OCIPAMA 39
Ndomo Suku a Tenda Osonde
Osonde yi kuete esilivilo lialua. Nda ka tua kuatele osonde, nda lomue o kuete omuenyo. Omo okuti Suku eye Ululiki, o kuete omoko yoku tu sapuila ndomo osonde yi sukila oku tatiwa. Nye eye a popia catiamẽla kosonde? Citava okuti yi liwa, ale oku kapiwa vasipa? O pondola oku nõla ndati onjila yiwa yatiamẽla kondaka eyi?
1. Yehova o tenda ndati osonde?
Yehova wa sapuila afendeli vaye vo kosimbu okuti: “Omuenyo woviluvo viosi u kasi vosonde.” (Ovisila 17:14) Ku Yehova, osonde yi lomboloka omuenyo. Omo okuti omuenyo ombanjaile yimue yi kola ya tunda ku Suku, osonde yi kolavo.
2. Suku o pisa onjila yipi yoku talavaya losonde?
Yehova wa handelekele Akristão vatete oco ka va ka lie osonde. (Tanga Efetikilo 9:4 kuenda Ovisila 17:10.) Eye wa tõlisa ocihandeleko caco eci osungu yakulu ya sapuila Akristão “oku amamako oku lilava . . . kosonde.”—Tanga Ovilinga 15:28, 29.
Oku lilava kosonde ci lomboloka nye? Nda ondotolo yimue yi ku sapuila oku lilava kovinyua vi koluisa, ove nda kua nyuile ovina viaco. Anga hẽ nda wa lia ovikulia vi kuete ovinyua vi koluisa, ale nda wa vi kapa vasipa? Ocili okuti, sio. Cimuamue haico, ocihandeleko ca Suku coku lilava kosonde, ci lomboloka okuti, ka citava okuti tu nyua osonde ale oku lia ositu yocinyama cimue ka ca tundile osonde. Ndaño muẽle oku lia ovikulia vina mua kapiwa osonde.
Nye ci popiwa koku sakuiwa losonde? Olonjila vimue via siata oku kuamiwa, vi pisiwa locihandeleko ca Suku. Volonjila viaco mua kongela oku kapiwa osonde yosi, ale olonepa vimue via velapo viosonde ndeci—ologlobulu vi kusuka, ologlobulu vi yela, oloplaketa kuenda oplasma. Olonjila vikuavo vioku sakula citava okuti, vi lueya ocihandeleko ca Suku lonjila yimue ka yi limbukiwa. Ndeci, volonjila vimue mua kongela oku sakula lolonepa vimue vitito calua viupiwa kolonepa via velapo viosonde. Volonjila vikuavo mua kongela oku sakula omunu losonde yaye muẽle. Pokati kolonjila evi, omunu lomunu eye muẽle o sukila oku nõla onjila a kuama. a—Va Galatia 6:5.
LILONGISA ONDONGOSI
Kũlĩhĩsa olonjila o nõla catiamẽla koku sakuiwa losonde.
3. Poku sakuiwa nõla onjila yi sanjuisa Yehova
Poku sakuiwa o nõla ndati onjila yi likuata locisimĩlo ca Suku? Tala OVIDEO, noke konomuisa esilivilo lioku kapako ananga a kuãimo.
-
Vohutililo pinga olondunge.—Tiago 1:5.
-
Konomuisa olonumbi Viembimbiliya kuenda ndomo vi kapiwako.—Olosapo 13:16.
-
Kũlĩhĩsa olonjila via siata oku kuamiwa oku o kasi.
-
Konomuisa olonjila vina okuti, ove ku vi tava.
-
Kuata utate wokuti onjila o nõla, yi ku ecelela oku kuata owanji wutima wa yela. —Ovilinga 24:16. b
-
Kũlĩha okuti, catiamẽla kondaka yowanji wutima, ohueli yove, ukulu umue wekongelo, ale omunu wa siata oku ku longisa Embimbiliya, ka citava okuti va ku nõlelako onjila o sukila oku kuama.—Va Roma 14:12.
-
Soneha onjila wa nõla oco omanu vakuavo va yi kũlĩhe.
4. Olombangi Via Yehova vi sanda oku sakuiwa lonjila ya velapo
Citava oku pokola kocihandeleko ca Suku catiamẽla kosonde kuenda oku sakuiwa lonjila ya velapo okuti, ka tu kapiwa osonde. Tala OVIDEO.
Tanga Tito 3:2, noke konomuisa epulilo li kuãimo:
-
Momo lie tu sukilila oku lekisa esumbilo kuenda eliketiso poku sapela lolondotolo?
|
Ka citava |
Ukristão eye o nõla |
|---|---|
|
A. Osonde yoplasma |
Olonepa viopiwa koplasma |
|
B. Ologlobulu vi yela |
Olonepa viopiwa kologlobulu vi yela |
|
C. Oloplaketa |
Olonepa viopiwa koloplaketa |
|
D. Ologlobulu vi kusuka |
Olonepa viopiwa kologlobulu vi kusuka |
5. Ceci mu kongela olonepa viosonde
Osonde yi kuete olonepa vikuãla via velapo okuti: ologlobulu vi kusuka, ologlobulu vi yela, oloplaketa kuenda oplasma. Olonepa viaco via velapo via tepiwavo volonepa vialua vi tukuiwa okuti, olonepa vitito viosonde. c Vimue pokati kolonepa viaco, va siata oku panga lavio ovihemba vi kuatisa koku sakula ovovei ale koku kotola osonde.
Catiamẽla kolonepa vitito viosonde, Ukristão Lukristão o sukila oku nõla onjila ya kunamẽla kowanji wutima waye wa pindisiwa Lembimbiliya. Vamue va nõlapo oku likala oku sakuiwa lolonjila mua kongela olonepa vitito viosonde. Vakuavo owanji wutima wavo u va ecelela oku tava oku sakuiwa lolonepa vitito viosonde.
Poku nõla onjila o kuama, konomuisa epulilo li kuãimo:
-
Ame nda nda lombolola ndati kondotolo yimue esunga lieci si tavela, ale ndi tavela oku sakuiwa lolonepa vitito viosonde?
UMUE PAMUE O PULA: “Anga hẽ ekandu oku tava oku sakuiwa losonde?”
-
Nye o sima?
NYE WA LILONGISA?
Yehova o yongola okuti, tu tenda osonde ndocina cimue ci kola.
Oku Pitulula
-
Momo lie Yehova a tendela osonde ndocina cimue ci kola?
-
Tua kũlĩha ndati okuti ocihandeleko ca Yehova catiamẽla koku amamako oku lilava kosonde ci tiamisiwilavo koku sakuiwa losonde?
-
O nõla ndati olonjila viwa viatiamẽla koku sakuiwa losonde?
OCO O KŨLĨHE OVINA VIKUAVO
Nye o sukila oku sokolola osimbu kua nõlele nda o tava ale sio oku sakuiwa losonde yove muẽle?
“Apulilo a Lingiwa la Vakuakutanga” (Utala Wondavululi 1 wa Kuvala 2000)
Nye o sukila oku kũlĩhĩsa poku nõla nda o tava, ale sio oku sakuiwa lolonepa vitito viosonde?
“Apulilo a Lingiwa la Vakuakutanga” (Utala Wondavululi 15 Wevambi 2004)
Nye ca vetiya ondotolo yimue oku tava okuti, onjila ndomo Yehova a tenda osonde ya sunguluka?
“Nda Tava Ocisimĩlo ca Suku Catiamẽla Kosonde” (Omasuli!, 8 ya Cembanima 2003)
Lilongisa ndomo akulu vekongelo vana va panga onepa Koseketa Yoku Tetulula Ovitangi Violombei va siata oku kuatisa vamanji.
a Tala Ocipama 35, “Ndomo ku Nõliwa Olonjila Viwa.”
b Tala pokasapi 5, “Ceci mu Kongela Olonepa Viosonde;” Etosi 3 kesulilo, “Olonjila Vioku Sakuiwa Lavio Mua Kongela Osonde.”
c Olondotolo vimue vi tenda olonepa vikuãla via velapo viosonde ndolonepa vitito viosonde. Omo liaco, o sukila oku lomboluila ku ndotolo yove onjila wa nõlapo yoku likala oku kapiwa osonde yosi, ale ologlobulu vi kusuka, ologlobulu vi yela, oloplaketa ale oplasma.
Ove o ka ci Sola
APULILO A SIATA
Elilongiso Liembimbiliya li Lingiwa Lolombangi Via Yehova li Lomboloka Nye?
Lekuatiso lielilongiso li lingiwa ocali Lolombangi Via Yehova, o pondola oku kuama Lembimbiliya liosi o yongola. Lianja poku laleka epata liove liosi ale akamba vove, oco vu lilongisili kumosi.
