Madi a bohlokwa kudu, ntle le ona re ka se phele. Ka ge Modimo a re bopile, ke yena feela a ka re botšago gore re swanetše go a diriša bjang. Bjale o re re swanetše go a diriša bjang? Na re ka a ja goba ra a tšhela? Le gona, o ka thušwa ke’ng go dira diphetho tše dibotse tabeng ye?

1. Ke eng seo Jehofa a se boletšego ka madi?

Jehofa o ile a botša Baisiraele gore: “Bophelo bja sephedi sa mohuta o mongwe le o mongwe bo mading a sona.” (Lefitiko 17:​14) Go ya ka Jehofa, madi a swantšhetša bophelo. Ka ge bophelo e le mpho e bohlokwa kudu yeo Modimo a re filego yona, madi le ona a bohlokwa kudu.

2. Ke mekgwa efe ya go diriša madi yeo Modimo a sa e amogelego?

Mehleng ya kgale, Jehofa o ile a nea batho bao ba bego ba mo hlankela molao wa gore ba se ke ba ja madi. (Bala Genesi 9:4 le Lefitiko 17:​10.) O ile a bušeletša molao wo ka go botša sehlopha se bušago gore se botše Bakriste ba pele gore ba “ile madi.”​—Bala Ditiro 15:​28, 29.

Go ila madi goba go se a diriše go ra go re’ng? Na ge e ba ngaka e ka go botša gore o se sa nwa bjala, o tla bo nwa? Aowa. Eupša na o ka ja dijo tšeo di nago le bjala goba wa dumela go hlabelwa bjala mo ditšhikeng tša gago? Aowa, o ka se dumele! Ka mo go swanago, molao wa Modimo wa gore re ile madi o ra gore ga se ra swanela go nwa madi goba go ja nama yeo e sego ya ntšhiwa madi. Le gona ga se ra swanela go ja dijo tšeo di nago le madi.

Re ka dira’ng ge e ba go nyakega gore re alafiwe ka kalafo yeo e dirišago madi? Dikalafo tše dingwe ga di dumelelane le molao wa Modimo tabeng ya go diriša madi. Ka mohlala, re bolela ka dikalafo tša go swana le go tšhela madi goba dikalafo tšeo di dirišago e nngwe ya dikarolo tše dikgolo tša madi, tša go swana le disele tše dikhwibidu, disele tše ditšhweu, di-platelet le plasma. Dikalafo tše dingwe tšona, go ka no ba go se na molao wa go lebanya wa ka Beibeleng wa gore re se ke ra di šomiša. Ka mohlala, dikalafo tše dingwe di šomiša dikarolwana tše dinyenyane tšeo di tšwago dikarolong tše dikgolo tša madi. Mola tše dingwe tšona di diriša madi a motho yoo ka boyena. Go dikalafo tša mohuta wo, motho yo mongwe le yo mongwe o swanetše go itirela phetho. a​—Bagalatia 6:5.

 ITHUTE KA MO GO TSENELETŠEGO

3. Kgetha dikalafo tšeo di tlago go thabiša Jehofa

O ka dira’ng gore o kgone go kgetha dikalafo tšeo di dumelelanago le molao wa Modimo ditabeng tša madi? Bapalang BIDIO ye, gomme le boledišaneng gore ke ka baka la eng go le bohlokwa go dira dilo tše di latelago ge o dira phetho:

• Rapela Modimo gore a go fe bohlale.​—Jakobo 1:5.

• Nyakišiša melao ya motheo ya Beibele gomme o bone gore o ka e diriša bjang.​—Diema 13:16.

• Nyakišiša gore ke mekgwa efe ya kalafo yeo e lego gona mo o dulago gona.

• Tseba gore ke mekgwa efe ya kalafo yeo o sa swanelago go e diriša.

• Netefatša gore phetho e nngwe le e nngwe yeo o e dirago e ka se dire gore o šale o lewa ke letswalo.​—Ditiro 24:​16. b

• O se ke wa lebala gore ga go na motho yo a swanetšego go go direla phetho, e ka ba molekane wa gago, mogolo goba motho yo o ithutago le yena Beibele.​—Baroma 14:12.

• Ngwala phetho yeo o e dirilego gore batho ba bangwe ba e tsebe.

4. Dihlatse tša Jehofa di nyaka dikalafo tše kaonekaone

Go a kgonega gore o hwetše kalafo e kaonekaone yeo e sa dirišego madi. Bapalang BIDIO ye.

Balang Tito 3:​2, gomme le boledišaneng ka potšišo e latelago:

• Ke ka baka la’ng re swanetše go bolela ka tlhompho ge re bolela le dingaka?

 5. Ge go dirišwa kalafo yeo e nago le dikarolwana tša madi

Madi a na le dikarolo tše nne tše dikgolo, e lego disele tše dikhwibidu, disele tše ditšhweu, di-platelet le plasma. Dikarolo tšeo tše dikgolo, le tšona di na le dikarolwana tše dintši tše dinyenyane, tšeo di bitšwago dikarolwana tša madi. c Dikarolwana tše dingwe tša madi di dirišitšwe ka ga re ga dihlare, tšeo di thušago go lwantšha malwetši goba go thuša motho yo a babjago gore a se sa tšwa madi.

Ge go tliwa tabeng ya go amogela kalafo yeo e nago le dikarolwana tša madi, Mokriste yo mongwe le yo mongwe o swanetše go itirela phetho go ya le ka mokgwa wo a tlwaeditšego letswalo la gagwe ka Beibele. Bakriste ba bangwe ba ka kgetha go gana dikalafo tšeo di nago le dikarolwana tša madi. Mola ba bangwe matswalo a bona a ba dumelela go di amogela.

Ge o dira diphetho, naganišiša ka potšišo ye:

• Nka hlalosetša bjang ngaka ya ka gore ke ka baka la eng ke gana goba ke amogela kalafo yeo e nago le dikarolwana tše itšego tša madi?

 O ITHUTILE ENG?

Jehofa o nyaka gore re hlomphe madi.

Dipotšišo

• Ke ka baka la’ng madi a le bohlokwa go Jehofa?

• Re tseba bjang gore molao wa Modimo wa gore re ile madi, o ra gore ga se ra swanela go tšhela madi le go diriša dikarolo tše dikgolo tša madi?

• Re ka dira bjang diphetho tše dibotse ge re kgetha dikalafo tšeo di sepedišanago le madi?