Yog peb tsis muaj ntshav ces peb yeej tsis muaj sia nyob. Yog li ntawd, ntshav yeej tseem ceeb kawg nkaus. Vajtswv yog tus uas tsim peb, nws thiaj muaj cai qhia tias peb yuav siv ntshav li cas. Ua li, nws hais li cas txog ntshav xwb? Peb noj puas tau ntshav los sis txhab puas tau ntshav rau peb lub cev? Thiab hais txog kev siv ntshav, koj yuav ua li cas thiaj haum Vajtswv siab?

1. Vajtswv hais li cas txog ntshav?

Yehauvas hais rau nws cov neeg thaum ub hais tias, ‘Txhua yam uas ciaj sia, txoj sia yog nyob hauv cov ntshav.’ (Levis Kevcai 17:14) Rau Yehauvas ces ntshav yog peb txoj sia. Yog txoj sia uas Yehauvas muab rau peb muaj nqis thiab tshwj xeeb rau nws ces ntshav los yeej muaj nqis thiab tshwj xeeb rau nws ib yam nkaus.

2. Vajtswv txwv tsis pub siv ntshav ua dab tsi?

Tsis ntev tom qab dej nyab ntiaj teb, Yehauvas sam hwm rau nws cov neeg hauv Chivkeeb 9:4 tias, ‘Tsis txhob noj cov nqaij nrog cov ntshav uas yog txoj sia.’ Yehauvas kuj sam hwm li no rau haiv neeg Ixayees thaum ub thiab. (Levis Kevcai 17:10) Ntau pua xyoo tom qab ntawd los, Yehauvas kuj rov qab sam hwm rau lub koom txoos Khixatias kom lawv yuav tsum caiv ntshav.​—Nyeem Tes Haujlwm 15:28, 29.

Lo lus sam hwm kom peb yuav tsum caiv ntshav yog li cas tiag? Muab ua piv txwv li no. Koj tus kws kho mob hais kom koj tsis txhob haus cawv, koj thiaj li tsis haus cawv lawm. Tiam sis puas zoo rau koj muab cawv txhaj rau koj lub cev los sis noj tej zaub mov uas muaj cawv xyaw nyob rau hauv? Yeej tsis zoo! Zoo ib yam li ntawd, yog Vajtswv hais kom peb caiv ntshav ces kuj yog nws tsis pub peb haus ntshav thiab noj tus tsiaj uas tsis tau tso ntshav tawm cov qaij, thiab tsis pub peb noj tej zaub mov uas muaj ntshav xyaw nyob rau hauv.

Ua li, peb siv puas tau ntshav los kho mob? Muaj tej txoj kev kho mob peb paub tseeb tias txhaum Vajtswv txoj cai. Xws li txhab ntshav los sis siv plaub feem ntshav loj. Tiam sis kuj muaj lwm tej kev kho mob uas peb tsis paub tseeb tias puas txhaum los tsis txhaum Vajtswv txoj cai. Xws li thaum luag muab plaub feem ntshav loj cais ua tej fwb feem me tshaj ntawd lawm. Tsis tas li ntawd, tseem muaj dua lwm tej kev uas siv yus cov ntshav rov los kho yus thiab. Yog li ntawd, ua ntej peb yuav txais yuav ib txoj kev kho mob twg, peb nyias yuav tsum xav nyias kom zoo zoo ua ntej tso. a​—Kalatias 6:5.

 KAWM NTXIV

3. Xaiv txoj kev kho mob uas haum Yehauvas siab

Koj yuav ua li cas koj thiaj paub tias txoj kev kho mob twg thiaj haum Vajtswv siab? Saib zaj YEEB YAJ KIAB thiab tham seb vim li cas thiaj tseem ceeb rau peb ua raws li cov lus nram no.

• Thov Vajtswv muab tswv yim rau koj.​—Yakaunpaus 1:5.

• Tshawb nrhiav Vajtswv Txoj Lus thiab xav seb koj yuav coj los siv li cas.​—Pajlug 13:16.

• Nrhiav seb nyob ntawm koj thaj tsam muaj tej kev kho mob twg.

• Koj yuav tsum paub tias txoj kev kho mob twg koj yuav tsis kam yuav.

• Xaiv txoj kev kho mob uas yuav tsis ua rau koj lub siab rov nkaug koj.​—Tes Haujlwm 24:16. b

• Nco ntsoov tias txawm yog koj tus txij nkawm, cov txwj laus, tus qhia Vajlugkub rau koj los sis lwm tus yuav txiav txim siab tsis tau rau koj. Koj yuav tsum txiav txim siab rau koj tus kheej xwb.​—Loos 14:12.

• Thaum koj txiav txim siab li cas lawm ces muab sau kom muaj ntaub muaj ntawv cia kom lwm tus thiaj paub.

4. Yehauvas Cov Tim Khawv xav tau kev kho mob zoo tshaj plaws xwb

Peb yeej nrhiav tau tej kev kho mob zoo uas haum Vajtswv siab thiab tsis siv ntshav li. Saib zaj YEEB YAJ KIAB.

Nyeem Titus 3:2 thiab tham txog lo lus no:

• Vim li cas peb yuav tsum ua siab ntev thiab saib taus cov kws kho mob thaum peb nrog lawv tham?

 5. Xav seb koj puas yuav siv cov feem ntshav me

Ntshav muaj plaub feem loj uas yog ntshav liab, ntshav dawb, ntshav cam, thiab ntshav dej. Plaub feem ntshav loj no kuj muab cais tau ua tej fwb feem me me thiab. c Cov feem ntshav me no muaj nyob hauv tej tshuaj uas siv los pab kho mob los sis pab kom ntshav tu.

Hais txog tej kev kho mob uas siv cov feem ntshav me, koj yuav tau txiav txim siab rau koj tus kheej raws li tej uas koj twb kawm hauv Vajtswv Txoj Lus lawm. Muaj ib txhia, lawv tsis kam txais yuav cov feem ntshav me. Tiam sis muaj ib txhia ho kam yuav.

Thaum koj txiav txim siab seb koj yuav ua li cas, xav txog lo lus no:

• Kuv yuav piav li cas rau kuv tus kws kho mob tias yog vim li cas muaj tej feem ntshav me kuv thiaj kam siv los sis tsis kam siv?

 KOJ KAWM TAU DAB TSI

Yehauvas xav kom peb siv ntshav li nws pom zoo xwb.

Rov Tham Dua

• Yehauvas hais li cas txog ntshav?

• Thaum Vajtswv sam hwm kom peb caiv ntshav, puas yog nws txwv tsis pub txhab ntshav thiab?

• Hais txog ntshav, koj yuav ua li cas koj thiaj paub txiav txim siab tias koj yuav txais txoj kev kho mob twg?