Disan i tre enportan. Napa enn antre nou ki ti pou vivan si nou ti napa disan. Vi ki Bondye in kree nou, i annan sa drwa pour dir ki mannyer disan i kapab ganny servi. Ki i’n dir konsernan disan? Eski nou kapab manz disan ouswa fer transfizyon disan? Ki mannyer ou kapab fer bann bon desizyon dan sa domenn?

1. Ki pwennvi Zeova lo disan?

Dan letan Labib, Zeova ti dir son bann adorater: “Lavi tou sa ki vivan i dan son disan.” (Levitik 17:14, NWT) Pour Zeova, disan i reprezant lavi. Lavi i en kado sakre oubyen sen sorti kot Bondye, alor disan osi i vreman sakre.

2. Ki Bondye i defann nou fer avek disan?

Depi avan lepok bann Kretyen, Zeova ti demann son bann adorater pour pa manz disan. (Lir Zenez 9:4 ek Levitik 17:10.) I ti repet sa lord ler konsey direkter ti demann bann Kretyen pour “pa servi disan.”​—Lir Akt 15:28, 29.

Ki savedir pa servi disan? Si en dokter i dir ou pa servi lalkol, ou pa pou bwar li. Me eski ou pou manz bann manze ki annan lalkol ladan oubyen pran lalkol dan ou lavenn? Definitivman ou pa pou fer sa. Pareyman, ler Bondye i dir nou pa servi disan, sa i vedir ki nou pa devret bwar disan oubyen manz bann lavyann ki pa’n ganny sennyen. Nou pa devret osi manz okenn manze ki’n ganny fer avek disan.

Me ki nou pou dir dan domenn medikal kot disan i ganny servi? Serten prosedir medikal i kont lalwa Bondye. Sa i enkli transfizyon disan oubyen transfizyon enn son bann konponan prensipal parey globil rouz (red cells), globil blan (white cells), plaket (platelets) ek plasma. Par kont, i annan lezot prosedir medikal kot i pa sitan kler si sa i kas lalwa Bondye. Par egzanp, serten prosedir i servi bann pti fraksyon enn sa konponan prensipal dan disan. I annan lezot prosedir kot disan sa dimoun i ganny servi. Konsernan sa bann opsyon, sak endividi i bezwen fer son prop desizyon. a​—Galat 6:5.

 AL PLI O PROFON

3. Fer bann desizyon medikal ki fer plezir Zeova

Ki mannyer ou kapab fer bann desizyon medikal ki annakor avek pwennvi Bondye? Zwe sa VIDEO e apre diskite akoz i enportan pour fer sa bann keksoz ki swiv.

• Priye pour ganny lasazes.​—Zak 1:5.

• Fer resers lo bann prensip Labib e lo konman ou kapab aplik zot.​—Proverb 13:16.

• Rode ki bann opsyon medikal i annan kot ou reste.

• Idantifye ki bann opsyon ki definitivman pa akseptab pour ou.

• Fer sir ki ou desizyon i fer ou annan en konsyans kler.​—Akt 24:16. b

• Rekonnet ki personn, ni menm ou konzwen, en ansyen oubyen ou ansenyan Labib, pa devret dir ou ki desizyon ou devret fer dan domenn kot i konsern ou konsyans.​—Romen 14:12.

• Met ou desizyon an ekri.

4. Temwen Zeova i rod sa pli bon swen medikal

I posib pour obei lalwa Bondye konsernan disan e resevwar sa pli bon swen medikal kot disan pa ganny servi. Zwe sa VIDEO.

Lir Tit 3:2 e apre reponn sa kestyon:

• Akoz nou devret toultan demontre respe ek ladouser ler nou pe koz avek bann travayer lasante?

 5. Bann fraksyon disan

Disan i annan kat konponan prensipal. Sa i globil rouz, globil blan, plaket ek plasma. Sa bann konponan prensipal i annan bann pli pti porsyon ki apel fraksyon. c Sa bann fraksyon i ganny servi dan serten tretman medikal ki ede konbat kont serten maladi oubyen ede aret sennyman.

Konsernan bann fraksyon disan, sak Kretyen i bezwen fer son prop desizyon par servi son konsyans ki’n ganny antrennen par Labib. Serten i kapab deside pour refiz okenn tretman medikal oubyen prosedir ki enplik bann fraksyon disan. Tandis ki lezot i kapab santi ki zot konsyans i permet zot pour aksepte sa bann fraksyon.

Ler ou pe fer desizyon, reflesir lo sa kestyon:

• Ki mannyer mon ti pou eksplik en dokter akoz mon pa aksepte oubyen aksepte serten fraksyon disan?

 REZIMEN

Zeova pa oule ki nou mal servi disan.

Revizyon

• Akoz Zeova i vwar disan konman sakre?

• Ki mannyer nou konnen ki ler Bondye i demann nou pour pa servi disan, sa i aplikab pour transfizyon disan?

• Ki mannyer ou kapab fer bann bon desizyon konsernan bann tretman medikal ki enplik servi disan?