Thi cu a biapi tukmi a si. Thi loin ahohmanh kan nung kho lo. Sertu in Pathian cu thi hman ning kong he aa tlaiin chimnak nawl a ngei. Pathian nih thi kong he aa tlaiin zeidah a chim? Thi cu ei khawh asiloah i rawnh khawh a si maw? Mah kong he aa tlaiin zeitindah a ṭhami biakhiahnak na tuah khawh?

1. Thi he aa tlaiin Jehovah hmuhnak cu zeidah a si?

Jehovah nih Baibal chan lioah amah a biami hna kha hitin a ti hna: “Titsa vialte nunnak cu an thi cu a si.” (Levitikas 17:14) Jehovah hmuhnak ah thi nih nunnak kha a aiawh. Nunnak cu Pathian sinin kan hmuhmi a sunglawi tukmi laksawng a si caah thi zong a sunglawi tukmi laksawng a si ve.

2. Pathian nih thi kong he aa tlaiin zeidah a chim?

Buanchukcho hnu tlawmpal ah Jehovah nih amah a biami hna kha thi ei lo dingin nawl a pek hna. Cun hlanlio Israel mi hna zong mah nawlbia kha a pek ṭhan hna. (Genesis 9:4 le Levitikas 17:10 rel.) Khrihfabu dirh a si hnu zongah Jehovah nih mah nawlbia kha a pek ṭhan hna. Uktu bu nih Khrihfa hna kha hitin lamhruainak an pek hna: “Thi ei kha i sum u.”—Lamkaltu 15:28, 29 rel.

Thi ei i sum timi cu zei sullam dah a si? Siibawi pakhat nih zu din kha i sum tiah aan ti ahcun zu kha na ding lai lo. Asinain zu aa telmi rawl kha na ei lai maw asiloah zu kha na thahri in naa rawnh lai maw? Cutin na tuah lai lo. Cu bantukin Pathian nih thi ei i sum u tiah a kan ti tikah thi ei lo, thi i rawnh lo asiloah a thi a chuak lomi saram sa ei lo kha a chim duhmi a si. Cucaah thi aa telmi zei rawl hmanh kan ei awk a si lo.

Thi hmangin siithlopnak kong he aa tlaiin tah zeitin? Cheukhat siithlop ning nih Pathian nawlbia kha hlangfang tein a buar. Mah ah thi asiloah thi cheubang a simi, thi sen cell, thi rang cell, thi tlangtete [platelet] le thi a hang [plasma] i rawnhnak zong aa tel. Cheukhat siithlop ning nih cun Pathian nawlbia kha hlangfang tein cun a buar men lai lo. Tahchunhnak ah, cheukhat siithlop ning ah cun a biapimi thi cheubang pakhat in ṭhen ṭhanmi thi cheubang hna hmannak aa tel. A dang siithlop ning ah cun mi pakhat i amah a thi hmannak aa tel. Cu bantuk kong he aa tlaiin thimnak tuah a herh tikah kanmah pakhat cio nih biakhiahnak kan tuah a hau. a—Galati 6:5.

 TAM DEUH IN HLATHLAI

3. Siithlopnak kong he aa tlaiin Jehovah lung a lawmhtermi biakhiahnak tuah

Siithlopnak kong he aa tlaiin Pathian hmuhning he aa tlakmi biakhiahnak kha zeitindah na tuah khawh? VIDEO kha piah, cun mah biahalnak hi i ruah u. Biakhiahnak tuah hlanah a tanglei ah langhtermi kehlan hna hlan cu zeicah a biapit?

• Fimnak caah thlacam.—Jeim 1:5.

• Baibal phunglam le aa pehtlaih ning kong hlathlai.—Phungthlukbia 13:16.

• Na umnak hmun ah zei bantuk thimnak dah tuah khawh a si timi kong kha hlathlai.

• Na caah zei bantuk thimnak dah cohlan lo ding a si ti kha hngalh awkah i zuam.

• Na biakhiahnak nih a thiangmi chiaṭha thleidannak lungthin aan ngeihter nakhnga i zuam.—Lamkaltu 24:16. b

• Chiaṭha thleidannak lungthin kong he aa tlaiin zei bantuk biakhiahnak dah na tuah awk a si ti kha na innchunghawi, Khrihfa upa le Baibal aan cawnpiaktu i telin ahohmanh nih an in chimh awk a si lo ti kha hngal.—Rom 14:12.

• Biakhiahnak na tuahmi kha i ṭial.

4. Jehovah Tehte Hna nih a ṭha bikmi siithlop ning kha an kawl

Thi kong he aa tlaimi Pathian nawlbia kha zulh khawh a si i thi aa tel lomi a ṭha bikmi siithlop ning zong kha cohlan khawh a si. VIDEO kha piah.

Titas 3:2 rel law mah biahalnak hi i ruah u:

• Siibawi te he bia kan i ruah tikah zeicah nemnak le upatnak kha kan langhter zungzal awk a si?

 5. Thi cheubang aa tel tikah

Thi cu a bik in phunli in ṭhen a si, mah cu—thi sen cell, thi rang cell, thi tlangtete [platelet] le thi a hang [plasma] an si. Mah thi phunli kha a hmetete in an ṭhen ṭhan i mah kha thi cheubang tiah auh a si. c Cheukhat thi cheubang hna kha zawtnak thlopnak ca asiloah thi pihnak caah a bawm khomi sii hna caah an hman.

Thi cheubang kong he aa tlaiin Khrihfa pakhat cio nih Baibal in cawnpiakmi an chiaṭha thleidannak lungthin cungah hrambunh in biakhiahnak an tuah a hau. Mi cheukhat nih thi cheubang aa telmi siithlopnak hna kha cohlan lo dingin biakhiahnak an tuah men lai. Asinain mi cheukhat nih cun an chiaṭha thleidannak lungthin nih thi cheubang kha cohlan awkah a awnh tiah an ruah men lai.

Biakhiahnak na tuah tikah mah biahalnak hi ruat:

• Siibawi pakhat sinah thi cheubang hman kha zeicah ka cohlan lo asiloah zeicah ka cohlan ti kha zeitindah ka fianter khawh lai?

 A TAWINAK

Jehovah nih thi ningcang loin hmannak kha hrial hna seh ti a kan duh.

I Ruahṭi Ṭhannak

• Jehovah nih thi kha zeicah a sunglawi tukmi in a hmuh?

• Thi ei i sum u timi Pathian nawlbia cu thi rawnhnak he zong aa pehtlaimi a si ti kha zeitindah kan hngalh khawh?

• Thi aa telmi siithlop ning kong he aa tlaiin zeitindah a ṭhami biakhiahnak na tuah khawh?