Escuelar sarañapatakis mä warmejj wawapar wakichtʼkaspa ukham amuytʼañäni. Wawapajj suma jareqtʼata, qʼoma, suma isthaptʼat sarañapatakiw wakichtʼaski. Ukham suma cuidatajja uka wawajj janiw usuntkaniti, yaqhanakas tatapatsa mamapatsa sum parlapjjani. Wali munasiri Jehová Dios Awkisajja, ukhamarakiw cuerposan qʼomäñassa qʼom sarnaqañassa muni. Qʼomäñajj jiwasarojj yanaptʼistuwa, ukatjja Jehová Diosat mayninakajj sum parlapjjañapatakiw yanaptʼaraki.

1. ¿Kunjamsa cuerposan qʼomässna?

Jehová Diosajj ‘santo jaqëpjjañamawa’ sasaw sistu (1 Pedro 1:16). Santo jaqëñatakejja, cuerposas sarnaqatasas qʼomäñapawa. Kunapachatï cuerppach jareqtʼassktan, isisasa, utasasa, autosasa suma qʼomäki ordentʼatäkaraki ukhajja, qʼomätasswa uñachtʼaytanjja. Tantachasiñ Uta qʼomäñapatakis yanaptʼaraktanwa. Qʼomäñäni ukhajja, Jehová Diosaruw mayninakajj jachʼañchapjjani (2 Corintios 6:3, 4).

2. ¿Kunanaksa qʼomäñatakejj jan lurañasäki?

Bibliajj akhamwa ewjjtʼistu: “Kunanakatï cuerporusa amuyurusa qʼañuchki ukanakat qʼomachasipjjañäni” sasa (2 Corintios 7:1). Ukatwa kunanakatï cuerposarusa amuyusarus qʼañuchkaspa ukanakat jitheqtañatak wal chʼamachastanjja. Kuntï piensktan ukanakajj Jehová Diosar kusisiyañapatakejja, qʼañu amuyunak apanukuñatakiw chʼamachastanjja (Salmo 104:34). Ukatjja parlatasan qʼomäñatakiw chʼamachasiraktanjja (Colosenses 3:8 liytʼäta).

¿Kunanakas cuerposarusa sarnaqatasarus qʼañucharakispa? Cigarro fumañasa, coca akhulliñasa cuerposaruw qʼañuchi, amanut medicamentonakamp qolljasisasa drogasisasa cuerpos qʼañuchasiraksnawa. Ukanakamp cuerpos jan qʼañuchasktan ukhajja, cuerpos cuidatasa jakañ vidar respetomp uñjataswa uñachtʼaytanjja. Ukatjja sarnaqatasan qʼomäñasatakejja, qʼañu lurañanakata mä arun masturbasiñatsa, pornografía uñchʼukiñatsa, yaqha ukham jan walinakatsa jitheqtañasawa (Salmo 119:37; Efesios 5:5). Uka jan walinak apanukuñajj chʼamakïspawa, ukampis Jehová Diosaw yanaptʼistani (Isaías 41:13 liytʼäta).

 JUKʼAMP YATJJATAÑÄNI

3. Cuerposan qʼomätapajj Jehová Diosaruw jachʼañchi

Jehová Diosatakejj qʼom sarnaqañasajj wali wakiskiriwa, ukwa nayra Israel markar churkäna uka leyinak liytʼasajj amuytanjja. Éxodo 19:10; 30:17-19 liytʼasajja aka toqetwa parltʼapjjäta:

• Liytʼktan uka versiculonakarjamajja, ¿Jehová Diosajj qʼom sarnaqañas toqet kunsa amuyi?

• ¿Kunanak lurañas qʼomäñatakejj yanaptʼistaspa?

Qʼom sarnaqañatakejj tiempow munasi, chʼamachasiñasas wakisirakiwa. Ukampis kawkinsay jakaskchiñäni, qollqenïskchiñänisa janisa, jiwasajj qʼoma jaqësnawa. VIDEO uñtasajja aka toqetwa parltʼapjjäta:

• Prediktan uka jaqenakajj kunanakatï utjkistu ukanakan qʼomätap uñjapjjani ukhajja, ¿ukajj Jehová Diosar jukʼamp respetapjjañapatak yanaptʼaspati? ¿Kunatsa ukham amuyta?

4. Jan wali vicionak apanukum

Jumatï cigarro fumañaru, medicamentonakamp qolljasiñaru jan ukajj droganakamp qolljasiñar yatintatästajja, uka vicionak apanukuñajj kunja chʼamasa uk yatpachätawa. Ukampis ukanakajj kunjamsa vidamar jan waltʼayaski uk amuytʼañaw ukanak apanukuñatakejj yanaptʼiristam. Mateo 22:37-39 liytʼasajja aka toqetwa parltʼapjjäta:

• Cigarro fumasasa droganakampi qolljasisasa, ¿Jehová Diosampejj sum apasiskaksnati?

• Cigarro fumañasa droganakampi qolljasiñasa, ¿kunjamsa familiaranakasarusa yaqhanakarus jan waltʼayaspa?

Mä jan wali vicio apanukuñatakejj kunanaksa lurasma uka toqet pienstʼam. a VIDEO uñtapjjäta.

Filipenses 4:13 liytʼasajja aka toqetwa parltʼapjjäta:

• Sapa kuti orasiñasa, Bibliat yatjjatañasa, tantachäwinakar sarañasa, ¿maynirojj vicionak apanukuñatakejj yanaptʼaspati? ¿Kunatsa ukham amuyta?

 5. Jan walinak jan lurañataki, amuyumansa qʼomäñatak chʼamachasim

Colosenses 3:5 liytʼasajja aka toqetwa parltʼapjjäta:

• Pornografía uñchʼukiñasa, masturbasiñasa, sexteo ukasa b Jehová Diosatakejj qʼañu luräwinakawa sasin ¿kunatsa sissna?

• ¿Jehová Diosan qʼom sarnaqañ mayitapajj jumatakejj walikïskiti? ¿Kunatsa ukham amuyta?

Kunjamsa qʼañu amuyunak apanukusma uk yatjjatam. VIDEO uñtapjjäta.

Qʼom sarnaqañatakejja kunsa jankʼaki, jan pächasis lurañasa ukwa Jesusajj mä uñachtʼäwimp yatichawayi. Mateo 5:29, 30 liytʼasajja aka toqetwa parltʼapjjäta:

• Jesusajj janiw jiwaspachpa usuchjasiñat parlkänti, jan ukajj kunsa jiwasajj jankʼak lurañasa uka toqetwa parlaskäna. ¿Qʼañu amuyunak pʼeqesar jan mantañapatakejj kunsa lurañasa? c

Jumatï qʼañu amuyunak apanukuñatak chʼamachasiskta ukhajja, Jehová Diosajj ukham chʼamachasitam wali valoranitwa uñji. Salmo 103:13, 14 liytʼasajja aka toqetwa parltʼapjjäta:

• Jumatï mä jan wali vicio apanukuñatak chʼamachasisksta ukhajja, ¿uka versiculonakajj chʼamachasiskakiñamatak yanaptʼiristamti? ¿Kunatsa ukham amuyta?

 ¿KUNSA YATEQAWAYTAN?

Cuerposasa, amuyusasa, sarnaqatasas qʼomäki ukhajja Jehová Diosaruw kusisiytanjja.

Amtañataki

• ¿Kunatsa qʼomäñajj wali wakiskirejja?

• ¿Kunanaksa cuerposan qʼomäñapatakejj lurañasa?

• ¿Sarnaqatasasa lupʼitanakasas qʼomäñapatakejj kunanaksa lurañasa?