MUTU 39
Mwakuiwonela milopa Mulungu
Milopa ni yofunika ngako. Paliye munthu angankhale na moyo paliye milopa. Mulungu niye etilenga, tetyo yove niye ufunika kutiuja mwatingakatishilile ntchito milopa. Kansi Mulungu onena votyani vokhuza milopa? Kansi ŵanthu ofunikila kulya olo kuikiwa milopa? Kansi mungachite tyani kuti musankhe vinthu mwanzelu pa nkhani yamene iyi?
1. Kansi Yehova oiwona tyani milopa?
Yehova euja atumiki ŵake akale kuti: “Moyo wa nyama iliyonse ni milopa yake.” (Levitiko 17:14) Yehova, owona kuti milopa yupanamila moyo. Tetyo pakuti moyo ni mphaso yopatulika yofumila kwa Mulungu, nayosoti milopa ni yopatulika.
2. Mulungu olesha kukatishila ntchito milopa mophoniyeka
Yehova elamula atumiki ŵake kuti osati akokulya milopa. (Ŵelengani Genesis 9:4 na Levitiko 17:10.) Yove ewelejasoti lamulo yamene iyi pokatishila ntchito bungwe yutonga yamene yelangiza akhilisitu kuti “apitilije kupewa . . . milopa”.—Ŵelengani Machitidwe 15:28, 29.
Kansi kupewa milopa kutanthauza chinji? Keno dokota wakuujani kuti osati mukokumwa walwa, niye kuti otanthauza kuti mulekeletu kuumwa. Niye kuti mungalye chakulya chili na walwa olo mungaike walwa wamene uyo mu jekeseni nolilasa? Mungachitelini vamene ivo. N’chimozi-mozisoti na lamulo yechipeleka Mulungu yokhuza milopa. Lamulo yamene iyi yutanthauza kuti tufunikilalini kulya milopa olo nyama yosakhesa. Tufunikilalinisoti kupika milopa kulya olo kulya chakulya chamene chayavijiwa na milopa.
Lomba tyani pa nkhani yokatishila ntchito milopa kuchipatala? Pali njila ziyakine zoyavyila wolwala zamene zufwaya lamulo ya Mulungu pa nkhani yokhuza milopa. Vamene ivi vupamikijapo kuika wolwala milopa olo vigawo vikulu-vikulu va milopa vamene ni—maselo, asweta, maselo atuŵa komasoti maselo oyavya milopa kuunjikana na manzi a m’milopa. Koma pali njila ziyakine zamene ni zovuta kuziziŵa kuti zufwaya lamulo ya Mulungu olo yayi. Mwachisanzo, achipatala okwanisha kukatishila ntchito tuvigawo tutontho-tutontho twamene tutolewa kufumila ku vigawo vikulu-vikulu va milopa. Nthawe ziyakine pofunikila kukatishila ntchito milopa ya munthu wamene olwala yamene yetolewa mmuŵili mwake nosungiwa. Pa nkhani ngati n’zamene izi, aliyense ofunikila kusankha yeka vofunikila kuchita. a—Agalatiya 6:5.
VATI TIPHUNZILE
Tiphunzile kuti muwone mwamungasankhile vochita pa nkhani ya thandizo ya chipatala yokhuza milopa.
3. Mukosankha vinthu vamene vingakondweleshe Yehova
Keno musankha thandizo ya chipatala kansi mungasankhe tyani vinthu mokatijana na mwakuwonela milopa Mulungu? Lolelani VIDIYO, ndipo pavuli pake mukambilane kufunika kokonkheja mfundo zili m’nyansi izi.
-
Mukopenphela kuti Yehova akuyavyeni kusankha vinthu mwanzelu.—Yakobo 1:5.
-
Mukofufuza mfundo za m’Baibolo nowona mwamungazikatishilile ntchito.—Miyambo 13:16.
-
Sakilani njila zakukatishila ntchito kwanu kwamene uko achipatala pofuna kuyavya munthu olwala ofunikila milopa.
-
Pa njila zamwafwana zamene izo, onani njila zamungakane kulondela.
-
Sankhani vinthu vamene vingakuyavyeni kuti munkhale na chikumbuntima chituŵa.—Machitidwe 24:16. b
-
Ziŵani kuti paliye munthu—angafunikile kukusankhilani vochita pankhani yokhuza chikumbuntima—keno ni mwanakazi olo mwanalume wanu, nkulu mumpingo olosoti munthu wokuphunzisani Baibolo.—Aroma 14:12.
-
Lembani vamwasankha.
4. A Mboni za Yehova ofuna kulondela thandizo iweme ya chipatala
N’vokwanishika kumvwila lamulo ya Mulungu yokhuza milopa ndipo tingakwanishe kulondela thandizo iweme paliye kuikiwa milopa. Lolelani VIDIYO.
Ŵelengani Tito 3:2, ndipo pavuli pake mukambilane konsho iyi:
-
Ndaŵa yanji tufunikila kuchita vinthu mwaulemu komasoti mofasa tikolaŵila na madokota?
|
N’vosaloleka |
Nkhilisitu angasankhe yeka |
|---|---|
|
A. Manzi a m’milopa |
Tuvigawo tofumila m’manzi a m’milopa |
|
B. Maselo atuŵa |
Tuvigawo tofumila m’maselo atuŵa |
|
C. Maselo oyavya milopa kuunjikana |
Tuvigawo tofumila m’maselo oyavya milopa kuunjikana |
|
D.Maselo asweta |
Tuvigawo tofumila m’maselo asweta |
5. Vamufunikila kuziŵa vokhuza tuvigawo twa milopa
Milopa ili na vigawo vikulu-vikulu 4 vamene ni:—maselo, asweta, maselo atuŵa komasoti maselo oyavya milopa kuunjikana na manzi a m’milopa. Vigawo vamene ivi, vili na tuvigawo tutontho-tutontho tunyinji. c Tuyakine mwatuvigawo twamene utu otukatishila ntchito popanga mamkhwala olimbana na matenda komasoti oyavya kuti milopa iunjikane noleka kufuma.
Pa nkhani yosankha tuvigawo tutontho-tutontho twa m’milopa, nkhilisitu ofunikila kusankha yeka vochita mokatijana na chikumbuntima chake. Akhilisitu ayakine angasankhe kukana thandizo ya chipatala yufunikila kuti madokota akatishile ntchito tuvigawo tutontho-tutontho twa m’milopa. Pamene chikumbuntima cha Akhilisitu ayakine chingaŵalole kulondela tuvigawo tutontho-tutontho twa m’milopa.
Pamusankha vochita pa nkhani iyi, likonsheni kuti:
-
Kansi ningamufotokozele tyani dokota chifukwa chanukanila kulola kuti akatishile ntchito tuvigawo tutontho-tutontho twa m’milopa poniyavya?
ŴANTHU AYAKINE ANGAKUKONSHENI KUTI: “Kansi n’kuphoniya kuikiwa milopa?”
-
Kansi mwewo muganiza tyani?
MFUNDO ZACHIDULE
Yehova ofuna kuti tikowona kuti milopa ni yopatulika.
Makonsho oweleja
-
Ndaŵa yanji Yehova owona kuti milopa ni yopatulika?
-
Kansi tuziŵa tyani kuti lamulo ya Mulungu yakuti tikopewa milopa ikalikatasoti ntchito pa nkhani yoikiwa milopa?
-
Kansi mungasankhe tyani vochita mwanzelu pa nkhani yokatishila ntchito milopa monga thandizo ya chipatala?
PHUNZILANI VINYINJI
Kansi mufunikila kuganizila vinthu votyani mukaliye sankha thandizo ya chipatala yofunika kukatishila ntchito milopa yanu?
“Makonsho ofumila kuli oŵelenga” (Nsanja ya Olonda, 15 October , 2000)
Kansi mufunikila kuganizila chinji pamusankha kulondela olo pamukana tuvigawo tutontho-tutontho twa milopa?
“Makonsho ofumila kuli oŵelenga” (Nsanja ya Olonda, 15 June, 2004)
Kansi n’chinji chiyavya dokota muyakine kukhulupilila kuti maganizo a Yehova pa nkhani ya milopa ni omvwika?
“Niyamba kuwona milopa mwakuiwonela Mulungu” (Galamukani!, 8 December, 2003)
Onani mwamene akulu amene otumikila m‘Makomiti olaŵila na azachipatala mwakuchitila.
b Onani mfundo 5, “Zamene zamufunikila kuziŵa zokhuza tuvigawo tutontho-tutontho twa milopa,” na Mawu akumapeto 3, “Njila zoyavyila wolwala zokhuza milopa na Utumiki Wathu wa Ufumu, November 2006, pedji 3-6.”
c Madokota ayakine owona kuti vigawo vikulu-vikulu 4 vili monga tuvigawo tutontho-tutontho. Tetyo mungafunikile kumufotokozela dokota wanu kuti mwesankha kuti mungalolelini kuikiwa milopa yonse olo maselo, asweta, maselo atuŵa komasoti maselo oyavya milopa kuunjikana na manzi a m’milopa.
