Kure na nyanyakipaha. Ka si adu nga ya boro ho rengbe ka du ni unga ni te. Ni du Mbori ni Bakusiahe, ko na rengo beko ka pepa wai furani rengbe ani ka mangasunge na kure. Ginipai ko napehe tipa kure? Ya mo si naida i rihe watadu ka diaha kutii kpotose yo? Na waigu rengbe mo ka manga wene diaberã tipa gipai re?

1. Ga Yekova bipai nga gine tipa kure?

Ti gu regbo i aake Baibiri ti ni, Yekova ape gupai fu airisiko nga: ‘Unga unga ahe dunduko du rogo kure he yo.’ (Pa Amotumo 17:14) Bangiri Yekova, kure narukuba unga. Wadu he nga unga ni ziaziaha na ni gamahe be Mbori, kinawo a du kure ni ziaziaha.

2. Gini ngbatunga gene mangasunge na kure Mbori asogaha?

Yekova afu zinahe fu agu airisiko nadu mbata fu rago aKristano nga ka i ringa kure ya. (Mo gedi Bambata Pai 9:4 na Pa Amotumo 17:10.) Ko anyakasipa agi arugute re berewe ti gu regbo riigbu bipasunge arugu aKristano nga ‘i ne . . . kure.’—Mo gedi Amokedi 15:28, 29.

Rogo gupai yo nga ka ne kure nga gine? Ka si dunga munganga pe gupai foro nga mo mbu mbira buda, mo mbu mbiraha ambu. Ono ya mo mo rengbe kaa ri agu ariahe du na buda rogoho watadu kaa ruhe kutii kpotoro yo? Karagapai nga Oó. Wa kina gure a, ga Mbori ndiko tipa ne kure nayugo gupai nga si aidanga ani mbiri kure watadu ka ri gu pasio nya i auka nga kure ru ya te. Na si aidanga ani ri ai gu riahe a du na kure rogoho te.

Ginipai tigaha du tipa mangasunge na kure tipa husa? Gu kura gene husa kinaho na kuo ga Mbori andiko akuo gbaiga. Gipai re nakoda dia kure naabaha watadu gu bangua apaparaha du nga—zamba para kure, pusi para kure, gu papara kure nawiiso oro, na gu ime kura apapara kure asungo rogoho. Gu kura gene ahusa kinaho arengbanga ka kuo ga Mbori andiko gbaiga ya. Ni kpiapai bete agu agene husa re nakoda mangasunge na rukutu apapara kure nga gu i adiaha ti abangua apapara kure. Gu kura agene husa nakoda mangasunge na kure boro. Ho boro awisigo pa agi agene husa ni re, boro na boro si aida ni mangi gani diaberã nisa ni. a—AGaratio 6:5.

 MO WIRIKI KURA DUNGU APAI

3. Mo mangi agu adiaberã nga gu nabipa gene husa nasa ngbarago ti Yekova

Waigu rengbe mo ka manga agu adiaberã nga gu nandu sa na ga Mbori bipai tipa kure? Mo bi gu VIDIO re, na tifuoho, mo ki sakipai tipa wai nyakipa agu adiandue ngbefuoho:

• Mo kpari tipa tatamana.—Yakoba 1:5.

• Mo mangi wetekapai tipa gu bangua arengo nga ga Baibiri na wai ka mangasunge na ni.—Asanza 13:16.

• Mo ngere tipa agu agene husa du rogo gu ba mo araka rogoho.

• Mo sia agu agene husa nga gu mo aidanga ha ya.

• Mo ini gupai nga gamo diaberã nika mbu ro na gigiri sangba kpotoro yo.—Amokedi 24:16. b

• Mo ini gupai nga boro—ho singia gamo badia rogatise, bakumba rogo dungurati, watadu gamo bayugu Baibiri si aida ni pepa gu diaberã foro si aida mo mangihe nibipa agu apai nabipa sangbakpotoseyo te.—ARomo 14:12.

• Mo ke gamo adiaberã kusa sande.

4. ADezire Yekova nagbata gu gene husa du ni bawenehe

Boro ima rengba ka mangapai kuti ga Mbori andiko nibipa kure na ki gbia gu wene gene husa nga gu akodanga mangasunge na kure ya. Mo bi gu VIDIO re.

Mo gedi Tito 3:2, na tifuoho, mo ki sakipai tipa gi sanahe re:

• Ginipai si aida ani mangipai ti ni na irisa gbiati zera ti aregbo dũ ho ani amangapai na amunganga?

 5. Ho daha ni ti mangasunge na rukutu apapara kure

Kure na abangua apaparaha biama—zamba papara kure, pusi papara kure, gu papara kure nawiiso oro, na gu ime kura apapara kure asungo rogoho. Gi bangua apapara kure re na rukutu apaparaha i ayambaha nga rukutu apapara kure. c I namangasunge na gu kura bete rukutu apapara kure tipa ka kusa agu adawa na undo ka sovura kuti akaza, watadu na undo ka rugusa gu kure naga ho boro nahõ ni.

Ho daha ni ti mangasunge na rukutu apapara kure, ai Kristano si aida ni mangi gani diaberã ni tini ringbisihe kuti gu sangbakpoto ni yo ni na rabaha kuti Baibiri. Bete kura aboro ima rengba ka ka gu gene husa akaza nga gu na koda mangasunge na rukutu apapara kure. Agu yo ima rengba ka bihe nga sangbakpotoyo yo naida aida fuyo i di rukutu apapara kure kutii kpotoyo yo.

Ho mo nikaa manga adiaberã ni, mo berẽnga kurii gi sanahe re:

• Waigu mi narengbe ka saka ndu gupai fu gimi munganga mi naká ti ni watadu mi naidi ti ni ka mangasunge na kura rukutu apapara kure?

 GINIPAI MO NAWIRIKIHE?

Yekova naida ani ne mangasunge na kure ngba gbegberẽ gene.

Fugöpai

• Gini ndupai Yekova abi kure ti ni ni ziaziaha?

• Wai du ani aino gupai nga ga Mbori bipai tipa kure nabipa dia kure abi a kutii kpotoseyo?

• Waigu rengbe mo ka manga wene adiaberã nibipa gu gene husa nakoda mangasunge na kure?