TOƁƁERE 39
No Alla miijorii fii ƴiiƴan non
Ƴiiƴan ko huunde hittunde. Ɓaawo majjan hay gooto waawataa wuurude. Ɓay ko Alla tagi en, ko kanko tun haani haalande en no huutorten ɗan. Ko honɗun o daali fii ƴiiƴan ? En waaway ɗan ɲaamude maa wattude ɗan ka ɓanndu men ? Ko honno fewjirten moƴƴa fii mun ?
1. Ko honɗun Yahuwah Alla miijii fii ƴiiƴan ?
Yahuwah Alla daalanno rewooɓe mo ɓen ɓaawo ɗoo : « Ngurndan kala ɓanndu ko ƴiiƴan mun » (Sariyaaji lewiyankeeɓe ɓen 17:14). Fii Yahuwah Alla, ƴiiƴan no firi ngurndan. Ɓay ngurndan ko dokkal hormorteengal iwrungal e Alla, ƴiiƴan kadi ko ko hormorte.
2. Ko fii piiji honɗi Alla haɗi en huutorgol ƴiiƴan ?
Yahuwah Alla yamirno rewooɓe mo ɓen ado almasiiyaaɓe ɓen wota ɓe ɲaamu ƴiiƴan (janngee Fuɗɗoode nden 9:4 [VPFJ] e Sariyaaji lewiyankeeɓe ɓen 17:10). O fillitino ndee yamiroore fewndo Hikkiiɓe ɓen ka fewjoore jannunoo almasiiyaaɓe ɓen yo ɓe ‘terto ƴiiƴan’ (janngee Kuuɗe sahaabaaɓe ɓen 15:28, 29).
Ko honɗun firi tertagol ƴiiƴan ? Si doftooru wi’i yo on terto konnjan, ɗun no firi wonaa yo on yaru konnjan. Kono hara on ɲaamay ɲaametee wonduɗo e konnjan maa on pikoto ɗun ? Pellet, on waɗataa ɗun. Ko wano non kadi, si Alla yamirii en tertagol ƴiiƴan, ɗun no firi en haanaa yarugol ƴiiƴan maa ɲaamugol teewu kullun kun hirsaaka. En haanaa ɲaamugol kadi ɲaameete mo ƴiiƴan ɓeydaa e mun.
Si doftooru haalani on huutorgol ƴiiƴan fii ɲawndagol, ko honno gerdirton fii mun ? Ɲawndagol fasonji goo teddintaa sariya Alla on fes. Ko tawaa e ɗun ko wattanegol ƴiiƴan maa pecce nay njane ƴiiƴan ɗan : ɗun ko globil boɗeejo, globil daneejo, plaket e plasma a. Kono ɲawndagol fasonji goo hollataa ko laaɓi pos wonnde ɗun no teddina maa teddintaa sariya Alla on. E piide misal, ɲawndagol fasonji goo ko huutorgol peccoy iwrukoy e ɗee pecce nay njane maa huutorgol ƴiiƴan ontigi ɗan. Si tawii ko non, mo kala no haani fewjande hoore mun b (Galaasi 6:5).
LUGGINEE
Ndaaree no fewjirton fii ɲawndagol ka huutorgol ƴiiƴan tawaa.
3. Ƴettee pehe ɲawndoragol no Yahuwah Alla yiɗiri non
Ko honno ƴettirton pehe fii ɲawndagol ko yaadi e miijo Alla fii ƴiiƴan ? Fijinee VIDIO on e yewton fii hitte huutorgol waajuuji jokkituɗi ɗin :
-
Toree Alla fii heɓugol faamu (Yaaquuba 1:5).
-
Ɗaɓɓee tugaale Deftere Alla nden e no ɗe huutortee non (Tindi 13:16, VPFJ).
-
Ɗaɓɓee fasonji ɲawndagol ka wonuɗon ɗon.
-
Anndee fii fasonji ɲawndagol ɗi on jaɓataa fes.
-
Fellitee no fewjirton non wallay on heɓugol ɓernde laaɓunde (Kuuɗe sahaabaaɓe ɓen 24:16) c.
-
Annditee wonndema hay gooto—hay moodi mon maa ɓeyngu mon, ardotooɗo, maa jannoowo on Deftere Alla nden—haanaa on haalande fewjoore nde ƴettoton ka ɓernde mon (Roomu 14:12).
-
Winndee ko fewjuɗon kon.
4. Seedeeɓe Yahuwah ɓen no ɗaɓɓa fasonji kelɗuɗi fii ɲawndagol
Hiɗen waawi ɗoftaade sariya Alla on fii ƴiiƴan e heɓude fasonji kelɗuɗi fii ɲawndagol ɗi aldaa e ƴiiƴan. Fijinee VIDIO on.
Janngee Tiituusa 3:2 e yewton fii ngal lanndal :
-
Fii honɗun hiɗen haani gollidude e ɲawndooɓe ɓen e yewtiren ɓe e hoore needi ?
Ko men jaɓataa |
Ko almasiiyaajo kala fewjanta hoore mun |
---|---|
A. Plasma ƴiiƴan |
Peccoy iwrukoy e plasma |
B. Globil daneejo |
Peccoy iwrukoy e globil daneejo |
C. Plaket |
Peccoy iwrukoy e plaket |
D. Globil boɗeejo |
Peccoy iwrukoy e globil boɗeejo |
5. Si peccoy ƴiiƴan no tawaa
Ƴiiyan no jogii pecce nay njane : globil boɗeejo, globil daneejo, plaket e plasma. E ɗee pecce nay no jogii pecce toosooke buy. Ɗee pecce no noddaa peccoy ƴiiƴan d. Peccoy koy no huutoree e lekkeele ɲawndooɗe nawnaare maa wallayɗe darnugol ƴiiƴan yaltooɗan.
Fii koy peccoy ƴiiƴan, seedeejo Yahuwah kala no haani fewjande hoore mun e hoore ɓernde eltiraande Deftere Alla nden. Woɓɓe goo no waawi salaade ƴettugol lekki maa fasonji fii ɲawndagol ka koy peccoy ƴiiƴan huutortee. Woɓɓe goo kadi jaɓay huutorde koy e hoore ɓernde laaɓunde.
Ado yo on fewjude, lanndee hoore mon :
-
Ko honno mi yewtirta doftooru an on fii honɗun mi jaɓanta maa mi salantoo ƴettugol peccoy ƴiiƴan goo ?
NO GASA WOƁƁE NO LANNDOO : « Si tawii ƴettugol ƴiiƴan no dannda, ko honɗun boni e mun ? »
-
Ko honɗun miijiɗon ?
RAWNOODE
Yahuwah Alla faalaaka yo en huutor ƴiiƴan no boniri.
Ndartannde
-
Fii honɗun e miijo Yahuwah Alla ƴiiƴan ko hormorɗan ?
-
ko honno anndirɗen wattanegol ƴiiƴan no tawaa kadi e ko Alla yamiri kon fii tertagol ƴiiƴan ?
-
Ko honɗun wallata on fewjugol no moƴƴiri fii ɲawndagol ka ƴiiƴan tawaa ?
TASKEE
Ko honɗun haanuɗon miijaade taho ado yo on fewjude no huutorton ƴiiƴan mon ɗan fii ɲawndagol ?
« Lanndaale janngooɓe ɓen » (Suudu Aynirdu ndun, 15 ottoombur 2000)
Ko honɗun haanuɗon miijaade taho ado yo on fewjude si on jaɓay maa si on jaɓataa huutorgol peccoy ƴiiƴan ?
« Lanndaale janngooɓe ɓen » (Suudu Aynirdu ndun, 15 suwen 2004)
Ko honɗun walli ɲawndoowo goo miijagol no Yahuwah Alla yi’iri ƴiiƴan ko ko haani ?
« Mi jaɓii miijo Alla ngon fii ƴiiƴan » (Finee !, 8 deesaambur 2003)
Anndee no ardotooɓe tawaaɓe ka mojobere kippunde fii ɲawndagol ɓen tammbitorii musiɓɓe maɓɓe ɓen ka dewal.
a Ɗee pecce nay njane noddirte e haala faranse : « globules rouges, globules blancs, plaquettes et plasma » maa e haala enngele : « red cells, white cells, platelets, and plasma ».
b Ndaaree toɓɓere 35, « Ko honno fewjirton no moƴƴiri ? »
c Ndaaree limoore 5, « Si peccoy iwrukoy e ƴiiƴan no tawaa » ; tinndinoore 3, « Fasonji fii ɲawndagol ka ƴiiƴan tawaa ».
d Fii ɲawndooɓe goo ɗee pecce nay njane e peccoy koy ko gootun. Ko ɗun waɗi, hiɗon haani haalande ɓe fewjoore mon nden wonndema on jaɓataa wattanegol ƴiiƴan maa ɗee pecce njane iwruɗe e majjan : globil boɗeejo, globil daneejo, plaket e plasma.