JIʼTE 40
Pe fing ne lô dze Si m tchi ge ke ?
Naʼ kwègne taʼ mema é pe khoung mou é, é po nyapte é ne ghô sekou. É tchente dé ge é sôk ne, ge mdze mye lô. A gre ge mou pe a tchuô, neng daʼte bi pyeshe pô ge mta pye tchente dé é. Dendeng poʼo, Ta koungne yôkpe, Jéova, tcheng ge pe pe dô ne beng ne yôkpe, tchum mkwègne môkpe, mghôm môkpe, ba ne mghetse môkpe. Tchwe ye pe dô a, a ning ghouʼte ne é, kwaʼ wôkpe neng dzu pé.
1. Pe fing ne lô ne beng ne yôkpe m tchi ge ke ?
Jéova gôm bi pe ge : “po pe dôlô.” (1 Pètro 1:16) Pe gô ne pe dôlô, be beng ne yôkpe, mkwègne môkpe, mghôm môkpe, ba mghetse môkpe lô. Ne lô ne beng ne yôkpe, tcheng ge pe pe sôk ne goung mtam awè, bing be gre ge goung potse tsôkpe awè lô. Pe fing ne pe kwite ba ge Dye Nefo lô. Ne lô ne beng ne yôkpe ning mkouʼ ne Jéova.—2 Korinto 6:3, 4.
2. Te ge pe lô, a tcheng ge pe waʼ ma m ma ?
Bible ha kaktuô ge pe “lôgne ne tsôkpe ne goung mving awè ne bapne ba m ne jwégne.” (2 Korinto 7:1) Poʼo, pe gô waʼ bakele ye a fing ne ghe ywe tchwepoung ne ne yôkpe, ke ne mkwègne môkpe le. Mkwègne môkpe gô ne poung bi Si, be pe ghe goung ywe awè ne ne gwaʼ mkwègne tchwepoung. (Mghôm ghamte 104:34) Pe bing khaktuô ba ne wim mghôm mye a lô a.—Ké Kolosai 3:8.
Ke fing ne ping gre ge pe le pe dôlô dze Si ? She potse fing ne tsiʼ ne yôkpe. Poʼo, pe gwaʼ potse paʼ ne nwe sika, ne pfe ke fye dépaʼ khô le, ke ba ne wim mhwe m tchwepoung le. Tchwe ye pe te gre potse menge a pe, pe gre ne tchuô, neng daʼte ge pe gre mkouʼ ne poutchi vôk. Pe bing khaktuô ne pe dôlô dze Si, tchye m ne ne pe doʼ potse paʼ masturbation ba pornografi a. * (Mghôm ghamte 119:37; Éféso 5:5) A fing ne tuô ne waʼ m ma bô, daʼge Jéova fing ne kwite wôkpe.—Ké Izaya 41:13.
PING TCHENG NE GÔ DZE
Lagne nweke pe ning mkouʼ ne Jéova, tchwe ye pe gre ge ne yôkpe ba potse tsôkpe pe dô a, neng djô tchi paʼ o fing ne yaʼ ne ping be gre potse tsye a dziʼ ne o a.
3. Ne pe gre ge ne yôkpe ba potse tsôkpe pe dô ning mkouʼ ne Jéova
Pe fing ne yô deng paʼ a be tuôdeng bi Jéova ge pe pe dô a, tchwe ye pe dinte mtchoʼ mye é le ha bi po a Israèl tchwedze a. Ké Ne tem 19:10 ba 30:17-19, neng gômte ne mhente menge :
-
Mkhè menge daʼte ge Jéova djô ne pe dô m tchi ge ke ?
-
O fing ne pe gre ma potse goung tam awè mye a gô kwite o ne pe dô a ?
Ne pe dô hente tam ba faʼ. Daʼge ke pe tchwe baha a le, ke pe ghe khap ke beng le, pe fing ne lô. Yô VIDÉO, neng gômte ne hente yenge.
-
Nweke pô pye pe sing Ghôm Si bi pou a, gô ping tchente ning mkouʼ ne Jéova tchwe ye wap djô ge potse tsôkpe dô a ?
4. Yaʼ m ma tchwepoung
Jéova fing ne kwite o ne yaʼ baya tchi ma tchwepoung le
O pe nwe sika ke depaʼ khô le, be o fing ne jye deng paʼ a tuô ne yaʼ ne ghe ya a. Ke fing ne kwite o ? Sè nwe ne ywe ye ma bô bo gre ne o a. Ké Matio 22:37-39, neng dou gômte ne tchi paʼ sika, ke depaʼ khô le gre ywe ne . . .
-
ye ne pe m so taʼ mo pou a Jéova a.
-
toundye mo ba pô pye wap be gingne é a.
Ve potse tsye o gô ghe te ne yaʼ taʼ ma tchwepoung a. * Yô VIDÉO.
Ké Filipo 4:13, neng gômte ne hente yenge :
-
Ne pe gre priya, jiʼte Bible neng be gô mtchouʼte goung tam awè, fing ne ha guʼ bi taʼ mo, ne yaʼ taʼ ma tchwepoung m tchi ge ke ?
5. Loʼ mkwègne ba mghetse mye a te be dôlô a pe
Ké Kolosai 3:5, neng gômte ne mhente menge :
-
Pe jye m ge ke ge pornografi, sèksting, * ba masturbasion be potse be a ka lô dze Jéova a ?
-
O kwè ge pe fing ne lô tchum mkwègne môkpe, mghôm môkpe ba mghetse môkpe kwaʼ paʼ Jéova hente bi pe a le ? Nweke ?
Yô tchi paʼ o fing ne loʼ mkwègne mye a ka lô a pe. Yô VIDÉO.
Yéso le wim taʼ foʼte ne ne daʼte ge, pe gô le khète ne ghe goung ywe ye pe fing a ne ne be a dôlô. Ké Matio 5:29, 30, neng gômte ne hente yenge :
-
Yéso late bo gôm ge pe gô té mnye môkpe ke yaʼ mbou môkpe le kwaʼ nyenyô pe, daʼge é le bo tcheng ne ghôm ge a tcheng ge pe ghe ywe. Taʼ mo fing ne le khète ne ghe kwaʼ ke, ne ne bôm mkwègne mye a te dôlô a ? *
O po doʼ ne tchyete ping gre mkwègne mye a te dôlô a pe, be Jéova bo tchente ning deng ne kaktuô o. Ké Mghôm ghamte 103:13, 14, neng gômte ne hente yenge :
-
O po doʼ ne tchyete ping gre mkwègne mye a te dôlô a pe, be mkhè Bible meng bo ha kaktuô bou ne tchyete fiʼ mbou m tchi ge ke ?
Ne vu te toute ge o pi pe !
A fing ne hwi ne sè ge, “ge vu, poʼo dze ge mye yaʼ ne ping kaktuô”. Daʼge sè nwe ne ywe yeng : taʼ mo ye é bo khu du a, faʼte neng bvu si, be a te toute ge é pi du pe, ke m ge é gô ping thoʼ du a m se pe. Dendeng poʼo, o ping gre taʼ ywe tchwepoung ye o ke bo tcheng ne yaʼ ne ping gre a, be a te toute ge o pi shou ye o bo doʼ ne ma tchwepoung bô a pe. A te neng vegne goung kaktuô ye o tsèm ghe a pe. Te ge o yaʼ kwaʼ nyenyô ne ping be gre ya, a gô ŋwak ge o vu mtchum mtchum. Ke pwa mkwé ! Pou a kwite Jéova, o fing ne loʼ ma tchwepoung bô te dzu.
SHE PÔ GÔM GE : “Ge ghe ma ne pe gre ya téʼ te bia de kouʼgne ne yaʼ.”
-
O fing ne wim ya khè Bible ne ne daʼte bi mo bô ge pou a kwite Jéova é fing ne yaʼ taʼ ma tchwepoung ?
YE NE KHAMTE
Pe gre ge Jéova ŋwègne, tchwe ye pe gre ge ne yôkpe, mkwègne môkpe ba mghetse môkpe pe dô a.
O lagne ke ?
-
Nweke a be mtuôdeng ne pe dô ?
-
O fing ne pe dô ne ne o ba potse tsu m tchi ge ke ?
-
O fing ne ghe ge mkwègne mou ba mghetse mou pe dô m tchi ge ke ?
YÔ SHE POTSE NE
Ma potse si mye o fing ne ghe, ne ne be dô ne beng ne o ba m be ye o peng a ?
Yô potse tsye o fing ne ghe, a kwite o ne yaʼ ne ping be nwe sika a.
Yô ywe ye pornografi gre ne mo a.
“La pornographie : inoffensive ou dangereuse ?” (La Tour de Garde, 1er août 2013)
Lagne tchi paʼ taʼ mbè le kouʼgne ne yaʼ ne ping be djô pornografi a.
“Jʼai échoué bien des fois avant de réussir” (La Tour de Garde no 4 2016)
^ Masturbation be paʼ taʼ mbè gre taʼ ywe ne lôp tsye, ke taʼ mdjwi ghe taʼ ywe ne kôp é le, ne dogne ji ne noung pou a mo a. Pornografi be mvidéo, mfoto, potse bveve, ba potse djouʼyouʼou mye a be si ne ne gre ge mo ghe ji ne noung pou a mo a.
^ Artikle, “Comment arrêter de fumer,” ye a tchum jeng “Yô she potse ne” tchum jiʼte yenge a, gôm nwe ne she potse tsye mo fing ne ghe ne ne djaʼ ne ping be nwe sika a.
^ Sèksting, be ne tchya m mésage, mfoto ke mvidéo le, ne daʼte mtse nôm tchye m ne mesing.
^ Ne ne djô ywe ye a fing ne kwite mo ne yaʼ masturbasion a, lé kam 25 “Comment arrêter de me masturber ?” tchum pouʼ ŋwaʼgne Les jeunes sʼinterrogent. Réponses pratiques (volume 1).
