BAG I 40
Be kuʼni nebe ben nelàn mbwe Yaweh Nsi à ndùke?
Naʼ nkwade taʼ mama nke nabte mén i a nèn ñwaʼni. Aʼ lôde be ze mén i sôg wul i, mbèn ndôde be ze nzwe tse làn nà. Neghù yennà num njwimde mbe mén tswe mebwô mbèn ndaʼde tsemoʼ mbe tàab bo màab num ndôdʼé kuaʼ mebwô. Be ndañndañ, Tà ben ze nkôni, Yaweh Nsi, kô mbe be nke ndàne—num bag mbàb wut, ntùm ngùninu ben, nkwade ben, mba ntùm ntshob ben. Ngelañ bag bin num ndàn nà, bag bin jù bin, mbèn mfà ghamde Yaweh Nsi.
1. Be bag bin làn num bag mbàb wul à ndùke?
Yaweh Nsi tshob ben mbe: “Bin nsi be ben nelàne.” (1 Pétro 1:16) Yennà nke mbagdʼà nelàn num bag mbàb wut mba mba ntùm ngùninu ben, nkwade ben, mba ntshob ben. Be nke nsôg wut ben njoñ léʼ fa, nke nsôg nzwe ben, ndà ben, mba zebe yañbaʼ, mba bag bin kuʼni nelàn num bag mbàb wut. Bag bin bèn nkuʼni neywimde nesôg ndà ntseʼde. Be nke ndàn num bag mbàb wut, mba bag bin aʼ fà ghamde Yaweh Nsi.—2 Korintô 6:3, 4.
2. Nebe ben nelàne, tsit mat a bètte be ghuaʼ à?
Ñwaʼni Nsi tshwèt mbètte ben mbe “bag bin lànde njoñ ñuʼ mbàb wut fa mba njoñ ñuʼ ntù fa num be.” (2 Korintô 7:1) Ndùlà, a bètte be ghuaʼ njoñ tshu fa tse bʼa sagde wut ben mba nkwade ben nà. A bètte nkwade ben tsiañde ntù Yaweh Nsi. Ndùlà, bag bin kagtùn neghuaʼ njoñ nkwade kebwô fa. (Yobkwi 104:34) Bag bin bèn nkagtùn neghù ntshob tsʼa làn nà.—Siañ Kolosé 3:8.
Ke ze bʼa bèn nsagde ben num bag mbàb wut, mbèn nsagde nkwade ben à? Be kuʼni neloʼ tsemoʼ tshu, a bagde wut ben. Ndùlala, bag bin num nguaʼ ba mat mba nenu sika, ndebaʼ, ke ndebaʼ kàn no, mbèn nguaʼ fu tse ngomnaʼ tshùʼ là. Be ghuaʼ tshen mat là, mba bag bin aʼ tswe mebwô, mbèn ndaʼde mbe be kuʼni yôg zʼa be taʼ ndaʼ là. A bèn mbètte be kagtùn neghù ba nkwade tsʼa làn nà, nguaʼ mat kebwô bo num ntsiañ mbe “masturbation” * là, mbèn nguaʼ mat nelôde tshunu ghàne. (Yobkwi 119:37; Efésô 5:5) Bʼa ta neghuaʼ tshen mat kebwô là, ndaʼndù Yaweh Nsi kuʼni neywimde ben.—Siañ Esaya 41:13.
TSWEʼ NTUN MI
Yen mba nelàn num bag mbàb wut num mfà ghamde Yaweh Nsi, mbèn njen mbʼo kuʼni neghuaʼ ba mat kebwô là.
3. Nelàn num bag mbàb wut num mfà ghamde Yaweh Nsi
Be siañ ntshùʼ tse Yaweh Nsi naʼ mfà bon Israél là, mba bag bin aʼ yen ju zʼa ghù a be ju ndùb Yaweh Nsi mbe ghafaʼ tse be nelàn nà. Siañ Netume 19:10 bo 30:17-19, mbèn mbùnde tshen mbètte li:
-
Mba tshen nka Ñwaʼni Nsi li tshwèt ndaʼde là, nkwade Yaweh Nsi mfà num nelàn num bag mbàb wut bʼa zile?
-
Ke ze bʼo ghù njoñ ngelañ fa nelàn num bag mbàb wul à?
Netswe nelàn num bag mbàb wut num mbètte nkagtùn mbèn nke ndoʼ ngelañ yàme. Ndaʼndù bag bin kuʼni nelàn num bag mbàb wut mba yà lo ze bag bin be là, kà be be ghankàb ke mbwoñ no. Lôde LAʼDE NETSHAÑ, mbèn mbùnde yen bètte li.
-
Neléʼ ba tshu tse be num nèn nàfaʼ yi là nelàn num nkuʼni zebe faʼ nesoñ nkùn mebwô à ndùke?
4. Ghuaʼ ba mat kebwô
Yaweh Nsi kuʼni neywimde ben neghuaʼ mba zit mat kebwô lo
A be zʼo ghù mat nenu sika là, mba bʼo lèn mbʼa ta neghuaʼ yen mat là là. Ke ze bʼa ywimdʼo à? Yen ju ze yen mat kebwô là num ngù num o là. Siañ Matio 22:37-39, mbèn mbùnde tshen mbètte li. Ne nke nu sika ke ndebaʼ kàn no . . .
-
num nkwag ze kushun taʼ mènntùn bo Yaweh Nsi à ndùke?
-
num nkwag tunndà taʼ mènntùn, mba benntùn a be njôg yub lʼà ndùke?
Nabte taʼ nkazin zʼa ywimdʼo neghuaʼ mat kebwô là. * Lôde LAʼDE NETSHAÑ.
Siañ Filipi 4:13, mbèn mbùnde yen bètte li:
-
Ne nke ngù leʼde njoñ ngelañ fa, nke nsiañ Ñwaʼni Nsi, mbèn nke nèn ntseʼde kuʼni neywimde mènntùn neghuaʼ taʼ mat kebwô à ndùke?
5. Ghuaʼ nkwade bo ngùninu kebwô
Siañ Kolosé 3:5, mbèn mbùnde tshen mbètte li:
-
Be lèn à ndùke mbe nelôde tshunu ghàne, netshag ba “sextos” * mba “masturbation” bʼa ba mat tsʼa keʼ làn miag Yaweh Nsi à?
-
O kwade mbe Yaweh Nsi ghù nebéb mbe bag bin làn ntùm nkwade, ntshob mba ngùninu ben ké? Numke?
Yen mbʼo kuʼni neghuaʼ nkwade kebwô là. Lôde LAʼDE NETSHAÑ.
Yésu naʼ loʼ taʼ mfiʼ nelaʼde mbʼa bètte be loʼ mfiʼ neghù njoñ tshu fa tsʼa bètte là netswe nelàn ntùm nkwade, ntshob, mba ngùninu ben. Siañ Matio 5:29, 30, mbèn mbùnde yen bètte li:
-
Yésu naʼ ke nke ntshob à mbe kuaʼ nenùn be keb taʼ bag wut ben, là, a naʼ nke ndaʼdʼà mbe a bètte be ghù taʼ ju. Ke lèn mfiʼ mènntùn kuʼni neloʼ neghuaʼ nkwade kebwô à? *
A be zʼo tshwèt nzwe bo nkwade kebwô là, mba Yaweh Nsi tshwèt nyàmde tsho nkagtùn. Siañ Yobkwi 103:13, 14, mbèn mbùnde yen bètte li:
-
A be zʼo tshwèt nzwe bo taʼ mat kebwô là, mba be yen nka Ñwaʼni Nsi li ywimdʼo nenèn mbwe ke bot mbu à ndùke?
A be be ndù a keʼ fiag, nèn mbwe ke bot mbu!
Bʼa fiag nekwade mbe ‘Me yà kagtùn yàme, yàm kuʼ ndùlà.ʼ Ndaʼndù naʼ nsiañde: Taʼ ngakù nde be kù, ngwù nsi, mbʼa keʼ bʼa mbʼa bi nde, ke ne mbʼa mbʼaʼ bèn nèn ntoʼdʼà netoʼde. Be ndañndañ, nebèn ngwù ntùm taʼ mat kebwô keʼ bʼa mbe o keʼ kuʼni neghuaʼ yen mat kebwô là, ke bèn mbʼa mbe njoñ nkagtùn fa tsʼo yà ghù là bʼa bànbàn. Bʼo bèn ngwù. Be bo ke ghuaʼ taʼ mat kebwô à yoñ ntshùʼ. Kà bot mbu; bo ywimde Yaweh Nsi, o kuʼni neghuaʼ mat kebwô zʼo ghù là.
TSEMOʼ BENNTÙN NUM NTSHOB MBE: “A yà mit num àm, be me ke bèn ntsine.”
-
Zit nka Ñwaʼni Nsi o kuʼni neloʼ num nelaʼde yen mènntùn ni mbe Yaweh Nsi kuʼni neywimdʼé neghuaʼ ze mat kebwô à?
JU NETSHÙBE
Ngelañ bag bin num ndàn num wut ben, ntùm nkwade ben, mba mba ntùm ngùninu ben nà, be num ntsiañde ntù Yaweh Nsi.
Mbètte nekwimde
-
Numke a mbe ju ndùb nelàn à?
-
Bʼo làn num wul o à ndùke?
-
Bʼo làn ntùm nkwade mu, mba ntùm ngùninu mu à ndùke?
DIAGE
Ke ze bʼo ghù nelàn num bag mbàb wut a be be ndù o keʼ ghù nkàb yàm à?
Lôde ba tshu tse bʼo ghù kà ntsin nenu sika là.
Yen tshu kebwô ze nelôde tshunu ghàne kuʼni neloʼ nseʼ yi num o là.
“La pornographie: inoffensive ou dangereuse? (La Tour de garde, 1er août 2013)
Yen mba taʼ mandum tum nkuan nelôde tshunu ghàn nà.
“Jʼai échoué bien des fois avant de réussir” (La Tour de garde no 4 2016)
^ Lag ntshob “masturbation” nke mbagdʼà ne nke nyiañde nzewul o yu tu num nejuʼ tsiañde mbàb wut.
^ Ñwaʼni “Comment arrêter de fumer?” zʼa be ntùm bag Diage yen bag i li là aʼ fà ba ntag tsʼa ywimdʼo neghuaʼ mat nenu sika là.
^ Lag ntshob “sexto” nke mbagdʼà netshag ba tshu num tôkàb tse bʼa bùʼde nzi nekat ntù mèn nà.
^ Neyen ju ze bʼa ywimdʼo neghuaʼ “masturbation” là, siañ “Comment arrêter de me masturber?” ntùm ñwaʼni Les jeunes sʼinterrogent—Réponses pratiques, Volume 1, chapitre 25.
