SAK 39
Wẽnnaam tagsg sẽn yaa to-to zɩɩmã wɛɛngẽ
Zɩɩmã tara yõod wʋsgo. D sã n pa tar zɩɩm, d pa tõe n vɩɩmd ye. Wẽnnaam sẽn yaa d Naandã yĩnga, yẽ n tar sor n tõe n wilg tõnd d sẽn segd n maan to-to ne zɩɩmã. Bõe la a yeel zɩɩmã wɛɛngẽ? Rẽ yĩnga, d tõe n dɩɩ zɩɩm, wall n sak tɩ b ning-d zɩɩm bɩ? Wãn to la y tõe n bãng n yãk yam rẽ wɛɛngẽ?
1. A Zeova tagsg yaa bõe zɩɩmã wɛɛngẽ?
Pĩnd wẽndẽ wã, a Zeova ra yeela a nin-buiidã yaa: “Bõn-vɩɩl buudã fãa vɩɩm bee a zɩɩmẽ.” (Maan-kʋʋre 17:14) Ne a Zeova, zɩɩmã makda vɩɩmã. Vɩɩmã yaa kũun meng-meng Wẽnnaam sẽn kõ-do. Dẽnd zɩɩmã me yaa bũmb sẽn tar yõod wʋsgo.
2. Bõe la Wẽnnaam yeel zɩɩmã wɛɛngẽ?
Sa-kãsengã poor bilf bala, a Zeova kõo neb nins sẽn da tũud-a wã noore, n yeel-b tɩ b ra rɩ zɩɩm ye. A kõo pĩnd wẽndẽ Israyɛll nebã no-kãng me. (Karm-y Sɩngr 9:4 la Maan-kʋʋr 17:10.) Yʋʋm kobs poor me, a kõo kiris-nebã no-kãnga, n yeel-b yaa: “Lak-y y mens . . . ne zɩɩm.”—Karm-y Tʋʋm 15:28, 29.
Lak-y y mens ne zɩɩmã rat n yeelame tɩ bõe? Logtor sã n yeel-y tɩ y lak y mens ne rãam, y pa na n yũ ye. La rẽ yĩnga, y na n dɩɩ rɩɩb sẽn naag ne rãam, bɩ n sak tɩ b vʋdg-y rãam sɩda? Yaa vẽeneg tɩ ayo. Woto me, Wẽnnaam sẽn yeel tɩ d lak d mens ne zɩɩmã, rat n yeelame tɩ d pa segd n yũ zɩɩm, pa rẽ bɩ n wãb rũng b sẽn pa kodg nemd ye. D pʋd n pa segd n dɩ rɩɩb baa a ye sẽn naag ne zɩɩm ye.
La zɩɩmã tall n tɩbsã yẽ? Tɩbsg kẽer kɩɩsda Wẽnnaam tõogã vẽeneg-vẽenega. Wala makre, sak tɩ b ning-f zɩɩmã, pa rẽ bɩ zɩɩmã bõn-kãsems a naasã, rat n yeel tɩ globill ruuz rãmbã, globill blã rãmbã, plakɛt-rãmbã la plasma wã. Tɩbsg sãnda wɛɛngẽ, tõeeme n pa vẽeneg sã n kɩɩsda Wẽnnaam tõogã bɩ pa kɩɩsde. Wala makre, tɩbsg kẽer tũuda ne bõn-kɩds nins sẽn be zɩɩmã bõ-kãsems a naasã pʋgẽ wã. Yel-kãensã wɛɛngẽ, yaa ned kam fãa n segd n tags neere, n yãk a toorẽ yam. a—Galat-rãmbã 6:5.
D BAO N BÃNG N PAASE
D ges d sẽn tõe n bãng n yãk yam to-to zɩɩmã tall n tɩbsã wɛɛngẽ.
3. D yãk yam sẽn noogd a Zeova sũuri
Wãn to la d tõe n yãk yam tɩ zems ne a Zeova tagsg sẽn yaa soab zɩɩmã wɛɛngẽ wã? Ges-y VIDEO wã, rẽ poor bɩ y gom sagls nins sẽn pʋgdã tũubã yõod yelle.
-
Pʋʋs-y n kos-y yam.—Zak 1:5.
-
Maan-y vaeesg n bao noy la sagls sẽn be Biiblã pʋgẽ, la y bao n bãng y sẽn tõe n tũ-b to-to.—Yel-bũnã 13:16.
-
Bao-y n bãng-y tɩbsg nins y sẽn tõe n paam yãmb sẽn vɩẽ wã.
-
Bao-y n bãng-y tɩbsg nins y sẽn pa tõe n sakã vẽenega.
-
Modg-y tɩ y sẽn na n yãk yam ningã ra wa kɩt tɩ y sũur-kasetã ningd-y taal ye.—Tʋʋma 24:16. b
-
Bãng-y tɩ ned baa a ye, baa y sɩdã bɩ y pagã, kãsem-soaba, pa rẽ bɩ y Biibl karen-saambã pa segd n wilg yãmb y sẽn tog n yãk yam ninga, yɛl nins sẽn yaa sũur-kaset yellã wɛɛngẽ ye.—Rom dãmbã 14:12.
-
Gʋls-y y yam-yãkrã sebr zugu.
4. A Zeova Kaset rãmbã baooda tɩbsg nins sẽn yaa sõma n yɩɩda
D tõe n tũu noor ning Wẽnnaam sẽn kõ zɩɩmã wɛɛngẽ wã, la d paam tɩbsg sẽn yaa sõma, n pa tũud ne zɩɩm ye. Ges-y VIDEO wã.
Karm-y Tɩt 3:2, tɩ rẽ poor bɩ y leok sokrã:
-
Bõe yĩng tɩ d sã n wa sõsd ne logtoɛɛmbã bɩ d segd n waoogd-ba, la d gomd ne bʋgsem?
Kiris-ned pa tog n sak ye |
Kiris-ned fãa n yãkde |
---|---|
A. Plasma |
Plasma wã bõn-kɩdsã |
B. Globill blã rãmbã |
Globill blã rãmbã bõn-kɩdsã |
D. Plakɛt-rãmbã |
Plakɛt-rãmbã bõn-kɩdsã |
E. Globill ruuz rãmbã |
Globill ruuz rãmbã bõn-kɩdsã |
5. Zɩɩmã bõn-kɩdsã tall n tɩbsã
Zɩɩmã pʋgẽ, bõn-kãsems a naas n be be. Yaa globill ruuz rãmbã, globill blã rãmbã, plakɛt-rãmbã, la plasma wã. Bãmb b naasã pʋgẽ me, bõn-kɩds n be be. c B maanda tɩ-biis ne zɩɩmã bõn-kɩds kẽere, tɩ sõngd ne bãasã tɩbsgo, pa rẽ bɩ n tõe n sõng tɩ ned zɩɩm sẽn daagd yõke.
Zɩɩmã bõn-kɩdsã wɛɛngẽ, kiris-ned fãa n segd n tik a sũur-kasetã sẽn paam kiblg ne Biiblã maasmã zugu, n yãk a torẽ yam. Neb kẽer tõe n yãka yam n zãgs tɩ b kõn sak tɩbsg sẽn tũud ne zɩɩmã bõn-kɩdsã ye. Sãnda yẽ sũur-kaset kõt-b-la sore, tɩ b tõe n sake.
Y sã n wa rat n yãk yam, sok-y y meng yaa:
-
M na n maana a wãn n wilg logtor bũmb ning sẽn kɩt tɩ m na n sak bɩ n zãgs zɩɩmã bõn-kɩdg ninga?
NINA TÕE N SOKAME YAA: “Sak tɩ b ning-f zɩɩmã wẽngã yaa zĩ-bʋgo?”
-
Yãmb tagsg yaa bõe?
KƲMSGO
A Zeova pa rat tɩ d tall zɩɩmã n maan sẽn pa segd ye.
Lebg-n-gese
-
Bõe yĩng tɩ zɩɩmã yaa bũmb sẽn tar yõod wʋsg a Zeova nifẽ?
-
Bõe n kɩt tɩ d miẽ tɩ sak tɩ b ning-f zɩɩmã wɛɛngẽ, d segd n tũu noor ning Wẽnnaam sẽn kõ n yeel tɩ d lak d mens ne zɩɩmã?
-
Wãn to la y tõe n bãng n yãk yam zɩɩmã tall n tɩbsã wɛɛngẽ?
BŨMB A TAABA
Nand tɩ y yãk yam tɩbsg sẽn tũud ne yãmb mengã zɩɩmã wɛɛngẽ, bõe ne bõe yell la d segd tagse?
“Karemdbã sogsgo” (Yʋʋmd 2000 zĩ-likr kiuug pipi daar Gũusg Gasgã)
Y sã n wa rat n yãk y sã n na n saka zɩɩmã bõn-kɩdsã bɩ y pa na n sake, bõe yell la y segd n tagse?
“Karemdbã sogsgo” (Yʋʋmd 2004 sigr kiuug rasem 15 Gũusg Gasgã)
Bõe n sõng logtor a ye t’a wa tẽed masã tɩ Wẽnnaam tagsg sẽn yaa a soab zɩɩmã wɛɛngẽ wã zemsame?
Kãsem-dãmb nins sẽn naag sull nins sẽn get logtor yirẽ tɩbsg zu-loees yellã sẽn sõngd b tẽed-n-taasã to-to.
b Ges-y nimero a 5 wã: “Zɩɩmã bõn-kɩdsã tall n tɩbsã,” la Vẽnegr a 3, “Tɩbsg sẽn tũud ne zɩɩmã.”
c La logtoɛɛmb kẽer getame tɩ globill ruuz rãmbã, globill blã rãmbã, plakɛt-rãmbã, la plasma wã me yaa zɩɩmã bõn-kɩdse. Dẽnd y segd n wilga y logtorã bũmb ning sẽn kɩt tɩ y yãk yam n pa na n sak tɩ b ning-y zɩɩmã, wall a bõn-kãsems a naasã.