KALANSEN 39
Joli bɛ Ala bolo cogo min na
Joli nafa ka bon kosɛbɛ. Ni joli tɛ, an si tɛ se ka to ɲɛnamaya la. Ala de ye an da, o la, yamaruya bɛ ale kelenpe de bolo k’a fɔ an ye baara bɛ se ka kɛ ni joli ye cogo min na. A ye mun de fɔ joli ko la? Yala an bɛ se ka a dun walima ka a don an farikolo la wa? I bɛ se ka latigɛli ɲumanw kɛ cogo di ka ɲɛsin o ko ma?
1. Joli bɛ cogo di Jehova bolo?
Bibulu sɛbɛn waatiw la, Jehova y’a fɔ a batobagaw ye ko: “Dafɛn bɛɛ ɲɛnamaya bɛ a joli la.” (Levitike 17:14) Jehova bolo, joli bɛ ɲɛnamaya de jira. Ikomi ɲɛnamaya ye nilifɛn senuma ye ka bɔ Ala yɔrɔ, o de la joli fana ye fɛn senuma ye.
2. Ala ko an kana baara kɛ ni joli ye sira jumɛnw fɛ?
Jehova batobaga dɔw tun bɛ yen sani krecɛnya diinɛ ka na. Jehova ye ci di olu ma ko u kana joli dun. (Jenɛse 9:4 ani Levitike 17:10 kalan.) A ye o cikan sɛmɛntiya tuma min na Ɲɛmɔgɔ kulu y’a fɔ krecɛnw ye ko u ‘kana joli dun.’—Kɛwalew 15:28, 29 kalan.
Ka an yɛrɛ tanga joli ma, o kɔrɔ ye mun ye? Ni dɔkɔtɔrɔ y’a fɔ i ye ko i k’i yɛrɛ tanga dɔlɔ ma, i tɛna dɔlɔ min. Nka yala i bɛna dumunifɛnw dun dɔlɔ bɛ minnu na walima i bɛna dɔlɔ don i jolisiraw fɛ wa? Siga t’a la ko i tɛna o kɛ cogo si la. O cogo kelen na, Ala ye cikan min di ko an ka an yɛrɛ tanga joli ma o kɔrɔ ye ko, an man kan ka joli min walima ka bagan sogo dun min joli ma bɔn. An fana man kan ka dumunifɛn si dun joli tara ka don minnu na.
Baara bɛ kɛ ni joli ye furakɛli minnu hukumu kɔnɔ, olu dun? O furakɛli fɛɛrɛ dɔw la, a bɛ ye cogo jɛlen na ko u bɛ Ala ka sariya sɔsɔ. Nin fɛn ninnu sen b’o la: Ka joli kuturu bɛɛ don mɔgɔ la walima a kɔnɔfɛnba dɔw, ni olu ye—jolikisɛbilenw, jolikisɛjɛw, plaquettes (plakɛtiw) ani plasma (plasima). Furakɛli fɛɛrɛ dɔw la, a bɛ se ka kɛ ko a tɛ da kɛnɛkan olu kɔnɔna na ko Ala ka sariya bɛ ka sɔsɔ. Misali la, baara kɛli ni joli kɔnɔfɛnba dɔ kɔnɔfɛn fitinin dɔw ye, o sen bɛ o fɛɛrɛ dɔw la. O fɛɛrɛ dɔ wɛrɛw fana ye ka baara kɛ ni i yɛrɛ joli ye. O fɛɛrɛ suguw ta fan fɛ, an bɛɛ kelen-kelen de ka kan ka latigɛli kɛ an yɛrɛ ye. a—Galasikaw 6:5.
DƆ FARA I KA DƆNNIYA KAN
Furakɛli dɔw kɔnɔna na, baara bɛ kɛ ni joli ye. Latigɛliw bɛ kɛ cogo min na ka ɲɛsin o kow ma, an ka o sɛgɛsɛgɛ.
3. Latigɛli minnu ka di Jehova ye furakɛli hukumu kɔnɔ, olu kɛ
Furakɛli cogo minnu bɛ taa ni Ala hakilina ye ka ɲɛsin joli ma, i bɛ se ka latigɛliw kɛ olu ko la cogo di? A’ye WIDEYO lajɛ, o kɔ, fɛn minnu kofɔlen bɛ dugumana na, nafa min bɛ olu kɛli la, a’ye baro kɛ o kan.
-
Delili kɛ walasa ka hakilitigiya sɔrɔ.—Yakuba 1:5.
-
Ɲinini kɛ Bibulu sariyakolow ani u waleyacogo kan.—Ntalenw 13:16.
-
A ɲini k’a dɔn o furakɛli cogo sugu minnu bɛ aw ka yɔrɔ la.
-
A ɲini k’a dɔn i tɛ sɔn o furakɛli sugu minnu ma fewu-fewu.
-
I jija i ka latigɛli kana i dusukun jalaki.—Kɛwalew 24:16. b
-
A dɔn ko mɔgɔ si, hali i furuɲɔgɔn, diinɛ maakɔrɔ, walima mɔgɔ min bɛ ka Bibulukalan kɛ i kun, olu si man kan k’a fɔ i ye i ka kan ka min latigɛ nin ko sugu la. Bawo i ka kan ka latigɛli kɛ ka kɛɲɛ ni i dusukun ye.—Romɛkaw 14:12.
-
I ye min latigɛ, o sɛbɛn.
4. Jehova Seerew bɛ furakɛli cogow bɛɛ la ɲuman de ɲini
Ala ka sariya min ɲɛsinnen bɛ joli ma, ka o waleya ani ka furakɛli cogow bɛɛ la ɲuman sɔrɔ joli tɛ min na, o bɛ se ka kɛ. A’ye WIDEYO lajɛ.
Tite 3:2 kalan, o kɔ aw ka baro kɛ nin ɲininkali kan:
-
Ni an bɛ kuma dɔgɔtɔrɔw fɛ, mun na an ka kan ka o kɛ tuma bɛɛ ni bonya ani dusu majiginnenya ye?
|
Sɔn tɛ kɛ min ma |
Krecɛn de b’a latigɛ |
|---|---|
|
A. Joli plasima |
Plasima kɔnɔfɛn fitininw |
|
B. Jolikisɛjɛw |
Jolikisɛjɛw kɔnɔfɛn fitininw |
|
C. Plakɛtiw |
Plakɛtiw kɔnɔfɛn fitininw |
|
D. Jolikisɛbilenw |
Jolikisɛbilenw kɔnɔfɛn fitininw |
5. Ni joli kɔnɔfɛnba dɔ kɔnɔfɛn fitininw sen bɛ furakɛli cogo la
Kɔnɔfɛnba naani de bɛ joli la ni olu ye: Jolikisɛbilenw, jolikisɛjɛw, plakɛtiw ani plasima. Fɛn fitinin fitinin caman bɛ o kɔnɔfɛnbaw kɔnɔ. O fɛn fitinin fitinin ninnu bɛ wele, joli kɔnɔfɛnbaw kɔnɔfɛnw. c O fɛn fitinin dɔw bɛ kɛ furaw la minnu bɛ farikolo dɛmɛ ka bana kɛlɛ walima ka a dɛmɛ ka jolibɔn jɔ.
Ni joli kɔnɔfɛnbaw kɔnɔfɛn fitinin fitininw de don, krecɛnw bɛɛ kelen-kelen de ka kan ka latigɛli kɛ u yɛrɛw ye, ka kɛɲɛ ni u dusukun kololen ye Bibulu fɛ. Krecɛn dɔw bɛ se k’a latigɛ ka ban furakɛli cogo dɔ walima furakɛli fɛɛrɛ dɔ ma, joli kɔnɔfɛnbaw, kɔnɔfɛn fitinin fitininw sen bɛ minnu na. Dɔ wɛrɛw bɛ se k’a ye ko u dusukun bɛ sɔn o joli kɔnɔfɛn fitinin fitininw ma.
I kɛtɔ ka latigɛliw kɛ, i k’i hakili jagabɔ nin ɲininkali kan:
-
Kun min na ne bɛ ban walima ne bɛ sɔn joli kɔnɔfɛnbaw, kɔnɔfɛn fitinin fitinin dɔw ma, ne bɛ se ka o ɲɛfɔ dɔgɔtɔrɔ ye cogo di?
MƆGƆ DƆ BƐ SE KA NIN ƝININKALI KƐ: “Yala ko jugu don ka sɔn joli ka don i la wa?”
-
I hakilina ye mun ye?
BAKURUBAFƆLI
Jehova b’a fɛ an ka joli jate fɛn senuma ye.
Seginnkanni
-
Mun na joli ye fɛn senuma ye Jehova bolo?
-
Jehova ye cikan min di ko an ka an yɛrɛ tanga joli ma, an b’a dɔn cogo di ko o bɛ waleya jolidon kan?
-
I bɛ se ka latigɛli ɲumanw kɛ cogo di furakɛli fɛɛrɛw ko la minnu kɔnɔna na baara bɛ kɛ ni joli ye?
NINNU LAJƐ
I ka kan ka i hakili jagabɔ mun de kan fɔlɔ sani i k’a latigɛ ka sɔn walima ka ban furakɛli fɛɛrɛw ma minnu kɔnɔna na baara bɛ kɛ ni i yɛrɛ joli ye?
I ka kan ka mun de jateminɛ tuma min na i bɛ k’a latigɛ ni i bɛ sɔn walima ni i tɛ sɔn joli kɔnɔfɛn fitinin fitininw ma?
Diinɛ maakɔrɔ dɔw bɛ baara kɛ Banabagatɔw ka kow ɲɛnabɔbagaw ka komitew la. A lajɛ olu bɛ u balimakɛw ni u balimamusow dɛmɛ cogo min na.
a Kalansen 35nan lajɛ, “An bɛ se ka latigɛli ɲumanw kɛ cogo min na.”
b Yɔrɔ 5nan lajɛ, “Ni joli kɔnɔfɛnba dɔ kɔnɔfɛn fitininw sen bɛ furakɛli cogo la,” Kunnafoni 3nan, “Joli sen bɛ furakɛli cogo fɛɛrɛ minnu na.”
c Dɔgɔtɔrɔ dɔw bɛ joli kɔnɔfɛnbaw ye i n’a fɔ o kɔnɔfɛn fitinin fitininw. O la, i ka kan ka i jija ka ɲɛfɔli kɛ i ka dɔgɔtɔrɔ ye walasa a ka i ka latigɛli faamu ka ɲɛ. A k’a faamu ka ɲɛ ko i tɛ sɔn joli kuturu bɛɛ walima jolikisɛbilenw, jolikisɛjɛw, plakɛtiw, walima plasima ka don i la.
