LÈSON 39
Ka Bondyé ka di anrapò èvè san-la
San-la vréman nésésè. San li, ponmoun pa té’é pé viv. Konm sé Bondyé ki kréyé-nou, i andwa di-nou kijan pou nou sèvi èvè san-la. Ka Bondyé ka di-nou anrapò èvè san-la ? Ès nou ni dwa pran san ? Ès nou ni dwa manjé-y ? Lè an ni on désizyon a pran anrapò èvè san, ka pou mwen fè ?
1. Ka Jéova ka di anrapò èvè san-la ?
Mi sa Jéova di sé Izraélit-la : « Vi a tout kalté chè sé san a-y » (Lévitik 17:14). Pou Jéova, san-la ka rèprézanté lavi. É lavi sé on biten ki sakré, paskè sé on bèl kado Jéova fè-nou. Kifè, san-la sakré osi.
2. Ka Bondyé défann-nou fè èvè san-la ?
On ti moman apré Délij-la, Bondyé di sèwvitè a-y pa manjé san, é i wouviré répété komandman-lasa an tan a Izrayèl (li Jénèz 9:4 é Lévitik 17:10). I wouba sé krétyen-la menm komandman-lasa, lèwvwè komité santral la di-yo « pa sèvi [...] èvè san » (li Akt 15:28, 29).
Ka sa vlé di pa sèvi èvè san-la ? Si on dòktè ka di-w pa sèvi èvè alkòl, ès ou ké bwè-y ? Non ! Ès ou ké manjé on manjé ki ni alkòl oben ès ou ké fè alkòl-la rantré an kò a-w pa venn a-w ? Anponjan ! Menmjan-la, lè Bondyé ka mandé-nou pa sèvi èvè san-la, sa vé di pa bwè-y, pa manjé vyann a zannimo ki pa sengné oben pa manjé pon rèpa yo mèt san adan.
Men ès ou pé sèvi èvè san-la pou pran swen a santé a-w ? Ni sèwten trètman yo ka ba-w é ki pa annakò èvè lwa a Bondyé ditou-ditou. Pa ègzanp, lè yo bizwen ban-nou san pou swangné-nou, nou ka rèfizé pas sé on trètman Labib ka kondanné. Anplisdisa, adan san-la ni kat pawti enpòwtan : sé globil wouj la, sé globil blan la, sé plakèt-la, é plasma-la. É si on trètman ni omwen yonn adan sé biten-lasa adan-y, nou pa’a pran-y nonplis. Ni dòt trètman aprézan ki pa menm biten ki séla é pa ni pon lwa an Bib-la ki ka di franchman kè yo pa bon. Pa ègzanp, ni sèwten trètman ki ka sèvi èvè dé toupiti biten kè yo pran adan sé globil wouj la, sé globil blan la, sé plakèt-la oben plasma-la. É ni dé tèknik ki ka itilizé pwòp san a malad-la. Adan sé ka-lasa, sé chakmoun ki ké désidé ka i ké fè a (Galat 6:5).
AN-NOU FOUYÉ PI FON
Lè sé dòktè-la ka pwopozé-mwen on trètman, ka an pé fè pou pran bon désizyon ? An-nou vwè sa.
3. Lè ou bizwen swangné-w, pran désizyon ki ka fè Jéova plézi
Lè fò-nou swangné-nou, kijan nou pé pran désizyon ki ka fè Jéova plézi ? Gadé VIDÉO-la é réponn a kèsyon-lasa : Poukwa sa enpòwtan kè ou suiv sé étap-lasa avan ou pran on désizyon ?
-
Priyé pou Jéova ba-w sajès (Jak 1:5).
-
Chèché déotwa prensip an Bib-la é éséyé vwè kijan ou pé sèvi èvè yo (Pwovèb 13:16).
-
La ou ka rété la, éséyé vwè si pa ni mwayen yo pwopozé-w ondòt trètman.
-
Fò ou ja konnèt ki trètman ou pé’é jen pran.
-
Fò ou sèten kè lè ou ké pran désizyon a-w, konsyans a-w pé’é bat-vou b (Akt 24:16).
-
Sonjé kè ponmoun — pa menm moun-la ou mayé èvè-y la, ni sé ansyen-la, ni moun-la ki ka fè étid a-w la — pa andwa di-w ka pou ou fè lèwvwè sé-w tousèl ki dwètèt pran désizyon a-w (Women 14:12).
-
Maké sa ou désidé.
4. Témwen a Jéova ka éséyé swangné-yo èvè méyè trètman ki tini
Ou pé rivé a swangné-w byen san pran san, kon lwa a Bondyé ka mandé-w. Gadé VIDÉO-la.
Li Tit 3:2 é fè on ti kozé asi kèsyon-lasa :
-
Poukwa fò-nou kolaboré èvè sé dòktè-la, é poukwa fò-nou palé jantiman ba yo ?
|
Fò pa nou pran-y |
Sé chak krétyen ki ka vwè |
|---|---|
|
A. Plasma |
Toupiti biten yo ka pran adan plasma-la |
|
B. Globil blan |
Toupiti biten yo ka pran adan sé globil blan la |
|
C. Plakèt |
Toupiti biten yo ka pran adan sé plakèt-la |
|
D. Globil wouj |
Toupiti biten yo ka pran adan sé globil wouj la |
5. Fraksyon a san-la
Adan san-la, sa ou ka touvé plis, sé globil wouj, globil blan, plakèt é plasma. Adan sé kat pawti-lasa, ou ka touvé dé toupiti ti biten yo ka kriyé « fraksyon a san-la c ». Sé dòktè-la ka sèvi èvè sé fraksyon-lasa pou swangné sèwten maladi oben pou anpéché on moun pèd twòp san.
Lè yo ka pwopozé on krétyen on trètman ki ni fraksyon adan, sé-y tousèl pou pran désizyon a-y. É pou i pran désizyon-lasa, i ké sèvi èvè sé prensip-la ki an Bib-la. Pétèt kè ni sèwten krétyen ki ké rèfizé pran on trètman ki ni fraksyon adan-y, alòskè ni dòt ki ké aksèpté-y. É ni sèwten krétyen ki ké dakò pou yo swangné-yo èvè on tèknik ki ka sèvi èvè fraksyon a san-la, alòskè ni dòt ki pé ké aksèpté-y.
Avan ou désidé si ou ké pran oben si ou pé’é pran fraksyon a san-la, pozé-w ti kèsyon-lasa :
-
Kijan an ké èspliké on mèdsen poukwa an vlé oben poukwa an vé pa sèvi èvè fraksyon a san-la pou swangné-mwen ?
MI SA YO TÉ’É PÉ MANDÉ-W : « Zò ka di fò pa moun pran san, men sa pé sové vi a moun ! Ka i ni dè mal adan sa ? »
-
Ka ou té’é réponn ?
ON TI RÉZIMÉ
Labib ka di-nou kijan Jéova vlé nou sèvi èvè san-la.
Ka ou woutyenn
-
Pou Jéova, san-la sé on biten ki sakré. Poukwa ?
-
Bondyé ka di-nou pa sèvi èvè san-la. Kijan nou fè sav kè komandman-lasa ka défann-nou pran san ?
-
Lèwvwè yo ka pwopozé-w on trètman ki ni san oben fraksyon a san-la adan, ka ki pé édé-w pran on bon désizyon ?
AY GADÉ SA OSI
Ki réflèksyon fò ou fè avan ou di si ou dakò pou yo sèvi èvè pwòp san a-w pou yo swangné-w ?
« Questions des lecteurs » (Tou dè Gad a 15 òktòb 2000 an fransé)
Dè ki biten fò ou tchenn kont avan ou désidé si ou ké aksèpté oben si ou pé’é aksèpté fraksyon a san-la ?
« Questions des lecteurs » (Tou dè Gad a 15 jen 2004 an fransé)
Ka ki édé on dòktè aksèpté sa Jéova ka di anrapò èvè san-la ?
« J’ai accepté le point de vue de Dieu sur le sang » (Réveillez-vous ! a 8 désanm 2003)
Ni onlo ansyen ki adan sa yo ka kriyé komité pou fè lyannaj èvè sé lopital-la. Kijan yo ka édé frè é sè a yo ?
b Gadé senkyèm pwen-la « Fraksyon a san-la » ; nòt niméwo 3 la ki an bout a liv-la, « Métòd ki ka sèvi èvè san pou swangné » ; é Le ministère du Royaume a novanm 2006, paj 3 a 6.
c Pou sèwten mèdsen, globil wouj la, globil blan la, plakèt-la é plasma-la, sé fraksyon a san-la osi. Kifè, pétèt ou ké oblijé èspliké dòktè a-w kè ou pa’a pran ni san, ni globil wouj, ni globil blan, ni plakèt, ni plasma.
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
