Bayangkon ma sahalak inang na laho paborhathon niombahni hu sikolah. Ipastihon ia ma niombahni ai domma borsih janah rapi bajuni. Anggo ibahen ia sonai gabe sehat ma niombahni ai. Ididah halak ma homa anggo ia dear mangurus anakni ai. Songon namatoras ai do homa Jahowa. Sihol do Ia ase borsih hita. Anggo borsih hita gabe sehat ma hita, janah gabe ipasangap ma goran ni Jahowa.

1. Aha do na porlu ibahen ase totap borsih hita?

Jahowa mangkatahon, “Maningon pansing do hanima.” (1 Petrus 1:16) Anggo ihatahon pansing tarmasuk ma ai borsih dirinta, sonai homa parlahounta. Ase boi sonai, maningon taratur ma hita maridi, ijaga hita ma borsih pakeianta, rumah, pakon kendaraanta. Anjaha, maningon ipaborsih hita do homa Balei Harajaon. Anggo marusaha hita totap borsih, gabe ipasangap ma goran ni Jahowa.​—2 Korint 6:3, 4.

2. Ase totap borsih, hasomalan aha do na maningon iambukkon?

Bibel mangkatahon, “Paborsih hita ma dirinta humbani sagala na pabutakkon daging ampa pingkiran.” (2 Korint 7:1) On artini maningon ipadaoh hita ma dirinta humbani aha pe na boi pasedahon angkulanta pakon pingkiranta. Umpamani, maningon marusaha ma hita padaohkon pingkiran na sambor. (Psalmen 19:14) Leganni ai, maningon ijaga hita ma homa parsahapta ase totap borsih.​—Basa Kolosse 3:8.

Sobali ai, maningon ipadaoh hita do homa dirinta humbani hasomalan na sambor, songon mardemban, mangissop, marganja pakon marnarkoba. Anggo ibahen hita sonai, gabe sehat ma hita janah taridah ma maharga do hagoluhan ai banta. Maningon ipadaoh hita do homa dirinta humbani hasomalan na butak, songon masturbasi a pakon mangidah pornografi. (Psalmen 119:37; Epesus 5:5) Ra do lang urah pasohkon hasomalan sisonai. Tapi pasti iurupi Jahowa do hita ase marhasil.​—Basa Jesaya 41:13.

 PARLAJARI ROH BAHATNI

3. Gabe ipasangap do goran ni Jahowa anggo borsih hita

Anggo ibasa hita titah ni Jahowa hubani bangsa Israel na hinan, gabe iarusi hita ma mase maningon borsih juakjuak ni Jahowa. Basa ma 2 Musa 19:10 pakon 30:17-19, janah ulas ma sungkun-sungkun on:

• Humbani ayat ai, sonaha Jahowa patuduhkon anggo juakjuak-Ni maningon borsih?

• Aha ma na boi ibahen ham ase totap borsih?

Tongon, porlu do ipasirsir hita panorang ampa gogohta ase boi totap borsih. Age pe miskin atap bayak hita, janah lang soal ija hita tading boi do ihorjahon hita ai. Tonton ma VIDEO, dob ai balosi ma sungkun-sungkunni.

• Anggo borsih barang-barangta sanggah hita marbarita, mase ai boi mambahen halak mamuji Jahowa?

4. Pasoh ma hasomalan na lang dear

Anggo mangissop atap marnarkoba ham, ra do lang urah pasohkon ai. Aha ma na boi mangurupi ham? Pingkirhon ham ma aha do akibatni anggo itoruskon ham ai. Basa ma Mateus 22:37-39, anjaha ulas ma sonaha mangissop pakon marnarkoba boi pasedahon . . .

• parhasomanan ni sasahalak pakon Jahowa.

• kaluarga ampa parhasomanan ni sasahalak pakon na legan.

Bahen ma rencana laho pasohkon hasomalan na lang dear. b Tonton ma VIDEO.

Basa ma Pilippi 4:13, janah ulas ma sungkun-sungkun on:

• Aha do gunani bani sasahalak anggo tongtong ia martonggo, marlajar Bibel, pakon martumpu?

 5. Marusaha ma pasohkon hasomalan ampa pingkiran na butak

Basa ma Kolosse 3:5, janah ulas ma sungkun-sungkun on:

• Hunja ibotoh hita hasomalan na butak do mangidah pornografi, sexting, c pakon masturbasi?

• Pandapotmu, boi do hita totap borsih ibagas pingkiran songon na iparentahkon Jahowa? Mase sonai balosmu?

Sonaha hita boi mangambukkon pingkiran na butak? Tonton ma VIDEO.

Ipatugah Jesus do sada limbaga na patuduhkon adong do na maningon ibahen hita laho manjaga parlahounta ase totap borsih. Basa ma Mateus 5:29, 30, janah ulas ma sungkun-sungkun on:

• Ijon sedo maksudni Jesus iparseda hita angkulanta. Tapi maksudni maningon podas do hita mangambukkon pingkiran na butak ase ulang sambor parlahounta. Anggo iahap ham, aha ma contohni? d

Anggo marusaha hita mangambukkon pingkiran na sambor, tontu ihargai Jahowa do ai. Basa ma Psalmen 103:13, 14, janah ulas ma sungkun-sungkun on:

• Sonaha ayat on boi mangurupi ham ase marhasil pasohkon hasomalan na butak?

 RIMPUNAN

Anggo borsih angkulanta, pingkiranta, pakon parlahounta, gabe malas do uhur ni Jahowa.

Na Dob Iparlajari

• Mase maningon borsih hita?

• Aha do na porlu ibahen hita ase totap borsih?

• Sonaha ham boi manjaga pingkiran pakon parlahoumu ase totap borsih?