ADZESUA 39
Nyankopɔn Bu Bɔgya Dɛn?
Bɔgya ho hia paa. Sɛ yennyi bi a, hɛn mu biara runntum nntsena ase. Nyankopɔn na ɔbɔɔ hɛn, ntsi ɔno na ɔwɔ ho kwan dɛ ɔkyerɛ hɛn adze a yebotum dze bɔgya ayɛ. Ebɛn asɛm na ɔaka afa bɔgya ho? Aso yebotum edzi anaa yaagye akɔ hɛn mu? Afei so, ibesi dɛn esi gyinae pa wɔ bɔgya ho?
1. Jehovah bu bɔgya dɛn?
Bible no ma yehu dɛ tsetse no, Jehovah kaa kyerɛɛ n’asomfo dɛ: “Honam nyinara no nkwa nye no bɔgyaa.” (Leviticus 17:14) Wɔ Jehovah n’enyi do dze, bɔgya gyina hɔ ma nkwa. Nkwa yɛ akyɛdze soronko bi a ofi Nyankopɔn hɔ, na dɛmara so na bɔgya tse.
2. Ebɛn asɛm na Nyankopɔn aka afa bɔgya ho?
Ansaana wɔdze Christianfo asafo no ribesi hɔ no, Jehovah hyɛɛ n’asomfo dɛ mma wonndzi bɔgya. (Kenkan Genesis 9:4 na Leviticus 17:10.) Aber a wɔdze Christianfo asafo no sii hɔ ekyir no, Jehovah saan so sii dɛm ahyɛdze yi do bio. Akwankyerɛ kuw a nna ɔwɔ hɔ dɛm aber no dze akwankyerɛ maa Christianfo no dɛ: ‘Hom nyi homho mfi bɔgya ho.’—Kenkan Asomafo Ndwuma 15:28, 29.
Yebesi dɛn atwe hɛnho efi bɔgya ho? Sɛ dɔkta bi ka kyerɛ wo dɛ twe woho fi nsa ho a, eronnom. Naaso, ana ibedzi edziban a nsa wɔ mu anaa ebɛma wɔdze nsa afa wo ntsin mu egu wo mu? Erennyɛ dɛm da. Dɛmara na ahyɛdze a Nyankopɔn dze ama hɛn dɛ yɛntwe hɛnho mfi bɔgya ho no so tse. Dɛm ahyɛdze yi kyerɛ dɛ ɔnnsɛ dɛ yɛnom bɔgya anaa yɛwe abowa bi a woenntwa ne men ne nam. Dɛmara so na ɔnnsɛ dɛ yedzi edziban bi a wɔdze bɔgya ayɛ.
Na bɔgya a wɔdze sa yarba so ɛ? Ayarsa ahorow bi wɔ hɔ a otsia Nyankopɔn ne mbra pefee. Ayarsa a ɔtsetse dɛm no bi nye dɛ obi bɛgye bɔgya ankasa, anaa ɔbɛgye bɔgya mu ndzɛmba etsitsir anan no bi. Dɛm ndzɛmba anan no nye bɔgya mu nkwambowa kɔkɔɔ, bɔgya mu nkwambowa fitaa, bɔgya mu nkwambowa tɛtɛrba nye bɔgya mu nsu. Ayarsa ahorow bi so nntsia Nyankopɔn ne mbra pefee. Dɛ mfatoho no, ayarsa no bi wɔ hɔ a, wɔdze ndzɛmba nketsenketse bi a wonya fi bɔgya mu ndzɛmba etsitsir anan no mu kor mu na wɔdze yɛ. Ɔyɛ so a, wotum dze nyimpa nankasa no bɔgyaa dzi dwuma wɔ ayarsa ahorow bi mu. Sɛ obi bɛgye ayarsa a ɔtse dɛm ato mu o, sɛ ɔrenngye nnto mu o, ɔyɛ nyimpa nankasa na ɔsɛ dɛ osi ho gyinae. a—Galatiafo 6:5.
PƐNSAPƐNSA MU KƆ EKYIR
Ma yɛnhwɛ kwan a ebɛfa do esi bɔgya a wɔdze bedzi dwuma wɔ w’ayarsa mu no ho gyinae.
3. Si ayarsa a ɔsɔ Jehovah n’enyi ho gyinae
Ibesi dɛn esi ayarsa ho gyinae a Nyankopɔn gye to mu? Ma yɛnhwɛ VIDEO yi, na yensusu siantsir a no ho hia dɛ isusu anamɔn a odzidzi do no ho:
-
Bɔ mpaa hwehwɛ nyansa.—James 1:5.
-
Hwehwɛ Bible mu afotusɛm na susu kwan a ibotum afa do dze ayɛ edwuma no ho.—Mbɛbusɛm 13:16.
-
Hwehwɛ ayarsa ahorow a wo nsa botum aka wɔ beebi a ewɔ no.
-
Hu ayarsa ahorow a ennkɛgye ato mu koraa no.
-
Gyinae biara a ibesi no, hwɛ hu dɛ ɔrennhaw wo tsibowa.—Asomafo Ndwuma 24:16. b
-
Sɛ ɔba no tsibowa ho asɛm a, hu dɛ ɔsɛ dɛ woara na isi wo gyinae. Wo hokafo, asafo mu panyin, anaa wo Bible kyerɛkyerɛfo mpo runntum nnsi gyinae mma wo.—Romefo 14:12.
-
Kyerɛw gyinae a ibesi no to hɔ ama nyimpa afofor so eehu gyinae a esi no.
4. Jehovah Adasefo pɛ ayarsa a ɔyɛ papa
Yebotum dze Nyankopɔn ne mbra a ɔfa bɔgya ho no ayɛ edwuma na ber kor no ara so yeenya ayarsa papa a wɔremmfa bɔgya nndzi dwuma wɔ mu. Ma yɛnhwɛ VIDEO yi.
Ma yɛnkenkan Titus 3:2, na yensusu asɛmbisa yi ho:
-
Ebɛnadze ntsi na ɔsɛ dɛ yefi ɔdwe na obu mu nye adɔktafo kasa?
|
Dza yɛrenngye |
Dza Christiannyi bi ankasa besi ho gyinae |
|---|---|
|
A. Bɔgya mu nsu |
Bɔgya mu nsu mu ndzɛmba nketsenketse |
|
B. Nkwambowa fitaa |
Nkwambowa fitaa mu ndzɛmba nketsenketse |
|
D. Nkwambowa tɛtɛrba |
Nkwambowa tɛtɛrba mu ndzɛmba nketsenketse |
|
E. Nkwambowa kɔkɔɔ |
Nkwambowa kɔkɔɔ mu ndzɛmba nketsenketse |
5. Ayarsa a bɔgya mu ndzɛmba nketsenketse wɔ mu
Ndzɛmba etsitsir anan bi na ɔka bɔ mu yɛ bɔgya. Dɛm ndzɛmba no nye nkwambowa kɔkɔɔ, nkwambowa fitaa, nkwambowa tɛtɛrba, na bɔgya mu nsu. Ndzɛmba nkakraba pii na ɔwɔ dɛm ndzɛmba etsitsir anan yi mu biara mu. Dɛm ndzɛmba nkakraba yi, wɔfrɛ no bɔgya mu ndzɛmba nketsenketse. c Ɔyɛ a wɔdze ndzɛmba nkakraba yi bi yɛ ndur dze ko tsia yarba ahorow. Anaaso dɛ wotum dze yɛ ndur a sɛ bɔgya rutu obi a wɔdze ma no ma bɔgya no twa.
Sɛ ɔba no bɔgya mu ndzɛmba nketsenketse ho gyinaesi a, ɔsɛ dɛ Christiannyi biara gyina ne tsibowa a ɔdze Bible atsetse no do si gyinae. Binom wɔ hɔ a hɔn tsibowa ntsi, wobotum esi gyinae dɛ wɔrenngye ayarsa anaa edur a bɔgya mu ndzɛmba nketsenketse wɔ mu. Christianfo binom so tse nka dɛ sɛ wɔpen bɔgya mu ndzɛmba nketsenketse do wɔ hɔn ayarsa mu a, hɔn tsibowa rennhaw hɔn.
Sɛ irisi wo gyinae a, ɔyɛ a susu asɛmbisa yi ho:
-
Mibesi dɛn akyerɛkyerɛ mu akyerɛ dɔkta bi ma oeehu siantsir a megye bɔgya mu ndzɛmba nketsenketse bi to mu anaa siantsir a menngye nnto mu?
BI A OBI BEBISA DƐ: “Ɔyɛ bɔn dɛ obi bɛgye bɔgya?”
-
Edwen ho dɛn?
DZA ESUA
Jehovah pɛ dɛ yebu bɔgya dɛ ɔyɛ krɔnkrɔn.
Mbobɔdo
-
Ebɛnadze ntsi na Jehovah bu bɔgya dɛ ɔyɛ krɔnkrɔn?
-
Ahyɛdze a Nyankopɔn dze ama dɛ yɛntwe hɛnho mfi bɔgya ho no, yesi dɛn hu dɛ dɛm ahyɛdze no fa bɔgya a obi bɛgye ho?
-
Ibesi dɛn esi bɔgya a wɔdze bedzi dwuma wɔ w’ayarsa mu no ho gyinae pa?
HWEHWƐ PII KA HO
Sɛ irisi wankasa wo bɔgyaa a wɔdze bedzi dwuma wɔ w’ayarsa mu ho gyinae a, ebɛn ndzɛmba na ɔsɛ dɛ isusu ho?
Sɛ irisi bɔgya mu ndzɛmba nketsenketse a ebɛgye anaa erenngye ho gyinae a, ebɛn ndzɛmba na ɔsɛ dɛ isusu ho?
Ebɛnadze na ɔboaa dɔkta bi ma ɔgyee dza Jehovah aka afa bɔgya ho no too mu?
“Megyee Dza Nyankopɔn Aka Afa Bɔgya Ho No Too Mu” (Nyan!, December 8, 2003)
Hwɛ video yi, na ibohu edwuma a mpanyimfo a wɔsom wɔ Ayarsabea Ntamu Nkitahodzi Egyinatukuw ahorow mu no yɛ dze boa hɔn nuanom Christianfo.
a Hwɛ Adzesua 35, “Yebesi Dɛn Esisi Gyinae Pa?”
b Hwɛ asɛm a otsia 5, “Ayarsa A Bɔgya Mu Ndzɛmba Nketsenketse Wɔ Mu”; Nsɛm Bi A Wɔakyerɛ Mu 3, “Ayarsa A Wɔdze Bɔgya Dzi Dwuma Wɔ Mu”; nye December 2006 Hɛn Ahendzi Som, nkrataafa 3-6.
c Adɔktafo binom wɔ hɔ a, wobu bɔgya mu ndzɛmba etsitsir anan no dɛ ɔyɛ bɔgya mu ndzɛmba nketsenketse. Ntsi, bi a obehia dɛ ekyerɛkyerɛ mu kyerɛ wo dɔkta no ma ɔtse ase dɛ, esi gyinae dɛ mma wɔmmfa bɔgya ankasa anaa nkwambowa kɔkɔɔ, nkwambowa fitaa, nkwambowa tɛtɛrba anaa bɔgya mu nsu mma wo.
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
