Nyɔmɔɔ mɔ̀ ɖɛ kpa ɖɛ ɖò cá. À seɔ́ ɓéɖéín, à ɖò seɔ́ cĩ́ɛ ɓɛ́ìn mu. Geɖepɔɔ mɔ̀ nyɔ mɛ à. Ɔ jèɛɛ, ɔ ɓéɖé kpé ɓɛ́ ɔ ké kà à ké nyɔmɔɔ kũ̀à mú nyùìn nyɛɛ jè à gbo cɛ̃. Ðɛ́ ɔ cɛ̃ ɓá nyɔmɔɔ jè dyíɛ́? À ɓɛ́ìn ɖiɛɛ̀ mɔɔ à ɓɛ́ìn nyɔ ɖò mú poɛɛ̀? Ké xwɛ̀ m̀ ɓɛ́ìn ɖɛ gbɔ poɛ nɔ̀mɔ̀ dyíin ɓá ɖɛ nìà kɛ jè dyíɛ́?

1. Xwɛ̀ Jɛhova nyu nyɔmɔɔ dya gmɔ̀ɔ̀ kɛ́?

Ðé ti sùà múɛɛ, Jɛhova cɛ̃ɛ ma ɔ ɓiè-nyɔ̀ ɓèɔ̀ gbo, ké ɔ ɖá: “Fɔ̀ɔ̀-ɖɛ̀ séínɛ̀ fɛ̀ɛ̀ɔ̀ nì ɖé wa nyɔmɔɔ̀ mú.” (Ðìvéɖékɔ̀ 17:14) Ðé Jɛhova gboɛɛ, nyɔmɔɔ mɔ̀ fɛ̀ɛ̀. Kà fɛ̀ɛ̀ mɔ̀à nyíí-ɖɛ̀ hwɛ̀ mú sɔ̀àìn ɖé Geɖepɔɔ gboɛɛ, kàà nyɔmɔɔ mɔ̀ mú-hwɛ̀-ɖɛ̀ ɖekè.

2. Ðɛ́ mɔ̀ nyɔmɔɔ kũ̀à-mú-nyùìn-kà ɓɛ́ Geɖepɔɔ nyɛ́ múɛ́?

Jɛhova cɛ̃ɛ ma ɔ ɓiè-nyɔ̀ ɓè nì ma kĩ́ín nyɛɛ gbo kà wa mɛ ɓɔ́ nyɔmɔɔ ɖiɛ kɛ. (Zà Jɛ́nɛ́sì 9:4 kè Ðìvéɖékɔ̀ 17:10 wuɖuún.) Ɔ kpa ma gma nìà kɛ kɔ̃in ɖe ti àpɔ́sò ɓèɔ̀ kè ɛ́ɖɔ̀ ɓèɔ̀ cɛ̃ɛ ma Kɛ́ɖɛ́ì ɖeín-sí-nyɔ̀ ɓèɔ̀ gbo ɓɛ́ wa ké “nyɔmɔɔ ɖi-ɖi dyi táà” kɛ.—Zà Àpɔ́sò 15:28, 29, NWT, wuɖuún.

Ðɛ́ mɔ̀ nyɔmɔɔ ɖi-ɖi dyi-táà-táà xwíníín nyɛ́? Ɔ jù ké hwòo-nyɔ̀ ɖò dyiɛ m̀ gbo cɛ̃ ɓɛ́ m̀ ké nɔmɔɔ dyi táà ní, m̀ seɛ náa mu. Kɛɛ, nì mú ɖii-ɖɛ̀ ɓɛ́ nɔmɔɔ nì gboɛɛ ɖiìnǹ, mɔɔ nì muɛ píni mú poùn ɓɛ́ m̀ kéɛ dyí ɖúù? M̀ seɛ náa nyuɛ́ mu fɔɔ. Kà dyúáɖòɔ̀ kàà, Geɖepɔɔ gma mɔ̀à táà nyɔmɔɔ ɖi-ɖi dyiɛɛ xwíníín mɔ̀, à mɛ ɓɔ́ nyɔmɔɔ náa mɔɔ suaɖɛ̀ kɔ̃̀ nyɔmɔɔ se dyi wáɖá kɛɛ ɖiɛ. Ké à mɛ ɓɔ́ ɖii-ɖɛ̀ séín ɖò ɓɛ́ nyɔmɔɔ nì gboɛɛ ɖiɛ.

Nyɔmɔɔ kũ̀à-mú-nyùìn-nyùìn ɓó kũùn jèɛɛ mɔ̀ùn ɖé? Nyɔmɔɔ kũ̀à-mú-nyùìn-nyùìn ɓó kũùn jèɛɛ ɖíɛ́ ɓè kè Geɖepɔɔ gmaɔ̀ se gbo muìn fɔɔ. Wa mɔ̀, nyɔmɔɔ gàná mɔɔ ɔ wáká jɛ́ɛ́ ɓè mɔ̀à—nyɔmɔɔ-gɛ̃̀ zĩ-zã kè nyɔmɔɔ-gɛ̃̀ púú kè nyɔmɔɔ-cɛ̃̀ ɔ kè nyɔmɔɔ-nì kɛɛ nyɔ ɖò mú po-po. Nyɔmɔɔ kũ̀à-mú-nyùìn-kà ɖíɛ́ ɓè ɓó kũùn jèɛɛ se Geɖepɔɔ gmaɔ̀ wáɖá cá. Ɔ hwɔìn-kà, nyɔ ɖíɛ́ ɓè nyùìn ɖɛ mɛ́nɛ́ɛ́ ɓè sɔ̀ìn ɖé nyɔmɔɔ̀ wáká jɛ́ɛ́ ɓèɔ̀ ɖò múɛɛ kũ̀à mú. Nyɔ tɔ̀ɔ̀ ɓè nyùìn nyɔɔ̀ mìɔùn nììn nyɔmɔɔ̀ kũ̀à mú. Ðé ɖɛ ɓè nìà kɛ jè hwìɖìi-poìn-poìn múɛɛ, à ɖò-ɖò séín kɔ̃̀ à ké ɖɛ gbɔ po ɓó à mìɔùn bìì. a—Gàɖézìà 6:5.

 ÐE ÐƐ MÚIN CÁ

3. Po ɖɛ ɓè gbɔ ɓá kũùn-dyí-ɖú-ɖú ɓɛ́ ɔ dè Jɛhova hwìɖìiɛɛ jè dyí

Xwɛ̀ m̀ ɓɛ́ìn kũùn-dyí-ɖú-ɖú ɓɛ́ ɔ dè Jɛhova hwìɖìiɛɛ jè gbɔ poɛ kɛ́? Po VÍÐÒƆ̀ kũ̀à gbo, ɓɛ́ ɓè ké kà nyuu-ɖɛ̀ ɓè kɔà ɓó dyíɛ nyu-nyu nyu ɖɛ kpaa kɛɛ jè dɔ́ɔ́ kɔ̃in dèìn.

• Ɓaà fɔ̀nɔ̀-hwòɖò jè.—Jĩ́ìn 1:5.

• Ðe ɖɛ múin ɓá Baɓo hwìè-dà-zàìn-wùɖù ɓè jè dyí, kè kà wa nyu m̀ dyí ɓáa kɛ.—Nɔ́ɔ́ 13:16.

• Cɛ̃́ kũùn-dyí-ɖú-ɖú ɓè ɓɛ́ wa nì dɛ̀ m̀ cĩ́à kɛɛ jè.

• Dyuò kũùn-dyí-ɖú-ɖúɔ̀ nyɔ m̀ ké se jè gbo wɔ̃́ìn fɔɔ kɛɛ dyí.

• Po ɖɛ ɓè ɓɛ́ wa se nì hwòɖò-xwíníín-hwòɖò-dyùàɔ̀ fũ̀à-fṹá nyùɛ̀n múɛɛ gbɔ.—Àpɔ́sò 24:16. b

• Dyuòɛ̀ dyí kà ɓɛ́ nyɔ séín ɖò—kɛbì ɔ mɛ mɔ̀ nì gmàà mɔɔ nì dyú-ɓà mɔɔ ɛ́ɖɔ̀ ɖò mɔɔ nì ɖɛ-tɛ̀mɛ̀ìn-nyɔ̀ɔ̀ kɛɛ—se kɔ̃̀ ɔ ké ɖɛ m̀ ké gbɔ po ɓá ɖɛ ɓè ɓá hwòɖò-xwíníín-hwòɖò-dyùà jè dyíɛɛ m̀ gbo cɛ̃ kɛ.—Wóɖómà 14:12.

• Céè ɖɛ ɓè m̀ po gbɔɛɛ ɓíɖíi.

4. Jɛhova Zàse ɓè mɔ́ kũùn ɓɛ́ ɔ nɔ̀mɔ̀ dyíin cá kɛ

Nyɔ ɓɛ́ìn Geɖepɔɔ gma ɓá nyɔmɔɔ jè dyíɛɛ dyi kpɔ̃ɔ, ɓɛ́ nyɔ ké kũùn nɔ̀mɔ̀ dyíin ɓɛ́ ɔ se nyɔmɔɔ dyí ɓá kɛɛ dyé. Po VÍÐÒƆ̀ kũ̀à gbo.

Zà Tátɔ̀ 3:2 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Xwíníínɔ̀ nyɛ́ kɔ̃̀ jè à mɛ ɓéɖéà kpéín-dyé-dyé kè gìɖìì ɔ jù ké à dyi hwòo-nyɔ̀ ɓè gbo wùɖùɛ̀n nììn nyɛ́?

 5. Ɔ dyi ɖɛ mɛ́nɛ́ɛ́ ɓè sɔ̀ nyɔmɔɔ wáká jɛ́ɛ́ ɓèɔ̀ ɖò múɛɛ dyí ɓá ní

Nyɔmɔɔ ɓéɖé wáká hĩinyɛ jɛ́ɛ́ ɓè. Wa mɔ̀, nyɔmɔɔ-gɛ̃̀ zĩ-zã kè nyɔmɔɔ-gɛ̃̀ púú kè nyɔmɔɔ-cɛ̃̀ ɔ kè nyɔmɔɔ-nì. Wáká jɛ́ɛ́ ɓè nìà kɛɛ mɔ̀ùn ɓéɖé wáká mɛ́nɛ́ɛ́ ɓè ɖekè. c Wa nyùìn wáká mɛ́nɛ́ɛ́ ɓèà ɖíɛ́ ɓè kũùn mú, ɓɛ́ wa ké wɛ́ ɓè gbo vɔ̃ mɔɔ ɓɛ́ wa ké jè ɖò nyɔmɔɔ mú-sɔ̀-sɔ̀ ɓɔ́í po.

Ɔ dyi nyɔmɔɔ wáká mɛ́nɛ́ɛ́ ɓèɔ̀ jè gbo dyi ní, Kɛ́ɖɛ́ì ɖeín-sí-nyɔ̀ ɖò-ɖò séín kɔ̃̀ wa kéɛ gbɔ po dyììn ɖé waà hwòɖò-xwíníín-hwòɖò-dyùàɔ̀ mú. Nyɔ ɖíɛ́ ɓè ɓɛ́ìn dyɛ̀ gbɔ poɛ ɓɛ́ wa ké se kũùn mɔɔ kũùn-dyí-ɖú-ɖú ɓɛ́ ɔ ɓá nyɔmɔɔ wáká mɛ́nɛ́ɛ́ ɓèɔ̀ dyíɛɛ dyí ɖú. Nyɔ tɔ̀ɔ̀ ɓè mɔ̀ùn ɓɛ́ìn hwìɖìi poɛ̀n kà waà hwòɖò-xwíníín-hwòɖò-dyùàɔ̀ wɔ̃́ìn gbo, ɓɛ́ wa ké nyɔmɔɔ wáká mɛ́nɛ́ɛ́ ɓèɔ̀ dyí ɖúɛ.

M̀ dyi ɖɛ nì náa gbɔ poɛń nììn, poìn dyi-diè-ɖɛ̀ nìà kɛ jè hwìɖìi:

• Xwɛ̀ ḿ ɓɛ́ìn xwíníín kɔ̃̀ jè ḿ seà nyɔmɔɔ wáká mɛ́nɛ́ɛ́ ɓèɔ̀ ɖíɛ́ ɓè mɔ́ mɔɔ xwíníín kɔ̃̀ jè ḿ mɔ́à wa ɖíɛ́ ɓè kɛɛ hwòo-nyɔ̀ ɖò gbo kɔ̃in zaìn nyɛ́?

 SṸÌN-XWÍNÍÍN

Jɛhova mɔ́ ɓɛ́ à ké nyɔmɔɔ dya gmɔ̀ kà mú-hwɛ̀-ɖɛ̀ nìà kɛ.

Ðɛ-kɔ̃in-kpa-kpa

• Xwíníínɔ̀ nyɛ́ kɔ̃̀ jè Jɛhova gmɔ̀à nyɔmɔɔ dya kà ɔ mɔ̀ mú-hwɛ̀-ɖɛ̀ kɛ́?

• Xwɛ̀ à nyuɛ dyí dyuòɛ̀ kà Jɛhova gma mɔ̀à táà nyɔmɔɔ ɖi-ɖi dyi kɛɛ ɓá nyɔmɔɔ dyí ɖú jè dyíɛ́?

• Xwɛ̀ m̀ ɓɛ́ìn ɖɛ ɓè gbɔ poɛ nɔ̀mɔ̀ dyíin ɓá nyɔmɔɔ kũ̀à-mú-nyùìn-nyùìn ɓó kũùn jèɛɛ jè dyíɛ́?