kɩnga Tayɩtɔsɩ 3:2, na akʋ̃ bozunzú odwokɔɣizialɛ eyi nwʋ:

• Mɩnla ti mɔɔ sɛ yɛ nɩɩ dɔkɩtamaa tɩndɛɛ a, ɩsɛ kɛɛ yɛkã yɛ nwʋ azɩ na yɛda annidi ali a?

  5. Mmɩlɩ mɔ mmegyia nu nninyeni ngyɩkɩ̃ɩ̃ ngyɩkɩ̃ɩ̃ wɔ numɔ

Nninyeni aditili anla yɛ ɩkã ɩbɔ numɔ ɩyɛ mmegyia a. Mɛyɩ yɛ lɛ nnwʋanlɩ mmʋwaba kɔkɔlɔ, nnwʋanlɩ mmʋwaba fuvulo, nnwʋanlɩ mmʋwaba tafɩlaa, nɩɩ mmegyia nu nzulo. Mmegyia yɩ ɔfʋã aditili anla eyi, nninyeni be wɔ numɔ mɔɔ bɔfʋlɔ bɛ mmegyia nu nninyeni ngyɩkɩ̃ɩ̃ ngyɩkɩ̃ɩ̃. c Bɛfa mmegyia nu nninyeni ngyɩkɩ̃ɩ̃ ngyɩkɩ̃ɩ̃ be bɛyɛ awudo mɔɔ ɩkʋ̃ itiyia adimakɛlɛ azʋlɔtʋ anzɛnyɩɩ sɛ mmegyia ituu abiye a, bɔkʋla bɛfa besi yi munwa.

Sɛ ɩba yɩ nɩ mmegyia nu nninyeni ngyɩkɩ̃ɩ̃ ngyɩkɩ̃ɩ̃ nwʋ a, ɩsɛ kɛɛ Kilisinyianii bela kyina yi ti ɔwʋwaba nɩɩ mɔɔ izuma wɔ Bayɩbʋlʋ nu nɩ zʋ isi pɔkɔ. Abiyemmɔ si pɔkɔ kɛɛ bɔkɔbʋ awudoyɛlɛ mɔɔ bɛfa mmegyia nu nninyeni ngyɩkɩ̃ɩ̃ ngyɩkɩ̃ɩ̃ bedi egyima nɩ donwuu. Abiyemmɔ sʋ̃ be ti ɔwʋwaba kɛma ɔhʋanɩ bɛ ma bekele mmegyia nu nninyeni ngyɩkɩ̃ɩ̃ ngyɩkɩ̃ɩ̃ be.

Sunzú odwokɔɣizialɛ eyi nwʋ wɔ mmɩlɩ mɔ esii pɔkɔ nɩ:

• Mɩnla ɔhʋanɩ zʋ yɛ mʋkɔhʋla mikehilehile sianti mɔɔ mide mmegyia nu nninyeni ngyɩkɩ̃ɩ̃ ngyɩkɩ̃ɩ̃ be nɩɩ sianti mɔɔ miále numɔ be nɩ mikehile dɔkɩta nɩ a?

 YƖ DƆKƆWƆLƐ

Gyehova ɩábɛ kɛɛ yɛfa mmegyia yedi egyima wɔ ɔhʋanɩ tanɩ zʋ.

Kɛ Okowuwa Ekeze a?

• Mɩnla ti mɔɔ Gyehova bu mmegyia kɛɛ ɩdɩ nwanzanwanza a?

• Kɛ ɩyɛ mɔɔ yɛnwʋ kɛɛ Nyamɩnlɩ yɩ mmɛla mɔɔ ise yɛhwɩ̃ yɛ nwʋ wɔ mmegyia nwʋ nɩ ɩfalɩ mmegyialelɛ sʋ̃ nwʋ a?

• Kɛ ɩkɛyɛ na wʋazi pɔkɔba wɔ mmegyia mɔɔ bɛfa bedi egyima wɔ awudoyɛlɛ nu a?