Iye ọmọ nọ hoẹmwẹ ovbi ẹre i gi ovbi ẹre gbiruẹn. Ọ ghaa rrie esuku, ọ ghi khuẹ ọre sẹsẹsẹ, ọ ghi mu ẹre egbe. Ẹghẹ hia ẹre ọ ya họ ukpọn rẹn. Ọmọ nii ghi ye kereghede, emwa ghi vbe bẹghe ẹre wẹẹ, a gele wa gbaroghe ẹre. Erriọ e Jehova ne Erha mwa nọ hoẹmwẹ ima, vbe ya hoo ne ima gha re emwa nẹi gbiruẹn, ọ vbe hoo ne ekhọe kevbe uyinmwẹ ọghe ima gha re nọhuanrẹn. Ma ghaa re emwa ni huanrẹn, ma miẹn ere vbọ, ọ vbe rhie uyi gie Jehova.

1. De vbene ima khian ya sẹtin gha re emwa nẹi gbiruẹn hẹ?

E Jehova wẹẹ: “Ọ kere ne uwa gha re nọhuanrẹn.” (1 Pita 1:16) Ọmwa nọhuanrẹn i gbiruẹn, erriọ iziro kevbe uyinmwẹ ọghẹe vbe ya huan. Ma ghaa re emwa nẹi gbiruẹn, egbe ima, ukpọn ima, owa ima kevbe okotọ ọghe ima ghi ye sẹsẹsẹ vbe ẹghẹ hia. Ma ghi vbe gha mwẹ obọ vbe Ọgua Arriọba na kpe huan. Ma ghaa re emwa nẹi gbiruẹn, te ima rhie uyi gie Jehova.​—2 Kọrinti 6:3, 4.

2. De emwi eso na gha gban egbe na, na mieke na gha re nọhuanrẹn?

E Baibol wẹẹ ne ima “khuẹ egbe mwa huan hin emwi nọ sẹtin ya egbe ra orhiọn khian nọ ma huan.” (2 Kọrinti 7:1) Ọni ọre wẹẹ, ma ghi gha gban egbe ne emwi ke emwi nọ gha sẹtin mu ima egbe ra ekhọe rhia. Ọ khẹke ne iziro ọghe ima gha yẹẹ e Jehova, nọnaghiyerriọ, te ima gha hia ne iziro dan ghẹ la ima ekhọe. (Psalm 104:34, NW) Ọ vbe khẹke ne ẹmwẹ nọ maan gha ke ima unu ladian.​—Tie Kọlose 3:8.

De emwi ọvbehe nọ gha sẹtin ya egbe ima, ekhọe ima kevbe uyinmwẹ ima khian nọ ma huan? Emwi eso gha sẹtin mu ima egbe rhia. Nọnaghiyerriọ, ọ ma khẹke ne ima gha si itaba, esiga ra ne ima gha ya ukhunmwu ni wegbe rọkhọ egbe. Ma ghaa lẹẹ ne emwi vbenian, ma i khian mu emianmwẹ ne iran si, te ima vbe rhie ẹre ma wẹẹ, ma gbọyẹmwẹ ye arrọọ. Ma ghaa gban egbe ne ughe ne emwa na bannọ ruan kevbe uyinmwẹ ne emwa na gua ẹgẹn iran kpa, te ima rhie ẹre ma wẹẹ, ekhọe ima kevbe uyinmwẹ ima huanrẹn. (Psalm 119:37; Ẹfisọs 5:5) Emwi vbenian gha gua ọmwa obọ ro nẹ, ọ wa lọghọ na ban, sokpan e Jehova gha sẹtin ru iyobọ.​—Tie Aizaia 41:13.

 GUALỌ OTỌ RE SAYỌ

3. Ọ keghi rhie uyi gie Jehova vbe ima ghaa re emwa nẹi gbiruẹn

Ma ghaa tie uhi ne Jehova yi ne Ivbi Izrẹl nẹdẹ, ọ ghi ya ima rẹn vbene ọ hin usi sẹ hẹ vbe aro ọre, ne ima gha re emwa ni huanrẹn. Tie Ẹksodọs 19:10, NW kevbe 30:17-19, iyeke ọni, uwa ghi ziro yan avbe inọta na:

• Zẹvbe nọ rre avbe ako na, vbe ima ya rẹn hẹ wẹẹ, e Jehova i hoo ne emwa rẹn gha gbiruẹn?

• Vbọ khẹke ne u gha ru, ne u mieke na gha re ọmwa nẹi gbiruẹn?

Ẹrhiọn kevbe ẹghẹ, ẹre a loo na mieke na gha re ọmwa nẹi gbiruẹn. Vbọrhirhighayehẹ, ma gha sẹtin gha re ọmwa nẹi gbiruẹn vbe ehe ne ima rhirhi gha ye, ọre ovbiogue ẹre ima khin, ra ọdafẹn. Kpee VIDIO na, iyeke ọni, uwa ghi ziro yan inọta nọ lelẹe.

• Ma ghaa re emwa nẹi gbiruẹn, ọ keghi ya emwa ne ima kporhu ma rhie uyi gie Jehova. Vbe ima gu kha vberriọ?

4. Ban uyinmwẹ dan nọ gua ruẹ obọ ro

U ghaa re ọmwa nọ si esiga ra emwi ọvbehe, ra ọmwa nọ loo ukhunmwu nọ wegbe ya rọkhọ egbe, ẹi mwẹ u ma rẹn vbene ọ lọghọ hẹ, na ban uyinmwẹ vberriọ. De emwi nọ gha sẹtin ru iyobọ? Muẹn roro, deghẹ u gele miẹn ere vbe uyinmwẹ vbenian. Tie Matiu 22:37-39, iyeke ọni, uwa ghi ziro yan avbe inọta na:

• Ọmwa ghaa si itaba ra esiga, ra ọ ghaa loo ukhunmwu nọ wegbe, de vbene ọ ya ya ọmwa khian rree ne Jehova hẹ?

• De emwi nọ gha sẹtin si ye uwu ẹgbẹe? Vbọ vbe ya dekaẹn emwa ni lẹga re hẹ?

Hia vbe odẹ ke odẹ ne u ban uyinmwẹ dan. a Kpee VIDIO na.

Tie Filipai 4:13, NW, iyeke ọni, uwa ghi ziro yan inọta na:

• Ọmwa ghaa na erhunmwu, ọ na gha tie Baibol, ọ na vbe gha yo iko vbe ẹghẹ hia, vbọ khian ya ru iyobọ nẹẹn hẹ ya sẹtin ban emwi dan nọ gua re obọ ro?

 5. Hia ne u khọnmiotọ yan iziro dan kevbe uyinmwẹ nọ gbiruẹn

Tie Kọlose 3:5, iyeke ọni, uwa ghi ziro yan avbe inọta na:

• Vbe ima ya rẹn hẹ wẹẹ ọ sọnnọ e Jehova ighẹ ughe ne emwa na bannọ ruan, uyinmwẹ ne emwa na gua ẹgẹn iran kpa, kevbe ne emwa na ya efoni ra ekọmputa gie uhunmwu alama oghẹ gie emwa ọvbehe?

• Uwẹ yayi wẹẹ ima gha gele sẹtin gha mwẹ ekhọe kevbe uyinmwẹ nọhuanrẹn, zẹvbe ne Jehova gualọe yi ra? Vbua gu kha vberriọ?

Ghee odẹ ne u gha ya sẹtin khọnmiotọ yan iziro dan. Kpee VIDIO na.

Jesu keghi zẹ erre ọkpa nọ rhie ẹre ma wẹẹ, ọ khẹke ne ima zẹ emwi ru, ne ima mieke na gha re emwa ni huanrẹn. Tie Matiu 5:29, 30, NW, iyeke ọni, uwa ghi ziro yan inọta na:

• Vbe ako na, Jesu ma wẹẹ ne ima rhie ikuanegbe ne egbe ima, sokpan te irẹn wẹẹ ne ima zẹ emwi ru. De odẹ ne ọmwa gha ya sẹtin zẹ emwi ru, vbe iziro dan gha khian la re ekhọe? b

U ghaa hia ne u sẹtin khọnmiotọ yan iziro dan, e Jehova wa gbọyẹmwẹ ye ẹrhiọn ne u loo. Tie Psalm 103:13, 14, iyeke ọni, uwa ghi ziro yan inọta na:

• Deghẹ ọ mwẹ uyinmwẹ nọ gbiruẹn nọ gua ruẹ obọ ro, nọ lọghọ ruẹ na ban, de ẹmwẹ igiọdu nọ rre ako ọghe evbagbẹn nọhuanrẹn na, nọ gha ru iyobọ nuẹn ne ẹtin ghẹ fuẹ?

 OLIKA ẸMWẸ

Egbe ima, ekhọe ima, kevbe uyinmwẹ ima ghaa re nọhuanrẹn, te ima ya ẹko rhiẹnrhiẹn e Jehova.

Ogbewerriẹ

• Vbọzẹ nọ na khẹke ne ima gha re emwa ni huanrẹn?

• De vbene u khian ya gha re ọmwa nẹi gbiruẹn hẹ?

• De vbene iziro ekhọe kevbe uyinmwẹ ruẹ khian ya gha re nọhuanrẹn hẹ?