LECCIÓN 39
Jehová Dios ¿imara riman yahuarmanda?
Yahuar yapa valijmi an. Yahuar illaj mana pis causana ushan. Yaya Dios ñucanchira rurashcamanda pailla dirichu charin imasna yahuarda utilizanara. Yahuarmanda Jehová Dios ¿imara yachachin? ¿Yahuarda micuna ushanchichu o ñucanchi aicha ucui churana ushanchichu? ¿Imara canda yanapana ushan cai temamanda ali ajllangahua?
1. ¿Imara iyan Jehová yahuarmanda?
Ñaupa timpui Jehová Dios paita sirvijcunara nica: “Tucui tunu aichayuj causai yahuarbi tian” (Levítico 17:14). Jehová nin yahuarbi causai tian. Causaiga Dios partimanda cuyashca anmi, shinallara yahuar santu chuyaj anmi.
2. Jehová Dios ¿imara yahuarmanda yachachishca?
Manara punda congregación tiajpi paita sirvijcunama Jehová Dios yahuarda ama micunguichichu nisha mandaca (leai Génesis 9:4; Levítico 17:10). Congregación ña tiashcai cutillara Jehová cai mandashcara iyachica. Congregacionda pushaj apostolguna ancianogunas cuerpo gobernante cuinta, Jesusta catijcunara cai mandashcara cunuca: “Yahuardas [...] ama micuichichu” nisha (leai Hechos 15:28, 29).
¿Imara nisha nin yahuarda mana chasquina? Caita ali intindingahua iyashun. Doctor canda tragura saqui nijpi ¿manzhu tragu upinara saquinguima? Chi randi ¿traguhua rurashca micunara can micunguima o tragura camba aicha ucui tucsichinguima? Mana. Shinallarami an yahuarda mana chasquingaj mandashca. Yaya Diosta casungaj yahuarda mana micunchi, mana upinchi, animalmanda yahuarda mana llucchishca ajpi chi aicharas mana micunchi. Shinallara yahuarhua rashca micunara mana micuna anchi.
¿Imara tucun doctor yahuarda churana angui nijpi? Doctorguna huaquin tratamientogunara rurangaj yahuarda utilizanun, maicambi yahuarda o yahuarbi tiaj glóbulos rojos, glóbulos blancos, plaquetas, plasma nishcaunara churanunmi, chita chasquisha Jehová Diosta mana casushcara ricuchishun. Shinajpis huaquin tratamientogunara rurangaj yahuarmanda ichinlla partiunara utilizanun. Shinallara runa paihua quiquin yahuardas utilizanun. Shinajpis caran tunu tratamientogunara ricusha intindishca huasha caran shuj ima ruranara ajllana an (Gálatas 6:5). a
MAS YACHAI
Ricushun imara riparana anchi shu tratamientora ajllana huraspi.
3. Jehová ñaupai ali ricuringahua ajllai
Jehová Dios yahuarmanda ima iyashcara yachasha ¿imasnara ali ajllana ushangui? VIDEORA ricuichi, huasha rimaichi imarasha catij rimashcauna catina ministirishca an:
-
Yachana iyaira oraciombi mañai (Santiago 1:5).
-
Cai temamanda Biblia yachachishcara imasna pactachinaras mascai (Proverbios 13:16).
-
Can causashca lugarbi ima tratamientoguna tiashcara yachangahua tapui.
-
Maican tratamientogunara mana chasquina ashcara ricui.
-
Can ajllashca ali sintichichu riparai (Hechos 24:16). b
-
Ama cungarichu mana pis, camba cari, camba huarmi, ancianoguna, canda Bibliamanda yachachiujpas canmanda mana ajllana anun (Romanos 14:12).
-
Quillcasha churai can ajllashcara.
4. Jehovahuaj testigoguna ali tratamientogunara mascanchi
Yahuarmanda Dios mandashcara casusha yahuar illaj tratamientogunaras chasquina ushanchi. VIDEORA ricuichi.
Leaichi Tito 3:2, huasha catij tapuimanda rimaichi:
-
¿Imarasha tucui huras doctorgunahua ali respetuhua rimana anchi?
|
Mana chasquinchi |
Caran shuj ajllana an |
|---|---|
|
A. Plasma sanguíneo. |
Plasmamanda ichinlla partiuna |
|
B. Glóbulos blancos. |
Glóbulos blancos nishcamanda ichinlla partiuna |
|
C. Plaquetas. |
Plaquetasmanda ichinlla partiuna |
|
D. Glóbulos rojos. |
Glóbulos rojos nishcamanda ichinlla partiuna |
5. Yahuarmanda ichinlla partiuna
Yahuar chuscu partiuna charin: glóbulos rojos, glóbulos blancos, plaquetas, plasma nishca. Shinallara cai chuscu partiuna mas ichinlla partiunara charin, cai ichinlla partiuna fracciones sanguíneas nishca ricsinchi. c Huaquin cai ichinlla partiunara ambiunara rurangaj utilizanun o yahuar taliriujta shayachingaj.
Yahuarmanda ichinlla partiunara chasquingaj o mana chasquingaj Diosta sirvijcuna caran shuj ajllana an paiguna iyaibi ali sintiringaj Biblia imasna yachachishcasna. Huaquinguna yahuarmanda ichinlla partiunahua rashca ambira o tratamientogunara chasquinungalla. Randi shujcuna caigunara shu rai mana chasquinungachu.
Can imara ajllangarausha casna tapuri:
-
¿Imasna doctorda intindichisha imarasha chasquini o mana chasquini huaquin yahuarmanda ichinlla partiuna nishcara?
RUNAUNA CASNA TAPUNUJPI: “Yahuar runaunara causachingaj yanapajpi ¿imarasha mana valin yahuarda ñucanchi aicha ucui churachingaj?”.
-
¿Imara ningui?
IMARA YACHASHCANGUI
Jehová mana munanzhu yahuarda ñucanchi manali utilizachu.
Iyaringaj
-
¿Imarasha Jehová ricun yahuar santu ashcara?
-
Yahuarda mana chasquingaj mandashca leybi ¿ñucanchi aicha ucuis yahuarda mana churachina ashcara intindichinzhu?
-
Ima tratamientogunara chasquinara o mana chasquinara ali ajllangaj ¿imara rurana angui?
RICUNGUI
Camba quiquin yahuarhua ambingaj tratamientora manara ajllashcallaira ¿imara ali riparana angui?
“Leajcunamanda tapuiguna” (La Atalaya, 15 de octubre de 2000)
Yahuarmanda ichinlla partiunara utilizanara manara ajllashcallaira ¿imara yachana angui?
¿Imara shu doctorda yanapaca intindingaj yahuarmanda Jehová imasna utilizanara rimashca ali ashcara?
“Yahuarmanda imasna utilizana Dios rimashcara intindicani” (¡Despertad!, 8 de diciembre de 2003)
Cómites de Enlace con los Hospitales nishcai tarbaj ancianoguna paiguna huauqui paniunara imasna yanapashcara ricui.
a Lección 35: “¿Imasnara ali ruraigunara ajllana ushanchi?” nishcara ricungui.
b Ricungui punto 5ra “Yahuarmanda ichinlla partiuna” shinallara nota 3 “Ñucanchi yahuarhua rurashca tratamientoguna”.
c Huaquin doctorguna iyanun glóbulos rojos, glóbulos blancos, plaquetas, plasma nishca yahuarmanda ña ichinlla partiuna an nisha. Chiraigu doctorda can ali intindichina angui can mana utilizangaraushcara intiru yahuarda shinallara glóbulos rojos, glóbulos blancos, plaquetas, plasma nishcaras.
Cai temagunaras leana munanguichari
TAPUIGUNA
Jehovahuaj testigoguna Bibliamanda yachachinchi
Jehovahuaj testigogunahua gratis Bibliamanda yachashcai can munashca Bibliara utilizana ushangui. Astaumbas munasha camba ailluunara amigogunaras cumbirana ushangui canhua yachangaj.
