Imagina con el un nana quien ta prepara con el de suyu anak para na escuela. Ta asigura le que ya baña este y limpio el camisa de este. Por causa con ese, tiene buen salud el bata y ta dale se mira con otro que ta cuida gayot con ele el de suyu mayores. Na igual manera, el diaton amable Tata, si Jehova, quierre que limpio kita​​—na fisical y na moral. Si limpio kita, kita mismo ta puede beneficia y ta puede kita dale honor con Jehova.

1. Paquemodo kita puede queda limpio na fisical?

Si Jehova ta habla kanaton: “Debe ustedes queda sagrao.” (1 Pedro 1:​16) Para queda sagrao, necesita kita queda limpio na moral y fisical. Puede kita queda limpio na fisical si regular kita baña, usa maga limpio ropa y limpia con el diaton casa y vehiculo. Puede tambien kita ayuda limpia con el Kingdom Hall. Si ta esta kita limpio na fisical, ta dale kita honor con Jehova.​​—2 Corinto 6:​3, 4.

2. Para queda limpio, cosa kita debe evita?

El Biblia ta anima kanaton que “limpia kita todo mancha na diaton cuerpo o espiritu.” (2 Corinto 7:1) Poreso, ta pricura kita evita con el maskin cosa que puede hace mabuling con el diaton cuerpo o pensamiento. El diaton pensamiento debe uyun na cosa quierre si Jehova, poreso ta hace kita el todo para evita pensa mabuling cosas. (Salmo 104:34) Ta pricura tambien kita queda limpio na diaton converzada.​​—Le con el Colosa 3:8.

Cosa pa puede hace mabuling kanaton na fisical o moral? Tiene cuanto cosas que puede hace mabuling con el diaton cuerpo. Poreso, gendeh kita ta usa tabaco, tan mamah o ta usa maga droga prohibido. Cay ta evita kita con este, tiene kita mas buen salud y ta dale kita mira que ta respeta kita con el regalo de vida. Ta pricura tambien kita esta limpio na moral​—gendeh kita ta practica masturbacion o ta mira pornografia. (Salmo 119:37; Efeso 5:5) Posible, dificil para na un persona que quita con este maga vicio, pero puede kanaton ayuda si Jehova.​​—Le con el Isaias 41:13.

 APRENDE PA MAS

3. El fisical limpieza ta dale honor con Jehova

Puede kita sabe el mirada de Jehova acerca na limpieza si examina kita con el de suyu maga mandamiento na maga Israelita de antes. Le con el Exodo 19:10 y 30:​17-​19, y despues, discuti con este maga pregunta:

• Cosa este maga texto ta revela acerca na mirada de Jehova na fisical limpieza?

• Cosa tu puede regular hace para esta limpio na fisical?

Necesita tiempo y esfuerzo para esta limpio na fisical. Pero, puede siempre kita se hace maskin onde man kita ta queda o maskin cosa man el diaton estado na vida. Man play con el VIDEO y despues, discuti con el pregunta.

• Porque el maga gente hay mas respeta con Jehova si mira sila que limpio el diaton maga gamit na predicacion?

4. Quita con el maga mal vicio

Si ta puma tu o ta usa droga prohibido, sabe tu si paquemodo se de dificil quita. Cosa puede ayuda contigo? Considera si cosa el efecto de ese vicio contigo. Le con el Mateo 22:​37-​39 y despues, discuti si paquemodo el usada de tabaco o droga prohibido ta afecta con el . . .

• relacion del un persona con Jehova.

• familia del un persona y con otro alrededor con ele.

Hace un plano para puede quita con el un mal vicio. a Man play con el VIDEO.

Le con el Filipo 4:​13, NWT y despues, discuti con este pregunta:

• Paquemodo el regular rezo, estudiada de Biblia y atendida na maga miting puede ayuda con el un persona para quita con el de suyu mal vicio?

 5. Resisti con el maga mabuling practica y pensamiento

Le con el Colosa 3:5 y despues, discuti con este maga pregunta:

• Paquemodo kita ya sabe que para con Jehova mabuling el pornografia, sexting y masturbacion?

• Ta mira tu, justo lang ba que pidi kanaton si Jehova que queda limpio na moral? Porque?

Sabe si paquemodo resisti con el maga mabuling pensamiento. Man play con el VIDEO.

Si Jesus ya usa un ilustracion para dale mira que debe kita queda determinao para hace el cosa necesita para esta limpio na moral. Le con el Mateo 5:​29, 30, NWT y despues, discuti con este pregunta:

• Nuay habla si Jesus que debe kita hace sinti duele con el diaton fisical cuerpo, sino este quierre decir que necesita kita hace accion. Cosa puede hace el un persona para evita maga mabuling cosas na de suyu pensamiento? b

Si ta pricura tu quita con el maga mabuling cosas na de tuyu pensamiento, ta aprecia si Jehova con el de tuyu maga esfuerzo. Le con el Salmo 103:​13, 14 y despues, discuti con este pregunta:

• Si tan dificil tu quita con el un mabuling practica, paquemodo este texto puede ayuda contigo para continua hace esfuerzo?

 SUMARIO

Ta puede kita hace alegre con Jehova si limpio el diaton fisical cuerpo, pensamiento y conducta.

Repaso

• Porque bien importante que queda limpio?

• Paquemodo tu puede queda limpio na fisical?

• Paquemodo tu puede queda limpio na de tuyu pensamiento y conducta?