Sangi é un kuza txeu inportanti. Sen el, ninhun di nos ka ta staba bibu. Dja ki é Deus ki faze-nu, é el ki ten direitu di fla-nu kuzê ki nu debe faze ku sangi. Kuzê ki el ta fla sobri sangi? Nu pode kume, da ô toma sangi? I modi ki bu pode toma bons disizon sobri kel asuntu li?

1. Kuzê ki Jeová ta pensa sobri sangi?

Jeová fla se sérvus na pasadu: ‘Vida di tudu kriatura é se sangi’. (Levítico 17:14) Pa Jeová, sangi ta reprizenta vida. Dja ki vida é un prezenti sagradu di Deus, nton sangi é sagradu tanbê.

2. Kal ki é kes manera di uza sangi ki Deus ta proíbi?

Jeová manda se sérvus, ki vive antis di ténpu di Jizus, pa ka kume sangi. (Lé Génesis 9:4 i Levítico 17:10.) El ripiti kel lei li kantu el fla grupu enkaregadu di óbra na ténpu di apóstlus pa es ‘ka uza sangi’. — Lé Atos 15:28, 29.

Kuzê ki ‘ka uza sangi’ krê fla? Si un dotor flaba bo pa bu ka uza bebida alkólika, bu ka ta bebeba. Má, bu ta kumeba kuzas ki tinha bebida alkólika na el ô bu ta poba el na veia? Klaru ki nau. Di mésmu manera, óras ki Deus manda-nu pa nu ka uza sangi, kel-li krê fla ma nu ka debe bebe sangi nen kume karni di un animal ki ka tradu sangi. Tanbê nu ka debe kume ninhun kumida ki fazedu ku sangi.

Má nu debe uza sangi na tratamentus di saúdi? Alguns tratamentu ta bai kóntra lei di Deus. Kel-li ta inklui toma sangi konplétu ô kalker un di kes párti prinsipal di sangi: glóbulus burmedju, glóbulus branku, plaketas i plasma. Má ten tratamentus ki talvês é ka fásil nu sabe si é kóntra lei di Deus ô nau. Pur izénplu, alguns tratamentu ta uza kes párti más pikinoti di sangi, ki tradu di un di kes párti prinsipal di sangi. Otus tratamentu ta nvolve uza bu própi sangi. Na kes situason la, kada un di nos debe disidi kuzê ki nu ta faze. a — Gálatas 6:5.

 SABE MÁS

3. Skodje kes tratamentu di saúdi ki ta agrada Jeová

Modi ki bu pode skodje kes tratamentu di saúdi ki sta di akordu ku kel ki Jeová ta pensa? Odja VÍDIU, i dipôs pâpia sobri kes kuza inportanti li:

• Ora ta pidi sabedoria. — Tiago 1:5.

• Djobe prinsípius di Bíblia i odja modi ki bu ta aplika-s. — Provérbios 13:16.

• Odja ki tipu di tratamentu ta fazedu na undi ki bu ta mora.

• Disidi kal di kes tratamentu bu ka ta seta.

• Ten sertéza ma kel disizon ki bu toma ta dexa-u ku un konsénsia linpu. — Atos 24:16. b

• Lenbra ma óras ki bu ta toma un disizon ki ten aver ku konsénsia, ningen ka debe fla-u kuzê ki bu ten ki faze, nen bu maridu ô mudjer, nen un ansion i nen kel algen ki sta studa Bíblia ku bo. — Romanos 14:12.

• Skrebe kel disizon ki bu toma pa otus pode sabe.

4. Tistimunhas di Jeová krê ten midjór tratamentu di saúdi

Nu pode sigi leis di Deus sobri sangi i omésmu ténpu resebe midjór tratamentu di saúdi sen sangi. Odja VÍDIU.

Lé Tito 3:2, i dipôs pâpia sobri kel pergunta li:

• Pamodi ki nu debe mostra ruspetu i mante kalmu óras ki nu ta pâpia ku un dotor?

 5. Tratamentus ki ta uza kes párti más pikinoti di sangi

Sangi ten kuatu párti prinsipal: glóbulus burmedju, glóbulus branku, plaketas i plasma. Kada un di kes kuatu párti prinsipal pode divididu na kes párti más pikinoti. c Alguns di kes párti más pikinoti di sangi pode uzadu pa faze ramedi pa trata duénsas ô pa djuda un algen para di perde sangi.

Óras ki tratamentus di saúdi ta uza kes párti más pikinoti di sangi, kada kriston debe uza se konsénsia trenadu pa Bíblia pa toma se própi disizon. Alguns kriston talvês ta disidi ka seta kes tratamentu ki ta uza kes párti más pikinoti di sangi. Má otus ses konsénsia pode dexa-s seta kes tratamentu la.

Óras ki bu ta toma bu disizon, pensa na kel pergunta li:

• Modi ki N ta splikaba un dotor pamodi ki N ta seta ô N ka ta seta alguns di kes párti más pikinoti di sangi?

 REZUMU

Jeová ka krê pa nu uza sangi di manera mariadu.

Perguntas di rezumu

• Pamodi ki sangi é sagradu pa Jeová?

• Modi ki nu sabe ma kel lei di Deus sobri sangi ta aplika na da ô toma sangi?

• Modi ki bu pode toma bons disizon sobri tratamentus di saúdi ki ta uza sangi?