39 УРОК
Канга Кудайдыҥ кӧрӱми кандый?
Кижи кан јогынаҥ јӱрӱп болбос. Кудай ончо немени јайаган болордо, ол биске канды канайып тузаланарын айдар аргалу. Агару Бичикте кан керегинде не айдылат? Оны јиирге эмезе урдырарга јараар ба? Кан јанынаҥ сурак чыгып келзе, Иеговага јараар јӧпти канайып чыгарар?
1. Канга Иегованыҥ кӧрӱми кандый?
Ӧткӧн ӧйлӧрдӧ Иегова бойыныҥ ишчилерине мынайып айткан: «Ончо тынар-тындуныҥ јӱрӱми — олордыҥ канында» (Левит 17:14). Айдарда, Иегованыҥ кӧзине кан јӱрӱмди темдектейт. Јӱрӱм — Кудайдыҥ сыйы болордо, ол агару, айдарда кан база агару.
2. Кудай канды канайып тузаланарын јаратпай јат?
Јебрен ӧйлӧрдӧ Иегова канды јибезин деп айткан. (Башталганы 9:4 лӧ Левит 17:10 кычырыгар.) Иегованыҥ кан јанынаҥ берген јасагы солынбаган. Бу дезе баштапкы чакта башкару јӧп ончо христиандарга канды јибезин деп јакарганынаҥ кӧрӱнет. (Апостолдордыҥ ижи 15:28, 29 кычырыгар.)
Канды јиирге јарабас дегенин канайып оҥдоор? Тем кӧрӱп ийектер. Врач слерди аракы ичпезин деп айткан болзо, айдарда, слерге аракыны ичерге јарабас. Је слер аракы кожуп салган курсакты јиир эдеер бе эмезе аракыны тамыр ажыра урдырар эдер бе? Јок эмей! Анайып ла канды јибегер деп Кудайдыҥ јасагы биске канды ичерге ле канын агыспаган тындуныҥ эдин јиирге јарабас деп кӧргӱзет. Анайда ок биске кан кожуп салган курсакты јиирге јарабас.
А медицинада кан канайып тузаланылат? Кезик медицинский процедуралар Кудайдыҥ јасагын јарт ла бузып јат. Бого канныҥ бойын ла оныҥ тӧс компоненттерин урдырары кирет: эритроциттерди, лейкоциттерди, тромбоциттерди ле плазманы. А кезик медицинский процедуралар Кудайдыҥ јасагын бузып турган деп чике айдып болбозыҥ. Темдектезе, кезик эмденетен эп-аргаларга канныҥ тӧс компоненттериниҥ бир-бирӱзинеҥ алынган фракцияларды тузаланары кирет. Анайда ок кижиниҥ бойыныҥ канын тузаланары кирет. Бу эмденетен эп-аргалар керегинде кажы ла кижи јазап шӱӱп сананып, бойы јӧп чыгарар учурлу (Галаттарга 6:5) a.
ТЕРЕҤЖИДЕ КӦРӰГЕР
Кан тузаланып эмденетен эп-аргалар јанынаҥ кандый јӧп чыгарарын билип алыгар.
3. Иеговала колбулараар ӱрелбезин деп, эмденетен эп-аргаларды чын талдагар
Кан јанынаҥ сурактарда Иегованыҥ кӧрӱмине келижип турган эмденер эп-арганы канайып талдаар? ВИДЕОНЫ кӧрӱп, бу алтамдар нениҥ учун керектӱ деп јартап беригер.
-
Мӱргӱп, ойгор сурагар (Иаков 1:5).
-
Слердиҥ айалгага келишкедий библиялык принциптерди шиҥдеп, олорды канайып тузаланарын шӱӱп кӧрӱгер (Укаа сӧстӧр 13:16).
-
Слердиҥ јадып турган јерде эмденетен кандый эп-аргалар бар деп билип алыгар.
-
Слерге эмденетен кандый эп-аргалар јарабас деп билип алыгар.
-
Чыгарган јӧбигердиҥ кийнинде уйадаар слерди јибес пе деп сананыгар (Апостолдордыҥ ижи 24:16, ЈТ) b.
-
Кем де — керек дезе эш-нӧкӧрӧӧр дӧ, аксагал да эмезе слерле кожо Агару Бичик ӱренип турган кижи де уйат јанынаҥ сурактарда слерге кандый јӧп чыгарарын айтпас учурлу деп ундыбагар (Римдегилерге 14:12).
-
Бойоордыҥ чыгарган јӧбигерди бичип алыгар.
4. Иегованыҥ Керечилери эҥ артык эмденер арганы талдап јат
Кудайдыҥ кан керегинде јасагын буспай, кан јокко јакшы эмденер арга бар. ВИДЕОНЫ кӧрӱгер.
Титке 3:2 кычырып, суракты шӱӱжип ийигер:
-
Нениҥ учун врачтарла токуналу ла тоомјылу куучындажар керек?
|
Јарабас |
Кижи бойы кӧрӧр |
|---|---|
|
А. Канныҥ плазмазы |
Плазманыҥ фракциялары |
|
Б. Лейкоциттер |
Лейкоциттердиҥ фракциялары |
|
В. Тромбоциттер |
Тромбоциттердиҥ фракциялары |
|
Г. Эритроциттер |
Эритроциттердиҥ фракциялары |
5. Канныҥ фракцияларыла эмденер тушта
Кан тӧрт тӧс компоненттеҥ турат: эритроциттердеҥ, лейкоциттердеҥ, тромбоциттердеҥ ле плазмадаҥ. Бу тӧрт компоненттеҥ канныҥ фракцияларын аларга јараар c. Бу фракциялардыҥ кезигин ооруларла тартыжарга ла канды токтодорго тузаланатан эм-туска кожот.
Канныҥ фракциялары јанынаҥ кажы ла христиан кижи Агару Бичикле ӱредилген уйады аайынча бойы јӧп чыгарар учурлу. Кезик христиандар канныҥ фракцияларын тузаланып турган медицинский процедураларга јӧпсинбей јат. А кезиктериниҥ уйады фракцияларды тузаланарга јарадат.
Јӧп чыгарардаҥ озо бу суракка каруу беригер:
-
Мен нениҥ учун канныҥ кезик фракцияларын тузаланарга јӧпсинип эмезе јӧпсинбей јадым деп, бойымныҥ врачыма канайып јартаар эдим?
КЕЗИК УЛУС СУРААР БОЛОР: «Кан урдырарында нези јаман?»
-
Слер нени айдар эдеер?
ТӦС ШӰӰЛТЕЗИ
Иегова канды агару деп кӧрӧт, ол бисти де канга андый ла ок кӧрӱмдӱ болзын деп кӱӱнзейт.
Нени билип алдыгар?
-
Иегова канды нениҥ учун агару деп кӧрӧт?
-
Канды јибегер деген Кудайдыҥ јасагына кан урдырбазы да кирип јат деп нениҥ учун айдарга јараар?
-
Кан тузаланып эмденетен эп-аргалар јанынаҥ јӧп чыгарарга не болужар?
ШИҤДЕЙТЕН МАТЕРИАЛ
Бойыныҥ канын тузаланар медицинский процедуралар јанынаҥ јӧп чыгарардаҥ озо нени ајаруга алар керек?
«Кычыраачылардыҥ сурактары» («Каруулчы шибее», 2000 јыл, ӱлӱрген ай 15)
Канныҥ кичинек фракцияларын тузаланар ба, јок по деп јӧп чыгарардаҥ озо не керегинде сананар керек?
«Кычыраачылардыҥ сурактары» («Каруулчы шибее», 2004 јыл, кичӱ изӱ ай 15)
Иегованыҥ канга кӧрӱмиле јӧпсинерге бир врачты не кӱӱнзеткен?
«Мен Кудайдыҥ канга кӧрӱмин алынгам» («Ойгоныгар!» 2003 јыл, јаҥар ай 8)
Больницаларла колбожор комитеттиҥ аксагалдары христиан ака-эјелерине канайып болужып турганын билип алыгар.
a «Јакшы ла чын јӧптӧрди канайып чыгарар?» деп 35-чи урокты кӧрӱгер.
b Бу уроктыҥ «Канныҥ фракцияларыла эмденер тушта» деген 5-чи пункттын ла «Кан тузаланылып турган медицинский процедуралар» деп 3 кожултаны кӧрӱгер.
c Кезик врачтар канныҥ тӧрт тӧс компонентин фракциялар деп бодойт. Оныҥ учун слер јӱк ле канныҥ бойын урдырарынаҥ эмес, је эритроциттердеҥ, лейкоциттердеҥ, тромбоциттердеҥ ле плазмадаҥ мойноп турганаарды врач оҥдоп турган деп бӱдӱмјиленип алыгар.
Анайда ок слерге јараар болор
ЈААНТАЙЫН БЕРИЛИП ТУРГАН СУРАКТАР
Иегованыҥ Керечилериниҥ Агару Бичикти ӱренетен курсы канайып ӧдӧт?
Иегованыҥ Керечилеринде Агару Бичик неге ӱредип турганын билип аларга болужатан тузалу курс бар. Ӱредӱниҥ ӧйинде слер бойоордыҥ Агару Бичигерле тузаланар аргалу, анайда ок ӱредӱлерге бойоордыҥ билегерди ле најылараарды айдып алар аргалу.
