Wilajja wali importantewa, jan wilampejj janiw khitis jakkaspati. Niyakejjay jiwasajj Diosan luratästanjja, wilarojj kunjamsa uñjañasa uk sañatakejj jupakiw derechoni. ¿Kunsa jupajj wila toqet qhanañchistu? ¿Wila manqʼañasa wila uchayasiñas walikïskiti? ¿Uka toqet suma amtanakar puriñatakejj kunas yanaptʼistaspa?

1. ¿Kunjamsa Jehová Diosajj wilar uñji?

Bibliajj qellqaskäna uka tiemponjja, Jehová Diosajj servirinakapar akham sänwa: “Taqe kasta jakirinakan vidapajj wilankiwa” sasa (Levítico 17:14). Jehová Diosatakejja, wilajj vidampi sasiwa. Vidajj Diosan mä suma regalopawa, ukatwa wilajj wali sagradojja.

2. ¿Wila manqʼañasa wila uchayasiñas Diosatakejj walikïskiti?

Cristiano congregacionajj janïr utjkäna ukhajja, Jehová Diosajj janiw wil manqʼapjjätati sasaw servirinakaparojj säna (Génesis 9:4; Levítico 17:10 liytʼäta). Cristiano congregacionajj utj-jjäna uka qhepatjja, Jehová Diosajj uka pachpwa sarakïna. Cuerpo gobernantejja, mä arun congregación pʼeqtʼapkäna uka apostolonakampi ancianonakampejja, ‘wilat jitheqtapjjam’ sasaw cristianonakarojj sapjjäna (Hechos 15:28, 29 liytʼäta).

¿Wilat jitheqtañajj kamsañsa muni? Doctoratï jumajj janiw alcohol umañamäjjeti sasin siristam ukhajja, ¿janejjay alcohol umjjasmatejja? Janirakiw alcoholani manqʼanaksa manqʼjjasmati, ni vena toqes alcohol uchayaskasmati. Wilat jitheqtapjjam siski uka mandatojj ukar uñtasitarakiwa. Diosar istʼañ munstan ukhajja, janiw wil umañasäkiti ni manqʼañasäkisa, janirakiw wil jan apsut aychsa manqʼañasäkiti ni wilamp uchat manqʼañanaksa manqʼañasäkiti.

¿Wilamp qollayasiñ toqet kamsaraksnasa? Procedimientos médicos a sasin uñtʼatäki ukanakat yaqhepajja, Diosan leyinakap contrawa. Amuytʼañataki: wila uchayasiñajj janiw walïkiti; wilajj pusïr jaljtayaski uka glóbulos rojos, glóbulos blancos, plaquetas, plasma ukanak uchayasiñas janirakiw walïkiti. Ukampis awisajja, mä procedimientojj Diosatakejj walikïskiti janicha uka toqet janiw leyinakapajj qhanañchkiti. Sañäni: glóbulos rojos, glóbulos blancos, plaquetas, plasma ukanakat jukʼamp jiskʼa partenakar jaljtayaski ukanakampiw yaqhep tratamientonakajj lurasi. Yaqhep procedimientonakanjja, mayni pachpat apsut wilampiw qollasiraki. Taqe ukanakat parlkasajja, sapa mayniw kunjamsa qollayasini uk amtjjañapa (Gálatas 6:5). b

 JUKʼAMP YATJJATAÑÄNI

3. Jehová Diosar kusisiykir amtanakaruw puriñasa

Diosajj kunjamtï wilar uñjki ukarjamajja, ¿kunjamsa jiwasajj suma amtanakar pursna? VIDEO uñtapjjäta, ukatjja aka aynachan uñstki uka ewjjtʼanakarjam lurañajj kunatsa wali wakiskirejja uka toqetwa parltʼapjjäta:

• Diosaruw yatiñanïñ mayisiñama (Santiago 1:5).

• Biblian mä yatichäwip thaqtasajja, kunjamsa ukarjam lurasma ukwa amuytʼañama (Proverbios 13:16).

• Jakaskta uka cheqan kawkjansa qollayasisma, kunjamsa uka cheqanakan qollapjjeristam ukanakatwa yatjjatañama.

• Jumatakejj kawkïr procedimientonakamp qollayasiñas jan walïki ukwa amtañama.

• Kuna amtarutï purkäta ukajja, suma conciencianïñatakit yanaptʼätam janicha ukwa amuytʼasiñama (Hechos 24:16). c

• Janiw esposomasa ni esposamasa, ni mä ancianosa, ni Bibliat yatichirimasa, ni khitis kuntï sapa maynejj concienciaparjam mä amtar puriñapäki uk amtañapäkiti (Romanos 14:12).

• Kuna amtarutï purkäta ukjja qellqtʼasiñamawa.

4. Jehová Diosan Testigonakapajj sum qollayasiñ muntanjja

Wila toqet parlir Diosan leyipar istʼañajja, sum qollayasiñ janis puedksna ukham janiw sañ munkiti. VIDEO uñtapjjäta.

Tito 3:2 liytʼasajja aka toqetwa parltʼapjjäta:

• ¿Kunatsa doctoranakarojj suma arunakampi ukhamarak respetomp parltʼañasapuni?

 5. Fracciones sanguíneas

Wilajj aka pusir jaljatawa: glóbulos rojos, glóbulos blancos, plaquetas, plasma. Uka pusit sapa maynejja jukʼamp jiskʼa partenakaruw jaljtayasi, ukanakaw fracciones sanguíneas satajja. d Ukanakat yaqhepajja usunak qollañataki, wila wal saripan saytʼayañatak qollanakataki jan ukajj medicamentonakatakiw apnaqasi.

Fracciones sanguíneas ukanakampejj qollayasiniti janicha ukjja, sapa cristianow Bibliarjam yatichat concienciaparjam amtjjañapa. Inas yaqhep jilat kullakanakajj kunatï fracciones sanguíneas ukanakanïki uka tratamientonaksa, jan ukajj procedimientos médicos ukanak rechazañ amtapjjchini. Yaqhepanakatakejja fracciones sanguíneas ukanakampi qollayasiñajj walikïskarakispawa.

Mä amtar purkasajja akhamwa jisktʼasiñama:

• Fracciones sanguíneas ukanakat yaqhepampejj kunatsa qollayasiñ munta, jan ukajj kunatsa jan ukanakamp qollayasiñ munkta ukanakjja, ¿kunjamsa doctoranakar qhanañchiristjja?

 ¿KUNSA YATEQAWAYTAN?

Jehová Diosajja wilarojj wali sagradot uñjañaswa muni.

Amtañataki

• ¿Kunatsa Jehová Diosatakejj wilajj sagradöpacha?

• Wilat jitheqtapjjam sasin siski uka mandatojja, ¿kunatsa wila jan uchayasiñatwa parlaraki sasajj sissna?

• Wilamp qollayasiñ toqetjja, ¿kunas suma amtanakar puriñatak yanaptʼiristam?