មេរៀនទី៣៩
តើព្រះមានទស្សនៈយ៉ាងណាអំពីឈាម?
ឈាមគឺសំខាន់ខ្លាំងណាស់ បើគ្មានឈាមយើងទាំងអស់គ្នាមិនអាចរស់បានទេ។ ព្រះដែលជាអ្នកបង្កើតយើង មានសិទ្ធិប្រាប់យើងថាគួរប្រើឈាមតាមរបៀបណា។ តើលោកមានប្រសាសន៍យ៉ាងណាអំពីឈាម? តើយើងអាចបរិភោគឈាមឬចាក់បញ្ចូលឈាមបានទេ? ស្ដីអំពីរឿងនេះ តើអ្នកអាចធ្វើយ៉ាងណាដើម្បីសម្រេចចិត្តត្រឹមត្រូវ?
១. តើព្រះយេហូវ៉ាមានទស្សនៈយ៉ាងណាអំពីឈាម?
នៅសម័យគម្ពីរ ព្រះយេហូវ៉ាបានប្រាប់អ្នកគោរពប្រណិប័តន៍លោកថា៖ «ជីវិតទាំងឡាយគឺនៅក្នុងឈាម»។ (ច្បាប់លេវី ១៧:១៤) ចំពោះព្រះយេហូវ៉ា ឈាមគឺតំណាងជីវិត។ ជីវិតគឺពិសិដ្ឋ និងជាអំណោយដ៏វិសេសពីព្រះ ដូច្នេះឈាមក៏ពិសិដ្ឋដែរ។
២. តើព្រះហាមមិនឲ្យប្រើឈាមក្នុងរឿងអ្វីខ្លះ?
មុនមានក្រុមជំនុំគ្រិស្តសាសនិក ព្រះយេហូវ៉ាបានបង្គាប់អ្នកគោរពប្រណិប័តន៍លោកមិនឲ្យបរិភោគឈាម។ (សូមអាន ដើមកំណើត ៩:៤ និងច្បាប់លេវី ១៧:១០) ក្រោយពីមានក្រុមជំនុំគ្រិស្តសាសនិក ព្រះយេហូវ៉ាបានឲ្យបង្គាប់នោះម្ដងទៀត។ ហេតុនេះ គណៈអភិបាលបានផ្ដល់ការណែនាំដល់គ្រិស្តសាសនិកថា៖ «ចូរជៀសវាងជាដាច់ខាត . . . ពីឈាម»។—សូមអាន សកម្មភាព ១៥:២៨, ២៩
តើការជៀសវាងពីឈាមមានន័យយ៉ាងណា? ជាឧទាហរណ៍ បើគ្រូពេទ្យប្រាប់អ្នកឲ្យជៀសវាងពីស្រា នោះអ្នកច្បាស់ជាមិនពិសាស្រាទេ។ ប៉ុន្តែ តើអ្នកនឹងបរិភោគអាហារដែលមានជាតិស្រា ឬចាក់បញ្ចូលស្រាតាមសរសៃរបស់អ្នកទេ? ច្បាស់ជាមិនធ្វើដូច្នោះទេ។ ស្រដៀងគ្នាដែរ បង្គាប់របស់ព្រះដែលឲ្យជៀសវាងពីឈាមមានន័យថា យើងមិនគួរបរិភោគឈាមឬបរិភោគសាច់សត្វដែលមិនទាន់សម្រក់ឈាមទេ ហើយយើងក៏មិនគួរបរិភោគអាហារដែលមានដាក់ឈាមដែរ។
ចុះយ៉ាងណាការប្រើឈាមក្នុងវេជ្ជសាស្ត្រ? វិធីព្យាបាលខ្លះគឺខុសច្បាប់របស់ព្រះតែម្ដង។ វិធីព្យាបាលទាំងនេះរួមមានការចាក់បញ្ចូលឈាមសុទ្ធ ឬសមាសធាតុសំខាន់ៗនៃឈាម ពោលគឺគោលិកាក្រហម គោលិកាស ប្លាកែត និងប្លាស្មា។ វិធីព្យាបាលខ្លះទៀតប្រហែលជាមិនខុសច្បាប់របស់ព្រះចំៗទេ។ ជាឧទាហរណ៍ វិធីព្យាបាលខ្លះរួមបញ្ចូលការប្រើធាតុចម្រាញ់ណាមួយនៃសមាសធាតុសំខាន់ៗនៃឈាម។ ចំណែកឯវិធីព្យាបាលផ្សេងទៀត គឺរួមបញ្ចូលការប្រើឈាមរបស់បុគ្គលនោះផ្ទាល់។ ពេលពិចារណាអំពីវិធីព្យាបាលទាំងនេះ យើងម្នាក់ៗត្រូវធ្វើការសម្រេចចិត្តដោយខ្លួនឯង។ a—កាឡាទី ៦:៥
បង្កើនចំណេះ
សូមពិចារណាអំពីរបៀបដែលអ្នកអាចធ្វើការសម្រេចចិត្តដែលទាក់ទងនឹងការប្រើឈាម។
៣. ចូរធ្វើការសម្រេចចិត្តអំពីវិធីព្យាបាលដែលព្រះយេហូវ៉ាពេញចិត្ត
តើតាមរបៀបណាអ្នកអាចជ្រើសរើសវិធីព្យាបាលដែលស្របតាមទស្សនៈរបស់ព្រះ? លេងវីដេអូ រួចពិភាក្សាអំពីសារៈសំខាន់នៃការធ្វើតាមជំហានដូចតទៅ៖
-
អធិដ្ឋានសុំប្រាជ្ញា។—យ៉ាកុប ១:៥
-
ស្រាវជ្រាវគោលការណ៍ក្នុងគម្ពីរ និងរបៀបអនុវត្ត។—សុភាសិត ១៣:១៦
-
ស្វែងយល់អំពីវិធីព្យាបាលក្នុងតំបន់របស់អ្នក។
-
កត់សម្គាល់វិធីព្យាបាលដែលអ្នកមិនព្រមទទួល។
-
ត្រូវប្រាកដថាការសម្រេចចិត្តរបស់អ្នកនឹងធ្វើឲ្យអ្នកនៅតែមានសមត្ថភាពវិនិច្ឆ័យដែលមិនផ្ដន្ទាទោស។—សកម្មភាព ២៤:១៦ b
-
ក្នុងរឿងដែលទាក់ទងនឹងសមត្ថភាពវិនិច្ឆ័យរបស់អ្នក គ្មានអ្នកណាម្នាក់គួរប្រាប់អ្នកថាត្រូវសម្រេចចិត្តបែបណាទេ សូម្បីតែគូអាពាហ៍ពិពាហ៍របស់អ្នក អ្នកចាស់ទុំ ឬអ្នកបង្រៀនគម្ពីរ។—រ៉ូម ១៤:១២
-
កត់ទុកការសម្រេចចិត្តរបស់អ្នក។
៤. សាក្សីព្រះយេហូវ៉ាស្វែងរកវិធីព្យាបាលល្អ
ស្ដីអំពីឈាម សូមអ្នកជឿជាក់ថាអ្នកអាចធ្វើតាមច្បាប់របស់ព្រះបាន ហើយអ្នកអាចរកបានការព្យាបាលល្អដែលមិនប្រើឈាម។ លេងវីដេអូ។
សូមអាន ទីតុស ៣:២ រួចពិភាក្សាសំណួរនេះ៖
-
ពេលពិគ្រោះជាមួយគ្រូពេទ្យ ហេតុអ្វីយើងគួរបង្ហាញការគោរពនិងចិត្តស្លូតបូត?
|
មិនទទួល |
គ្រិស្តសាសនិកម្នាក់ៗត្រូវសម្រេចចិត្ត |
|---|---|
|
ក. ប្លាស្មា |
ធាតុចម្រាញ់ចេញពីប្លាស្មា |
|
ខ. គោលិកាស |
ធាតុចម្រាញ់ចេញពីគោលិកាស |
|
គ. ប្លាកែត |
ធាតុចម្រាញ់ចេញពីប្លាកែត |
|
ឃ. គោលិកាក្រហម |
ធាតុចម្រាញ់ចេញពីគោលិកាក្រហម |
៥. ធាតុចម្រាញ់ចេញពីសមាសធាតុសំខាន់ៗនៃឈាម
ឈាមមានសមាសធាតុសំខាន់ៗបួនគឺ គោលិកាក្រហម គោលិកាស ប្លាកែត និងប្លាស្មា។ សមាសធាតុទាំងនេះមានធាតុតូចៗជាច្រើន ហៅថាធាតុចម្រាញ់ចេញពីសមាសធាតុសំខាន់ៗនៃឈាម។ c ធាតុចម្រាញ់ខ្លះមានក្នុងឱសថដែលជួយព្យាបាលជំងឺ ឬជួយឲ្យឈាមកក។
ស្ដីអំពីធាតុចម្រាញ់ចេញពីសមាសធាតុសំខាន់ៗនៃឈាម គ្រិស្តសាសនិកម្នាក់ៗត្រូវធ្វើការសម្រេចចិត្តផ្ទាល់ខ្លួន ដោយផ្អែកលើសមត្ថភាពវិនិច្ឆ័យដែលបានត្រូវបង្ហាត់បង្រៀនពីគម្ពីរ។ បងប្អូនខ្លះប្រហែលជាមិនព្រមទទួលយកវិធីព្យាបាលដែលមានធាតុចម្រាញ់ចេញពីសមាសធាតុសំខាន់ៗនៃឈាមទេ។ រីឯសមត្ថភាពវិនិច្ឆ័យរបស់បងប្អូនឯទៀត ប្រហែលជាអនុញ្ញាតឲ្យពួកគាត់ទទួលយកធាតុចម្រាញ់ទាំងនោះ។
ពេលអ្នកត្រូវធ្វើការសម្រេចចិត្ត សូមពិចារណាសំណួរនេះ:
-
តើខ្ញុំអាចពន្យល់គ្រូពេទ្យយ៉ាងណា អំពីមូលហេតុដែលខ្ញុំទទួលឬមិនទទួលយកធាតុណាមួយដែលចម្រាញ់ចេញពីសមាសធាតុសំខាន់ៗនៃឈាម?
មនុស្សខ្លះប្រហែលជាសួរថា៖ «តើការចាក់បញ្ចូលឈាម ខុសដែរឬ?»។
-
តើអ្នកគិតយ៉ាងណា?
សេចក្ដីសង្ខេប
ព្រះយេហូវ៉ាចង់ឲ្យយើងម្នាក់ៗចាត់ទុកឈាមថាពិសិដ្ឋ។
រៀនសាឡើងវិញ
-
ហេតុអ្វីព្រះយេហូវ៉ាចាត់ទុកឈាមថាពិសិដ្ឋ?
-
តើយើងដឹងយ៉ាងដូចម្ដេចថា បង្គាប់របស់ព្រះដែលឲ្យជៀសវាងពីឈាមគឺទាក់ទងនឹងការមិនចាក់បញ្ចូលឈាម?
-
ទាក់ទងនឹងវិធីព្យាបាលដែលប្រើឈាម តើអ្នកអាចធ្វើយ៉ាងណាដើម្បីសម្រេចចិត្តត្រឹមត្រូវ?
ស្វែងយល់ថែមទៀត
តើអ្នកគួរពិចារណាកត្តាអ្វីខ្លះ មុនធ្វើការសម្រេចចិត្តអំពីវិធីព្យាបាលដែលប្រើឈាមរបស់អ្នកផ្ទាល់?
«សំណួរពីអ្នកអាន» (ទស្សនាវដ្ដីប៉មយាម ថ្ងៃទី១ ខែតុលា ឆ្នាំ២០០៤)
មុនអ្នកសម្រេចចិត្តទទួលយកធាតុចម្រាញ់ចេញពីសមាសធាតុសំខាន់ៗនៃឈាម តើអ្នកគួរគិតពិចារណាអ្វីខ្លះ?
«សំណួរពីអ្នកអាន» (ទស្សនាវដ្ដីប៉មយាម ថ្ងៃទី១ ខែតុលា ឆ្នាំ២០០៤)
តើអ្វីបានធ្វើឲ្យគ្រូពេទ្យម្នាក់ជឿជាក់ថាទស្សនៈរបស់ព្រះយេហូវ៉ាអំពីឈាមគឺសមហេតុសមផល?
សូមមើលរបៀបដែលពួកអ្នកចាស់ទុំនៅផ្នែកគណៈកម្មាធិការសម្ព័ន្ធការពេទ្យជួយបងប្អូនរួមជំនឿ។
a សូមមើលមេរៀនទី៣៥ «របៀបធ្វើការសម្រេចចិត្តល្អ»។
b សូមមើល ចំណុចលេខ៥ «ធាតុចម្រាញ់ចេញពីសមាសធាតុសំខាន់ៗនៃឈាម» និងកំណត់នៅចុងសៀវភៅលេខ៣ «វិធីព្យាបាលដែលទាក់ទងនឹងឈាម»។
c គ្រូពេទ្យខ្លះចាត់ទុកសមាសធាតុសំខាន់ៗទាំងបួននៃឈាមថាជាធាតុចម្រាញ់។ ហេតុនេះ អ្នកប្រហែលជាត្រូវពន្យល់គ្រូពេទ្យអំពីការសម្រេចចិត្តរបស់អ្នកថា អ្នកមិនទទួលយកការចាក់បញ្ចូលឈាមសុទ្ធ ឬគោលិកាក្រហម គោលិកាស ប្លាកែត និងប្លាស្មាទេ។
លោកអ្នកក៏ប្រហែលជាចូលចិត្តដែរ
សំណួរដែលមនុស្សជាច្រើនសួរអំពីសាក្សីព្រះយេហូវ៉ា
តើការរៀនគម្ពីរជាមួយសាក្សីព្រះយេហូវ៉ាគឺយ៉ាងណា?
ការរៀនគម្ពីរជាមួយសាក្សីព្រះយេហូវ៉ាគឺឥតគិតថ្លៃ។ លោកអ្នកអាចប្រើសេចក្ដីបកប្រែណាក៏បាន។ លោកអ្នកអាចអញ្ជើញមិត្តភក្ដិ ឬក្រុមគ្រួសារឲ្យចូលរួមរៀនជាមួយគ្នា។
