ISHOMO RYA 39
Oku Ruhanga ari kureba eshagama
Eshagama ni ey’omugasho. Tihariho omuntu ori kubasa kubaho atagine. Obwe rero, ahabw’okuba Ruhanga ari Omuhangi, ayine obugabe bw’okutugambira oku eshemerire kukoresibwa. Ni bata oku ari kureba eshagama? Mbehi tushemerire kuyirya ninga kuyiterwa? Kandi shi ni bata oku ori kubasa kukora ensharamu ndungi aha bikwatirine n’okukoresa eshagama?
1. Ni bata oku Yehova ari kureba eshagama?
Yehova akagambira abahereza beye b’omu bwire bwa kare ngu: ‘Amagara g’ekihangirwe cona gari omu shagama yaco.’ (Abaleevi 17:14) Ahari Yehova eshagama negeranisa amagara. Obwe rero, obu amagara gari ekiconco ekiri kwera eki Ruhanga yatuhire, eshagama na yo ni eri kwera.
2. Ni buha buryo bw’okukoresa eshagama obu Ruhanga ari kwanga?
Bwanyima y’omwijuro Yehova akaragira abahereza beye kutarya eshagama, kandi eco kiragiro akashuba yakiragira ihanga ry’Abisirayeli. (Shoma omu Kutandika 9:4 n’omu Baleevi 17:10.) Hahwire ebinyigana byingi akakihamya ari kugambira ekibina c’Abakristo ‘kureka kurya eshagama.’—Shoma omu Byakozirwe 15:28, 29.
Mbwenu shi okureka kurya eshagama nikimanyisa ki? Dokita yakugambira ngu oruge aha marwa naba yamanyisa ngu otaganywa. Konka shi okarya ebyokurya birimu amarwa ninga oyikiriza ngu bagakutere omu misi? Ingaha mazima. Ni co kimwe, ekiragiro ca Ruhanga c’okureka eshagama nikimanyisa okutagirya, kwerinda kuginywa ninga shi kurya enyama ezitajwisibwe. Kandi nambwenu titushemerire kurya ebyokurya ebi batiremu eshagama.
Kandi shi ebikwatirine n’okukoresa eshagama omu by’okutambirwa? Oburyo bumwe bw’okutambirwa nibushisha ebiragiro bya Ruhanga. Nibutwariramu okuterwa eshagama yona, ninga shi ebicweka byayo bikuru ari byo enshoro eziri kutukura, enshoro eziri kwera, omushongi, n’otukwasi. Hariho oburyo bw’okutambirwa obu ori kushanga kigumire kumanya yaba buri kushisha ebiragiro bya Ruhanga. Ecokureberaho: Oburyo bumwe bw’okutambirwa nibutwariramu okukoresa obucweka bw’omu bicweka bikuru by’eshagama. Obundi nibutwariramu okukoresa eshagama y’omuntu. Omuntu n’iwe ori kweshariramu oburyo bw’okutambirwa. *—Abagalatia 6:5.
YEGA BYINGI
Shwijuma oku ori kubasa kukora ensharamu ndungi aha bikwatirine n’okukoresa eshagama.
3. Kora ensharamu eziri kushemeza Yehova omu bikwatirine n’okutambirwa
Ni bata oku ori kubasa kukora ensharamu eziri kushemeza Ruhanga omu bikwatirine n’okutambirwa? Zana VIDIYO, rero muganire aha bintu by’omugasho ebi ori kubasa kukora ebiri kukurataho:
-
Shaba Yehova akuhe obwenge.—Yakobo 1:5.
-
Condoza aha misinge y’omuri Bibuli orebe n’oku ori kubasa kuyita omu nkora.—Enfumu 13:16.
-
Shwijuma omanye ge oburyo oburi kukoresibwa omu kacweka k’owanyu.
-
Reba oburyo bw’okutambirwa obu otari kubasa kwikiriza.
-
Reba yaba ensharamu ezi ori kukora ziri kutuma wagira omuntuwomunda murungi.—Ebyakozirwe 24:16. *
-
Yijuka ku hatariho omuntu n’omwe oshemerire kukorera ensharamu n’obu yakuba owu mwatasine, omuzehe ninga ori kukwegesa Bibuli.—Abarooma 14:12.
-
Handika ebi washaramu.
4. Abahamya ba Yehova nibaronda oburyo burungi bw’okutambirwa
Nitubasa korobera ekiragiro ca Ruhanga ekikwatirine n’okwerinda eshagama kandi tutambirwa hatakoresibwe eshagama. Zana VIDIYO.
Shoma omuri Tito 3:2, rero muganire ahari eki kibuzo:
-
Ahabw’enki tushemerire kwereka omutima g’okukwatanisa n’obucurezi twaba turi kuganira n’abadokita aha bikwatirine n’oburyo bw’okutambirwa?
|
Ebitikirizibwe |
Ebi Omukristo ari kweshariramu |
|---|---|
|
Otukwasi |
Obucweka buce oburi kuruga omu tukwasi |
|
Enshoro eziri kwera |
Obucweka buce oburi kuruga omu nshoro eziri kwera |
|
Omushongi |
Obucweka buce oburi kuruga omu mushongi |
|
Enshoro eziri kutukura |
Obucweka buce oburi kuruga omu nshoro eziri kutukura |
5. Waba ori kwenda kukoresa obucweka bw’eshagama
Eshagama erimu ebicweka bina bikuru ari byo enshoro eziri kutukura, enshoro eziri kwera, omushongi, n’otukwasi. Ebyo bicweka birimu obundi bucweka buce. * Bumwe omuri obwo bucweka nibabukoresa bari kutamba endwara ezitari zimwe ninga shi bari kwenda kuzibira eshagama kuguma kujwa.
Aha bikwatirine n’otucweka tuce tw’eshagama, Omukristo naba ashemerire kweshariramu akuratize omuntuwomunda weye owamanyizibwe na Bibuli. Abamwe nibabasa kusharamu kwanga kutambirwa hakoresibwe obucweka buce bw’eshagama. Abandi bo nibabasa kureba kitine enshonga kubatambira hakoresibwe obwo bucweka.
Obwe rero waza kukora ensharamu, shwijuma ebi bibuzo oyetonzire:
-
Ahabw’enki ori kubasa kwanga ninga shi okikiriza otucweka tuce tw’eshagama.
-
Ni bata oku ori kubasa kubishobororera dokita?
ABANTU ABAMWE NIBABASA KUBUZA NGU: “Ni ziha ngaruka eziri kubasa kumpikaho nayikiriza kuterwa eshagama?”
-
Iwe nokigambaho enki?
EMPINYE
Bibuli netugambira oku Yehova ari kwenda ngu tukorese eshagama.
Wayega ki?
-
Ahabw’enki Yehova ari kureba eshagama nk’eri kwera?
-
Nitumanya tuta ku ekiragiro ca Ruhanga c’okwerinda eshagama, kiri kutwariramu n’okwerinda kugiterwa?
-
Ni bata oku ori kubasa kukora ensharamu ndungi aha bikwatirine n’okutambirwa hakoresibwe eshagama?
CONDOZA
Ni biha bintu ebi oshemerire kutekatekaho waza kukora ensharamu y’okutambirwa hakoresibwe eshagama yawe?
“Ebibuzo by’abashomi” (Omunara g’Omurinzi, 15 Okwikumi, 2000)
Ni enki eki oshemerire kubanza watekatekaho waza kusharamu aha bikwatirine n’okwikiriza obucweka buce bw’eshagama?
“Ebibuzo by’abashomi” (Omunara g’Omurinzi, 15 Okwamukaga, 2004)
Ni enki ecatumire dokita yayikiriza ku oku Yehova ari kureba eshagama kiri ec’obwenge?
“Nkikiriza kureba eshagama nk’oku Ruhanga ari kugireba” (Musisimuke!, 8 Okwikuminabiri, 2003)
Reba oku abazehe abari kukora omuri Komiti y’okukwasa abarwire bari kuyamba benetata na banyanyazi.
^ Reba Ishomo rya 35, eryine omutwe oguri kugira ngu: “Oku ori kubasa kukora ensharamu ndungi.”
^ Reba akacweka ka 5, akari kugira ngu: “Waba ori kwenda kukoresa obucweka buce bw’eshagama,” n’Enyongezo ya 3, eri kugira ngu: “Oburyo bw’okutambirwa hakoresibwe eshagama.”
^ Abadokita abamwe nibareba ebicweka bikuru by’eshagama nk’obucweka buce. Obwe rero noba oshemerire kubashobororera ensharamu yawe y’oku otari kwikiriza kuterwa eshagama yona ninga shi enshoro eziri kutukura, enshoro eziri kwera, omushongi, n’otukwasi.
