ERISOMO 39
Amalengekania wa Nyamuhanga oko Musasi
Omusasi ni w’omughaso munene. Sihali oyuwangabyaho athawithegho. Nyamuhanga, iyo ng’Omuhangiki, awithe ehamuli y’eribugha omusasi ng’atholere iniakolesibwa athi. Ni byahi eby’abiribugha oko musasi? Mbwino angana libwa kutse erihirwa okwa mundu? Kandi wangathwamu wuthi ndeke oko mwatsi oyu?
1. Yehova awithe malengekaniaki oko musasi?
Yehova mwabwira abaramya biwe omwa buthuku bwe Biblia athi: ‘Engebe y’omubiri wosi gho musasi.’ (Abalawi 17:14) Oku Yehova, omusasi akimanira engebe. Kundi engebe ni kihembo ekibuyirire erilhua oku Nyamuhanga, omusasi nagho abuyirire.
2. Ni mikolesirye yahi y’omusasi eya Nyamuhanga akathanga?
Yehova mwabwira abaramya biwe ababyaho Ekikristayo kithe kyatsuka athi isibalya omusasi. (Soma Enzuko 9:4 na Abalawi 17:10.) Mwahamya okwa kihano eki omughulhu akathunga akakasondolha kabwira Abakristayo kathi ‘muleke erirya omusasi.’—Soma Emibiri 15:28, 29.
Erileka erirya omusasi kikamanyisayaki? Omudokita amakubwira athi wuleke obwabu, isiwendibya wukabunywa. Aliwe ibbwa iwunemwendibya wukalya ebyalya ebiri mw’obwabu kutse iwunemwendi lhabya obwabu bw’omwa miki yawu? Eyihi nahake. Kuthya, ekihano kya Nyamuhanga eky’erileka omusasi kikamanyisaya kithi sithutholere thukanywa omusasi kutse erirya enyama eyithalhuire mw’omusasi. Kandi sithutholere thukalya ebyalya ebyabirihirwamo omusasi.
Kandi ibbwa emithambirire ey’erihirwako omusasi? Eyindi mithambirire yikathwa ekihano kya Nyamuhanga. Eyi mwamuli erihirwako omusasi owosi kutse ebighuma by’okwa bitsweka bikulhu-bikulhu by’omusasi—red cells, white cells, platelets, na plasma. Okwa yindi mithambirire, kyanganabya isikilhangirikire ndeke nga yanganathwa ebihano bya Nyamuhanga kutse eyihi. Ng’eky’erileberyako, eyindi mithambirire mwamuli ehitsweka hy’omwa bitsweka bikulhu-bikulhu by’omusasi. Eyindi imwabya omundu erikolesya omusasi wiwe-wiwe. Thukalebya ndeke emithambirire eyi, obuli mughuma w’okw’ithwe atholere iniayithwiramu. a—Abanya Galatia 6:5.
THASYIGHA BINGYI
Minya ngoku wanga thwamu okwa mithambirire eyirimu erikolesya omusasi.
3. Ithwamu ekikatsemesaya Yehova okwa by’emithambirire
Wangathwamu wuthi ekikatsemesaya Nyamuhanga erikwamana n’emithambirire eyirimu erikolesya omusasi? Mubughaye EVIDIYO, mwanakania okwa mughaso w’erighendera okwa biika ebikakwamako.
-
Saba Yehova y’amenge.—Yakobo 1:5.
-
Sondekanaya emisingyi ye Biblia kandi ngoku wanga ghendera kuyo.—Emisyo 13:16.
-
Minya nga ni yindi mithambirire yahi eyiri ewenyu.
-
Minya nga ni mithambirire yahi eya wuthe wanga ligha.
-
Lhangira wuthi ebya wukathwamu bikaleka obunyamuthima-thima bwawu ibwabya ibunahenirye.—Emibiri 24:16. b
-
Minya ngoku isihabya mundu—nomwangabya oyo wuli nayu omwa butheke, omusyakulhu w’ekithunga, kutse oyukakweghesaya e Biblia—oyutholere erikubwira eky’erithwamu bikahika oko myatsi y’obunyamuthima-thima.—Abanya Roma 14:12.
-
Handika erithwamu lyawu.
4. Abema ba Yehova bakasondekanaya emithambirire eyuwene kutsibu
Kinathokekene erighendera okwa kihano kya Nyamuhanga ekihambire oko musasi n’erithambirwa ahathe erikolesya omusasi. Mubughaye EVIDIYO.
Soma Tito 3:2, mwanakania okwa kibulyo kino:
-
Busana naki thutholere ithwakangania erisikya n’obwolho thukakania n’abathambiri?
|
Ebithelighawa |
Ebya Mukristayo akayithwiramu |
|---|---|
|
A. Blood plasma |
Obutsweka bwe plasma |
|
B. White cells |
Obutsweka bwe white cells |
|
C. Platelets |
Obutsweka bwe platelets |
|
D. Red cells |
Obutsweka bwe red cells |
5. Emithambirire yamabya mw’erikolesya obutsweka-butsweka bw’omusasi
Omusasi awithe ebitsweka bbini bikulhu-bikulhu—red cells, white cells, platelets, na plasma. Ebitsweka ebi biri mw’ehitsweka hike-hike hinene, ni bugha ambu, obutsweka-butsweka bw’omusasi. c Obundi butsweka bukakolesibawa omwa mibatsi eyikawathikaya erirwanisya amalhwere kutse erikakirya erilhuamo musasi munene.
Bikahika okwa butsweka-butsweka bw’omusasi, obuli Mukristayo atholere iniayithwiramu erikwamana n’obunyamuthima-thima bwiwe obukangiriribwe ne Biblia. Abandi bangana thwamu erighana emithambirire eyirimu erikolesya obutsweka-butsweka bw’omusasi. Abandi bangana yowa bathi obunyamuthima-thima bwabu bukaligha erikolesya obutsweka-butsweka obo.
Wukathwamu lengekanaya okwa kibulyo kino:
-
Nangasoborera indi omuthambiri ekikaleka ingaghana kutse ingaligha emithambirire eyirimu erikolesya obutsweka-butsweka bulebe bw’omusasi?
OMUNDU ANGANA BULYA ATHI: “Hali kibiki erihirwako omusasi?”
-
Wanga bugha wuthiki?
OMWA BIKUHI
Yehova anzire ithwayihighulha okw’ikolesya nabi omusasi.
Eriyibukya
-
Busana naki Yehova akalhangira omusasi ng’ekindu ekibuyirire?
-
Thukaminya thuthi ngoku ekihano kya Nyamuhanga eky’erileka erirya omusasi kihambire n’okw’ihirwako omusasi?
-
Wanga thwamu wuthi ndeke bikahika okwa mithambirire eyirimu erikolesya omusasi?
MINYA BINGYI
Ni byahi ebyanga kuwathikya wukathwamu okwa mithambirire eyirimu erikolesya omusasi?
“Ebibulyo Erilhua Omwa Basomi” (The Watchtower, Okwerikumi 15, 2000)
Ni byahi ebya wanga kolha wukathwamu nga wulighe emithambirire eyirimu erikolesya obutsweka-butsweka bw’omusasi?
“Ebibulyo Erilhua Omwa Basomi” (The Watchtower, Okwomukagha 15, 2004)
Ni kyahi ekya wathikaya omunya sayansi mughuma eriligha ngoku amalengekania wa Yehova oko musasi ahikire?
“Munaligha Amalengekania wa Nyamuhanga oko Musasi” (Awake!, Okwerikuminibiri 8, 2003)
Minya abasyakulhu abali okwa Hithunga Ehikakolongana n’Amathambiriro nga bakawathikaya bathi balikyethu.
a Lebaya Erisomo 35, “Ngoku Wanga Thwamu Ndeke.”
b Lebaya enzumwa ya 5, “Emithambirire yamabya mw’erikolesya obutsweka-butsweka bw’omusasi,” na Endomeko 3, “Emithambirire Eyirimu Erikolesya Omusasi.”
c Abandi bathambiri bakalhangira ebitsweka bbini bikulhu-bikulhu by’omusasi ng’obutsweka-butsweka bw’omusasi. Neryo iwanganayithagha erisoborera erithwamu lyawu ery’erighana erihirwako omusasi owosi kutse esya red cells, white cells, platelets, kutse plasma.
