KHAOLO EA 39
Maikutlo a Molimo ka ho Sebelisa Mali
Mali a bohlokoa. Ha ho ea ka phelang ka ntle ho mali. Kaha Molimo ke ’Mopi, o na le tokelo ea ho re bolella hore na re sebelise mali joang. O itse’ng ka ho sebelisa mali? Na re ka a ja kapa ra a tšela ’meleng bakeng sa phekolo? Ke’ng e ka u thusang ho etsa liqeto tse nepahetseng tabeng ee?
1. Jehova o nka mali e le a bohlokoa hakae?
Jehova o ile a bolella bahlanka ba hae mehleng ea ha ho ne ho ngoloa Bibele a re: “Moea [kapa bophelo] oa nama ea mofuta o mong le o mong ke mali a eona.” (Levitike 17:14) Jehova o nka mali e le bophelo. Kaha bophelo ke mpho e ikhethang kapa e halalelang e tsoang ho Molimo, mali le ’ona aa halalela.
2. Molimo o re thibela ho sebelisa mali joang?
Nako e telele pele phutheho ea Bokreste e e-ba teng, Jehova o ile a laela bahlanka ba hae hore ba se ke ba ja mali. (Bala Genese 9:4 le Levitike 17:10.) Molimo o ile a tiisa hore maikutlo a hae ha a e-s’o fetohe ha sehlopha se busang se ne se laela Bakreste hore ba “ile . . . mali.”—Bala Liketso 15:28, 29.
Ho ila mali ho bolela’ng? Haeba ngaka e ne e ka u bolella hore u se ke oa sebelisa joala, u ne u ke ke oa bo noa. Empa na u ne u ka ja lijo tse phehiloeng ka bona kapa oa lumela ho entoa ka joala? Ho hlakile hore u ne u ke ke oa etsa joalo. Ka tsela e tšoanang, taelo ea Molimo ea hore re ile mali e bolela hore ha rea lokela ho noa mali kapa ra ja nama e sa tsoang mali hantle. Hape ha rea lokela ho ja lijo tse tšetsoeng mali.
Ho thoe’ng ka ho sebelisa mali bakeng sa phekolo? Ho na le mekhoa ea phekolo eo ho hlakileng hore e tlola molao oa Molimo. Taba ena e akareletsa ho tšela mali le likarolo tse kholo tsa ’ona e leng lisele tse khubelu, lisele tse tšoeu, liplatelete le plasma. Ho ka ’na ha se ke ha hlaka hore na mekhoa e meng ea phekolo e tlola molao oa Molimo kapa che. Ka mohlala, mekhoeng e meng ea phekolo ho sebelisoa likaroloana tse nyenyane tsa mali. Mekhoeng e meng ea phekolo, mokuli o phekoloa ho ntse ho sebelisoa mali a hae. Ha ho tluoa mekhoeng ena ea phekolo, motho e mong le e mong o tlameha ho iketsetsa qeto. a—Bagalata 6:5.
ITHUTE LINTLHA TSE LING
Bona hore na u ka etsa qeto joang ha ho tluoa tabeng ea mekhoa ea phekolo e sebelisang mali.
3. Etsa qeto e tla thabisa Jehova ha u khetha mekhoa ea phekolo
U ka etsa qeto e tla thabisa Jehova joang ha u khetha mekhoa ea phekolo? Bapala VIDEO ebe le buisana ka hore na ke hobane’ng ha ho le bohlokoa ho nka mehato e latelang.
-
Kopa Molimo hore a u fe bohlale. —Jakobo 1:5.
-
Batla litemana tsa Bibele tse ka u thusang hore u bone hore na Jehova o ikutloa joang ’me u shebe hore na li ka u thusa joang.—Liproverbia 13:16.
-
Batla hore na ke mekhoa efe ea phekolo e sebelisoang moo u lulang.
-
Sheba hore na ke mekhoa efe ea phekolo eo u ke keng oa e amohela ho hang.
-
Etsa qeto e tla u siea ka letsoalo le khutsitseng.—Liketso 24:16. b
-
Tseba hore ha ho motho ea lokelang ho u etsetsa qeto ha ho tluoa mekhoeng ena ea phekolo, ebang ke molekane oa hao, moholo kapa motho ea u rutang Bibele. Boemong bona ke letsoalo la hao le lokelang ho u tataisa.—Baroma 14:12.
-
Ngola fatše qeto eo u e entseng.
4. Lipaki Tsa Jehova li batla mekhoa ea phekolo e atlehang ka ho fetisisa
Re ka fumana phekolo ea boemo bo holimo ha ka nako e tšoanang re ntse re mamela molao oa Molimo. Bapala VIDEO.
Bala Tite 3:2 ebe le buisana ka potso e latelang:
-
Ke hobane’ng ha re lokela ho bua le lingaka ka bonolo le tlhompho?
|
Ha re li amohele |
Mokreste o iketsetsa qeto |
|---|---|
|
A. Plasma. |
Likaroloana tsa plasma |
|
B. Lisele tse tšoeu. |
Likaroloana tsa lisele tse tšoeu |
|
C. Liplatelete. |
Likaroloana tsa liplatelete |
|
D. Lisele tse khubelu. |
Likaroloana tsa lisele tse khubelu |
5. Ha ho sebelisoa likaroloana tsa mali
Mali a na le likarolo tse ’nè e leng lisele tse khubelu, lisele tse tšoeu, liplatelete le plasma. Likarolo tsena tsa mali li na le likaroloana tse nyenyane. c Likaroloana tse ling tsa mali li sebelisoa ke lingaka bakeng sa ho loantša mafu a itseng kapa ho thibela hore mali a se ke a tsoa leqebeng.
Tabeng ea likaroloana tsa mali, Mokreste e mong le e mong o lokela o iketsetsa qeto a ipapisitse le letsoalo la hae leo a le koetlisitseng a sebelisa Bibele. Batho ba bang ba ka ’na ba hana ho phekoloa ka mekhoa e sebelisang likaroloana tsa mali. Batho ba bang bona ba ka re matsoalo a bona ha a ba thibele ho amohela likaroloana tsa mali.
Ha u etsa liqeto, nahana ka potso ena:
-
Nka hlalosetsa ngaka joang hore na ke hobane’ng ha ke hana kapa ke amohela likaroloana tse itseng tsa mali?
MOTHO A KA ’NA A RE: “Ke’ng e phoso ka ho tšeloa mali?”
-
U ka araba ka ho re’ng?
KAKARETSO
Jehova o batla hore re qobe ho sebelisa mali hampe.
Re Ithutile’ng?
-
Ke hobane’ng ha Jehova a nka mali a halalela?
-
Re tseba joang hore taelo ea Molimo ea ho ila mali e akareletsa hore re se ke ra tšela mali bakeng sa phekolo?
-
U ka thusoa ke’ng ho etsa qeto e nepahetseng ha u khetha mokhoa oa phekolo o sebelisang mali?
BATLA
U lokela ho nahana ka eng pele u etsa qeto ka mokhoa oa phekolo o sebelisang mali a hao?
“Lipotso Tse Tsoang ho Babali” (Molula-Qhooa, October 15, 2000)
U lokela ho nahana ka eng pele u etsa qeto ea hore na u tla amohela likaroloana tsa mali?
“Lipotso Tse Tsoang ho Babali” (Molula-Qhooa, June 15, 2004)
Ke’ng e ileng ea etsa hore ngaka e lumele hore tsela eo Jehova a nkang mali ka eona ea utloahala?
“Ke Ile ka Amohela Tsela eo Molimo a Ikutloang ka Eona ka Mali” (Tsoha!, December 8, 2003)
Ithute hore na baholo ba sebetsang Likomiting tsa Bohokahanyi le Lipetlele ba thusa bara le barali ba bo rona joang.
a Sheba khaolo ea 35 e reng: “Re ka Thusoa Ke’ng ho Etsa Liqeto Tse Nepahetseng?”
b Sheba ntlha ea bohlano e reng: “Ha ho Sebelisoa Likaroloana Tsa Mali” le tlhaloso ea boraro e reng, “Mekhoa ea Phekolo e Sebelisang Mali.”
c Lingaka tse ling li nka likarolo tsena tse ’nè tsa mali e le likaroloana. Kahoo, u ka ’na oa lokela ho hlalosetsa ngaka ea hao hore na u entse qeto efe ka ho sebelisa likarolo tsa mali kapa lisele tse khubelu, lisele tse tšoeu, liplatelete kapa plasma.
Mohlomong u ka Rata le
LIPOTSO TSE BOTSOANG HANGATA
Lenaneo la ho Ithuta Bibele le Lipaki Tsa Jehova
Ha u ithuta bukana ena ea U ka Thaba ka ho sa Feleng! u ka sebelisa Bibele e ’ngoe le e ’ngoe eo u nang le eona. U ka mema ba lelapa le metsoalle.
