OZUMALƐDƖYƐ 40
Kɛ Ɩkɛyɛ Na Yɛ Nwʋ Ɩadɩ Wɔ Nyamɩnlɩ Anyɩ Zʋ a?
Tuá enlinlɛ be mɔɔ ɩwɔ ɔlɔlɛ mɔɔ isiyeziyee yɩ ɣa ma ɩkɔhɔ sukuulu nwʋ mfonyini kila. Ibiyia yɩ na ikila sʋ̃ kɛɛ yɩ ntalɩ anyɩ tɩ. Eyi ɩma kuakula yɩ tɩ pɔkɔ na ɩma mmenii mvʋlɔ nwʋ yɩ kɛɛ yɩ awʋvʋlɔ bekila yɩ bʋwɔ baaba paa. Ɔzɔ la yɛ Gyehova, yɛ Zɩ mɔɔ ɩdɔ yɛ nɩ pɛ kɛɛ yɛ nwʋ tɩ wɔ nnwʋnlamɩ ɔfʋã nu, yɛ ɛdɩndɛlɛ, ye nzunzunlɩyɛ nɩɩ nyɛlɩyɛ munwala nu a. Sɛ yɛma yɛ nwʋ tɩ a, yenyia ɔzʋlɔ mfasʋ na ɩhyɛ Gyehova animinyiamɩ sʋ̃.
1. Kɛ ɩkɛyɛ na yɛ nwʋ ɩadɩ wɔ nnwʋnlamɩ ɔfʋã nu a?
Gyehova ɩkã ikile yɛ kɛɛ: ‘Yɛyɛ́ nwanzanwanza.’ (1 Pita 1:16) Sɛ yɛkɛyɛ nwanzanwanza a, mɛyɩ ɩsɛ kɛɛ yɛma yɛ nwʋ tɩ wɔ yɛ ɛbɩlawɔlɛ nɩɩ nnwʋnlamɩ ɔfʋã nu. Sɛ yekehile kɛɛ yɛ nwʋ tɩ wɔ nnwʋnlamɩ ɔfʋã nu a, ɩsɛ kɛɛ yebiyia eɣile bela, yɛma yɛ ntalɩ, yɛ awudo nɩɩ yɛ kaalɩ sʋ̃ nwʋ tɩ na yesiyeziye yɩ kɩnlɩma. Sa yɛkʋla sʋ̃ yɛbʋwa ma besiyeziye yɛ Kɩndɔm Hɔɔlʋ. Sɛ yɛkɔlɩ ɔzʋlɔ yɛma yɛ nwʋ tɩ wɔ nnwʋnlamɩ ɔfʋã nu a, ɩhyɛ Gyehova animinyiamɩ.—2 Kɔlɛntɩmaa 6:3, 4.
2. Sɛ yɛ nwʋ ɩkɛdɩ a, mɩnla nninyeni yɛ ɩsɛ kɛɛ yɛpʋ a?
Bayɩbʋlʋ ɩhyɛ yɛ ɛzɩzɩbɛ kɛɛ “yɛwʋwʋ́ yɛ nwʋ wɔ nnwʋnlamɩ nɩɩ sunzuma ɔfʋã nu evinli bela nwʋ.” (2 Kɔlɛntɩmaa 7:1, NWT) Meti yɛbɔ mmɔdɩnɩ kɛɛ, yɛkɔhwɩ̃ yɛ nwʋ wɔ dɩyɛ bela mɔɔ ɩkɔhʋla ɩkɛzɩkɛ ye eniiwudo yɩ nɩɩ yɛ adwɩnɩ nwʋ. Ɩsɛ kɛɛ ye nzunzunlɩyɛ ɩsɔ Gyehova anyɩ, meti yɛbɔ mmɔdɩnɩ kɛɛ yɛlɔ́dwɩnɩndwɩnɩ nninyeni tanɩ nwʋ. (Ndwomi 104:34) Yɛbɔ mmɔdɩnɩ sʋ̃ kɛɛ yɛlɛ́kã ndɛnɩ evinli.—Kɩnga Kolosiyiamaa 3:8.
Mɩnla dɩyɛ fʋlɔ sʋ̃ yɛ ɩkɔhʋla ɩkɛma yɛ nwʋ ikogua evinli wɔ ɛbɩlawɔlɛ nɩɩ nnwʋnlamɩ ɔfʋã nu a? Nninyeni be ɩwɔ ɛkɛnɩ mɔɔ ɩkɔhʋla ɩkɛzɩkɛ ye eniiwudo yɩ. Meti yɛánlʋ nnuno tanɩ dɩkɛɛ wii, sɩgɛlɛtɩ, snɔf nɩɩ nnuno tanɩ azʋlɔtʋ mɔɔ mmenii fa de bɛ anyɩ nɩ. Ɔzɔ mɔɔ yɛyɛ nɩ, ɩma yenyia pɔkɔdɩlɛ baaba na ɩma yɛda yɩ ali kɛɛ yebu nnwʋanlɩ. Yɛbɔ mmɔdɩnɩ sʋ̃ kɛɛ yɛkɔhwɩ̃ yɛ nwʋ wɔ nyɛlɩyɛ tanɩ dɩkɛɛ yɛ nwʋ mɔɔ yɛkɔgʋlʋ ma yɛ nwʋ ɩkɛɣa nɩɩ ponogɩlafi nwʋ na ama yɛ ɛbɩlawɔlɛ nwʋ ɩadɩ. (Ndwomi 119:37; Ɛfɩsɛsɩmaa 5:5) Ɩ́la azɩ kɛɛ yekeyiaki ɔzɔ subanɩ tanɩ eyimmɔ, naasʋ̃ Gyehova ɩkɔhʋla ɩkɔwʋwa yɛ ma yekeyiaki.—Kɩnga Ayɩzaya 41:13.
SUMÁ SƲ̃MAA
Sumá kezimɔ sɛ yɛma yɛ nwʋ tɩ a, ɩhyɛ Gyehova animinyiamɩ nɩɩ kezimɔ yɛkɔhʋ̃ yekediyia nyɛlɩyɛ tanɩ azʋlɔtʋ sʋ̃.
3. Sɛ yɛ nwʋ tɩ wɔ nnwʋnlamɩ ɔfʋã nu a, ɩhyɛ Gyehova animinyiamɩ
Sɛ yekila mmɛla mɔɔ Gyehova ɩva ɩmanlɩ Yizilayamaa nɩ a, ɩma yɛnwʋ kezimɔ nnwʋnlamɩ ɔfʋã nu anwʋdɩlɛ nwʋ hyinyia yɩ paa. Kɩnga Ɛkɩsadɔsʋ 19:10 nɩɩ 30:17-19, na akʋ̃ bozunzú ndwokɔɣizialɛ eyimmɔ nwʋ:
-
Mɩnla ɔhʋanɩ zʋ yɛ ɛhɛlɛlɛ ndwokɔ eyimmɔ bʋwa yɛ ma yɛnwʋ kezimɔ Gyehova bu nnwʋnlamɩ ɔfʋã nu anwʋdɩlɛ a?
-
Mɩnla yɛ ɔkɔhʋla ɛkɛyɛ eɣile bela ma wʋ nwʋ ɩkɛdɩ wɔ nnwʋnlamɩ ɔfʋã nu a?
Ide mmɩlɩ nɩɩ mmɔdɩnɩwɔlɛ na ama abiye yɩ nwʋ ɩadɩ. Naasʋ̃ ɩávalɩ nwʋmɔ dɩka mɔɔ yɛda, kɛ yedii ehyinyia anzɛnyɩɩ yɛwɔ ozukua nɩ, sa yɛkʋla yɛma yɛ nwʋ tɩ.Yɩ́ VIDIYO nɩ, na akʋ̃ bozunzú ndwokɔɣizialɛ eyimmɔ nwʋ.
-
Sɛ yedi nninyeni mɔɔ yɛfa yedi dasɩlɛ nni na yɛma nwʋmɔ tɩ a, mɩnla ɔhʋanɩ zʋ yɛ ɩkɛma bɛkɛhamvʋ Gyehova a?
4. Yiakí subanɩ tanɩ
Gyehova kɔhʋla kɔwʋwa yɛ ma yekeyiaki nyɛlɩyɛ tanɩ bela
Sɛ ɔnʋ wii, sɩgɛlɛtɩ, ɔtwɩ̃ snɔf anzɛnyɩɩ nnuno tanɩ mvʋlɔ ɛfa ede wʋ anyɩ a, ɔkɔnwʋ kɛɛ ɩ́la azɩ kɛɛ ekeyiaki ɔzɔ subanɩ tanɩ nɩ. Mɩnla yɛ ɩkɔwʋwa wʋ ma ekeyiaki a? Dwɩnɩndwɩnɩ kezimɔ ɩkɔhʋla ɩkɛha wʋ nɩ nwʋ. Kɩnga Matiyu 22:37-39, na akʋ̃ bozunzú kezimɔ wiinlʋnlɛ, sɩgɛlɛtɩnlʋnlɛ, snɔfhwɩnlɛ anzɛnyɩɩ nnuno tanɩ mvʋlɔ ɩnlʋnlɛ ɩkɔhʋla ɩkɛhã . . .
-
ɔhɔnwʋvalɛ mɔɔ abiye nɩɩ Gyehova wɔ.
-
yɩ mmusunwamaa nɩɩ bɛzabɛ mɔɔ bebike yɩ.
Yɛ́ nhyɩhyɛlɩyɛ fa kʋ̃ tiyia subanɩ tanɩ be. a Yɩ́ VIDIYO nɩ.
Kɩnga Fɩlɩpɩmaa 4:13, na akʋ̃ bozunzú odwokɔɣizialɛ eyi nwʋ:
-
Sɛ abiye yɛ nhyɩhyɛlɩyɛba bɔ mpayɩ, isuma Bayɩbʋlʋ, na ɩkɔ asafʋ ayiyialɩyɛ a, kɛ ɩkɔhʋla ɩkɔwʋwa yɩ ma ikeyiaki subanɩ tanɩ a?
5. Kʋ̃ tiyia nzunzunlɩyɛ nɩɩ nyɛlɩyɛ tanɩ
Kɩnga Kolosiyiamaa 3:5, na akʋ̃ bozunzú ndwokɔɣizialɛ eyimmɔ nwʋ:
-
Kɛ ɩyɛ mɔɔ yɛnwʋ kɛɛ ponogɩlafi, nna nwʋ ndwokɔ mɔɔ bɛfa bɔnwʋã nɩɩ enii mɔɔ ɩgʋlʋ yɩ nwʋ ma yɩ nwʋ ɩba nɩ, ɩdɩ dɩyɛ evinli wɔ Gyehova anyɩ zʋ a?
-
Kezimɔ Gyehova ikilaa ɔhʋanɩ kɛɛ yɛ nwʋ ɩkɛdɩ nɩ, ekila a, nɣɛlɛbɛ wɔ nu a? Mɩnla ti a?
Kilá kezimɔ ɔkɔhʋ̃ ekediyia nzunzunlɩyɛ tanɩ.Yɩ́ VIDIYO nɩ.
Gyisɛsɩ ɩvalɩ ndianwʋ be ilili egyima ɩva ihileli kɛɛ, ɩsɛ kɛɛ yeminyia yɛ nwʋ yɛyɛ dɩyɛ titili be na ama yɛ nwʋ ɩadɩ. Kɩnga Matiyu 5:29, 30, na akʋ̃ bozunzú odwokɔɣizialɛ eyi nwʋ:
-
Wɔ ɛkɩhyɩ nɩ, nɩ Gyisɛsɩ ɩlɛ́kã kɛɛ yebila yɛ nwʋ, mfomi nɩ ɩpɛ kɛɛ ikile kɛɛ yɛwɔ́ mmɔdɩnɩ kɛɛ yɛkɛyɛ yɛ ɔhawʋ yɩ nwʋ dɩyɛ be. Mɩnla pɔkɔ yɛ abiye kɔhʋla kezi na ama ɩabʋ nzunzunlɩyɛ tanɩ a? b
Sɛ ɔbɔɔ mmɔdɩnɩ kɛɛ ɔkɔhʋ̃ ekediyia nzunzunlɩyɛ tanɩ a, mɛyɩ nwʋ kɛɛ, Gyehova anyɩ ɩsɔ mmɔdɩnɩ mɔɔ ɔbɔ nɩ paa. Kɩnga Ndwomi 103:13, 14, na akʋ̃ bozunzú odwokɔɣizialɛ eyi nwʋ:
-
Sɛ ɔbɔɔ mmɔdɩnɩ kɛɛ ɔkɔhʋ̃ ekediyia nzunzunlɩyɛ tanɩ a, mɩnla ɔhʋanɩ zʋ yɛ ɛhɛlɛlɛ odwokɔ eyi ɩbʋwa wʋ ma ɔnwʋ kɛɛ ɩsɛ kɛɛ eminyia wʋ nwʋ a?
Sɛ esia ɔkɔ ɛyɛ dɔkʋ̃ a, mɛyɩ iáhile kɛɛ wʋ sa iziye azɩ!
Ɩkɔhʋla ɩkɛyɛ mɛlɛkɛ kɛɛ ekenyia adwɩnɩ kɛɛ, ‘Mɩ sa ziye azɩ, meti ma mʋdʋ mɩ adwɩnɩ nu.’ Naasʋ̃ dwɩnɩndwɩnɩ eyi nwʋ: Sa abiye ituu tɔlɔnwa na sɛ ipoli ɩtɔ azɩ a, mɛyɩ iáhile kɛɛ ɩwɩ anzɛnyɩɩ ɩsɛ kɛɛ isia ɩkɔ ɩbɔ yɩ tʋ dɔkʋ̃. Meti, sɛ esia ɔkɔ ɛyɛ dɩyɛ mɔɔ ɔbɔɔ mmɔdɩnɩ kɛɛ ekeyiaki a, mɛyɩ iáhile kɛɛ wʋ ɛvɛlɩyɛ ɩyɛ mbʋanlɩ. Na ɩábɩba mmɔdɩnɩ mɔɔ ɔwɔ daada nɩ sʋ̃ wɔ ɛkɛnɩ. Sa ɩkʋla isi kɛɛ yekezia yɛkɛyɛ dɩyɛ mɔɔ yɛbɔɔ mmɔdɩnɩ kɛɛ yekeyiaki nɩ. Máma wʋ padi ikolɔ! Iluwa Gyehova yɩ mmʋwalɩyɛ zʋ nɩ, sa ɔkʋla eyiaki nyɛlɩyɛ tanɩ nɩ.
ABIYEMMƆ BƐKÃ KƐƐ: “Ɩhalɩ mɩ kɛ, mʋlɔ́kʋla mikeyiaki.”
-
Mɩnla ɛhɛlɛlɛ odwokɔ yɛ ɔkɔhʋla ɛkɛva ɔkɔwʋwa enii kʋ̃ nɩ yɩ ma ɩkɔnwʋ kɛɛ, iluwa Gyehova yɩ mmʋwalɩyɛ zʋ nɩ, sa ɩkʋla iyiaki nyɛlɩyɛ tanɩ a?
YƖ DƆKƆWƆLƐ
Sɛ yɛma yɛ nwʋ tɩ wɔ nnwʋnlamɩ ɔfʋã nu, yɛ adwɩnɩ nu, nɩɩ yɛ nyɛlɩyɛ nu a, ɩma Gyehova anyɩ de.
Kɛ Okowuwa Ekeze a?
-
Mɩnla ti mɔɔ ihyinyia paa kɛɛ yɛma yɛ nwʋ tɩ a?
-
Kɛ ɩkɛyɛ na wʋama wʋ nwʋ ɩadɩ wɔ nnwʋnlamɩ ɔfʋã nu a?
-
Kɛ ɩkɛyɛ na wʋama wu nzunzunlɩyɛ nɩɩ wʋ nyɛlɩyɛ nwʋ ɩadɩ a?
PƖBƐ́ SƲ̃MAA
Sɛ ɛdɩ ehyinyianii po a, mɩnla nninyeni ngyɩkɩ̃ɩ̃ ngyɩkɩ̃ɩ̃ be yɛ ɔkɔhʋla ɛkɛyɛ na ama wʋ nwʋ ɩadɩ wɔ nnwʋnlamɩ ɔfʋã nu a?
Kɩnga nninyeni mɔɔ ɛyɛ a, ɩkɛma ekeyiaki sɩgɛlɛtɩnlʋnlɛ.
Kilá mɔɔ ɩzʋ̃ ponogɩlafihilalɛ nu ɩba.
“Ponogɩlafɩ—Ɩha Adwɩnɩ Anzɛnyɩɩ Ɩáha Adwɩnɩ?” (Ɔwɩɛnɩlɛ Aɣanɩ, August 1, 2013)
Nɩ benyia be ihila ponogɩlafi nkʋ̃ʋ̃ ma ɩhalɩ yɩ ɛkɛnɩ, kilá mɔɔ ɩwʋwalɩ yɩ ma iyiakili.
“Mɩ Sa Ziyeli Azɩ Mbɔmɩ Sʋ̃maa Ansaana Mibayiaki” (Ɔwɩɛnɩlɛ Aɣanɩ No. 4 2016)
a Odwokɔ mɔɔ ise “Kezimɔ Ekeyiaki Sɩgɛlɛtɩnlʋnlɛ” mɔɔ ɩwɔ ozumalɛdɩyɛ eyi yɩ Pɩbɛ́ Sʋ̃maa ɔfʋã nɩ, ikilehile nninyeni azʋlɔtʋ mɔɔ abiye kɔhʋla kɛyɛ na ama iayiaki sɩgɛlɛtɩnlʋnlɛ nɩ nu.
b Mɔɔ ɩkɛma ekenyia mmʋwalɩyɛ na ama wʋayiaki wʋ nwʋ mɔɔ ɔgʋlʋ ma wʋ nwʋ ɩba nɩ, kilá “Kɛ Ɩkɛyɛ Na Miayiaki Mʋ Nwʋ Mɔɔ Mʋgʋlʋ Ma Mʋ Nwʋ Ɩba Nɩ a?” mɔɔ ɩwɔ Ndwokɔ Mɔɔ Mmɩlantɩyɛ Nɩɩ Nɣɛdɛkɛ Bebizia—Munwalɩyɛ Mɔɔ Ɩkɔwʋwa Bɛ, Ɔfʋã 1, yi ti 25 nɩ.
