Magazi ni yodekana. Palibe magazi tingakwaniselini kukhala na moyo. Ninge Mulengi, Mulungu ndiye anaudindo wa kulewa momwe tingaphatisire basa magazi. Ko iye achalewa chani pankhani ya magazi? Ko tingadye panango kuikhiwa? Ko mungachite tani vosalula vabwino pa nkhani mweyi?

1. Ko Yahova achayawona tani magazi?

Yahova adauza atumiki wake kalekale munthawe za m’Baibolo kuti: ‘Moyo wa chinthu chilichose uli m’magazi.’ (Levitiko 17:14) Kwa Yahova, magazi yachaimira moyo. Pakuti moyo ni wopatulika ndipo ni mphaso yochokera kwa Mulungu, magazimbo ni yopatulika.

2. Ko nikuphatisira basa kuponi magazi komwe Mulungu achalambiza?

Yahova adafotokoza kwa atumiki wake woyambirira kuti ayi kumbadya magazi. (Lewengani Genesis 9:4 na Levitiko 17:10.) Ndipo iye adabwerezera pomwe lamulo mweyi pomwe Bungwe Yotonga idalamula Akhrisitu kuti ‘pitirizani kupewa . . . magazi.’—Lewengani Machitidwe 15:28, 29.

Ko kupewa magazi kuchathandauza chani? Tilinganize kuti amediko akuwuzani kuti ayi kumbamwa mowa, ko imwepo mungamwe basi panango mungayikhe kuchakudya kuti basi mudyere kubodzi na mowa, panango mungachite kudzilasa na njirisawu? Vinkuchita kuwonekeratu kuti mungachitelini vimwevi. Mobverana na vimwevi lamulo ya Yahova yolambiza magazi ichathandauza kuti tichadekanalini kumwa magazi panango kudya chakudya pabodzi na magazi ndipo tichadekanalini kudya nyama yomwe niyosakhesa. Tichadekanalini soti kudya nyama iriyonse yomwe niyosakaniza na magazi.

Ko tani pankhani yakuphatisa basa magazi kushipitali? Njira zinango zolapila kushipitali zichaphwanya malamulo ya Mulungu. Zimwezi zinkuphatanidzapo kuchosa magazi mu vigawo vose vikuluvikulu panango mbali chabe zomwe ni maselo yafuwira, maselo yachena maselo yothandiza magazi kuphatana na madzi ya m’magazi. Njira zinango zimwezi zakuphatisa basa magazi zichaphwanyalini malamulo ya Mulungu mwa sitiriti. Mwakulinganiza, njira zinango zophatisira basa magazi zichaphatanidzapo kuphatisa basa magazi mu tuvigawo tung’onotung’ono tochokera kuchigawo chikulu cha magazi. Pomwe nthawe zinango achafuna kuti magazi yako wekhawekhawe yaphatisiwe basa. Tikambawona mpfundo zimwezi, aliyese payekha achadekana kuchita chosalula. a—Agalatiya 6:5.

 PFUNZIRANI VIZINJI

3. Salulani njira zabwino zodzilapira zomwe zichalemekeza Yahova

Ko imwepo mungasalule tani njira yabwino yomwe ichabverana na momwe Yahova achawonera magazi? Wonesani VIDIYO, ndipo patsogolo pake onani kudikana kotewedza masitepi mwaya.

• Pempherani kuti Mulungu akupaseni nzeru.—Yakobo 1:5.

• Faganifagani mpfundo za m’Baibolo na momwe mungaziphatisire basa.—Miyambo 13:16.

• Fagani njira zomwe ziliko ku dera yanu.

• Onani njira yomwe achaiwona kuti niyobveka ndipo kwa imwepo ni yosabvumizika.

• Tsimikizirani kuti vomwe mwasalula vikuchitiseni kukhala na chikhumbumtima chabwino.—Machitidwe 24:16. b

• Dziwani kuti palibe aliyese, olo munzanu wa mu ukwati, akulu panango womwe muchapfunzira nawo Baibolo kuti angakusalulireni pankhani ninge zimwezi zomwe zichadekana chikhumbumtima.—Aroma 14:12.

• Vomwe mwasaina chitani kunemba.

4. Mboni za Yahova zichafagafaga njira yabwino yodzilapira

Nivokwanisika kubvera malamulo ya Mulungu pa nkhani ya magazi na kutambira njira zabwino zamankhwala zomwe zichabveranalini na kuikhiwa magazi. Wonesani VIDIYO.

Lewengani Tito 3:2, ndipo patsogolo pake kambiranani mbvunzo uyu:

• Ndawa chani tichadekana kufotokoza mwanjira yabwino tikakhala kuti tinkukambirana na a mediko pa vomwe tasalula pa nkhani ya magazi?

 5. Vikakhala kuti vinkukhudza tunjira tung’onotung’ono twa magazi

Magazi yanavigawo vinayi vikuluvikulu vomwe ni maselo yafuwira, maselo yachena, maselo yothandiza magazi kuphatana na madzi ya m’magazi. Chigawo chilichose mu vigawo vimwevi vinatumagawo tung’onotung’ono nkati mwake, tochemerewa kuti tuvigawo tung’onotung’ono. c Tuvigawo tunango tuchaphatisiwa basa ninge mankhwala kuti tulimbane na matenda panango kuti tuimise kuchoka kwa magazi.

Ikakhala nkhani yokhudza tuvigawo twa magazi, Nkhrisitu aliyese achadekana kusalula yekha mobverana na chikhumbumtima chake chopfunzisiwa bwino na Baibolo. Anango angalambiretu basi chithandizo chilichose chobverana na kuikhiwa magazi. Pomwe anango angawone kuti chikhumbumtima chawo chinkuwabvumiza kuti abvume tuvigawo tung’onotung’ono twa magazi.

Pakuchita vosalula vanu ganizirani mbvunzo uyu:

• Ko mungafotokozere tani amediko momwe mungalambire panango kubvuma tuvigawo tunango twamagazi?

 CHIGWATO

Yahova achada kuti timbaphatise basa magazi munjira yabwino.

Kubwerezera

• Ndawa chani Yahova achawona kuti magazi ni yopatulika?

• Ko tichadziwa tani kuti lamulo ya Mulungu yakuti timbapewe magazi yachaphata pomwe basa pa nkhani yaikhiwa magazi?

• Ko mungachitetani vosalula vabwino pa nkhani ya kuikhiwa magazi?