Tame ve’ele simesan éyoñ nyia a kômesane mone wé na a ke sikôlô. A wô’ô taté wo’o nye, éyoñe te a jalé nye mimfubane biyé. Nalé a bo na mon a bo mvo’é minsôn, a na bôte bevo’o be yene na bebiaé bé ba nyoñe ngab a nye. Avale te da da, Ésaa wongane Yéhôva, a yi na bi bo mfuban mimfa’a mise: menyul, ôsimesan, nkobô, a mimboone miangan. Éyoñe bi ne mfuban, bia bi abui bibotan, a bia ve Yéhôva duma.

1. Aval avé bi ne bo mfuban mfa’a ya minsôn?

Yéhôva a jô bia na: “Mia [yiane] bo mfuban.” (1 Pierre 1:​16) Nalé a tinane na bia yiane bo mfuban mfa’a ya minsôn a mfa’a ya nsisim. Bi ne bo mfuban mfa’a ya minsôn éyoñe bia wobane mban, a éyoñe bia ba’ale biyé biangan, nda jangan a metua wongane nta’an a mfuban. Bia yiane fe ba’ale Aba Éjôé dangan mfuban. Éyoñe bi ne mfuban mfa’a ya minsôn, bia ve Yéhôva duma.​—2 Becorinthien 6:​3, 4.

2. Asu na bi bo mfuban, bia yiane sa’ale mbia mefulu mevé?

Kalate Zambe a jô bia na bi bo “biabebien mfuban mfa’a ya mvin ése ya minsôn a nsisim.” (2 Becorinthien 7:1) Nalé a tinane na, bia yiane sa’ale mam mese me ne ve nyule jangan nge ke ôsimesane wongan mvit. Mam me ne bia ôsimesane ma yiane ve Yéhôva nlem avak, ajô te bia yiane ve ngule ya titane mbia b’asimesan bese ba kômbô nyiine bia minlem. (Besam 104:34) Bia yiane fe sa’ale ébole nkobô.​—Lañe’e Becolossien 3:8.

Jé éfe é ne bo na bi bo mvit mfa’a ya minsôn nge ke mfa’a ya nsisim? Biôm biziñe bia di nge ke nyu bi ne ve menyule mangan mvit. Ajô te, bia yiane sa’ale biôm ane sika, ta’a, banga, nge ke biôm bivo’o bia funane bili. Éyoñe bia bo nalé bia sa’ale abui akon, a bia liti na bia nyan ényiñe Zambe a nga ve bia. Bia ba’ale fe biabebiene mfuban mfa’a ya nsisim éyoñe bia wosane mbia mimboon ane fulu ya mieneke soé a e yene mvine mame ya bisôk bingengeñ. (Besam 119:37; Beéphésien 5:5) E ne bo ayaé na bi jô’é mbia mefulu mete, ve Yéhôva a ne volô bia na bi bo de.​—Lañe’e Ésaïe 41:13.

 TUKA’A FAK

3. Bia ve Yéhôva duma éyoñe bia ba’ale nyule jangan a biôm biangan mfuban

Éyoñe bia yene metiñe Yéhôva a nga ve ayoñ Israël, bia yen abim avé e mbe mfi na ayoñe dé e bo mfuban. Lañe’e Nkôlan 19:10 a 30:17-19, mvuse ya valé, yala’ane minsili mi:

• Bifuse bite bia liti na Yéhôva a yene mfubane ya minsôn aya?

• Mbamba mefulu mevé me ne volô bia na bi ba’ale menyule mangan mfuban?

Asu na bi ba’ale menyule mangan mfuban, da sili abui éyoñ a abui ngul. Ve bi ne bo mfuban vôm ase bia nyiñ, to’o bi bili ki abui biôm bi mo. Futi’i VIDÉO, mvuse ya valé, yala’ane nsili wo tôé valé.

• Amu jé bôte bia kañete bé tu’a semé Yéhôva éyoñ bé yene na biôme biangan bi ne mfuban?

4. Wosa’ane mbia mefulu

Nge ô bili fulu ya nyu sika nge ke banga, wo yiane yem abim avé e ne ayaé na môt a wosane mbia fulu ate. Jé é ne volô wo? Simesa’an abim avé mbia fulu ate a ne ndamane nyule jôé. Lañe’e Matthieu 22:​37-​39, mvuse ya valé, yene’ aval avé sika, ta’a, a banga bi ne  . . .

• ndaman élat jôé a Yéhôva.

• ndeñele bôte ya nda bôte jôé a bôte ba bômane wo.

Yene’e mam ô ne bo asu na ô wosane mbia fulu éziñ. a Futi’i VIDÉO.

Lañe’e Bephilippien 4:​13, mvuse ya valé, yala’ane nsili wu:

• Aval avé mban meye’elan, ayé’é Kalate Zambe, a ntabane bisulan, bi ne volô môte na a wosane mbia fulu éziñ?

 5. Wosa’ane mbia b’asimesan a mbia mimboon

Lañe’e Becolossien 3:​5, mvuse ya valé, yala’ane minsili mi:

• Aval avé bia yeme na bingengeñe bia liti mvine mame ya bisôk, fulu ya mieneke soé, a bekalate bôte be wô’ô lôme nkol asu na be kobô ajô mvine mame ya bisôk, bi ne abé mise me Yéhôva?

• Ye wo simesane na e ne mvo’é na Yéhôva nnye a kate bia mam me ne abé nge ke mvo’é? Amu jé?

Yene’ aval avé ô ne wosane mbia b’asimesan. Futi’i VIDÉO.

Yésus a nga belan éve’an éziñ asu na a liti mfi ya bo mam ma sili asu na bi ba’ale biabebien mfuban mfa’a ya nsisim. Lañe’e Matthieu 5:​29, 30, mvuse ya valé, yala’ane nsili wu:

• Yésus a nji be a kômbô’ô jô na bia yiane ju’u biabebien, ve a mbe a jô’ô na bia yiane ve ngul asu na bi wosane mbia mefulu. Aval mam avé ô ne bo asu na ô wosane mbia b’asimesan? b

Nge wo ve ngule na ô wosane mbia b’asimesan, Yéhôva é botane wo. Lañe’e Besam 103:​13, 14, mvuse ya valé, yala’ane nsili wu:

• Nge ô tatéya na wo wosane mbia fulu éziñ, aval avé éfuse ji é ne ve wo ngule ya ke ôsu a bo de?

 ÔBALEBAS

Bia ve Yéhôva nlem avak éyoñ bia ba’ale menyule mangan, asimesane dangan, a mimboone miangan mfuban.

Ô ne yalan aya?

• Amu jé é ne mfi na bi bo mfuban?

• Aval avé ô ne bo mfuban mfa’a ya minsôn?

• Aval avé ô ne ba’ale asimesane dôé a mimboone miôé mfuban?