ˈCƖAANDHƐ- 39
-Kawɛ Ɲɔnsoa a ˈjhe ɲmɔn -ɔn?
Ɲmɔn ɔnˈ dɩ kmanˈ ˈdhe -aaˈ ˈkmʋn ˈdhi. -Bho -a se ɲmɔn kuzɔnˈ -nɩn ɛnˈ, -a se ˈbhɛɛ- -a ˈye ˈkmʋn -sie-. Ɲɔnsoa -mɔn nʋn -aʋ, -ˈmɛn ɔ nɩɛn ɛnˈ -ka ɔ ˈye -aʋ ˈsrɩn ˈˈdu ˈdhe ɲmɔn ɔnˈ dɩ ˈdhi. Dhɛwɛ- ɔ ˈtmʋn ˈdhe ɲmɔn ɔnˈ dɩ ˈdhi -ɛ? Ɲʋn ˈbhɛɛˈ ɲʋn ˈyeɔ dhi -aeˈˈ ɲʋn ˈyeɔ kuzɔnˈ po? -Kawɛ -ˈbhɛɛ ˈye ˈo dhɛjɛɛn -za -ˈye nʋn ˈdhe ɲmɔn ɔnˈ dɩ ˈdhi -ɛ?
1. -Kawɛ Zoova a ˈjhe ɲmɔn -ɔn?
ˈDhe tɛnˈˈ ˈkmʋn ˈdhi ɛ, Zoova ˈtmʋʋn ɔɔˈ dhbhonʋʋn- ˈmɛn ɔ ˈnaan: “Ɲmɔn -nɩɛn- nmiin -e ɲiɔn ɔnˈ ˈkmʋn.” (Lévitique 17:14) ˈDhe Zoova ˈˈjhri ˈdhe ɛ, ɲmɔn ˈdha ˈkmʋn. ˈKmʋn -deeɛ- ˈfɔ ˈˈɩ, ʋn -nɩɛn- -baanˈ- -ɔ ˈghwlʋ ˈe Ɲɔnsoa bho. Ɲmɔn -nɩɛn- -baanˈ- -ke -ɔ -dee ˈfɔ ˈˈɩ.
2. Dhɛwɛ- ɲʋn an nʋʋn ɲmɔn Ɲɔnsoa aˈ ˈŋwɔɔn-?
Zoova ˈˈɲɩɛn ɔɔˈ dhbhonʋʋn- nɩan tɛnˈˈ ˈtee ɔ ˈnaan, ʋaˈ dhi -e ɲmɔn -dhe. (Zro Genèse 9:4 -e Lévitique 17:10.) Ɔ ˈˈɲɩn kletiɛn -ˈˈwe ˈtee -ˈnɩn ˈmɛn -ke -da -glibha- aˈ jiebhopoʋn ˈtmʋʋn ʋbʋ -ka ʋʋ ˈyea ‘ɲmɔn [...] bho -tɛɛn.’—Zro Actes 15:28, 29.
Dhɛwɛ- ɲmɔn ɔnˈ bho -tɛɛn ˈdha -a? -Bho -dɔsrɔi ˈtmʋʋn- mʋn ɔ ˈnaan -tɛɛn nmɔn bho ɛˈ, dhɛ ɛ ˈdhaa -mɛn -nɩn -manˈ ˈnɔɔn -dhe. -ˈMɛn -ˈbhɛɛˈ -ˈye dhiidhɛ- nɩan nmɔn bho dhi -aeˈˈ -ˈbhɛɛˈ -ˈye nmɔn -ˈnɔn ˈdhee- kuzɔnˈ po? ˈƖɩn-, se ˈbhɛɛ- -ˈye ɛɛˈ dhɛ tu nʋn. -ˈMɛn -bho Zoova ˈnaan -a -tɛɛn ɲmɔn bho ɛ, dhɛ ɛ ˈdhaa -mɛn -nɩn -a seɔˈ ˈnan in, -a seɔˈ -dhi i -aeˈˈ -a ˈse nmiin ɲʋn ˈsea blunzɔnˈ cɛn -dhi i. ˈˈDhe -a ˈse dhiidhɩ- ɲʋn -piia ɲmɔn -dhi i -ke.
ˈˈDhe -bho ɔ -nɩn ˈe -dɔsrɔkwɛin bho ˈdhe? Dhɩ -ˈnɩɩn ɲʋn an nʋʋn ɲmɔn -nɩn Ɲɔnsoa aˈ ˈtee aˈ kpa -jie- dhueˈ. Ɛ nɩn ɲmɔn ɔnˈ ˈˈjɛ -aeˈˈ dhɩ klaeˈˈ ɲiɛn nɩan ˈdhe ɲmɔn bho aˈ dhueˈ aˈ kuzɔnpoɛ-: -Ɩn nɩan globules rouges, globules blancs, plaquettes -e plasma. Dhɩ -ˈnɩɩn -nɩn ˈo ʋa nʋʋn ɲmɔn ˈdhe -dɔsrɔŋmɛinˈˈ -ɩanˈ dɩ Ɲɔnsoa aˈ ˈtee aˈ zela ˈˈkpe i -kajɔɔnka. Ɛ nɩn dhɩ -mɩɩnˈˈ ɲʋn an za ˈe dhɩ klaeˈˈ ɲiɛn -ɩn man ɲmɔn ˈmʋn ˈdhe ɲʋn an po kuzɔnˈ. Ʋʋ ˈbhɛɛˈ ʋʋ ˈye ɲɔn ɔnˈ ˈˈjɛ ɛˈ ɲmɔn -da ˈˈzaan i de ˈˈdhe ʋʋ ˈyeɔ ˈdhe ɔ kuzɔnˈ po -kenɛnˈ. ˈDhe dɩ -ˈnɩn ˈdhi ɛ, dhɛ ɲɔn ˈyea ˈo -za -nɩɛn- ˈdhe ɔɔˈ ˈˈjɛ ˈkwa. a—Galates 6:5.
KPA DHƐ I ˈŊWƆƐN ƝAN
ˈCɩaandhɛ- nɛn ɛn muɛn ʋn sʋn bho -po -wɛeˈ dhɛ -ˈyea ˈo -za -ˈyea nʋn ˈdhe ɲmɔn ɔnˈ dɩ ˈdhi -ˈyeɛ jhibho-.
3. -Za ˈo dhɛ -ɛɛ nʋan Zoova ˈtʋn ˈdhe ɲmɔn ɔnˈ dɩ ˈdhi
-Kawɛ -ˈye nʋn ˈˈdhe dhɩ -ˈyea ˈo -za -ˈyea nʋn ˈdhe ɲmɔn ɔnˈ dɩ ˈdhi -nɩn Ɲɔnsoa aˈ -glʋˈdɩ ˈye -jie- dhueˈ kpa -a? Po ˈo VIDEO, -wɛeˈ dhɛɛdɩ- ˈsrɩn nɩan da ˈzɔn da aˈ ˈˈjhriɛ ˈˈduɛ kɔandɩ ɛ, -ˈyeɛ i ˈŋwɔn.
-
Bhae- -wɛeˈ Ɲɔnsoa ˈye ʋn tɔˈdhinɩɛn ˈˈɲɩn.—Jacques 1:5.
-
Biiblʋ aˈ ˈsrɩn ˈbhɛɛa -ɩn ˈyea ʋn sʋn bho po ˈdhe dɩ -ˈnɩn ˈdhi ɛ, ˈbʋin.—Proverbes 13:16.
-
Ka -dɔsrɔ nɩan ˈo -manˈ kpɔ ˈdhi a nʋan ɲʋn anˈ kwɛin -nʋn sʋn ɛn, ˈbɔn ɛɛˈ i ˈŋwɔan in.
-
Kwɛin- -jɩn sea ˈbhɛɛ- -ˈyea ˈŋwɔɔn-, -ˈbhɛɛ -ˈyɩ i ˈcra.
-
Dhɛ -ˈyea ˈo -za, -nɛɛn tɔˈ i -kajɔɔnka -wɛeˈ -manˈ -glʋˈ saˈ ʋn dɩ ˈˈbhli kpa.—Actes 24:16. b
-
Dhɩ nɩan -glʋˈ aˈ dɩ ɛ, ɲɔn -ˈnɔɔn se ˈbhɛɛ- ɔ ˈyɩ ˈo -za ˈbho -man gɔˈ ˈˈɩ. -Bho ɛ -nɩn ɲɔn -nɩn ˈˈtia ˈˈbhli, ɲankɔin, ɲɔn -nɩn -man ˈcɩan Biiblʋ mɔn -dhe ɛˈ.—Romains 14:12.
-
ˈCre dhɩ -ˈyea ˈo -za -ˈyea nʋn -wɛeˈ ɲʋn -ˈnʋʋn ˈyɩ jhibho-.
4. Zoova aˈ -Bobhlaʋn an ˈbɔn dɔsrɔkwɛin- ˈdhɔɛe
Ɲɔn -ɔɔ ˈbɔan -ɔ ˈyea Ɲɔnsoa aˈ ghwlu ŋwɔn ˈjhe ˈdhe ɲmɔn ɔnˈ dɩ ˈdhi ˈbhɛɛˈ ɔ ˈye kwɛin- sea ɲmɔn bho -nɩn ˈjhe. Po ˈo VIDEO.
Zro Tite 3:2, -ˈmɛn aʋ ˈtmʋn ideedɩ- nɩn anˈ dɩ:
-
Dhɛɛdɩ- -a ˈye -dɔsrɔˈ -ˈˈwe ŋwɔn ˈjhe ˈˈdhe -a ˈye ŋwɔn peɛ- ˈdhe ʋbʋ bho -ɛ?
|
Dhɩ -a ˈsea ˈŋwɔɔn- in |
Dhɩ kletiɛn ɛnˈ ˈˈjɛ ˈyea ˈo -za |
|---|---|
|
1. Plasma |
Dhɩ -mɩɩnˈˈ ɲʋn an za ˈe plasma bho |
|
2. Globules blancs |
Dhɩ -mɩɩnˈˈ ɲʋn an za ˈe globules blancs bho |
|
3. Plaquettes |
Dhɩ -mɩɩnˈˈ ɲʋn an za ˈe plaquettes bho |
|
4. Globules rouges |
Dhɩ -mɩɩnˈˈ ɲʋn an za ˈe globules rouges bho |
5. Dhɩ -mɩɩnˈˈ ɲʋn an za ˈe dhɩ man ɲmɔn bho
Dhɩ ˈa kpɛ ɲiɛn nɩan ˈe ɲmɔn bho -mɩn ɲʋn an ˈdhaa ˈdhe ˈˈkwighwlu ˈdhi: globules rouges, globules blancs, plaquettes sanguines -e plasma. ˈDhe dhɩ nɩan kpɛ ɲiɛn -ˈnɩn bho ɲʋn an za “dhɩ -mɩɩnˈˈ” -ˈnɩɩnˈ. c Ɩmɩn- ɲʋn an ˈˈdhuo ˈmʋn ɲʋn an nʋʋn ˈghwɛ -ˈnɩɩn anˈ kwɛin -aeˈˈ -bho ɲɔn ɔnˈ ɲmɔn ɔn sa ˈˈdhru ɛˈ, ɩmɩn- ʋa nʋn -wɛeˈ ʋa ɲnɔɔn in.
ˈDhe dhɩ -mɩɩnˈˈ ɲʋn an za ˈe dhɩ man ɲmɔn bho aˈ dɩ ˈdhi ɛ, ɩanˈ ˈmʋn ˈˈdhuɛ- ɛɛˈ dɩ -nɩɛn- ˈe kletiɛn ɛnˈ ˈˈjɛ ˈkwa. Ɛ nɩn ɔɔˈ -glʋˈ Ɲɔnsoa aˈ ghwlu a poa jie bho -mʋn -ˈyeɔ sʋn bho po. Kletiɛn -ˈnʋʋn ˈbhɛɛˈ ʋʋ ˈye ɩanˈ ˈmʋn ˈˈdhuɛ- ɛɛˈ dɩ ˈŋwɔɔn- ˈˈdhe -ˈnʋʋn ˈbhɛɛˈ ʋʋ ˈsɩ ˈŋwɔɔn- in.
-Bho -ˈye ˈo dhɛ -za -ˈye nʋn ɛnˈ, -naan dɩ nɩn tɔˈ ˈˈkpe i:
-
Dhɛɛdɩ- ˈman ˈbɔan -aeˈˈ ˈɩn ˈsea ˈbɔn ˈyea dhɩ -mɩɩnˈˈ -ˈnɩɩn nɩan ˈe ɲmɔn bho kuzɔnˈ po -dɩ ˈŋwɔɔn- ɔn, -kawɛ- ˈɩn ˈbhɛɛ ˈye ɛɛˈ dɩ ˈtmʋn ˈdhe -dɔsrɔi bho -ɛ?
-BHO ƝƆN ˈNAAN: “-Ɛ -ɲnin ˈˈjhrii ˈdhe ɲmɔn ɔnˈ kuzɔnpoɛ- ɛˈ dɩ ˈdhi -ɛ?”
-
Ka -man mun ˈdha -a?
DHƐWƐ- ˈCƖAN-?
Zoova ˈse ˈbɔn -a ˈye ɲmɔn dhi, -a ˈyeɔ ˈnan -aeˈˈ -a ˈyeɔ kuzɔnˈ -po.
Dhɛwɛ- -ˈŋwɔn in -ɛn?
-
Dhɛɛdɩ- ɲmɔn -dee ˈfɔ ɩˈˈ ˈdhe Zoova ˈˈjhri ˈdhe -ɛ?
-
-Bho Zoova ˈnaan -aaˈ dhi -e ɲmɔn -dhe ɛˈ, ka -a nʋn ɛnˈ jhibho- sʋn -ka -a ˈseɔ ˈe kuzɔnˈ -po i -ke -ɛ?
-
-Kawɛ -ˈbhɛɛ -ˈye ˈo dhɛjɛɛn -za -ˈye nʋn ˈdhe ɲmɔn ɔnˈ dɩ ˈdhi ˈdhe -dɔsrɔŋmɛinˈˈ -ɛn?
ˈBƆN DHƖ -ˈNƖƖN ANˈ I ˈŊWƆAN IN
-Bho -man sa ˈbɔn ɲʋn ˈye -manˈ ˈˈjɛ ɛˈ ɲmɔn ˈdhee- kuzɔnˈ dhe po ɛˈ, dɩwɛ- -ˈye tɔˈ ˈˈkpe i -naan?
“Questions des lecteurs” (La Tour de Garde, 15 octobre 2000)
-Bho -ˈye dhɩ -mɩɩnˈˈ ɲʋn an za ˈe dhɩ ɲiɛn man ɲmɔn bho aˈ kpɔ dhueˈ ɛˈ kuzɔnpoɛ- ˈŋwɔɔn- ɔnˈ, dɩwɛ- -ˈye tɔˈ ˈˈkpe i -naan?
Dhɛwɛ- ˈˈtun ˈsɛɛjhibhoi- dhueˈ -wɛeˈ ɔ ˈnaan Ɲɔnsoa aˈ dhɩjhesʋn- ˈdhe ɲmɔn ɔnˈ dɩ ˈdhi ˈsrɛ ˈˈɩ -ɛ?
“J’ai accepté le point de vue de Dieu sur le sang” (Réveillez-vous!, 8 décembre 2003)
-Ka ɲankɔʋn anˈ kpɔ -ɔɔ ˈˈdua ˈdhoudhi -ˈˈwe aˈ dɩ ˈdhe dɔsrɔŋmɛinˈˈ ɔn nʋan dhbho -nʋn sʋn ɛn.
a -Ŋmʋn ˈdhe ˈCɩaandhɛ- 35, “Dhɛwɛ- -ˈbhɛɛ -ɛ ˈye -aʋ sʋn bho po ˈˈdhe -a ˈye ˈo dhɛjɛɛn -za -a ˈye nʋn -ɛn?” ˈdhi.
b Mun ˈbho ɛɛˈ ˈˈdhru ˈˈzaan 5 ˈˈkpe -da ɲʋn ˈcrea, “Dhɩ -mɩɩnˈˈ ɲʋn an za ˈe dhɩ man ɲmɔn bho,” Dhebhɔɔjhibhodhɩ- 3, “Ɲmɔn ɔnˈ dhbhonʋʋsʋn- ˈdhe dɔsrɔɲmɛinˈˈ”.
c Dhɩ aˈ kpɛ ɲiɛn man ɲmɔn ɔn, ɩmɩn- -dɔsrɔ- -ˈnʋʋn an ˈdhaa dhɩ -mɩɩnˈˈ nɩan ˈe ɲmɔn bho. Ɛɛˈ Dɩ dhɛ ˈsea ˈbɔn -ˈyea ɲmɔn -aeˈ globules blancs, globules rouges, plaquettes -aeˈˈ plasma kuzɔnˈ -po ɛ, -manˈ ˈˈjɛ ˈyeɛ -manˈ -dɔsrɔi ˈtmʋʋn-.
