Sai gaw grai ahkyak ai. Sai n nga yang, kadai mung asak n hkrung lu ai. Hpan Madu Karai Kasang sha, sai hpe gara hku lang mai ai ngu ai hpe tsun na ahkang nga ai. Sai hte seng nna shi hpa tsun da ai kun? Sai hpe sha mai ai kun? Bang mai ai kun? Dai hte seng nna kaja ai dawdan lam ni nang gara hku jahkrat lu na kun?

1. Sai hte seng nna Yehowa a ningmu gaw hpa rai kun?

Chyum Laika prat hta, shi hpe nawku dawjau ai ni hpe Yehowa ndai hku tsun ai: “Hkum shan ngu ai baw a asak hkrung lam gaw asai hta rawng nga ai.” (Jaw Jau 17:14) Yehowa a matu sai gaw, asak a malai re. Asak gaw Karai Kasang kaw na kumhpa rai nna chyoi pra ai zawn, sai mung chyoi pra ai.

2. Gara shara hta sai lang ai hpe Karai Kasang hkum pat ai kun?

Yehowa gaw Hkristan prat n hpang shi ai aten na, shi hpe nawku dawjau ai ni hpe sai n sha na matu hkang da ai. (Ningpawt 9:4 hte Jaw Jau 17:10 hpe hti u.) “Asai, . . . koi gam” u ngu Hkristan ni hpe uphkang hpung lam matsun jaw ai hku nna, Karai Kasang gaw ndai hkang da ai ga hpe bai shagrin ya wa ai.​—Kasa 15:​28, 29 hpe hti u.

Sai hpe koi gam u ngu ai lachyum gaw hpa rai kun? Tsa chyaru koi gam u ngu sarawun tsun yang, nang lu na n re. Tsa chyaru lawm ai lusha hpe sha na kun? Shing nrai, tsa chyaru hpe sai lam kata de htu bang na kun? Galaw na n re. Dai hte maren, sai koi gam u ngu ai Karai a tara gaw, sai hpe n lu ging ai (sh) sai n shaw da ai shan hpe n sha ging ai ngu ai lachyum re. Sai lawm ai gara lusha hpe mung n sha ging ai.

Tsi tsi na matu sai hpe lang ai gaw gara hku kun? Tsi tsi ai ladat nkau gaw, Karai a tara hpe dingtawk tawt lai ai. Dai hta, sai bang ai (sh) sai hta lawm ai sai hkyeng di, sai hpraw di, sai di kaji, sai san ntsin bang ai lam ni lawm ai. Tsi tsi ai ladat nkau gaw, Karai a tara hpe dingtawk tawt lai ai lam n nga ai. Ga shadawn, nkau tsi tsi ladat ni hta, sai hta lawm ai madung sai amyu mali kaw na langai a adaw achyen hpe lang ma ai. Nkau tsi tsi ladat ni hta gaw, tinang a sai hpe sha bai lang ai. Dai zawn ahkyak ai lata ra ai lam ni hta, langai pra gaw tinang nan dawdan ra ai. a​—Galati 6:5.

 Kahtap Hkaja

3. Yehowa ra sharawng ai tsi tsi ai ladat hpe lata u

Karai Kasang a ningmu hte maren re ai tsi tsi ai dawdan lam ni hpe gara hku jahkrat lu na kun? VIDEO hpe hpaw, dai hpang lawu na lam ni hta gara hku hkan sa mai ai hpe bawngban u.

• Nyan hpaji lu na matu akyu hpyi u.​—Yaku 1:5.

• Chyum Laika npawt tara ni hte dai hpe gara hku hkan sa mai ai lam hpe tam sawk sagawn u.​—Ga Shagawp 13:16.

• Na a buga hta gara tsi tsi ai ladat nga ai hpe tam u.

• Gara ladat hpe gaw n hkap la ai ngu ai hpe asan sha chye hkra galaw da u.

• Myit nsam asan sha re ai dawdan lam ni jahkrat lu hkra galaw da u.​—Kasa 24:16. b

• Myit nsam hte seng nna dawdan ra ai lam ni hta, ningrum ningtau, myitsu salang, Chyum ga sharin ya ai ni pyi n mai dawdan ya ai hpe dum u.​—Roma 14:12.

• Na a dawdan lam hpe ka da u.

4. Yehowa Sakse ni gaw kaja htum tsi tsi ai ladat hpe tam

Sai hte seng ai Karai a tara ni hpe hkan sa na matu hte, sai n bang ai sha kaja ai tsi tsi ladat ni hpe hkap la na matu mai byin ai. VIDEO hpe hpaw.

Titu 3:2 hpe hti nna, ndai ga san hpe bawngban u:

• Sarawun ni hte tsun shaga ai shaloi hkungga ai hku, shagrit shanem ai hku hpa majaw tsun ging ai kun?

 5. Sai adaw achyen ni hta lawm ai lam

Sai hta lawm ai madung sai amyu mali gaw, sai hkyeng di, sai hpraw di, sai di kaji (platelets), sai san ntsin (plasma) ni re. Dai madung sai mali hta, grai kaji ai adaw achyen kaji ni law law lawm nna, dai hpe sai adaw achyen kaji ni ngu shaga ai. c Adaw achyen nkau mi hpe, ana ahkya ni hpe shamai shatsai ai (sh) sai pru ai hpe jahkring kau ya ai tsi ni hta lang ai.

Sai adaw achyen ni hte seng nna Hkristan langai hpra gaw, Chyum Laika hte shaman da ai myit nsam hpe madung tawn nna dawdan ra ai. Nkau mi gaw, sai adaw achyen kaji ni lawm ai tsi tsi ai ladat hpe n hkap la ma ai. Nkau mi gaw, adaw achyen kaji ni hpe hkap la na matu, shanhte a myit nsam gaw hkraw ma ai.

Dawdan lam ni jahkrat ai shaloi ndai ga san hpe myit ging ai:

• Sai adaw achyen kaji langai hpe ngai hpa majaw hkap la ai (sh) n hkap la ai ngu ai hpe sarawun hpe gara hku sanglang dan na kun?

 Kadun Dawk

Yehowa gaw sai hpe shut ai hku n lang shangun mayu ai.

Bai Maram

• Yehowa gaw sai hpe chyoi pra ai ngu hpa majaw mu mada ai kun?

• Sai hpe koi gam u ngu ai Karai a tara gaw, sai bang ai hte mung seng ai hpe anhte gara hku chye lu ai kun?

• Tsi tsi ai hta sai lang ai hte seng wa yang, kaja ai dawdan lam ni hpe nang gara hku jahkrat lu na kun?