GONDO 39
Mawonelo a Txizimu ngu mnoha
Mnoha mbwa lisima ngutu. A walo awu a ndi no hanya ku si nga ni mnoha. Txizimu ngu txona txi ku ni fanelo yo womba nzila ayi mnoha wu fanelako kuthumiswa ngu yona. Txizimu txi womba txani ngu mnoha? Ina hi nga dya mnoha mwendo ku wu thumisa hi txi lwala? U nga si mahisa kutxani sisungo sa sinene ka mhaka yoneyo?
1. Ngu yahi mawonelo a Jehovha ngu mnoha?
Jehovha a gete malanda akwe a kale a txi khene: “Wutomi wa sihari wu mu ka mnoha.” (Levhi 17:14) Phela ka Jehovha, mnoha wu emela wutomi. Se i di ti to wutomi wu sawulekile ni wona mnoha wu sawulekile.
2. Ngu yahi mathumiselo a mnoha aya Txizimu txi si ma amukeliko?
Ku si se wumbwa dibanza do khata da Wukristu Jehovha a gete malanda akwe ti to ma sa fanela kudya mnoha. (Lera Genesisi 9:4 ni Levhi 17:10.) A tshumete e wuyeleta txileleto txonetxo mbimo yi Mmidi wu wu Fumako wu nga ningela mkongomiso awu wu ku “mi txi leka . . . mnoha.”—Lera Mithumo 15:28, 29.
Tiwomba txani kuleka mnoha? Ngako dhokodhela a txi kugela ti to ti lava u leka wusuke ditshuri ti to khu na ku wu sela, hi nga tona? Ina u ndi na dya sakudya asi si ku ni wusuke mwendo u maha ngu kuthela amu ka misiha? Ni ka kudotho, nguko ti ndi na fana ni ku va u txo sela. Ngu ha kufanako mlayo wa Txizimu wu womba ti to hi leka mnoha, i ku tiya: Kha ha fanela kusela mnoha mwendo kudya nyama ayi yi nga mbi theketwa mnoha wa yona. Ni ku kha ha fanela kudya sakudya asi si nga bhikwa si di patilwe ni mnoha mwendo wubenze.
Se kuwombwa txani ngu mathumelo aya ma patako mnoha? Mathumelo mamwani kha ma tsimbitisani ni milayo ya Txizimu. Eto ti pata kuthelwa mnoha ngu kukongoma mwendo ngu kuthumisa sienge sa wona; i ku maselula o bhilivila a mnoha, maselula o basa, maplaketa ni plasma. Kambe ka makhambi mamwani kha ti hehuki kutumbula to mathumelo awa, ma tsimbitisana ni mlayo wa Txizimu mwendo ahim-him. Ngu txikombiso, ka mathumelo mamwani va thumisa sienge sa sidotho sa mnoha. Kasi vamwani va thumisa mnoha wa mlwati ngu kukongoma. Se ti txita ka mhaka yo maha txisungo, mmwani ni mmwani a fanete ku ti mahela txisungo txakwe apune. a—Vagalatiya 6:5.
ENGETELA WUZIVI WAKO
Wona to u nga txi mahisa kutxani txisungo mayelano ni nzila yi u lavako kuthumwa ngu yona.
3. Sawula mathumelo aya ma no tsakisa Jehovha
U nga ma sawulisa kutxani mathumelo aya ma tsimbitisanako ni mawonelo a Jehovha ngo mnoha? Xalela VHIDHIYO, mi gwita mi bhula ngu lisima lo thumisa timhaka ati ti londiselako.
-
Kombela wutxhari ka Jehovha.—Jakobe 1:5.
-
Xolisisa matshina a milayo ya Bhiblia ni kuwona nzila ayi u nga ma thumisako ngu yona.—Mavingu 13:16.
-
Zama kutumbula mathumelo aya ma nga toloveleka ka wukhalo awu u zumbako ka wona.
-
Ziva mathumelo aya u si ma tsakeliko.
-
Tsaniseka ti to txisungo txako txi na ku siya u di ni livhalo lo basa.—Mithumo 24:16. b
-
Khumbula ti to a walo awu a nga ku mahelako txisungo mayelano ni timhaka ati ti yelanako ni livhalo lako. Ku ngava mwamna, msikati, didhota mwando awu a ku gondelako Bhiblia.—Varoma 14:12.
-
Bhala ka diphepha txisungo txako.
4. Tifakazi ta Jehovha ti lava mathumelo a dihanyo aya i ku a manene
Phela ta koteka kuengisa mlayo wa Txizimu mayelano ni mnoha, u tshumela u thumwa malwati ngu nzila ya yinene ayi yi si patiko mnoha. Xalela VHIDHIYO.
Lera Titosi 3:2, mi gwita mi bhula ngu txiwotiso txiya:
-
Ngu kutxani i di ta lisima kuwomba-womba ni va dhokodhela ngu nzila ya txixonipho ni yo thutha?
|
Mathumelo aya Makristu ma si ma tumeleliko |
Ati Mkristu a fanelako ku ti mahela txisungo ka tona |
|---|---|
|
A. Plasma |
Mafrasawu a plasma |
|
B. Maselula o basa a mnoha |
Mafrasawu a maselula o basa |
|
C. Maplaketa |
Mafrasawu a maplaketa |
|
D. Maselula o bhilivila |
Mafrasawu a maselula o bhilivila |
5. Ngako ku txi pateka mafrasawu a mnoha
Mnoha wu ni mune wa sienge sa lisima, i ku maselula a mnoha o bhilivila, maselula o basa a mnoha, maplaketa ni plasma. Sienge soneso sa mune si nga abaniswa ngu sienge sa sidotho asi si dhanwako ku mafrasawu a mnoha. c Mamwani a mafrasawu onewo ma thumiswa ka mirende kasi kuthuma malwati mwendo kuemisa mnoha.
Mayelano ni mafrasawu a mnoha, Mkristu mmwani ni mmwani a fanete ku ti mahela txisungo ngu kuya ngu livhalo lakwe ali li nga gondiswa ngu Bhiblia. Ti nga maha vamwani ve lamba kuthumwa ngu kuthumisa mafrasawu a mnoha. Kasi vamwani va nga tumela.
Mbimo yi u ti mahelako txisungo alakanyisisa ngu txiwotiso txiya:
-
Ni nga mu txhamuselisa kutxani dhokodhela wangu txivangelo atxi txi ni mahako ni lamba mwendo kutumela mafrasawu a mnoha?
NGAKO VAMWANI VA TXI WOTISA VA TXI: “Ngu tihi ati ti nga biha ngako ni txo tumela kuthelwa mnoha?”
-
U nga khawe txani?
ATI HI NGA TI WONA
Jehovha a lava ti to hi xonipha mnoha.
Ngu tihi ti u nga ti gonda
-
Ngu kutxani mnoha i di wo sawuleka ka Jehovha?
-
Hi tizivisa kutxani ti to mlayo wa Txizimu wo hi nga dyeni mnoha wa thuma ni ka mhaka yo thelwa mnoha?
-
Hi nga si mahisa kutxani sisungo sa sinene mayelano ni kwa mbi thelwa mnoha ngako hi di sibhejela?
XOTA TIMWANI
Ngu tihi ati u fanelako ku ti khumbula u si se maha txisungo txa ti to wa tumela to kuthumiswa mnoha wako mbimo yi u thumwako mwendo ahi-him?
“Tixamulo ta siwotiso sa vagondi” (Muwoneleli wa 15 ka Outubro wa 2000)
Ngu tihi ati u fanelako ku ti khumbula u si se maha txisungo txa ti to u na tumela mwendo kulamba mafrasawu?
“Tixamulo ta siwotiso sa vagondi” (Muwoneleli wa 15 ka Junho wa 2004)
Ngu tihi ati ti nga maha to dhokodhela wo kari e kholwa ti to mawonelo a Jehovha mayelano ni mnoha nga manene?
“Ni tumete mawonelo a Txizimu mayelano ni mnoha” (Khenjemuka! wa 8 ka Dezembro wa 2003)
Wona ati madhota aya ma thumako ka Komisawu yo Womba-womba ni Sibhejela ma va vhunisako tona vanathu.
b Wona ponto 5, aha ku ku: “Sienge simwani sa mnoha,” ni Txhamuselo yo gwitisa 3, “Mathumelo aya ma patako mnoha”, wona kambe, Ministério do Reino, wa Novembro wa 2006, mapajina 3, 4 5-6.
c Vadhokodhela vamwani va dhana sienge sa mune sa mnoha va txi mafrasawu. Ngu toneto ti lava u tsaniseka ti to dhokodhela wako wa ti pfisisa ti to awe khu tumeli kuthelwa mnoha mwendo sienge sa wona sa mune i ku maselula a mnoha o bhilivila, maselula a mnoha o basa, maplaketa ni plasma.
