Tena vatan-draha ty lio, satria tsy ho nivelo tsika laha tsy nisy lio. Jehovah ro Mpamoro, ka ie avao ro afaky mivola hoe tokony hampiasà amin’ino ty lio. Ino ty raha nivolaniny mikasiky ty lio? Azo hany na ampiliry amin’olo va raha io? Le ino ty hanampy anao handramby fanapahan-kevitsy soa mikasiky fampiasà lio?

1. Akory ty fiheverani-Jehovah ty lio?

Nivola tamy mpanompony taloha rey Jehovah hoe: “Ty aini-karaza nofotsy iaby le ty liony.” (Levitikosy 17:14) Amy Jehovah zany, ay ty lio. Fanomeza baka amy Ndranahary ty ay sady masy. Masy ho zay koa ty lio.

2. Tsy teani-Jehovah ampiasà amin’ino ty lio?

Nandrara ty mpanompony Jehovah tafara kelikelini-ranobe iny mba tsy hihina lio. (Vakio Genesisy 9:4 noho Levitikosy 17:10.) Nampolini-Jehovah ndraiky fandrarà zay lafa nanambara tamy Kristiana reo ty Filan-kevi-pitantana mba ‘hifaly ty lio.’​—Vakio Asan’ny Apostoly 15:28, 29.

Manao akory mifaly lio zao? Laha mivola aminao ty dokotera hoe mila mifaly toaky iha, le tsy tokony hino toaky zany iha. Fe ho sakinao va ty hihina sakafo misy toaky, na hampilitsy toaky amy lalan-dionao ao? Tsy hanao ani-zay mihintsy iha. Mitovy amy zay koa fa lafa nivola amintsika Ndranahary hoe mila mifaly lio tsika, le tsy tokony hihina lio tsika na hihina biby tsy nalatsaky lio. Tsy mety koa ty mihina sakafo nafangaro lio.

Akory koa laha afangaro amy fitsaboa ty lio? Misy fitsaboa avy le hita hoe mifanohitsy amy ty lalàna-Ndranahary. Tafilitsy amy zay ty fampilira lio na ty raiky amy laron-dio fototsy rey amin’olo. Retoa laron-dio fototsy rezao: Liomena, liofoty, plakety, noho plasma. Fe ty fitsaboa hafa tsy avy le hay mazava hoe mifanaraky amy lalàna-Ndranahary va sa tsy mifanaraky. Misy karaza fitsaboa, ohatsy, ampiasà raha baka amy laron-dio fototsy rey. Ty fitsaboa sisany koa lion’olo marary iny avao ro ampiasà aminy. Laha zay ro miseho, le anjara ty kiraidraiky ro manapa-kevitsy. a​—Galatianina 6:5.

 DINIHO LALIKY

3. Ze fitsaboa mampifalifaly ani-Jehovah avao ro filio

Tokony hifanaraky amy fiheverani-Jehovah ty lio ty fitsaboa ataontsika. Ino ty hanampy antsika hahavita ani-zay? Alefaso VIDEO toy, le iaraho midiniky hoe manino ro tena ilà ty manao ani-dingana retoa:

• Mivavaha mba hahazo fahendrea.​—Jakoba 1:5.

• Milà torolalani-Baiboly, le henteo ty fomba azo anoriha azy.​—Ohabolana 13:16.

• Henteo hoe ino iaby ty fitsaboa misy.

• Mariho hoe ia amy fitsaboa reo ro hita mazava hoe tsy mety aminao.

• Ataovo azo antoky hoe hampilamy ty eritseritsinao ty fanapahan-kevitsy hataonao.​—Asan’ny Apostoly 24:16. b

• Tiarovo fa iha avao ro tokony hanapa-kevitsy ho anao, fa tsy ty valinao, na ty anti-panahy, na ty mpampianatsy Baiboly anao, na olo hafa, satria mianky amy feoni-fieritseretanao raha zay.​—Romanina 14:12.

• Sorato ty fanapahan-kevitsinao.

4. Mila ty fitsaboa farani-ze soa ty Vavolombeloni-Jehovah

Azo atao soa ty hoe manoriky ty lalànani-Jehovah mikasiky ty lio sady mahazo fitsaboa farani-ze soa. Alefaso VIDEO toy.

Vakio Titosy 3:2, bakeo iaraho midiniky fanontanea toy:

• Manino tsika ro tokony ho soa fanahy noho hanaja ani-dokotera reo lafa miresaky amin-drozy?

 5. Mety va raha baka amy laron-dio fototsy rey?

Raha efatsy retoa ro atao hoe laron-dio fototsy: Liomena, liofoty, plakety, noho plasma. Misy raha maro koa anatini-laron-dio fototsy reo ao. Kaihy hoe raha baka amy laron-dio fototsy raha rezay. c Maro amy raha baka amy laron-dio fototsy reo ro ampiasà mba hitsaboa arety sisany na ampijanona lio mandeha.

Anjara ty Kristiana kiraidraiky ro manapa-kevitsy hoe haneky fitsaboa ampiasà raha baka amy laron-dio fototsy rey va ie sa tsy haneky. Mila mampiasa ty feoni-fieritseretany voaofani-Baiboly ie lafa manao ani-zay. Mety haneky fitsaboa ampiasà raha baka amy laron-dio fototsy ty Kristiana sisany, fa ty hafa mety tsy haneky.

Lafa manapa-kevitsy iha, le diniho toy:

• Akory ty anazavako amy ty dokotera hoe manino aho ro tsy maneky na maneky fitsaboa ampiasà raha baka amy laron-dio fototsy rey?

 FAMINTINA

Teani-Jehovah ho haintsika soa hoe masy ty lio.

Famerena

• Manino ro masy amy Jehovah ty lio?

• Nandrara antsika Jehovah mba hifaly ty lio. Manino ro tafilitsy amy zay koa ty hoe tsy ampilira lio?

• Ino ty hanampy anao hahay hanapa-kevitsy amy ty fitsaboa hataonao?