KALABO 39
Velei Gala Ɣa Ɣi-Gaa-Ziɛ La E Vile Fɔdɔ Ʋaa Va
Fɔdɔi maa viivɛ ɓɔɔ ga ʋike. Ani fɔdɔ lɛ ɣɛni de ya dɛ lɛ ɓega ɣɛ ŋetea. De ɓɛtɛ Ɣalagi ɣa manɛɛ e tɛnɛ fe de ya e vile fɔdɔ ʋaa va. Zɛɓɛi e boga e vile fɔdɔ ʋaa va? E ɣisu manɛɛ de fɔdɔ mi ɔɔ te pu de wɔlɔgi zu? Da leve ɣɛ le de deʋe vagɔ wo e vile fɔdɔ ʋaa va?
1. Jehova ɣa ɣi-gaa-ziɛ ɣɛ le e vile fɔdɔ ʋaa va?
Nii ɣa Jehova boni feli veaitiɛ ma wɔlɔ-wɔlɔi zu: “Ʋulu ŋɛniitiɛ ɓɔgapɛ te yɛʋui ɣa ga fɔdɔi e te ya.” (Leviticus 17:14) Jehova ɣaazu, fɔdɔi zu-wulo-zu ɣa ga zɛʋui. Tei zɛʋui ga faa ɓi Jehova ɣaazu, fɔdɔi ɓalaa ʋize wogɛ.
2. Zɛɓɛi Gala boga ga de mɛlɛ kɛ ga fɔdɔi?
Jehova boni feli veaitiɛ ma ga te mɛlɛ fɔdɔ mi. (Genesis 9:4; ɓɔga Leviticus 17:10 lodo.) E dɛɛni ga manɛɛ a de ziɛ ga tɔgi nii. E nii ɣɛɛni tei Gala Goo Wotii Maazu Vɛtɛ Veaitiɛ te boni Kolai Maa Veaitiɛ ma ga: te “ɓɔɔ ɓe teve . . . ŋama-mii ʋaa va.”—Te Ɣɛɛ Ʋaitiɛ 15:28, 29 lodo.
Gala Kɔlɔi ɣa bona ga de ɓɔɔ ɓeteve ŋama-mii ʋaa va, su-wulo-zu ɣa ga zɛɓɛ? Ani ya liina sale vɛlɛ la te ɣɛ e ma ɓɔɔ ɓeteve dɔɔ va, su-wulo-zu ɣa ga e mɛlɛ sa ta ɓoale. Kɛ e ɣisu ya kɛ e daa-mii ŋɛnii nii mi te dɔɔ wua ma ɔɔ e ɓe ba te pu e wɔlɔgi zu? Gaama zu, ɓa. Vele ɣana nɔ e la, nii Gala ge boga ga de ɓeteve ŋama-mii ʋaa va su-wulo-zu ɣa ga, de mɛlɛ fɔdɔ mi ɔ nɔ ɣɛ ga de suoi nii mi tɛ lɛ kɔda leveni. Maa lɛ nɛɛni wɔnɔ dɔ daa-mii ŋɛni nɛpɛ mi nii fɔdɔ su.
Zɛɓɛi e ga yɛdɔ ɣi-gaa-ziɛi e vile velei va ta fɔdɔ ʋaa ɣɛɛ la sale-vɛlɛi la? Velei tanisu ta fɔdɔ ʋai ɣɛɛla sale-vɛlɛi la ɛ lɛ ga velei Jehova wõini e ɣɛɛ la. Ta ɣa ga fɔdɔ ʋee ʋai nu ya ɔɔ baa-vekegi ta—ŋama ɓoeigi, ŋama welegi, ziɛi é fɔdɔi zu, e vɛɛ fɔdɔ malagi va. Nii ta kɛ sale-vɛlɛitiɛ la e vile fɔdɔ ʋai va, te pɛ taale te ga faa yowũ. Ta ɣa ga, ta ŋɛnii ta wulo fɔdɔi zu ga te fe nui ta ya. Tanisu ta nui ta na fɔdɔi wulosu. Ta wolona tii ɣɛɛzu manui ma te fɔdɔi na ʋe zeea wulu. Towa vaana fai niitiɛ wɔ, manɛɛ de ɣile-giledaitiɛ de deʋe wo e vile nii va da kɛ. a—Galeesiaitiɛ 6:5.
FAA LAMAA MAA WOLI
Wɛlɛ velei va ya deʋe vagɔ wo la towa vilena fɔdɔ ʋaa va.
3. Deʋe wo e vile fɔdɔ ʋaa va ga e Jehova wuuzu nɛɛ
Ya leve ɣɛ le e deʋe wo e vile fɔdɔ ʋaa va e ɣɛ velei Jehova wõini e ɣɛɛ la? ƲILIOGI nii lɛ ga. Yá wolona, wo yɛpɛ e vile nii va e kɛɛ e ga faa ɓi ga de fai niitiɛ ɣɛ.
-
Jehova ɣaa-zaɣa-kɛ ga e kele-ɣele fe e ya.—Jĩi 1:5.
-
Tɛnɛgitiɛ te Gala Kɔlɔi zu te maa woli, na ɣa ɣɛɛna e wɛlɛ velei va ya ziɛ la ga tiɛ.—Proverbs 13:16.
-
Ɣi-gaa-ziɛ nii ma sologɛi e ʋaa ma vɛ e na.
-
Velei ta tii ɣɛɛ la ga fɔdɔi ani ɛ lɛ vani, ɣi-gaa-ziɛ nii ma ɛ̀ lɛ kɛɛ ɔ yee zei bu.
-
Ɣaa-ɓaa nii nɛpɛgi ya deʋe e ɣɛ ga Jehova yii-ma ʋaa.—Te Ɣɛɛ Ʋaitiɛ 24:16. b
-
Kwɛ̃ɛ ga maa lɛ nɛɛni nu nɛpɛ ɔ deʋe wo e vile nii va, manɛɛ yɛ ɓɔɔ e deʋe.—Loomɛitiɛ 14:12.
-
Niitiɛ e deʋea ponɛ.
4. Jehova Na Seeleitiɛ te wõini ɓɔɔ ga salei nii solowogɛi
Da zoo de ziɛ ga Gala na tɔgi e vile fɔdɔ ʋaa va na ɣa ɣɛɛna de sale maa zɔlɔwo solowogɛi de ʋaa ma fɔdɔ ʋaa lɛ ba. ƲILIOGI nii lɛ ga.
A Taitɔ 3:2 lodo, wo gaa-zaɣa-kɛɛ nii ɣaa wote:
-
Zɛɓɛi e kɛɛ manɛɛ de dɛ ga wũfe-ma ɓɔga tuɓo-vele vagɔ ɣa de ya ani da ɣɛna yɛpɛzu wui sale lii ɣɛɛ nui ta wɔ?
|
Niitiɛ maa lɛ nɛɛni ɔ yee zei bu |
Nii manɛɛ e deʋe wo e vile ba |
|---|---|
|
A. Ziɛi é fɔdɔi zu |
Ani ta ŋɛnii ta wulona ziɛi zu é fɔdɔi zu |
|
B. Ŋama welegi |
Ani ta ŋɛnii ta wulona ŋama welegi zu |
|
C. Fɔdɔ malagi |
Ani ta ŋɛnii ta wulona fɔdɔ malagi zu |
|
D. Ŋama ɓoeigi |
Ani ta ŋɛnii ta wulona ŋama ɓoeigi zu |
5. Ani ta ɣɛna wõini te ŋɛnii ta wulo fɔdɔi va te fe de ya
Fɔdɔi ɣaa wɛɛvɛ su ga naagɔ—ŋama ɓoeigi, ŋama welegi, ziɛi é fɔdɔi zu, e vɛɛ fɔdɔ malagi va. Ŋɛni vɛlɛ-vɛlɛ taniga ta fɔdɔ baa-vekegi niitiɛ zu. c Ta ŋɛni vɛlɛ-vɛlɛgi nii taniga ɓɛtɛ ga sale, towa ya ɓɔ de va de seeɓɛi yee maazu ɣale ɔɔ e fɔdɔi ɣaa leve ani da ɓɔɔ zaɣana.
Towa vilena ŋɛni vɛlɛ-vɛlɛgi nii ta ziɣi ʋai wɔ e fɔdɔ zei-zu naagɔi niitiɛ zu, manɛɛ Kolai Maa Veaitiɛ te deʋe wo ta ɓɔɔ e vile ba kuloai Gala Kɔlɔi zu. Taniga ta deʋe ga te mɛlɛ ŋɛni vɛlɛ-vɛlɛgi nii ta ziɣi kuloai fɔdɔ zei-zu naagɔitiɛ zu. Fikaa ta deʋe ga te yee zei bu.
Ani ya ɣɛna deʋe wosu e vile fɔdɔ ʋaa va, ɣi-gaa-ziɛ gaa-zaɣa-kɛɛ nii ma:
-
Nii ge deʋea e vile ŋɛni vɛlɛ-vɛlɛgi niitiɛ va kuloai fɔdɔ zei-zu naagɔitiɛ zu, ga leve ɣɛ le ge su-wulo wui sale lii ɣɛɛ nui ma?
NUMAA TANIGA TA ƔƐ TEA: “Zɛɓɛi e kɛɛ fɔdɔ ziɣi ʋai ga faa yowũ?”
-
Zɛɓɛi e ga yɛdɔ ɣi-gaa-ziɛi?
NII SA È MAA WOLIA
Jehova wõini de fɔdɔ ʋai ziɣi ga faa ɓi.
Ma-ɓigitiɛ
-
Zɛɓɛi e kɛɛ fɔdɔ ʋai ga faa ɓi Jehova ɣaazu?
-
De levegɛ ɣɛ le de kwɛ̃ɛ ga nii Gala ge boga ga de ɓeteve ŋama-mii ʋaa va, su-wulo-zu ɣa ɓalaa ga de mɛlɛ fɔdɔ ziɣi?
-
Ya leve ɣɛ le e deʋe vagɔ wo e vile fɔdɔ ʋaa va?
WƐLƐ FAA LAMAA VA
Zɛɓɛi manɛɛ e ɣi-gaa-ziɛ ma ani towa vaana e ʋɔdɔi wulo ʋai e wɔlɔgi zu ta wolona tii ɣɛɛzu e ma te fe e ya wulu?
“Gaa-Zaɣa-Kɛɛ Kɔlɔ Lodo Beaitiɛ Ta Bo” (The Watchtower, October 15, 2000)
Zɛɓɛi manɛɛ e ɣi-gaa-ziɛ ma ani towa vaana ŋɛni vɛlɛ-vɛlɛgi niitiɛ wɔ ta kulo fɔdɔ zei-zu naagɔitiɛ zu te kpɛtɛ ga sale?
“Gaa-Zaɣa-Kɛɛ Kɔlɔ Lodo Beaitiɛ Ta Bo” (The Watchtower, June 15, 2004)
Zɛɓɛi e ɓɔni wui sale lii ɣɛɛ nui nii va ga e yee zei nii wu Jehova boga e vile fɔdɔ va?
“Ge Yee Zeini Nii Wu Jehova Boga E Vile Fɔdɔ Va” (Awake!, December 8, 2003)
Kuuwu Wũ-Tuo Veai Niitiɛ Ta Yɛpɛ Wui Sale Lii Ɣɛɛ Veaitiɛ Wɔ, wɛlɛ velei ta ɓɔ la de ɣaa yɔwɔ̃itiɛ va.
b Wɛlɛ baa-veke 5 va, “Ani Ta Ɣɛna Wõini Te Ŋɛnii Ta Wulo Fɔdɔ Va Te Fe De Ya,” e vɛɛ Kɔlɔi Nii Laa Wulozu 3, “Ani Ta Ɣɛna Wõini Te Ŋɛnii Ta Wulo Fɔdɔ Va Te Fe De Ya.”
c Wui sale lii ɣɛɛ vea taniga ta ɣi-gaa-ziɛ ga ŋɛni vɛlɛ-vɛlɛgi niitiɛ ɣa wɔnɔ te ga fɔdɔ zei-zu naagɔitiɛ. Na ma manɛɛ e kwɛ̃ɛ velei ya su-wulo la wui sale lii ɣɛɛ nui ma nii e kɛɛ ɛ lɛ yee zeiya fɔdɔ wu ɔɔ ma zei-zu naagɔitiɛ te ta.
