PWONY ME 40
Kit ma Watwero Bedo Kwede Jo Maleng i Wang Lubanga
Go kong ni mego mo tye ka yubo latin awobine wek ocit i cukul. Mego man neno ni wode olwokke dok bongone tye maleng. Man weko awobi man bedo ma kome yot dok nyuto ki jo mukene ni lunyodone tye ka gwokke maber. I yo acel-lu, Wonwa ma lamar, Jehovah, mito ni wabed jo maleng i komwa, tamwa, lokwa, kacel ki jami ma watimo. Ka wabedo jo maleng, wanongo adwogi maber dok wakelo deyo bote.
1. Watwero bedo jo maleng i yo me kom nining?
Jehovah wacciwa ni: “Wubed jo maleng.” (1 Petero 1:16) Wek wabed jo maleng i wang Jehovah, omyero wabed leng i kitwa kacel ki i komwa. Watwero bedo leng i yo me kom ka walwoko komwa kare ki kare, dok wagwoko bongiwa, gangiwa ki gin wotwa bedo maleng. Watwero bene miyo kony me gwoko lengo me Ot me Ker. Ka wagwoko lengo i yo me kom, ci wakelo deyo bot Jehovah.—2 Jo Korint 6:3, 4.
2. Ka wek wabed jo maleng, jami maraco ango ma omyero wagwokke kwedgi?
Baibul bene cuko cwinywa ni “myero walonnye woko kekenwa i gin mo ducu ma cido komwa nyo cwinywa.” (2 Jo Korint 7:1) Man tyen lokke ni omyero wagwokke ki jami ma twero kelo awano i komwa nyo balo tamwa. Tam ma watamo myero oyom cwiny Jehovah, pi meno watute ki kerowa ducu me kwero tam macilo. (Jabuli 104:34) Wagwokke bene pe me tic ki leb maraco.—Kwan Jo Kolocai 3:8.
Gin ango mukene ma twero weko pe wabedo leng i komwa, tamwa, lokwa kacel ki jami ma watimo? Tye jami mogo ma balo komwa. Pi meno, pe watiyo ki jami calo taa, miraa, kacel ki yadi mogo ma dano tiyo kwede me galowang. Ka pe watiyo ki jami magi, komwa bedo mayot dok wanyuto ni watye ki woro pi mic me kwo. Wabedo jo maleng ka watute me kwero tim mogo macilo calo cobo mitiwa me mit kekenwa kacel ki neno cal me lewic ma tugo miti me buto. (Jabuli 119:37; Jo Epeco 5:5) Twero bedo tek me juko timo jami magi, ento Jehovah twero konyowa me jukone.—Kwan Icaya 41:13.
NONG NGEC MATUT
Pwony kit ma bedo jo maleng i yo me kom kelo kwede deyo bot Jehovah, dok inen kit me loyo lweny i kom tim mogo macilo.
3. Gwoko lengo me komwa ki kabedowa kelo deyo bot Jehovah
Ka wakwano cik ma Jehovah omiyo bot rok me Icrael, wapwonyo kit ma pire tek kwede bote ni jone gubed jo maleng. Kwan Nia 19:10 ki 30:17-19, ci wunyam lapeny magi:
-
Tyeng magi ginyuto ni Jehovah neno lengo me komwa ki kabedo ma orumowa nining?
-
Gin ango ma itwero timone nino ducu me gwoko lengo me komi ki kabedo ma orumi?
Gwoko lengo me komwa ki kabedowa tero cawa ki kero. Ento wan ducu watwero timone labongo paro ka ma wabedo iye nyo ka wabedo lucan nyo lulonyo. Tuk VIDIO, ci wunyam lapeny ma lubo.
-
Pingo jo ma watito kwena botgi gitwero miyo deyo bot Jehovah ka guneno ni jamiwa tye maleng?
4. Lo lweny i kom tim macilo
Jehovah twero konyowa me juko tim mo keken macilo
Ka imato taa nyo itiyo ki yadi maraco me galowang, ci nongo ingeyo kit ma juko timo jami magi tek kwede. Gin ango ma twero konyi? Tam i kom kit ma tim magi gigudi kwede. Kwan Matayo 22:37-39, ci wunyam kit ma mato taa nyo tic ki yadi i yo marac gudo kwede . . .
-
wat pa ngat moni ki Jehovah.
-
jo gang pa ngat moni kacel ki jo ma gurumo ka ngete.
Go pulan me loyo lweny i kom tim macilo. a Tuk VIDIO.
Kwan 2 Jo Korint 4:7, ci wunyam lapeny man:
-
Lega nino ducu ki kwano Baibul piri keni, kacel ki cito i cokke twero miyo ki ngat mo kero me juko tim macilo nining?
5. Lweny matek ki tam kacel ki tim macilo
Kwan Jo Kolocai 3:5, ci wunyam lapeny magi:
-
Wangeyo nining ni neno cal me lewic ma tugo miti me buto, cwalo jami ma kit meno i cim nyo kompiuta, kacel ki cobo mitini me mit kekeni gubedo jami macilo adada i wang Jehovah?
-
Tika itamo ni twere me bedo jo maleng i tamwa, lokwa ki jami ma watimo kit ma Jehovah mito ni wabed kwede? Pingo?
Nen kit me lweny ki tam macilo. Tuk VIDIO.
Yecu otiyo ki lapor mo me nyutiwa ni omyero wamok tamwa me timo gin mo keken ma mitte wek wabed jo maleng i tamwa, lokwa kacel ki jami ma watimo. Kwan Matayo 5:29, 30, ci wunyam lapeny man:
-
Yecu onongo pe tye ka waco ni omyero waket awano i komwa, ento en onongo tye ka waco ni omyero watim gin mo me juko tim macilo. Gin ango ma ngat moni twero timone me gwokke ki i tam macilo? b
Ka itye ka lweny me loyo tam macilo, ci Jehovah tye ki pwoc pi tuteni. Kwan Jabuli 103:13, 14, ci wunyam lapeny man:
-
Ka itye ka tute ki tim mogo macilo, ginacoya man cuko cwinyi nining me medde ki lweny matek me loyone?
Pe iil cingi woko!
Twero bedo yot me tamo ni, ‘Anwoyo bal acel-li, pi meno omyero ail cinga woko.’ Ento tam kong i kom lapor man: Ka langwec oyokke ci opoto piny, meno pe tyen lokke ni kiloye woko, nyo ni en myero ocak ngwec ki i acakkine odoco. I yo acel-lu, ka inwoyo bal acel-li, meno pe tyen lokke ni dong pe ibitwero juko timo tim macilo meno. Pud bene itwero bedo ki yomcwiny pi tute ma itute kwede. Poto piny obedo gin ma timme dok obedo but loyo lweny me timo jami macilo. Pe iil cingi woko! Ki kony pa Jehovah, itwero juko timo jami macilo.
JO MOGO GIWACO NI: “Tim man dong odoko gikoma woko. Pe atwero jukone.”
-
Ginacoya mene ma itwero tic kwede me nyuto ki ngat meno ni ki kony pa Jehovah, en twero juko tim macilo meno?
WOT WIYE WIYE
Wayomo cwiny Jehovah ka wagwoko komwa, tamwa, kacel ki kitwa bedo leng.
Ngo ma ipwonyo?
-
Pingo pire tek adada me bedo ngat ma kome kacel ki kabedone leng?
-
Itwero bedo leng i yo me kom nining?
-
Itwero gwoko tammi kacel ki kiti bedo leng nining?
TIM KWED
Jami matinotino ango ma itwero timogi ma bikonyi me bedo ngat maleng i yo me kom kadi bed in lacan?
Nen jami ma itwero timogi ma twero konyi juko mato taa.
Nen adwogi maraco me neno cal me lewic ma tugo miti me buto.
“Jami ma Tugo Miti me Buto—Giber nyo Girac?” (Wi Lubele, Agucito 1, 2013)
Nen kit ma laco mo acel ojuko neno cal me lewic ma tugo miti me buto ma onongo dong odoko gikome.
“Apoto Tyen Mapol ma Peya Aloyo Lweny i kom Tim Macilo” (Wi Lubele Nam. 4 2016)
a Pwony ma wiye tye ni “Kit me Juko Mato Taa,” ma kiryeyo i bute me Tim Kwed me pwony man, tito jami mogo ma itwero timone me juko tim mogo macilo.
b Pi kony me juko tim macilo me cobo mitini me mit kekeni, nen “Atwero Juko Tim Macilo me Cobo Mitina me Mit Kekena Nining?” i buk me Questions Young People Ask—Answers That Work, Volume 1, dul me 25.
