Anchangei án emén inelap ammólnatá néún we kúkkún át ngeni sukul. A cheki ika a tútú me ika pisekin kewe ra torotoréch me limeliméch. Án ena inelap féri ena a túmúnú an esap semmwen me a pwári ngeni ekkewe ekkóch pwe seman kewe me inan ra túmúnúéchú. A pwal ina usun Semach we mi tong, Jiowa, a mochen ach sipwe limeliméch lón pekin inis, kapachelong ach ekiek, fós, me féffér. Atun sia limeliméch, sipwe pwisin kúna feiéch seni me elingaaló Jiowa.

1. Ifa usun sipwe limeliméch lón pekin inis?

Jiowa a erenikich: “Oupwe pin.” (1 Petrus 1:16) Ren ach sipwe emén aramas mi pin, a lamot ach sipwe limeliméch lón pekin inis me lón ach féffér. Sia tongeni limeliméch ika sia kan tútú iteitan, sopuni pisekich, me atotora me limetiéchú imwach kewe me waach kewe. Sia pwal tongeni álillis le elimelim lón ach we Leenien Mwich. Ika sia kan achocho le liméch lón pekin inis iteitan, sia elingaaló Jiowa.​—2 Korint 6:3, 4.

2. Met sókkun féffér sipwe ttiisenikich pwe sipwe emén aramas mi liméch?

Ewe Paipel a pesekich ach sipwe “limetikich seni sokun limengauen inis me ngün.” (2 Korint 7:1) Ina popun, sia achocho le ttiisenikich ese lifilifil met epwe elimengawa inisich me ekiekich. A lamot ekiekich epwe apwapwaai Jiowa, ina popun sia achocho úkúkún ach tufich le ttiisenikich ekiek mi limengaw. (Kölfel 104:34) Sia pwal achocho le eáni kapas mi liméch.​—Álleani Kolose 3:8.

Met a pwal tongeni elimengawa inisich, ekiekich, me féfférúch? A wor ekkóch mettóch ra tongeni efeiengawa inisich. Ina popun sia ttiisenikich ekkena mettóch, áwewe chék ren suupwa, ngúng puu, áeángawa ekkewe sáfei sia angei me pioing, me drugs. Atun sia túmúnúkich seni ekkena mettóch, epwe péchékkúl inisich me sia pwári pwe sia aúcheani manawach, liffangach we. Sipwe pwal achocho ach sipwe limeliméch lón ach féffér ren ach sisap féri ekkewe sókkun féffér mi limengaw, áwewe chék ren pwisin urumwotei pisekin fán maas me katol sasingin me kachitoon kapasingaw. (Kölfel 119:37; Efisos 5:5) A tongeni weires ach sipwe úkú seni ekkena mettóch, nge Jiowa a tongeni álisikich.​—Álleani Aisea 41:13.

 KÚTTAFICHI

3. Ach liméch lón pekin inis a elingaaló Jiowa

Atun sia álleani usun án Jiowa kewe allúk ngeni chón ewe mwúún Israel, sia káé pwe a mmen aúchea me ren án néún kewe aramas repwe liméch. Álleani Ekistos 19:10 me 30:17-19, me mwirin pwóróusfengen wóón ekkeei kapas eis:

• Me ren ekkena wokisin, met meefien Jiowa usun limeliméch?

• Met ka tongeni féri iteitan pwe kopwe chék lilliméch?

A lamot fansoun me angang weires ren ach sipwe limeliméch. Nge sia tongeni liméch ese lifilifil ia sia nóm ie me ese lifilifil nónnómuch. Fichi ei VIDEO, mwirin pwóróusfengen wóón ei kapas eis.

• Pwata epwe lapóló án chókkewe sia afalafaler súféliti Jiowa atun ra kúna pwe a torotoréch me limeliméch pisekich?

4. Úkú seni féffér mi ngaw

Ika ka kan ún suupwa are angei drugs, eli ka silei úkúkún weiresin án emén epwe úkú seni ekkena mettóch. Met a tongeni álisuk? Ppii ifa usun ekkena mettóch ra eingawaló manawom. Álleani Mateus 22:37-39, me mwirin pwóróusfengen wóón ifa usun suupwa are drugs a tongeni . . .

• atai án emén riri ngeni Jiowa.

• aosukosuka chón an famili are chókkewe a chiechi ngeniir.

Akkóta ifa usun kopwe úkú seni eú mettóch mi ngaw. a Fichi ei VIDEO.

Álleani 1 Korint 10:13, me mwirin pwóróusfengen wóón ei kapas eis:

• Ifa usun án emén ikkiótek, ákkállea Paipel, me fiffiti mwich a tongeni álisi le úkú seni eú féffér mi limengaw?

 5. Úkkú ngeni ekiek me féffér mi limengaw

Álleani Kolose 3:5, me mwirin pwóróusfengen wóón ekkeei kapas eis:

• Pwata sia silei pwe a mmen limengaw me ren Jiowa án emén katol sasingin me kachitoon kapasingaw, pwisin urumwotei fán mesan, me titiiló sasingin me kachitoon kapasingaw wóón cell phone?

• Met meefiom, mi fich án Jiowa menei senikich ach sipwe limeliméch lón féfférúch mi ekiekich? Pwata?

Katol ifa usun sia tongeni fiu ngeni ekiek mi limengaw. Fichi ei VIDEO.

Jesus a eáni eú kapas áwewe mi pwári aúchean ach féri met mi lamot pwe sipwe akkamwéchú liméchúch. Álleani Mateus 5:29, 30, me mwirin pwóróusfengen wóón ei kapas eis:

• Án Jesus na kapasen pesepes ese wewe ngeni ach sipwe efeiengawa pwisinkich, nge a wewe ngeni ach sipwe féri met mi lamot pwe sipwe akkamwéchú liméchúch. Met a lamot emén epwe mwittir féri pwe epwe túmúnú seni ekiek mi limengaw? b

Jiowa a aúcheani óm achocho lón óm fiffiu ngeni ekiek mi limengaw. Álleani Kölfel 103:13, 14, me mwirin pwóróusfengen wóón ei kapas eis:

• Ika ka fiffiu ngeni óm mochen féri féffér mi limengaw, ifa usun ena wokisin epwe apéchékkúlok le sópweló óm fiffiu ngeni?

 MENLAPAN

Sia apwapwaai Jiowa atun sia achocho le limeliméch lón féfférúch, ekiekich, me inisich.

Enniwili

• Pwata a lamot ach sipwe limeliméch?

• Met ka tongeni féri pwe kopwe emén mi limeliméch?

• Met ka tongeni féri pwe kopwe limeliméch lón óm ekiek me féfférum?