PELAJAREN 40
Carana gelah Bersih Kita i Lebe-Lebe Dibata
Bayangkenlah sekalak pernanden nampati anakna si kitik denga ersikap-sikap ku sekolah. Pastikenna anakna e enggo ridi, bersih bajuna janah rapi. Anakna e banci tetap sehat, janah idah kalak maka perdiateken orang tuana ia. Bage ka pe Bapakta Jahwe, ateNa bersih min dagingta, barang-barangta, cara rukurta, pengeranata, bage pe perbahanenta. Adi bersih kita, e erguna man banta janah Jahwe pe imuliaken.
1. Uga carana gelah bersih dagingta, barang-barangta, bage pe lingkungenta?
Nina Jahwe, “Kena arus badia.” (1 Petrus 1:16) Gelah banci badia arus bersih dagingta, perukurenta, bage pe perbahanenta. Perlu kita teratur ridi, bersih ras rapi siban bajuta, rumahta, ras kendaranta. Banci ka kita ikut nampati mbersihken Bale Kerajan. Adi silakoken e, Jahwe banci imuliaken.—2 Korinti 6:3, 4.
2. Gelah bersih kita, kebiasan kai si la banci silakoken?
Pustaka si Badia ngiahken kita gelah “sibersihken dirita arah kai pe si banci erban dagingta ras perukurenta najis.” (2 Korinti 7:1) Maksudna, arus sihindari kai pe si banci erban dagingta ras perukurenta lanai bersih. Siusahaken nulak perukuren si salah gelah perukurenta erban meriah ukur Jahwe. (Masmur 104:34) Siusahaken ka gelah rananta pe bersih.—Baca Kolose 3:8.
Kai ka si perlu sihindari gelah dagingta, perukurenta, ras perbahanenta banci tetap bersih? La silakoken kebiasan kai pe si banci ncedai dagingta. Contohna, ngisap ntah pe nontil mbako bage pe make narkoba. Alu bage reh sehatna kita janah siergai kegeluhen si ibereken Dibata. Siusahaken ka gelah bersih perukurenta ras perbahanenta alu la ngelakoken masturbasi a ras ngenen pornografi. (Masmur 119:37; Epesus 5:5) Banci saja mesera siakap mpengadi kebiasan e, tapi pasti sampati Jahwe kita.—Baca Jesaya 41:13.
PELAJARI TERBAGESEN
Sibahas kari engkai maka banci simuliaken Jahwe adi bersih kita. Janah sibahas ka uga carana mpengadi kebiasan si la mehuli si erban kita la bersih.
3. Jahwe imuliaken adi bersih dagingta, barang-barangta, bage pe lingkungenta
Sanga sibaca undang-undang Jahwe man bangsa Israel, siteh maka ate Jahwe bersih min umatNa. Bacalah Keluaren 19:10 ras 30:17-19, kenca si e bahas penungkunen enda:
-
Menurut ayat e, uga nge perukuren Jahwe kerna kebersihen dagingta bage pe barang-barangta?
-
Kai si perlu teratur lakokenndu gelah banci tetap bersih?
Gelah banci tetap bersih memang perlu waktu ras upaya. Tapi, la soal i ja kita tading ras uga keadan ekonomita, banci kita tetap bersih. Putar VIDEO, kenca si e bahas penungkunen enda:
-
Engkai maka kalak si jumpa ras kita bas erberita banci lebih ngergai Jahwe adi idahna barang-barangta rapi ras bersih?
4. Pengadilah kebiasan si la mehuli
Pasti sampati Jahwe kita nadingken kebiasan si la mehuli
Adi ngisap kam ntah pe make narkoba, pasti tehndu maka mesera kel nadingken kebiasan e. Kai si banci nampati kam? Ukurilah kai pengaruh kebiasan e man bandu. Bacalah Matius 22:37-39, kenca si e bahas kai pengaruh penyalahgunan mbako ras narkoba . . .
-
ku hubungen sekalak jelma ras Jahwe.
-
ku hubungen sekalak jelma ras keluargana bage pe ras kalak si lit i sekitarna.
Banlah rencana mpengadi kebiasan si la mehuli. b Putar VIDEO.
Bacalah Pilipi 4:13, kenca si e bahas penungkunen enda:
-
Engkai maka banci kam ngasup mpengadi kebiasan si la mehuli, adi teratur kam ertoto, erlajar Pustaka si Badia, ras reh ku perpulungen?
5. Erjuanglah ngelawan perukuren ras perbahanen si la bersih
Bacalah Kolose 3:5, kenca si e bahas penungkunen enda:
-
Janari siteh maka pornografi, sexting, c ras masturbasi ciga ate Jahwe?
-
Adi menurutndu, banci nge bersih perukurenta ras perbahanenta bagi si arapken Jahwe? Engkai?
Perdiatekenlah uga carana ngelawan perukuren si la bersih. Putar VIDEO.
Iceritaken Jesus sada perumpaman guna ncidahken maka arus siusahaken kel gelah perukuren ras perbahanenta tetap bersih. Bacalah Matius 5:29, 30, kenca si e bahas penungkunen enda:
-
Labo maksud Jesus silukai dagingta, tapi maksudna lit si perlu silakoken. Kai si perlu silakoken gelah banci bersih perukurenta? d
Adi sangana kam erjuang ngatasi perukuren si la bersih, ergai Jahwe kel perjuangenndu e. Bacalah Masmur 103:13, 14, kenca si e bahas penungkunen enda:
-
Adi sempat ulihindu ka ngelakoken kebiasan si la mehuli, uga ayat enda nampati kam gelah terus erjuang?
Ula kam nyerah!
Sanga mulihi lakokenndu kebiasan si la mehuli, banci saja nyerah atendu. Tapi cuba ukuri enda: Adi sekalak pelari ndabuh sanga ia lomba lari, enda labo ertina ia enggo talu. Janah labo perlu mulihi ka ia kiam arah awal nari. Bage ka pe, adi mulihi ka lakokenndu kebiasan si salah, e labo ertina kam enggo talu ngelawan kebiasan si salah e. Labo sia-sia kerina perjuangenndu sedekah enda. Kalak si pengadina atena kebiasan si la mehuli, wajar nge adi piga-piga kali mulihi ka lakokenna. Emaka ula kam nyerah! Alu penampat Jahwe pasti nge banci talukenndu kebiasan si la mehuli.
LIT SI NGATAKEN: “Aku enggo candu. Lanai bo terngadiken aku.”
-
Ayat si apai nge si banci gunakenndu nampati ia meteh maka alu penampat Jahwe banci nge pengadina kebiasan si la mehuli e?
KESIMPULEN PELAJAREN ENDA
Meriah siban ukur Jahwe adi sijaga dagingta, perukurenta, ras perbahanenta bersih.
Kai si Enggo Sipelajari?
-
Engkai maka arus kita bersih?
-
Uga carana gelah bersih dagingta, barang-barangta, bage pe lingkungenta?
-
Uga carana gelah perukuren ras perbahanenta bersih?
DARAMI TERBUEN
Kai saja si banci silakoken gelah kita tetap bersih amin pe kita kalak mesera?
Perdiatekenlah kai saja si banci lakokenndu gelah banci ngadi ngisap.
Perdiatekenlah kai pengaruh pornografi.
“Pornografi—Hiburan atau Racun?” (Menara Pengawal 1 Agustus 2013)
Perdiatekenlah uga sekalak dilaki banci mpengadi kebiasanna nonton pornografi.
“Saya Berhasil Setelah Sering Kali Gagal” (Menara Pengawal No. 4 2016)
a Masturbasi eme ngerangsang alat kelamin sendiri seh asa puas napsu seksna.
b Bas bagin Darami Terbuen pelajaren enda, lit artikel “Kiat Berhenti Merokok.” Bas artikel e lit ijelasken kai saja si perlu lakokenndu gelah banci pengadindu kebiasan si la mehuli.
c Sexting maksudna ngirimken pesan, foto, ntah pe video si sipatna cabul arah alat elektronik.
d Guna nampati mpengadi kebiasan masturbasi, nen “Bagaimana Aku Dapat Menaklukkan Kebiasaan Masturbasi?” bas buku Pertanyaan Kaum Muda—Jawaban yang Praktis, Jilid 1, pasal 25.
